JOSE ayüy ñi kimal ñi mari wünen peñi, petu ñi illamfalken ka petu weda piwkengen engün. Feymu lle feypi: ‘Ellkangüneduamapufe ngeymün. Küpaymün tamün inaduamal chew ñi newen-ngenon taiñ mapu.’

‘No, femngelayiñ iñchiñ,’ pirkeyngün. ‘Iñchiñ küme ngünewün wentru ngeiñ. Kom peñiwen ngeiñ. Mari epu ngefuyiñ. Welu kiñe peñi mülewelay, ka doy wechengelu müley ruka mew taiñ chaw engu.’

Jose femfaluwi ñi feyentunofiel engün. Kiñe peñi karseltükufi, Simeon pingelu, ka kakelu eluñmafi ñi yeal iyael (yagel) ka amutuy ñi ruka mew engün. Welu feypifi: ‘Ka wiño küpalmün, küpalelmuan tamün doy weche peñi kiñewün eymün.’

Puwtulu ñi ruka mew Kanaan mu, tüfachi peñiwen feypifi tañi chaw Jakob kom ñi rupan engün. Jakob müna weñangküy. Wirari: ‘Jose ngelay, ka fewla Simeon ka ngelay. Elulayafiñ tamün yeafiel tañi weche fotüm, Benjamin.’ Welu, afküley tachi iyael, Jakob müley ñi eluwal ñi yengeal Benjamin Egipto mapu mew, femngechi mu ka yelmengeal doy iyael.

Fewla Jose pey ñi küpalen ñi pu peñi. Rume ayüwi pefilu tañi weche peñi, Benjamin. Fey may, iney no rume kimlay engün tüfachi falin wentru, ngen Jose. Fewla Jose femi kiñe dungu ñi kintukaduamafiel ñi kiñe chaw mari peñi.

Kidu werküfi ñi pu kona apolelfi ñi saku engün iyael mew. Kafey werkufi ñi pu kona tukulelfi ñi sakin plata kopa Benjamin ñi saku mew, welu eluwlay ñi kimal engün. Fey wüla kom amutulu engün pichi alüka mapu Jose werküy tañi kona ñi inayafiel engün. Ditupufilu engün, feytichi pu kona feypifi: ‘¿Chumngelu (chemu) weñeñmafimün tañi plata kopa taiñ ngen-ngelu?’

‘Iñchiñ weñelafiyiñ tati kopa’, feypi engün kom pu peñi. ‘Perumelmün kiñeke iñchiñ mew nielu, langümafimün.’

Feymu, feytichi pu kona kintuy kom pu saku mew, ka Benjamin ñi saku mew pengey feytichi kopa, ka femngechi pefimi faw. Feypi tüfachi pu kona: ‘Kakelu amutuay, welu Benjamin müley taiñ kompañaetew.’ ¿Chumay am chi fewla chi mari peñi?

Kom wiñoy Benjamin engün Jose ñi ruka mew. Jose feypifi ñi pu peñi: ‘Kom amutuaymün tamün ruka mew, welu Benjamin mülekayay faw, iñche ñi ngillan kona ngetuay.’

Fewla Juda dunguy, ka feypi: ‘Iñche wiño amutuli yenofili tüfachi weche wentru, tañi chaw layafuy, rume piwkeyefilu am. Feymu, füreneafen, elkünuen iñche ngillan konayean, welu elfinge ñi amutual tüfachi weche wentru.’

Jose pey ñi kimkonürken ñi pu peñi. Illamfalken ka weda piwke niewelayngün. Fewla, peafiyiñ chem ñi femal Jose.