NAKÜMNGELU Egipto, Jose niey mari regle tripantu müten. Tüye mew, fendengey kiñe wentru Potifar pingelu. Potifar küdawelkefi ti Longkolelu Egipto mu, Faraon pingelu.

Jose rume küdawelkefi ta ngen küdaw Potifar. Feymu lle, doy tremlu Jose, Potifar elfalkünuleyew kom ñi ruka. Fey mew, ¿chumngelu am kay mülerkey Jose ti karsel mu? Potifar ñi domo ñi duam mu.

Tremlu Jose müna küme ad wentru ngerkey, ka Potifar ñi domo ayüfuy ñi kudumngeal kidu. Welu Jose kimi feychi dungu ñi wedalkalen, feymu pilay ñi femal. Potifar ñi domo rume illkuy (lladküy). Feymu lle, küpalu ñi füta, koylatulfi ka feypifi: ‘¡Feychi weda wentru Jose ayüfuy ñi kudumuaetew!’, pi. Potifar feyentufi ñi domo, ka rume illkutufi (lladkütufi) Jose, feymu tukufalfi karsel mew.

Elfalkülelu ti karsel, pürüm (pür) pefi Jose tañi küme wentru ngen. Feymu lle, elfalkünufi kom chi pu presulelu. Fey mew wüla, Faraon rume illkutufi ñi nüfül kopakelu ka ñi kofkekelu, ka tukufi engu karsel mu. Kiñe pun, kiduke tüfachi epu wentru pewmakey kiñe pekan pewma no, welu kimlayngu chem pifel ñi pewma. Umañ mu Jose feypifi engu: ‘Feypimuchi tamu pewma.’ Feymew Chaw Ngünechen ñi kellun mu, Jose kimeltufi ñi pewma engu.

Jose feypifi ti nüfül kopakelu: ‘Küla antü mu tripayaymi karsel mew, ka wiño nüfül kopaniefetuaymi Faraon mew.’ Feymu Jose ka feypifi: ‘Tripalmi, dunguñpean Faraon mew, ka kelluaen ñi tripayal faw.’ Welu ti kofkekelu, Jose feypieyew: ‘Küla antü müten, Faraon katrünentuñmanieaymi tami longko.’

Küla antü mew, wechutripay chumngechi Jose ñi pietew. Faraon katrunentuñmafi ñi longko ti kofkekelu. Welu ti nüfül kopakelu nentungey karsel mew, ka wiño küdawtuy ti Longkolelu mew. ¡Welu ngoymafi, dunguñpelafi Jose! Nütramkalafi Faraon chem dungu no rume, feymu Jose mülekay karsel mew müten.