¡ADKINTUFINGE chem rupaley! Fey Moyse tati, maychikünulfi ñi retrü Kelü Lafken mew. Feychi pu che montulelu Moyse engün nome lafken mülelu, fey ta Israel che. Welu Faraon ka tañi pu weychafe (awkafe) petu ürfingün. Peafiyiñ chumngechi rupay tüfa.

Chumngechi dew kimiyiñ, rupalu ti mari fütra weda dungu Faraon feypifi pu Israel che: ‘Tripamün Egipto mu.’ Kiñeke 600.000 Israel wentru tripay, ka fentren pu domo ka pichike che. Kafey, fentren ka tuwün che feyentulu Jewba mu, tripay tati pu Israel che engün. Tripalu Egipto mu, kom yenieyngün ñi pu ufisa, pu kapüra ka kulliñ.

Petu ñi tripanon, pu Israel che ngillatufi pu Egipto che takun, ka kom tüfachi itrofill dewmangelu milla (oro) ka plata. Pu Egipto che llükaletuyngün, rupalu ti afchi weda fütra dungu mew. Fey mu pu Egipto che elufi pu Israel che kom ñi pin engün.

Kiñeke antü wüla, pu Israel che akuyngün Kelü Lafken mew. Üye mew ürkütuyngün. Petu felelu tüfa, Faraon ka tañi pu wentru wiñorakiduamtuy ñi elufiel pu Israel che ñi amutual. ‘¡Elufiyiñ ñi amutual taiñ pu ngillan kona!’, pirkeyngün.

Feymu Faraon ka rakiduamtuy. Pürüm (pür) pepikawi tañi awkan (weychan) kareta ka tañi pu weychafe. Feymu amuy ñi inantükuafiel pu Israel che, ka kayu pataka dullingechi awkan kareta, ka kom kakelu awkan kareta Egipto mu.

Pefilu pu Israel che küpay Faraon ka tañi pu weychafe engün, rume llükaley engün. Nielay chew ñi lefmawal engün. Kiñe püle nieyngün ti Kelü Lafken, kañpüle küpaleyngün pu Egipto che. Welu Jewba elkünuy kiñe tromü rangi ñi pu che ka pu Egipto che mew. Feymu lle pu Egipto che pepi ñi penoafiel pu Israel che ñi lefkontuafiel.

Fewla Jewba feypifi ta Moyse ñi maychikünulafiel tañi retrü Kelü Lafken mew. Femlu tüfa Moyse, Jewba femi kiñe newen puel kürüf pimual. Ti lafken wüdawi, ka trüngkünkünuwi reke epuñpüle.

Feymu pu Israel che koni angken mapu mew ñi rumeal nome lafken. Duamniey alüñmayayngün ñi rumeal engün kom feychi che ka ñi kulliñ engün. Fey wüla pu Egipto che pepi ka puwkintufi, feymu inafi engün konpuy lafken mew.

Femlu tüfa, Ngünechen entuñmafi ñi chingkül (rueda) kareta engün. Pu Egipto che rume llükarkey ka wirari: ‘Jewba ta pu Israel che mew petu kewatueiñmew. ¡Leftripayayiñ faw!’ Welu ngelay ñi chumayal engün.

Fey mu Jewba feypifi Moyse ñi maychikünulafiel tañi retrü Kelü Lafken mew, chumngechi pefimi ti adentun mu. Fey mew feytichi trafruka ko reke llituy ñi wiñotual, ka takual pu Egipto che ka tañi kareta. Itrokom ti weychafe konpuy ti lafken mew. ¡Kiñe no rume Egipto che montulay!

¡Müna ayüwi Ngünechen ñi pu che ñi montulen! Pu wentru ülkantufi Jewba kiñe mañum ül, feypiley: ‘Jewba wewi kiñe afmatufal wewkayñen. Ütrüftükufi pu kawellu engu kawellutulelu lafken mew.’ Moyse ñi lamngen Miriam, entupay ñi pandereta, ka kom pu domo ka entupay kiduke ñi pandereta, ka inaniefi. Kafey purunkey, ka ülkantuy: ‘Jewba wewi kiñe afmatufal wewkayñen. Ütrüftükufi pu kawellu engu kawellutulelu lafken mew.’