¿EYMI kimimi chem wüne dewmay Noe tripalu fütra wampo ruka mew, kidu ka tañi reñma? Kidu elufi Ngünechen kiñe yewün. Adkintufinge chummeken tüfa nagaltu adentun mu. Noe elufi kiñe fütra mañumtun kulliñ, ñi mañumtuafiel Ngünechen ñi montuletew ñi pu reñma, ti Fütra Mangiñ Ko mew.

¿Chem pimi eymi? ¿Ayüwi Jewba ñi elungeel ti yewün? Femi llemay, ayüfi. Feymu lle, feypikünufi Noe: ‘Chumkawnorume wiño apümlayafiñ ti Mapu, kiñe Fütra Mangiñ Ko mew.’

Pichin mu, kom Mapu angküy, Noe ka ñi pu reñma tuwingün kiñe we mongen, wekun ti fütra wampo ruka mew. Ngünechen kümelkafi ka feypifi engün: ‘Müley tamün nieal fentren pu yall (püñeñ), ñi apolal kom tati Mapu che mew.’

Welu ka allkütule pu che ti fütra mangiñ ko, llükayafuychi ñi wiño rupalal ka kiñe Fütra Mangiñ Ko chumngechi rupalu feychi mu. Feymu lle, Ngünechen wüli kiñe dungu tukulpanieal che, Ñi mangelkünuy chumkawnorume ñi mangiñmanoal itrokom Mapu. ¿Eymi kimimi chem elufilu ñi tukulpayal tüfa? Kiñe relmu ngerkey.

Rumel ti relmu pengey wenu mu, wilüflu (lüfolu) chi Antü dew rupachi kiñe mawün. Ti relmu nieafuy ayüngechi kakewme wirin. ¿Dew pekefimi kiñeke mu? ¿Pefimi tüfa mülelu ti adentun mu?

Tüfa ñi feypin Ngünechen: ‘Rüfngey tañi pin, chumkawnorume apümwelayafiñ kom che, ka kulliñ kiñe Fütra Mangiñ Ko mew. Elkünumeken tañi relmu, ti tromü mu. Ka pewfalüwle ti relmu, iñche peafiñ ka tukulpayan tañi rüfngen ñi pin.’

Fey mew, eymi pefilmi kiñe relmu, ¿chem müley tami tukulpayal? May, rüfngen ñi pin Ngünechen, ñi turpu apümkanoafiel ti Mapu kiñe fütra mangiñ ko mew.