¿RÜF FILU kechiley feyti lliwüdkülelu mamüll mew? Fey no tati. Kofre dewmangey. Jewba feypifi ta Moyse ñi witrampüramkünual kiñe mamüll ti pu che ñi peal, ka ñi mongelerpual engün. Welu kakelu filu mülelu mapu mew, fey rüf filu tati. Ünatuyefi pu che ka kutranelfi. ¿Kimimi chumngelu (chemu)?

Pu Israel che weda tukulpafi Chaw Ngünechen ka Moyse. Lladküyngün: ‘¿Chumngelu entumuyiñ Egipto mew taiñ layal tüfachi wellin mapu mew? Tüfa ngelay chem iyael (yagel) rume, ko no rume. Küpa iwelafiyiñ tüfachi mana.’

Welu ti mana feyta küme iyael tati. Jewba elufi engün kiñe afmatun dungu mew. Kafey elufi engün ko kiñe afmatun dungu mew. Welu tati pu che mañumkelay Chaw Ngünechen ñi ngüneytunieetew. Feymu lle Jewba küpali tüfachi pu fenenungechi filu ürke, ñi kastigayafiel pu Israel che. Ti filu ünatuchey, ka feymu fentren che lay.

Fey wüla tati pu che küpayngün Moyse mu, ka feypingün: ‘Yafkaiñ, weda tukulpafilu am iñchiñ Jewba ka eymi mu. Llellipufinge Jewba ñi nentuafiel tüfachi pu filu,’ pirkeyngün.

Feymu Moyse llellipuy fey engün mew. Ka Jewba feypifi ta Moyse: ‘Dewmange kiñe kofre filu. Tukukünuafimi kiñe mamüll mew, ka kom che ünatungelu, müley ñi peafiel ti kofre filu’, pi. Moyse femi chumngechi ñi pietew Ngünechen. Feymu feyti ünatungelu pefi ti kofre filu, ka wiño kümelkatuy engün.

Tüfa kimiyiñ kiñe kimeltun. Ka femngechi kom iñchiñ ünatuniengeyiñ filu mew pu Israel che reke. Kom epeke laleiñ. Fill püle mu tati pu che füchakey, kutrankey ka lakey. Tüfa am fey ti wünen wentru ka ti wünen domo, Adan engu Eva, püntunentuwi Jewba mew, fey engu kom iñchiñ am ñi yall. Welu Jewba elkünuy kiñe rüpü ñi afnoachi mongeleal.

Jewba werküy tañi Fotüm Jesukristo, ti Mapu mew. Jesu pültrukünungey kiñe mamüll mew, fentrenke che am rakiduamkeyngün ñi weda che ngen. Welu Jewba wüli Jesu taiñ montulaetew. Pukintuniefiliyiñ, ka inaniefiliyiñ, nieafuyiñ afnoachi mongen. Welu doy amulerpuay taiñ kimnierpun tüfa mu.