BIBLIA mew peaymi kiñe lifru, Rut pingelu. Tüfachi lifru feypiley kiñe nütram ti epu domo ñi mongen engu, Rut ka Noemi, mongelekefuyngu feychi antü mu Israel nielu pu kues. Rut kiñe üllcha domo ngey, tuwlu Moab mapu mew, fey mew Israel ngelay Ngünechen ñi pu che. Welu kimürpufilu ti rüfngechi Ngünechen, Jewba, müna piwkeyefi. Noemi fey kiñe kuse papay kellukefi Rut ñi kimfiel Jewba.

Noemi Israel che ngey. Kidu ka tañi füta, ka tañi epu wentru püñeñ engün, wiñamtuwingün Moab mapu mew, mülelu filla Israel mapu mew. Fey mew kiñe antü Noemi ñi füta larkey. Fey wüla Noemi ñi pu wentru püñeñ (koñi) kurengeyngu epu Moab domoche, Rut ka Orpa pingeyngu. Welu rupalu wüla epe mari tripantu pemay, Noemi ñi epu püñeñ larkeyngu. ¡Müna weñangküley engün! ¿Chumafuy chi fewla Noemi?

Kiñe antü Noemi rakiduami ñi wiñotual chew mülen ñi pu che, fütra kamapu tüfa. Rut ka Orpa ayüy ñi müleal engün, ka kompañyewi engün kay. Welu miawlu engün wüla kiñe pichiñma mu, Noemi feypifi tati epu üllchadomo: ‘Amutuaymu tamu ruka mew, ka mületuaymu tamu ñuke emu.’

Noemi chaliwüdafi engu kiñe truru (truyun) mew. Fey eluwi ñi ngüman engu, müna piwkeyefilu am Noemi. Feypingu: ‘¡Femlayayu! Amuayu iñchiw eymi tami pu che mew.’ Welu Noemi wiñoldungufi: ‘Püñeñ, müleymu tamu amutual. Tamu pu che mu doy kümelkaleputuaymu.’ Fey mew, Orpa pepikawi ñi wiñotual ñi ruka mew. Welu Rut amutulay.

Noemi adkintuy chew ñi mülen Rut püle, ka feypifi: ‘Orpa dew amutuy. Eymi ka amutunge.’ Welu Rut llowdungufi: ‘¡Feypikeeli tami elafiel ka tañi wichuael ta eymi mew! Eluñmaen, eymi iñchiw tayu amual. Chew amulmi eymi iñche amuan, chew mülelmi, iñche mülean. Eymi tami pu che iñche tañi pu che ngeay, ka tami Ngünechen iñche tañi Ngünechen ngeay. Chew rume lalmi ta eymi, iñche ka feymew layan, ka fey mew ayülen tañi rüngalngeael.’ Feypilu Rut tüfa, Noemi fentekünufi Rut ñi wiñotual.

Fey wüla chi epu domo akuyngu Israel mapu mew. Mülenagpulu engu. Müchay müten Rut amuy ñi küdawal lelfün mu, akuy chi antü ñi üñiftungeal ka suchetungeal kawella. Kiñe wentru Boas pingelu elueyew ñi üñiftual kawella. ¿Eymi kimimi iney ngey Boas ñi ñuke? Raab pingey, Jeriko waria tuwi.

Kiñe antü Boas feypifi ta Rut: ‘Allkütun itrokom dungu tami femel, ka tami rume kümelkakefiel Noemi. Kimnien tati elkünufimi tami chaw, tami ñuke ka tami mapu, küpaymi mi müleam tami kimnofielchi che mew. ¡Feymu may, pewmangen Jewba ta füreneaeymew!’

Rut llowdunguy: ‘Rume küme piwketuen ta iñche, ñidol. Ka tami kümeke dungun tami chempietew, ta rumeñma yafülenew.’ Feymu may Boas rume ayüfi Rut, ka pichiñma mu niewingu. ¡Chumte ayüwelfi tüfa ta Noemi! Welu Noemi doy ayüwküley Rut ka Boas nielu ñi wünen fotüm, Obed pingelu. Fey wüla Obed lakuyefi David, tüfachi wentru doy kimayiñ wüla.