¿EYMI kimfimi iney pingey tati doy newen-ngechi wentru ta mongelekefulu? Kiñe kues ngey, Sanson pingey. Jewba elufi newen ta Sanson. Petu ñi choyün-ngenon, Jewba feypifi ñi ñuke: ‘Pichin (püchün) mu nieaymi kiñe wentru püñeñ. Kidu longkolealu ñi montulafiel pu Israel che filisteo mu.’

Tati pu filisteo wedache ngey engün mülelu Kanaan mapu mew. Fentren awkafe (weychafe) niey, ka wedalmekefi tati pu Israel che. Kiñechi mew, amupulu Sanson chew müley pu filisteo, tripay kiñe fütra trapial (fücha peñi) nawnawi kidu mew. Welu Sanson langümfi chi trapial ñi kuwü mew müten. Ka langümfi patakakechi wedake filisteo.

Fey wüla Sanson ayüfi kiñe domo, Dalila pingelu. Pu longkolelu filisteo mu feypifi Dalila: ‘Kiduke wentru ñi eluafiel kiñe warangka kiñe pataka moneda plata, feypimuliñ chew tuwi Sanson ñi fütra newen.’ Dalila ayüfi kom ti moneda plata. Rüf weniyelafi Sanson, ka Ngünechen ñi pu che. Feymew Dalila amuley ñi ramtukafiel Sanson: ‘¿Chew am tuwi tami fütra newen?’

Af mew, Dalila entudungufi Sanson ñi elkanielchi dungu ta chew tuwi ñi newen. ‘Turpu katrüñmangekelan tañi longko,’ pi. ‘Choyüngelu iñche, Ngünechen dullienew (ngümintuenew) tañi sakin kona ngeal, nasareo pingelu. Katrüñmangeli ñi longko, ñamümafun tañi newen.’

Feley, Dalila allkütulu tüfa, trürümelfi Sanson ñi umawtual ñi luku mew. Feymew mütrümfi kiñe wentru ñi konpayal ñi katrüñmayafiel ñi longko. Nepelu Sanson, ñamümi ñi newen. Pu filisteo konpuy, ka nüngepuy. Nentuñmangey ñi epu nge, ka ñi konayengeal.

Kiñe antü, pu filisteo fütra kawiñ (ayün-ngechi trawün) nieyngün ñi poyeafiel ñi dio Dagon, ka nentufi Sanson karsel mu ñi ayentuafiel kidu. Feymew, Sanson ñi longko wiño tremtuy. Sanson feypifi kiñe pichi wentru, ñi yenieetew ñi kuwü mew: ‘Fülümpuafen ñi nüafiel feychi fütra orkon (poste) newentungelu chi alüpürachi ruka mu.’ Feymew, Sanson ngillatufi Jewba: ‘Eluen newen,’ pi. Ka nüfi ti epu fütra orkon. Fey wüla wirari: ‘Eluñmaen tañi layal pu filisteo engün.’ Müley küla warangka filisteo ti kawiñ mu, ka lloyükünuwlu Sanson fente epu fütra orkon, ti alüpürachi ruka llangodnagi, ka langümfi kom tüfachi wedake che.