FEY WÜLA David tuwi ñi ngünenieel Jerusalen mew, Jewba eluñmafi ñi fentren wewün ñi pu awkafe (weychafe). Chaw Ngünechen Jewba dew feypikünuy ñi eluafiel Kanaan mapu ta pu Israel che. Fewla Jewba ñi kellun mew, kom tüfachi mapu ñi feypikünungeel ngerpufingün.

David küme ngünenielu ngen, ka piwkeyefi Jewba. Feymu lle, dew nüfilu Jerusalen waria mew, kiñe wünekechi dungu ñi dewmael, fey yeafiel feyti mew Jewba ñi tukulpangepeyüm kakon mu. Ayüy ñi dewmayal kiñe ngillatuwe ruka chew ñi tukuafiel.

Rupalu kiñe mufü tripantu, David fütra yafkay. Kidu kimniey ñi kümenon ñi nüñmangeal ka che ñi ngen-ngelu. Welu kiñe pun (trafia), mülelu wente tañi ülmen ruka mew, nagkintuy ka pey kiñe müna küme ad domo. Bat-seba pingey, ka tañi füta (afkadi) fey David ñi kiñe awkafe, Uria pingey.

David müna illufi Bat-seba, fey mew femi ñi küpalngeal ñi ülmen ruka mew. Kidu ñi füta miyawi awkan (weychan) mew kamapu. Fey mew, David kudumfi chi domo, ka fey wüla kimi chi domo ñi niepüñeñün. David rume rakiduamürkey, ka werküfi Joab, longko tañi pu awkafe ñi elkünuafiel Uria puñma ti awkan mu feymu ñi layal. Lalu Uria, David niewi Bat-seba engu.

Jewba rume lladkütufi David. Werküfi tañi kona Natan ñi feypiafiel tañi yafkan. Peafuymi tüfa Natan David engu. David müna weñangkürakiduamküley ñi femün mu, welu Jewba langümlaeyew. Welu may feypifi: ‘Femlu eymi tüfachi wedake dungu am, müleay rume fentren wedake dungu tami ruka mew.’ ¡Müna wedake dungu nierkey David!

Wüne, Bat-seba ñi püñeñ lay. Ka David ñi wünen fotüm, Amnon pingelu, newenkafi ñi lamngen Tamar ñi kudumuafiel. Fey mew David ñi kangelu fotüm, Absalon pingelu, rume lladküy tüfa, ka langümfi Amnon. Fey wüla, Absalon wewmafi fentren che ñi piwke, ka feymew femi ñi rey künungeal. Af mew David wewi ti awkan, ka Absalon lay. Fey llemay, David kutrankawi fentren wedake dungu mew.

Rangiñ mu kom tüfachi rupalechi dungu, Bat-seba ka püñeñi kiñe wentru püñeñ, Salomon pingey. David füchalu ka kutrankülelu, tañi fotüm Adonia ayüy ñi rey ngeal. Fey mu David werküy kiñe saserdote, Sadok pingelu, ñi wütruñmayafiel aseyte Salomon ñi longko mew, ñi pengelal Salomon ñi rey ngeal. Pichintu rupalu, David nielu regle mari tripantu, lay. Ngüneniefuy meli mari tripantu. Fewla Salomon rey ngey.