DEW DAVID langümfilu Goliat, Abner yeeyew chew müley Saul. Abner longkoley kom pu awkafe (weychafe) Israel mu. Saul longkokünufi David ñi pu awkafe mu, ka femi ñi müleal rey ñi ruka mew.

Fey wüla, akutulu pu awkafe ñi kewatufiel pu Filesteo che, tati pu domo ülkantuyngün: ‘Saul langümi warangkakechi che, welu David marikechi warangka che.’ Saul rume ütrirküley, David am doy pürañmaeyew ñi üy ta kidu mu. Welu Jonatan, Saul ñi fotüm, ütrirchekenolu. Piwkeyefi David, ka David piwkeyeeyew. Feymu lle feypikünuwingu ‘rumel weniyewayu’.

David küme dungulfi ti arpa, ka Saul ayüy ñi dungulken. Welu kiñe antü Saul ñi fütra ütrir mew, yeeyew ñi femafiel David kiñe rume weda dungu. Petu dungulmekey ti arpa, Saul witrapüray ñi wayki ka ütrüftufi, petu feypiley: ‘¡Iñche külafankünuafiñ David chi trafruka mu!’ Welu David kiñepülekünuwi ti wayki. Fey wüla Saul ka tulafi David ñi wayki mew. Fewla David kimi ñi kuñiwtükuleal kom püle.

¿Eymi tukulpanieymi chem dungu feypikünuy Saul ñi femal? Feypikünuy ñi eluafiel tañi ñawe ñi kurengeal feychi wentru langümfile Goliat. Af mew Saul feypifi ta David: ‘Nieafuymi tañi ñawe Mikal, welu wüne müley mi langümafiel kiñe pataka kayñe Filisteo che.’ ¡Pellenieymi! Saul ayüy tati pu Filisteo che ñi langümafiel David. Welu rupalay feychi dungu, ka Saul elufi ñi ñawe ta David ñi kurengeal.

Kiñe antü Saul feypifi ta Jonatan, ka kom tañi pu kona engün “küpa langümfiñ David” pi. Welu Jonatan feypieyew: ‘Wedalkakifilnge David. Kidu chumkawnorume wedalkakelaymu chem dungu no rume. Welu may, kellukeymew. Kuñiwtuy ñi mongen ñi langümfiel Goliat, ka eymi pefilu, ayüwimi.’

Saul allküñmafi tañi fotüm ñi dungu, ka feypikünuy ñi wedalkanoafiel David. Wiño küpalngey David Saul mew, femngechi mew wiño küdawi ñi femkefel kuyfi mew. Welu kiñe antü, David petu dungul-lu, Saul ka kiñe rupa ütrüftufi chi wayki mew. David kiñepülekünuwi, ka ti wayki dituy ti trafruka mew. ¡Tüfa küla rupa rupay! ¡Fewla David kimi ta müley ñi lefmawal!

Feychi pun (trafia) David amuy kidu ñi ruka mu, welu Saul werküy kiñeke wentru ñi langümafiel. Mikal kimi chem dungu tañi chaw ayüy ñi femal. Feypifi ta David: ‘Amutunolmi tüfachi pun , wüle layaymi.’ Feychi pun Mikal kellufi ta David ñi lefmawal kiñe fentana mew. Epe regle tripantu mu David ellkawmiawkey kompüle amukey ñi penoetew Saul.