¿TUKULPAYMI tami allküken tüfachi küla pu wekeche wentru? May, feyta Daniel ñi pu weni pinolu ñi iyafiel kümenochi iyael (yagel) kidu engün mu. Tati pu Babilonia che üytükufi engün Sadrak, Mesak, ka Abednego. Welu adkintufinge engün fewla. ¿Chumngelu (chemu) pochongnagkülelayngün tüfachi wekeche wentru alüpürachi adentun mu, kakelu pu che reke? Inaduamafiyiñ.

¿Eymi tukulpaymi Jewba ñi ley dungu kidu ñi wirintükukünuel, ti Mari Werkün Dungu? Ti wünen feypi: ‘Mülelay tami poyeafiel kakelu Ngünechen, iñche müten.’ Tüfachi wekeche wentru feyentuleyngün (müngeltuleyngün) tüfachi feypin, welu küdawngey ñi femal tüfa.

Nafukodonosor, ti rey Babilonia mu, mütrümi fentren falinke che ñi yamafiel tüfachi adentun kidu ñi witrañpüramel. Dew feypifi tati kom pu che: ‘Allkütule ti kullkull ñi dungun, ti arpa ka kakelu dungulwe, pochongnagmün ka poyeafimün tüfachi milla adentun. Feyti pochongnagnolu ka poyenofile, pürüm (pür) ütrüftükungeay kiñe lüfkülechi rono (horno) mu.’

Allkülu Nafukodonosor ta Sadrak, Mesak, ka Abednego ñi pochongnagnon engün, rume lladküy. Werküy ñi küpalelngeal. Ka wiño feypifi ñi pochongnagal engün. Welu ti wekeche wentru maneluwi Jewba mew. ‘Taiñ poyekeelchi Ngünechen montulafeiñmew,’ pi engün. ‘Welu montulnoeliyiñmu rume, iñchiñ pochongnaglayayiñ tami milla adentun mu.’

Allkütulu tüfa, Nafukodonosor doy rume lladküy. Pülle (püchü tripa) mu müley kiñe rono, kidu werküy: ‘¡Regle rupa doy kofimfimün chi rono chumleken ta kuyfi mu!’ Fey mew werküfi ñi pu wentru doy newengelu ñi pu awkafe (weychafe) ñi trariafiel ta Sadrak, Mesak, ka Abednego, fey ñi ütrüftükuafiel engün ti rono mew. Doy kofiley ti rono tati weywiñ (lem-lem) kütral langümfi tüfachi pu newen-ngechi wentru. Welu ti küla wekeche wentru ¿chumley engün ütrüftükuel ponwi? 

Ti rey lelikoni ponwi rono mu, ka rume llükay. ‘¿Trarilafiyiñ ama küla wentru, ka ütrüftükufiyiñ engün ponwi ti kofilechi rono mu?’ ramtuy:

‘May, femngechi femiyiñ,’ llowdunguy ñi pu kona.

‘Welu iñche penien meli wentru trekayawi kütral mu,’ pi. ‘Trarilelayngün, ka tati kütral wedalkamekelaeyew. Ka ti melingelu kiñe dio femngey.’ Ti rey fülkonpuy ti rono ñi wülngiñ mu ka wirari: ‘¡Sadrak! ¡Mesak! ¡Abednego! ¡Tripapamün, wenu Chaw Ngünechen ñi pu kona!’

Tripalu engün, kom che pey ñi allfeñ-ngenon engün. Fey mew ti rey feypi: ‘¡Püramyengepe Sadrak, Mesak, ka Abednego ñi Ngünechen engün! Werküy kiñe werken küme püllü, ka montulfi, chem dungu no rume pochongnakümlaeyew engün ka poyelafingün kake dio no rume, welu may tañi Ngünechen engün müten.’

¿Müna kümelay am ñi femün tüfa, kom iñchiñ ñi rumel püntüwnoael Jewba mu?