EPE EPU tripantu rupay Babilonia nüeyew tati pu medo ka pu persa engün. ¡Ka adkintufinge chem dungu rupaley fewla! May, tati pu Israel che tripaleyngün Babilonia mu. ¿Chumngechi neykümngeyngün? ¿Iney am eluñmay ñi amutual engün?

Fey ta Siro, Persia rey ngelu. Fütra kuyfi mu petu ñi choyün-ngenon Siro, Jewba werküy ñi pelon wentru Isaia ñi wirintükual Siro ñi dungu: ‘Femaymi iñche tañi ayün tami femal. Tati pu wülngiñ nülakünungeay tami nüafiel ti waria.’ Ka Siro longkoley ñi nüafiel Babilonia. Tati pu medo ka persa pun (trafia) konpuy chi waria mu, ti pu wülngiñ nülakünungelu am.

Welu Isaia Jewba ñi pelon wentru, ka feypi Siro ñi werküal ka ñi wiño dewmangetual Jerusalen waria ka ti ngillatuwe ruka. ¿Wüli ti rey Siro tüfachi werkün dungu? May. Tüfachi dungu Siro feypifi tati pu Israel che: ‘Amumün ta Jerusalen, ka dewmamün üye mew tamün Ngünechen Jewba ñi ngillatuwe ruka.’ Fey tüfa femalu pu Israel che.

Welu kom pu Israel che mülelu Babilonia mu, pepi amulay fütra kamapulelu am, Jerusalen waria, meli küyen mu puafuy engün, ka rume fentren Israel che doy füchay, ka kutranchengey. Ka dungu ka müley. Welu feychi amunolu, Siro feypifi: ‘Wülmün plata ka milla ka kakelu yewün, kom amulu ñi dewmayafiel Jerusalen ka tañi ngillatuwe ruka.’

Feymu lle, tati pu Israel che wiñolu Jerusalen mu elungey fentren yewün. Ka, Siro wüli tason ka kopa ti rey Nafukodonosor entuñmafilu Jewba ñi ngillatuwe ruka apümfilu Jerusalen. Tati pu che yenietuy fentren chemküfkechi dungu.

Rupalu wüla meli küyen chi ñi amulen engün, tati pu Israel che akuyngün Jerusalen rüf küme trenkonpuyngün. Trür regle mari tripantu rupay ñi apümngen chi waria, ka ti mapu mu ngewelay che. Welu tati pu Israel che wiñotulu engün ñi mapu mu, welu rume küdawtuay engün, fey kimafiyiñ wüla.