TRIPALU tati fütra wenulechi katrüntüku ruka mu, Jesu ka tañi pu apostol amuyngün kiñe pichi (püchü) tutechi anümkawe mew, Getsemani pingelu. Fentren rupa küpakerkeyngün. Fewla Jesu feypifi engün: ‘Trepelemün ka ngillatulemün,’ pichi (püchü) püntütripay kidu engün mu, ka lloyünagi mapu mew ka ngillatuy.

Fey wüla Jesu wiñotuy chew ñi mülen tañi pu apostol. ¿Eymi kimimi ñi chummeken engün? ¡Umawtulerkeyngün! Küla rupa Jesu feypifi engün müley tamün trepeleal, welu wiñotulu ñi pemeafiel ka umawtulerkeyngün. ‘Tüfachi antü mu ¿chumngechi kon-umawtuymün?’ pi Jesu inan-ngechi wiñolu. ‘Puwi ti antü ñi wülngeal tañi pu kayñe mew.’

Feychi mu allküngey ti rarakün fentren che. ¡Adkintufinge! ¡Küpaleyngün pu wentru yenielu engün fütrake kuchillo ka mamüll! Ka yeniey küdetuwe ñi pelontungeam. Fülpalu engün, kiñe tripay rangiñ fentren che mu, ka küpay Jesu ñi mülen mu. Trurufi (trepetufi), chumngechi peafuymi faw. ¡Feyti chi wentru Juda Iskariote ürke! ¿Chumngelu (chemu) trurufi (trepetufi) Jesu?

Jesu ramtuy: ‘Juda, ¿kiñe trurun (trupetu) mew ellka wülkünuen?’ Feley, kiñe trurun (trupetu) mew pengelelfi tati pu wentru mülelu Juda engün ñi kimal tüfa ta Jesu ngen, fey ñi kintukefiel. Feymu lle, Jesu ñi pu kayñe fülkonpuyngün ñi nüafiel. Welu Pedro eluñmalayay ñi yengeal ta Jesu, kidu ayüy (küpa) ñi kewayal. Entupay ñi fütra kuchillo yenielu, ka wülelfi ti wentru mülelu inafül kidu mu. Katrüñmafi ñi man pilun. Welu Jesu fewla wiño tukuleltufi ñi pilun, ka tremoltufi (mongelfi).

Jesu feypifi ta Pedro: ‘Wiñotükutufinge tami fütra kuchillo chew tañi müleken (mülepi). ¿Kimlaymi am iñche ngillatufili tañi Chaw fey werkülelafenew ñi warangkakechi werken püllü tañi montulaetew?’ ¡May, femafuy! Welu Jesu ngillatulafi Ngünechen ñi werkülelaetew kiñe werken püllü no rume, kimlu am akuy chi antü tañi pu kayñe ñi yeaetew engün. Fey mew eluñmay ñi yengeal. Peafiyiñ chem dungu mu ñi rupayal Jesu fewla.