MÜNA weda dungu rupawyey. Juan ti Fawtisachefe we langümngey. Erodia, ti rey ñi domo, üdeniekefeyew. Fey mew ñi ayüel, chi rey werküy ñi katrünentuñmangeal Juan ñi longko.

Allkülu Jesu tüfa, weñangküy. Kidu amuy kiñe mülewe ngenolu che. Welu tati pu che inaeyew. Pefilu Jesu ti pu che, kutrantupiwkeyefi. Feymu lle, nütramelfi Ngünechen ñi reyno mu, ka tremolfi (mongelfi) tañi pu kutrankülelu.

Feychi pun (trafia) tañi pu inanieetew küpayngün kidu mu, ka feypieyew engün: ‘Dew puni (trafiay), ka tüfa mu ngelay ruka che. Feymew chalitufinge tati pu che, tañi amutual pülleleyechi waria mew ñi ngillayael ta iyael (yagel).’

‘Kidu engün müley ñi amutunoal,’ pi Jesu. ‘Eymün elufimün ta iyael.’ Wiñokintufi ta Felipe, Jesu ramtufi: ‘¿Chew anta ngillameayiñ fentren iyael taiñ yafütulelafiel kom tüfachi pu che?’

‘Duamyiñ fentren plata ñi ngillangeal iyael ñi pichikentu elungeael kake kiñeke tüfachi pu che,’ llowdunguy Felipe. Andre feypi: ‘Tüfa mew müley kiñe pichi wentru, yenielu taiñ iyael, niey kechu kofke ka epu challwa. Welu mülelu fentren che puwlayafuy.’

‘Feypifimün tati pu che ñi anükünuwal ta kachu mew,’ pi Jesu. Fey mu Jesu mañumtufi Chaw Ngünechen ti iyael mew, ka feymew wüdamkafi. Feymew wüla, tañi pu inaniekeetew eluyefi tati pu che ti kofke ka ti challwa. Müley kechu warangka wentru, ka warangkakechi domo ka pichike che. Kom iyey engün fey kom ti pu che weday engün. ¡Ka tati pu inaniekeetew ñimituy engün (ngümintuyngün) pichilewelu (püchülewelu), müley mari epu külko apoley!

Fewla Jesu werküfi ñi pu inanieetew ñi konpuael tati wampo (fote) mew, ñi noal ti lafken Galilea pingelu. Petu punlu akuy kiñe fütra kürüftüku, ka ti rew rume (mütre) newentu nengümkiawülmekefi tati wampo. Tati pu inanieetew rume llükayngün. Feymew, rangintu pun (trafia), pefingün kiñe che namüntu trekalelu wente ko amuley kidu engün mew. Wiraringün fente llükan mew, kimnolu am chem ñi pen engün.

‘Llükakilmün,’ pi Jesu. ‘¡Iñche tati!’ Newe feyentulafingün (mupitulafingün). Fey mew Pedro feypi: ‘Rüf mew eymi ngelmi, Ñidol, feypinge iñche ñi trekayal wente ko amual tañi puwael ta eymi mew.’ Jesu llowdunguy: ‘¡Küpange!’ ¡Ka Pedro tripay ka trekaley wente ko mew! Fey mew Pedro llükay, ka petu llümnagi (ñafkoni) ko mew, welu Jesu montuleyew.

Ka rupan mew, Jesu ka ilelfi warangkakechi che. Fewla femi regle kofke ka pichike challwa. Ka kiñe mu müley fentren iyael kom che mu. ¡Müna kümengepelay chumngechi Jesu ñi poyefiel ta pu che! ¡Ngüneniele tüfachi Mapu, duamtunielayayiñ chem dungu no rume!