JESU petu ñi miyawün mapu mu, tremolfi (mongelfi) tati pu kutrankülelu. Tüfachi fentren afmatun dungu nütramngekey wall waria mapu mew. Feymu lle, tati pu che yelfi tati pu lañmalelu ñi kuerpu, trawmalelu ka küntrolelu, ka fentren kakelu kutrankülelu. Ka Jesu tremolfi (mongelfi) kom engün.

Dew rupay doy küla tripantu Juan ñi fawtisafiel Jesu. Ka Jesu feypifi tañi pu apostol: ‘Pichin (püchün) mu amuan Jerusalen waria mu, chew ñi langümngeal, ka fey mu wiñomongetuan.’ Fey mew, amuley ñi tremolkafiel (mongelkafiel) tati pu kutrankülelu.

Kiñe antü Jesu kimeltumekey safado mu. Tati safado pu judio ñi ürkütupeyüm chi antü. Tati domo mi pefiel tüfa mu potrongkülekey mari pura tripantu mu, pepi küme norümkelay ñi kuerpu. Feymu lle, Jesu fampuwüli ñi kuwü kidu mew, ka fey ti domo nortuy ñi kuerpu. ¡Tremowetuy (mongetuy)!

Welu tati pu longkolechi religioso illkuyngün (lladküyngün). ‘Müley kayu antü ta küdawam,’ kiñe wirarlelfi tati pu che. ‘¡Fey tati pu antü tremopayam (mongeltual), welu safado antü mew no!’

Welu Jesu wiñoldunguy: ‘¡Wedake che! Iney rume eymün mu neykümafuymün tamün furiku (burro), ka yeafuymün tamün pütokolafiel safado antü mew. Feymu lle, ¿tremolngelayafuy (mongelngelayafuy) tüfachi domo, mari pura tripantu kutrankülekefulu?’ Tüfachi wiñoldungun (llowdungun) mu yeweluwingün tüfachi wedake wentru.

Ka rupan mu, Jesu ka ñi pu apostol amuleyngün ñi puwam Jerusalen waria mu. Inafülpulu engün Jeriko waria mu, epu trawma ngillatuplatakelu wiraringu: ‘Jesu, kellumuyu.’

Jesu mütrümfi tati epu trawma, ka ramtufi: ‘¿Chem duamimu am tamu femngeal?’ Fey engu feypieyew: ‘Ñidol, ayüleyu nülayal tayu nge.’ Jesu idañmafi ñi nge engu, ¡fey mu müten pelotuyngu! ¿Kimimi chumngelu (chemu) Jesu femken (femi) kom tüfachi afmatun dungu? Piwkeyeniefilu am ta che ka ayüy ñi nieal mupiltun kidu mu. Tüfachi dungu rüf maneluwün ngey, Jesu ngüneniele tüfachi Mapu mew iney rume wiño kutranwelayay.