TÜFACHI pichi (püchü) malen mülelu tüfachi adentun mu, niey mari epu tripantu. Jesu nünieñmaeyew tañi kuwü, tañi ñuke ka tañi chaw inafülküleyngu. ¿Kimimi chumngelu (chemu) fente ayüwküleyngün? Peafiyiñ.

Tati pichi malen ñi chaw rume (mütre) falin wentru ngey, Jayro pingey. Kiñe antü tañi ñawe kutrani, fey mu elkünungey kiñe ngütantu mu. Welu tremolay (mongeltulay); doy wedalkalerpuy tañi kutran. Jayro ka tañi domo engu rume rakiduamtükunieyngu, tañi pichi malen engu am “layalu” trokifingu. Kiñen pichi malen nieyngu. Fey mu Jayro kintufi ta Jesu. Fey allküy tati pu afmatun dungu ñi femün ta Jesu.

Fey mu Jayro pefilu ta Jesu, müley fentren che wallmaniefilu. Welu Jayro rumey rangiñ trapümüwkülechi pu che mu, fey lukunagpay Jesu ñi namün püle. ‘Tañi ñawe rume kutranküley,’ pi. ‘Füreneen küpange, tremolfinge (mongelfinge),’ llellipufi. ‘Amuan’ pi Jesu.

Petu tañi trekalen engün, tati fentren pu che ültrekamekewingün (altromekewingün) ñi püllepual. Fey Jesu witrakünurumewi. ‘¿Iney am idakünuenew?’ ramtuy. Jesu kangetuwi kidu mu ñi tripan newen, ka kimi kiñe che ñi idañmaetew (paltrikünuetew). Welu ¿iney (iñi) am? Kiñe mari epu tripantu kutrankülechi domo. ¡Küpay, ka idañmafi Jesu tañi takun, ka tremotuy (mongetuy)!

Fey tüfa Jayro doy küme duami, pelu am Jesu mu küdawngelay tañi tremolafiel (mongelafiel) kiñe che. Welu fey küpay kiñe werken. ‘Femkünufinge ta Jesu,’ pinfi ta Jayro. ‘Tami ñawe ta lay.’ Jesu allküy tüfa ka feypifi ta Jayro: ‘Weda duamkilnge; fey kümelkaletuay.’

Fey mew akulu engün Jayro ñi ruka mew, tati pu che ngümamekey rume (mütre) weñangkülu engün am. Welu Jesu feypi: ‘Ngümakilmün. Tati pichi (püchü) malen lalay. Umawküley müten.’ Welu kidu engün ayekawingün, fey ayentufi engün ta Jesu, kimfilu engün am tañi lalen.

Jesu ka tati pichi malen tañi chaw, ka tañi ñuke, küla tati pu apostol konpuy engün tati katrüntüku ruka chew müley ti pichi malen. Nüñmafi tañi kuwü, ka feypifi: ‘¡Witrapürange!’ Fey mongetutuy, chumngechi pefimi tüfa mew. ¡Witratuy ka trekay! Fey mu kidu tañi chaw ka tañi ñuke fentren ayüwkületuyngün.

Welu Jesu fewla tañi wiñomongeltuchenon. Wüne wiñomongeltufi kiñe lantu domo tañi wentru püñeñ (koñi) mülelu Nain pingechi waria mew. Fey mu Jesu ka wiñomongeltufi ta Lasaru, Maria ka Marta tañi lamngen. Ngünechen elkünufi Jesu tañi rey ngeal, fey mu Jesu ngünenietule, wiñomongeltuafi rume fentren che. ¿Ayüwelkelayiñ mew tüfa?