¿EYMI kimimi iney engün am tüfachi domo ka epu wentru? Tati domo feyta Maria Magdalena, inaniefilu ta Jesu. Ka tati epu wentru lig takun nieyngu feyta küme werken püllü. Tüfachi pichi (püchü) katrüntüku kura mu Maria lelikonküley, fey ta chew elkünungey Jesu ñi kuerpu lalu wüla. Rüngan lolo eltun pingey. ¡Welu fewla ti kuerpu ngelay! ¿Iney am ta yeñmaeyew? Peafiyiñ.

Lalu Jesu wüla, tati pu saserdote feypifi ta Pilato: ‘Petu mongelelu Jesu feypi “küla antü rupale, wiño mongetuan”, pi. Feymu lle, werkünge ta eymi tañi fente küme llüwatuniengeael (lloftuniengeal) tati rüngan lolo. ¡Femngechi tañi pu inanieetew pepi weñepalayay tati kuerpu, ka feypiay “wiñomongetuy”!’ Pilato ta feypieyew: ‘Yemün pu soldaw ñi küme llüwatunieafiel (lloftunieafiel) tati rüngan lolo.’

Welu puliwen küla antü wüla Jesu ñi lan mu, Jewba ñi kiñe küme werken püllü akurumey. Chingkülrupafi ti fütra kura rakümnielu ti rüngan lolo. Tati pu soldaw rume llükanieyngün pepi nengümwelayngün. ¡Af mew, lelikonlu ti rüngan lolo mu, ti kuerpu ngelay! Kiñeke soldaw konpuyngün ti waria mu, ka dungufi tati pu saserdote. ¿Kimimi chumi engün am tati wedake saserdote? Kullifingün tati pu soldaw ñi koylatual. ‘Eymün ta feypiaymün: “Petu umawkülelu iñchiñ, Jesu tañi pu inanieetew küpay, ka weñenentupatufi engün tati kuerpu,”’ pifingün.

Petu ñi rupameken tüfa, kiñeke domo ñi inaniekefilu Jesu amuy ñi pemeafiel ti rüngan lolo. Pefilu ¡wellilerkey! Epu küme werken püllü nielu wilüfkülechi (lufoykülechi) takun pewfaluwürkey engün. ‘¿Chumngelu (chemu) kintupefimün ta Jesu faw?’, ramtuyngu. ‘Kidu wiñomongelngetuy. Müchay amumün, ka feypiafimün tañi pu inanieetew.’ Kidu engün lef amuyngün. Welu rüpü mu kiñe wentru katrütueyew. ¡Fey ta Jesu ürke! ‘Amumün ka feypiafimün tañi pu inanieetew,’ pirkey.

Tati domo feypifilu Jesu ñi pu inanieetew: ‘Jesu mongeley, ka pefiyiñ’, welu fey engün müte feyentulayngün ñi feypietew. ¡Pedro Juan engu lef amuy tati rüngan lolo mu, welu tati rüngan lolo wellilerkey! Amutulu engu, Maria Magdalena ina mülewey. Fey mew lelikonlu ka pefi epu küme werken püllü.

¿Kimimi chumün Jesu tañi kuerpu? Ngünechen femi ñi ñamümfiel (ñapumal). Ngünechen wiñomongeltulafi ta Jesu chumngechi kuerpu niekefel petu ñi lanon. Elufi kiñe we püllütu kuerpu, pu werken kümeke püllü reke. Welu ñi pengelelafiel tati pu inanieetew ñi mongelen, Jesu pewfaluwi kiñe kuerpu pengekelu.