1. ¿Chem ramtuwafuymi fewla?

TÜFACHI lifru mu dew kimimi fillke dungu. Kiñeke tüfa Chaw Dios ñi feypikünun taiñ nieal rumel mongen, pu layelu ñi amukenon kañpüle tañi mongeleal, welu ñi wiñomongetual engün (Eclesiastés 9:⁠5; Juan 5:⁠28, 29; Apokalipsi 21:⁠3, 4). Kafey, ¿amukeymi Trawünwe Ruka mu? ¿Rakiduamkeymi pu Dungukelu Iney Ngen Jewba ñi yenien ti rüf religion? (Juan 13:⁠35). ¿Eluwimi tami küme weniyeafiel ta Jewba? ¿Küpa serfikefimi?  Femngechi femülmi, ramtuwafuymi: “¿Chumafun ñi serfiafiel ta Chaw Dios?”.

2. Ti etiopia wentru, ¿chumngelu (chemu) küpa fawtisawi?

² Fütra kuyfi mew, feychi dungu ramtuwi kiñe wentru Etiopia tuwün-ngelu. Kiñe kristiano amuldungueyew pichi rupalu Jesus ñi wiñomongetun. Tüfachi kristiano Felipe pingefuy, ka pengelelfi Jesus ñi Mesia ngen. Tüfa puwi ti etiopia wentru ñi piwke mu, feymu feypifemi: “Tüfa mew müley ta ko. ¿Kümepelaafuy may ñi fawtisangeael ta iñche?” (Hecho 8:⁠26-36).

3. 1) Jesus, ¿chem feypifi tañi pu inanieetew? 2) ¿Chumngechi fawtisangekey pu rüf kristiano?

³ Tami serfiafiel ta Jewba, duamfali tami fawtisawal. Femngechi pengeli Biblia. Jesus feypifi tañi pu inanieetew: ‘Kimeltucheaymün [...] iñche ñi disipulungeael engün. Fawtisayafimün’ (Matew 28:⁠19). Jesus ka eluwi ñi fawtisangeal, femngechi pengeli taiñ chumal. Fawtisangelu kidu, kom ñi kuerpu ñamümtukungey ko mew. Re pachügtungelay ka re wütruñmangelay ko mew ñi longko (Matew 3:⁠16). Famülke mu ka femngechi femngekey ñi fawtisangeal pu rüf kristiano, kom ñi kuerpu müley ñi ñamümtukungeal ko mew.

4. Fawtisawün mu, ¿chem pengelkey pu che?

⁴ Fawtisawün mu, pu che pengelkey ñi rüf küpa weniyeafiel ka serfiafiel ta Chaw Dios (Salmo 40:⁠7, 8). Feymu ramtuwafuymi: “¿Chem duamfali tañi fawtisawal?”.

5. 1) Petu tami fawtisawnon, ¿chem duamfali tami femal? 2) ¿Chumngelu fente falin-ngey tami amual feychi trawün mu?

⁵ Petu tami fawtisawnon, duamfali tami kimafiel ta Jewba Jesus engu. Eymi eluwküleymi tami femal tüfa, feymu petu chillkatufimi Biblia (papeltunge Juan 17:⁠3).  Welu fey ka müten no. Biblia feypi tami “fente küme kimafiel ta Ngünechen ñi ayükeelchi dungu” (Kolosense 1:⁠9). ¿Chumngechi? Pu Dungukelu Iney Ngen Jewba nieyngün fillke trawün. Tüfa kelluaeymu tami doy küme weniyeafiel ta Chaw Jewba. Feymu fente falin-ngey tami amual feychi trawün mu (Ebrew 10:⁠24, 25).

6. Petu tami fawtisawnon, ¿chem duamfali tami kimal?

⁶ Welu petu tami fawtisawnon, ¿duamfali tami kimal itrokom ñi kimeltuel Biblia? Femlay, Jewba feypikelay tüfa. Rakiduamnge, Jewba feypilafi tati etiopia wentru ñi kimafiel itrokom, fey wüla ñi fawtisawal (Hecho 8:⁠30, 31). Kafey rumel amuleay taiñ kimnieafiel ta Ngünechen (Eclesiastés 3:⁠11). Welu tami fawtisawal, duamfali tami kimafiel ka feyentuafiel tati doy falin-ngechi dungu ñi feypikeel Biblia (Ebrew 5:⁠12).

7. ¿Chumngechi kellukeeymu tami chillkatufiel Biblia?

⁷ Biblia feypiley: “Ngelay ñi tutengeael ta Ngünechen ngenole maneluwün [kam feyentun] ta kisu mew” (Ebrew 11:⁠6). Feymu, tami fawtisawal duamfali tami feyentuleal. Biblia pengeli ñi chumün pu che Korinto waria mu. Kidu engün allkütufingün Jesus tañi pu inanieetew, fey ‘feyentuyngün ka fawtisawingün’ (Hecho 18:⁠8). Ka femngechi, eymi petu chillkatuymi Biblia, tüfa kellukeeymu tami feyentuleal. ¿Chem mu feyentuleymi? Jewba ñi feypikünun mu ka Jesus ñi femün taiñ montulaetew kulpan mu ka lan dungu mu (Josué 23:⁠14; Hecho 4:⁠12; 2 Timotew 3:⁠16, 17).

8. ¿Chem kelluaeymu tami küpa nütramkayafiel ta kakelu che chem tami kimürpuel?

⁸ Doy kimfilmi Biblia ka ngüneduamülmi chumngechi tami kellukeetew tüfa, doy feyentuleaymi. Ka küpa  nütramkayafimi ta kakelu che chem tami kimürpuel (Jeremías 20:⁠9; 2 Korintio 4:⁠13). Fey, ¿iney nütramkayafuymi?

9, 10. 1) ¿Iney nütramkalelafuymi tami kimürpuel? 2) Küpa tripalmi ti trawünche engün ñi amuldungual, ¿chumaymi?

⁹ Nütramkalelafuymi tami pu che, pu weni, karukatu kam tami pu kompañ. Müna kümey tami femal tüfa. Welu rumel nütramkange piwkeyen mu, ka ayüfalngepe tami feypin. Fey rupale ti antü, tripayafuymi ti trawünche engün ñi amuldungual. ¿Chumngechi femafuymi tüfa? ‘Pepikawkülen’ rakiduamülmi, feypiafimi tati peñi kam lamngen tami kimeltuetew Biblia. ‘Küpa tripan ti trawünche engün ñi amuldungual’ piafimi. Feychi peñi kam lamngen rakiduamle tami pepikawkülen ka tami inakefiel Biblia ñi ngülam, fey eymu trawüaymu epu longkolelu engün.

¹⁰ Fey pu longkolelu küpa kimnieyngün tüfa: ¿Kimniefimi ka feyentukefimi tati doy falin-ngechi dungu ñi kimeltukeel Biblia? ¿Inakefimi Biblia ñi ngülam? ¿Rüf ayüleymi ñi Dungukelu Iney Ngen Jewba ngeal? Feymu nütramkayafeymu engün. Longkontukunge, pu longkolelu kuydaniekefi kom pu koneltulelu trawünche mu. Eymi kafey kuydaniekeeymu. Feymu llükalayaymi dunguafiel engün (Hecho 20:⁠28; 1 Pedro 5:⁠2, 3). Afle tamün nütramkan, pu longkolelu feypiaeymu tami pepikawkülen kam pepikawkülenon tami amuldungual.

11. Petu tami tripanon ti trawünche engün ñi amuldungual, ¿chumngelu falin-ngey küme elkünutual tami mongen?

¹¹ Petu tami tripanon ti trawünche engün ñi amuldungual, pu longkolelu feypiafeymu tami doy küme elkünutual tami mongen. ¿Chumngelu falin-ngey tami femal tüfa? Amuldungun mu, Jewba tañi üy mu  miyawkeiñ. Feymu duamfali küme yenieal taiñ mongen, femngechi ñi weda dunguyengenoal Jewba (1 Korintio 6:⁠9, 10; Galata 5:⁠19-21).

12. ¿Chumngelu kom duamnieiñ taiñ wiñorakiduamtual?

¹² Kafey, petu tami fawtisawnon, duamfali tami femal kangelu dungu. Apostol Pedro feypi: ‘Feymew wiñotumün ta Ngünechen mew ka wiñorakiduamtumün, feymew Ngünechen wiñoduamtuaeymünmew tamün kulpan mew’ (Hecho 3:⁠19). ¿Chumkey tati wiñorakiduamtulu? Rume weda duamkey kom tañi weda femün mu. Duamfali ñi wiñorakiduamtual pu inanofilu chem ñi feypin Jewba kudumuwün dungu mew. Welu, ¿fey engün müten? Femlay. Kom duamnieiñ taiñ wiñorakiduamtual, ¿chumngelu? Kom iñchiñ kulpafe chengeiñ. Feymu duamnieiñ taiñ perdonayaetew Chaw Ngünechen, yafüluwliyiñ rume ñi küme yenieal taiñ mongen (Romanu 3:⁠23; 5:⁠12).

13. ¿Chem duamfali femal taiñ wiñotual?

¹³ Welu, ¿re weda duamaiñ taiñ femün mu? Femlay. Apostol Pedro ka feypi: “Wiñotumün”. Taiñ femal tüfa, duamfali elkünual taiñ weda femken, fey eluwal taiñ küme femal. Rakiduamnge tüfa: amulmi kiñe lof tami kimkenofiel, welu ngüneduamrumelmi tami amun ka rüpü mu, ¿chumafuymi? Witrakünuafuymi ka wiñotuafuymi. Fey amuaymi küme rüpü mew. Ka femngechi eymi, tami chillkatufiel Biblia, ngüneduamafuymi ñi duamfalngen doy küme elkünutuafiel tami mongen. Feymu eluwnge tami wiñotual: küme elkünutunge tami weda femken, fey eluwnge tami femal kümeke dungu.

14. Wülkünual tami mongen Jewba mew, ¿chem duamfali tami femal?

¹⁴ Petu tami fawtisawnon, kangelu falin dungu duamfali tami femal: wülkünuaymi tami mongen Jewba mew. Tami femal tüfa, duamfali tami llellipuafiel ta Jewba. Feychi llellipun mu feypikünuafimi tami poyeafiel kidu müten ka doyümafiel tami mongen mew (Matew 4:⁠10).

15, 16. ¿Chumngelu kiñe che küpa wülkünuafuy ñi mongen Jewba mu?

¹⁵ Rakiduamnge kiñe wentru ñi femfiel tañi ayün. Kidu doy kimfile tañi ayün, fey doy piwkeyeafi ka ayüay ñi nieafiel. Tüfa ‘fütra dungu’ piafuiñ, welu ti wentru eluwküley ñi femal tüfa, fente tañi piwkeyeniefiel ñi ayün. Feley llemay, kidu engu rume piwkeyewi, feymu feypikünuwi ñi kiñewal kom tañi mongen mew. Ka femngechi trürümngeafuy wülkünual tami mongen Jewba mu.

¹⁶ Doy kimfilmi ta Jewba, doy piwkeyeafimi ka doy eluwaymi tami serfiafiel. Feymu küpa wülkünuaymi tami mongen kidu mu. Ngüneduamnge Jesus ñi feypin: “Iney rume ta ayülele iñche ñi disipulungeael, kisutu ngüyünentuwpe”, upenentuwpe (Marku 8:⁠34). ¿Chumngechi femafuymi tüfa? Doyümfinge tami feyentuafiel ta Chaw Jewba. Doy falintuafimi kidu ñi ayükeel, fey kiñepülekünuafimi eymi tami ayükeel (papeltunge 1 Pedro 4:⁠2).

17. Kiñeke che, ¿chumngelu wülkünukelay ñi mongen Jewba mew?

¹⁷ Kiñeke che rakiduamkey: “Feypikünufili ta Jewba ñi serfiafiel, welu wechunentunoli, weñangkülafiñ”,  pikeyngün. Kafey kakelu che rakiduamkey: “Wülkünunoli ñi mongen Jewba mew, kidu chem feypilayaenew rume”. Feymu wülkünukelayngün ñi mongen Jewba mew.

18. “Weñangkülafiñ ta Jewba” feypilmi, ¿chem kelluaeymu tami femngechi llükawenoal?

¹⁸ “Weñangkülafiñ ta Jewba” feypilmi, ¿chem kelluaeymu tami femngechi llükawenoal? Tami piwkeyefiel ta Jewba. Tüfa ka kelluaeymu tami yafüluwal, femngechi serfiafimi kom tami mongen mu (Eclesiastés 5:⁠4; Kolosense 1:⁠10). Kafey rakiduamlayaymi: “Küdawngey femal Jewba tañi pin”. Ngüneduamnge apostol Juan ñi feypin: ‘Tati rüf dungu mew piwkeyefilu ta Ngünechen ka feley tañi inayafiel kisu ñi werkün dungu. Fey kidu tañi werkün dungu küdawngelay’ (1 Juan 5:⁠3).

19. Küpa wülkünulmi tami mongen Jewba mu, ¿chumngelu llükalayaymi?

¹⁹ Jewba kimniey taiñ welulkawken taiñ kulpafe chengen mu. Feymu küpa wülkünulmi tami mongen Jewba mu, kidu feypilayaeymu tami welulkawnoal (Salmo 103:⁠14). Kafey kidu kelluaeymu tami küme femal (Isaías 41:⁠10). Kom tami piwke mu maneluwnge tami Wenu Chaw mu, fey “kidu norümaeymu chew tami miyawal” (Proverbios 3:⁠5, 6).

20. Dew wülkünulmi tami mongen Jewba mew llellipun mu, ¿chumaymi fewla?

²⁰ ¿Pepikawküleymi wülkünual tami mongen Jewba mu? Femülmi tüfa llellipun mu, pepikawküleymi tami femal kangelu falin dungu: fawtisawaymi.

21, 22. ¿Chumngechi ‘wüldunguaymi tami feyentulen fentren che ñi adkiñ mew’?

 ²¹ Fey wülkünulmi tami mongen Jewba mew, ka küpa fawtisawülmi, feypiafimi tüfa kiñe longkolelu tami trawünche mu. Fey trawüaymi kiñeke longkolelu engün, ka ngüneduamaymün tati doy falin-ngechi dungu ñi kimeltukeel Biblia. Fey ngüneduamle engün tami pepikawkülen, feypiaeymu  tami fawtisawal ti küpalechi fütra trawün mew taiñ nieal pu Dungukelu Iney Ngen Jewba. Feychi fütra trawün mew, kiñe wewpin mu pengelngeay chem müley ñi femal tañi mongen mu pu fawtisawalu. Tati wewpitulu epu dungu ramtuafi pu küpa fawtisawlu. Feymu “may” feypilmi feychi epu ramtun mew, femngechi ‘wüldunguaymi tami feyentulen fentren che ñi adkiñ mew’ (1 Timotew 6:⁠12).

 ²² Fey fawtisangeaymi, kom tami kuerpu ñamümtukungeay ko mew. ¿Chem pengelaymi tami fawtisawün mu? Tami wülkünun tami mongen Jewba mew ka tami Dungukelu Iney Ngen Jewba ngetun.

23. Taiñ fawtisangeal ‘Chaw tañi üy mew ka Fotüm ka Ngünechen ñi newen mew’, ¿chem duamfali taiñ femal?

²³ Jesus feypifi tañi pu disipulu tañi fawtisangeal ‘Chaw tañi üy mew ka Fotüm ka Ngünechen ñi newen mew’ (papeltunge Matew 28:⁠19). ¿Chem duamfali taiñ femal tüfa? Longkontukuaiñ Jewba ñi doy alüpüralen itrokom mew. Kafey falintuafiyiñ Jesus ñi lapan iñchiñ mu. Ka falintuafiyiñ Jewba ñi adkünufiel tañi newen ñi femtripayal kidu tañi pin (Salmo 83:⁠18; Matew 28:⁠18; Galata 5:⁠22, 23; 2 Pedro 1:⁠21).

24. Fawtisawün mu, ¿chem pengelngey?

²⁴ Fawtisawün mu pengelngey kiñe falin dungu. Ñamümtukungelmi ko mew, elkünuafimi tami kuyfi mongen, “layaymi” reke. Welu tripalmi ko mew, we mongen nietuaymi tami femal Chaw Dios ñi ayükeel. Fey pengelaymi tami serfiafiel ta Jewba tuntepule tami mongen. Eymi wülkünulayaymi tami mongen kiñe che mu, kiñe trokiñche kam kiñe küdaw. Doy may wülkünuaymi tami mongen Jewba mu.

25. ¿Chem inaduamaiñ kiñelewechi chillkatun mew?

²⁵ Wülkünulmi tami mongen Jewba mew, doy weniyeafimi (Salmo 25:⁠14). Welu feypilayaymi: “Fawtisawli montuan”. Ngüneduamnge ñi feypin Jesus: “Kom tati newenkülelu Ngünechen ñi dungu mew tuntepule ñi mongen, fey ta montuay” (Matew 24:⁠13). Fawtisawün fey tati wünen dungu tami femal tami montual. Welu, ¿chumafuymi tami püntütripanoal Jewba mew? Tüfa inaduamaiñ kiñelewechi chillkatun mew.