1, 2. Biblia kiñe sakin yewün Chaw Ngünechen mu küpalu, ¿chumngelu (chemu) feypiafuiñ tüfa?

KIÑE weni rakiduamle eymi mu ka eluelmu kiñe yewün (regalo), ¿chum duamnagafuymi? Müna ayüwafuymi ka mañumafimi, ka küpa kimfemaymi ñi chemngen tati.

² Ka femngechi ti Biblia kiñe yewün Chaw Ngünechen mu küpalu. Ñi feypiel ti Biblia trürngelay chem kangelu lifru mew no rume. Kimeltukeeiñmu Chaw Dios ñi dewmael kallfü wenu, ti Mapu ka ti wünen kurewen, Adan ka Eva pingelu. Kafey Biblia elukeeiñmew falinke ngülam, tüfa kellukeeiñmew mülen mu küdawngechi dungu. Ka pengeli chumngechi ñi küme elkünutuafiel ti Mapu taiñ Wenu Chaw. Feley llemay, ¡Biblia kiñe sakin yewün tati!

3. ¿Chem kimaymi chillkatufilmi Biblia?

³ Chillkatufilmi Biblia, kimaymi Chaw Ngünechen tami küpa weniyeetew. Doy kimfilmi tami Chaw Dios, doy fülkonaymi kidu mu.

4. ¿Chem mu afmatukefimi Biblia?

⁴ Biblia rulpadungungey doy 3.200 kewün dungu mu, ka rume fentren Biblia dewmangekey. Wall Mapu mu, epe kom pu che papeltuafuy Biblia kidu ñi kewün mu. Ka fillke semana doy kiñe millon Biblia wülngekey. ¡Biblia trürümfal-lay llemay!

5. ¿Chumngelu feypiafuiñ Chaw Ngünechen mu ñi küpan ti Biblia?

⁵ Biblia “wiringey Ngünechen tañi adkünuel ka ñi piel mew” (papeltunge 2 Timotew 3:⁠16). Welu kiñe che rakiduamafuy: “Wentru wirintukulu kay Biblia, feymu  ¿chumngelu ‘Chaw Ngünechen mu küpay’ piafuiñ?”. Ngüneduamnge Biblia ñi feypin: ‘Tüfa engün [pu wirintukufilu Biblia] dungukefuy Ngünechen ñi adkünuletewchi dungu, dunguy engün Ngünechen tañi newen ñi kellun mew’ (2 Pedro 1:⁠21). Tami doy adümafiel tüfa, rakiduamnge: kiñe wentru longkolelu werküfile tati werken ñi kimeldungual kiñe werkün dungu, ¿iney mu küpay ti werkün dungu? ¿Ti longkolelu mu kam ti werken? Ti longkolelu mu llemay. Ka femngechi Biblia Chaw Ngünechen mu küpay, küpalay tati pu wentru mew ñi wirintukufiel. Chaw Dios adkünufi tüfachi pu wentru ñi wirintukuñmangeal tañi rakiduam. Feley llemay, Biblia “Ngünechen ñi küme dungu” tati (1 Tesalonisense 2:⁠13; inaduamnge ti kimelün dungu 2).

6, 7. ¿Chumngelu feypiafuiñ ñi welulkadungukenon Biblia?

⁶ Doy 1.600 tripantu alüñmay ñi wirintukungeal Biblia. Ka trür mülechi antü mew mongelelafuyngün pu wentru ñi wirintukufiel. Kiñeke engün fentren educacion niefuy, welu kakelu engün müte nielafuy. Kiñe lawentuchefengefuy, kakelu ngan ketrafe, kulliñ kamañfe, challwafe, kues ka longko ülmen-ngekefuyngün. Trürlayngün pu wentru ñi wirintukufiel Biblia, welu ñi kimeltukeel kiduke tañi lifru kom kiñewküley, welulkadungukelay. *

⁷ Kom ti Biblia kimeltukey tañi femtripaken Chaw Dios ñi pin. Feymu, ti wünen lifru Biblia mu pengeli Chaw Dios ñi dewmael tati wünen kurewen, Adan Eva engu. Kidu engu kayñetufi tañi Wenu Chaw, feymu kutraningu, füchayngu ka layngu. Rupalu 4.000 tripantu, apostol Juan wirintukuy ti inan lifru Biblia mu, fey pengeli Chaw Ngünechen chumngechi ñi elutuafiel pu che küme felen ka rumel mongen, femngechi ñi ayüwküleal engün.

8. ¿Ka chem dungu mu rüfngey ñi feypin Biblia?

⁸ Biblia wirintukungelay ñi kelluafiel pu kolegiotukelu, fey ñi kimafiel chumngen pu kulliñ ka chumlen ta Mapu. Welu nütramkalu feychi dungu mu, rüfngey ñi feypin. ¿Femngechi femnoafulu Biblia, Chaw Ngünechen mu küpalu? Pu israelche ñi antü mu, kimngekelafuy chumngelu ñi kutranken pu che, welu Chaw Dios feypifi tañi pu che chem chumal ñi kutranelchenoal, femngechi pengeli Biblia Levítico lifru mu. Kafey Biblia feypi ñi pültrülen ti Mapu chem mew no rume, tüfa ta rüfngey (Job 26:⁠7). Kafey pu che welurakiduamkefuy ñi chumlen  ti Mapu, welu Biblia küme pengeli ñi mongkolkülen tüfa (Isaías 40:⁠22).

9. Kom ñi rüf feypin pu wirintukulu Biblia, ¿chem pengeli?

⁹ Fentren che wirintukulu chem ñi rupan kuyfi mu, kom rüf feypilayngün ñi rupan. Feymu newe manelfal-lay kidu engün tañi lifru. Tüfa engün nütramkakelafuy tañi pu che ñi wewngen kam kakelu dungu. Welu rüfngey ñi feypin Biblia nütramkalu chem ñi rupan kuyfi mu. Pu wirintukufilu tüfa kom rüf dunguyngün, wewngelu rume pu israelche. Kafey wirintukuyngün kiduke ñi welulkan. Feymu Números lifru mu, Moyse wirintukuy ñi weda welulkan ka chumngechi ñi norümtuetew Chaw Dios (Números 20:⁠2-12). Kom ñi rüf feypin pu wirintukulu Biblia, pengeli Chaw Ngünechen mu ñi küpan tüfa. Feymu maneluwafuiñ Biblia mu.

10. ¿Chumngelu fente kellukeeiñmu Biblia tañi ngülam?

¹⁰ Biblia “wiringey Ngünechen tañi adkünuel ka ñi piel mew, feymew rume kümey ñi kimeltulngeael ta che ka ñi ngülamtungeael ti welulkawkülelu” (2 Timotew 3:⁠16). Iñchiñ newe kimuwlaiñ taiñ chumngen. Welu Jewba dewmaeiñmu, feymu küme kimnieñmaeiñmu taiñ rakiduam ka taiñ piwke, ka ayükey taiñ ayüwküleal. Kidu kimniey chem taiñ kümelkakeetew ka wedalkakeetew. Feymu fente kellukeeiñmu Biblia tañi ngülam.

11. ¿Chem kümeke ngülam müley Matew lifru mu kapitulo 5 puwlu 7?

¹¹ Matew lifru mu kapitulo 5 puwlu 7, müley kümeke ngülam ñi wülün Jesus, tüfa kimeltueiñmu chumngechi ayüwküleal, ngillatual ka tutewküleal kakelu pu che iñchiñ, ka chem rakiduamal plata dungu mu. Tüfa wirintukungey 2.000 tripantu kuyfi mew, welu fantepu mu petu kümelkakeeiñmu ka kellukeeiñmu.

12. ¿Ka chem kümeke ngülam müley Biblia mu?

 ¹² Biblia mu Jewba ka elueiñmu kümeke ngülam ka falinke kimeltun, tüfa kellukeeiñmu ñi ayüwküleal taiñ pu che, taiñ küme küdawfengeal ka küme yewküleal kakelu pu che iñchiñ. Biblia ñi kümeke ngülam ka tañi falinke kimeltun kellukeeiñmu itrokom iñchiñ, chem küdawngechi dungu mu rume rupaliyiñ, chem chengeliyiñ kam chew müleliyiñ rume (papeltunge Apokalipsi 1:⁠3).

13. Isaia, ¿chem feypikünuy ñi rupayal Babilonia?

¹³ Fentren dungu ñi feypikünungeel Biblia mu femtripawyey. Kiñe ta tüfa: Chaw Dios ñi duam mu, Isaia feypikünuy ñi apümkangeal Babilonia ka küme pengeli chumngechi ñi nüngeal (Isaías 13:⁠19). Ti waria niefuy fütrake puerta, ka walloñmaniekefeyew kiñe lewfü, femngechi ñi kontunoaetew pu kayñe. Welu Isaia feypikünuy ñi arküal ti lewfü ka ñi nülaleal ti fütrake puerta. Ka feypi pu kayñe ñi kewanoal rume tañi nüafiel ti waria. Ka pengeli iney ñi nüafiel: Siro pingefuy (Isaías 44:⁠27–45:⁠2).

14, 15. ¿Chumngechi femtripay Isaia ñi feypikünuel?

¹⁴ Epu pataka tripantulu Isaia ñi feypikünuel tüfa, tañi nüafiel Babilonia akuy kiñe trokiñ weychafe (awkafe). ¿Kimimi iney ñi adniefiel feychi trokiñ weychafe? Siro, Persia ñi longko ülmen. Femtripay tüfachi dungu ñi feypikünuel Isaia. Kom adkünulefuy tañi femtriparpual kom ñi feypikünungeel.

¹⁵ Pu babiloniache maneluwkülefuyngün, mülen mu ti lewfü ka ti fütrake puerta. Welu wekuntu waria, Siro ka pu weychafe kañpüle wütrülfi ti lewfü ñi arkümafiel. Fey naglu ti ko, pu weychafe rumeyngün ti lewfü mu. Welu, ¿chumngechi konafuyngün ti waria mu? Feychi pun pu babiloniache fiestayngün, feymu nülakünungerkey  ti puerta. Fey pu weychafe kewalayngün rume ñi konpual Babilonia mew.

16. 1) ¿Ka chem feypikünuy Isaia ñi rupayal Babilonia? 2) ¿Chumngelu kimnieiñ ñi femtripan Isaia ñi feypikünuel?

¹⁶ Isaia ka feypikünuy iney no rume ñi mülewenoal Babilonia waria mu. Feypi: “Ngewetulayay ta che, turpu  mülewelayay che üye mu” (Isaías 13:⁠20). ¿Femtripay tüfa? Femi llemay. Chew ñi mülekemum Babilonia, fewla fülküley kiñe waria, Bagdad pingelu (Irak). Üye mu peafuymi chumngechi ñi felewen ti waria, chem mongen no rume ngewetulay. Feley llemay, Jewba apümkafi ta Babilonia, lepüfi reke kiñe lepüwe mu (Isaías 14:⁠22, 23). *

17. ¿Chumngelu maneluwküleiñ ñi femtripayal Jewba ñi feypikünuel?

¹⁷ Petu mülewey kakelu dungu ñi femtripayal küpalechi antü mew, kiñe tüfa: küme mülewe ngetual ti Mapu. Rüf maneluwküleiñ ñi femtripayal kom tüfa. ¿Chumngelu? Dew femtripalu kay fentren dungu ñi feypikünungeel Biblia mu (papeltunge Tito 1:⁠2). Feley llemay, Chaw Dios  “feypikünukelu kiñe dungu, ¿femnoafulu?” (Números 23:⁠19). *

18. Ti apostol Pablo, ¿chem feypi “Ngünechen ñi dungu” mew?

¹⁸ Tüfachi chillkatun mu kimürpuymi ñi trürümfalnon Biblia. Welulkadungukelay, ka rüfngey ñi feypin nütramkalu pu kulliñ mu, ti Mapu ka chem ñi rupan kuyfi mu. Kafey elukeeiñmew kümeke ngülam ka pengeli fentren dungu ñi femtripawyen. Welu fey ka müten no. Ngüneduamnge ñi feypin ti apostol Pablo: “Ngünechen ñi dungu mongen dungu ka pepiluwün dungu” (papeltunge Ebrew 4:⁠12).

19. Biblia, ¿chumngechi kelluafeymu kimal tami rüf chumngechi chengen?

¹⁹ Biblia ñi kellun mu, küme elkünutuafuymi tami mongen. Kelluafeymu kimal tami rüf chumngechi chengen. Fey kelluaeymu tami ngüneduamal tami rakiduam ka tami piwke. Inaduamnge tüfa: rakiduampelaymi tami piwkeyefiel ta Chaw Ngünechen. Welu chillkatuniefilmi Biblia, kimürpuaymi tüfa: tami femken mu pengelaymi tami piwkeyefiel taiñ Wenu Chaw. Feymu kimaymi ñi duamfalngen tami inayafiel Biblia ñi feypin.

20. ¿Chumngechi pengelafuymi tami mañumniefiel ti Biblia?

²⁰ Rüfkünu llemay, Biblia Chaw Ngünechen mu küpay. Kidu ayükey tami papeltuafiel, ngüneduamafiel ka falintuafiel. Feymu mañumkülenge tüfachi yewün mu, ka chillkatuniefinge. Femngechi kimaymi chem mongen ayüniey Chaw Ngünechen taiñ nieal. Küpalechi chillkatun mu doy inaduamaiñ tüfa.