1-4. ¿Chumalu Pablo amui ta Jerusalén, ca chem rupayafui üyeu?

 PABLO engu Lucas rume hueñancülefuingu tañi elcünufiel mu pu Éfeso loncolelu cüpafulu Mileto mu. Huelu püraingu farcu mu ñi tripayal Mileto mu. Cüme pepicaucülefuingün ñi tripayal, yeniefuingün com tañi duamnieel ca tati quellu ñi elueteu pu cristiano, fei ñi quelluafiel pu fillalelu Judea mu. Rume ayüniefuingu ñi eluafiel tüfachi quellu tati pu peñi ca pu lamngen Jerusalén mu mülelu.

² Ti farcu pepicaucülefui ñi tripayal, fei ñochiquechi pehuelafingün tañi pu hueni puerto mu mülelu. Pablo, Lucas ca pu regle huentru ñi compañaeteu maichicünuingün ñi cuhu ñi feipiafiel reque “peucayal” (Hech. 20:4, 14, 15).

³ Cuifi mu, pu loncolelu Éfeso mu quiñeucülen cüdahuingün Pablo engu cüla tripantu mu. Huelu feula, Chau Dios adniefi ta Pablo ñi amual ta Jerusalén. ¿Deu quimniepelai chi chem ñi rupayal puule üyeu? Fei feipifi ta pu loncolelu: “Chau Ngünechen ñi nehuen adnieneu, feimu feula amuan ta Jerusalén huaria. Quimlan chem ñi rupayal. Huelu fillque huaria mu, Chau Ngünechen ñi nehuen fentren rupa feipieneu ñi presungeal ca ñi cutrancahual” (Hech. 20:22, 23). Cuñihun-ngelu rume müleal Jerusalén mu, Pablo amui müten, eluhui ñi adnieteu “Chau Ngünechen ñi nehuen”. Pablo ayülafui ñi cutrancangeal, huelu doyümquefi Chau Dios ñi huercüeteu.

⁴ ¿Iñchiñ cai? ¿Pablo reque duamcülepeiñ mai? Hultuculu iñchiñ taiñ mongen Jehová mu, “doyümnieafiñ tami ayüqueel tañi mongen mu” feipicünufiyiñ. Feimu, rume falin-ngei taiñ cüme inaduamal Pablo ñi femün, fei taiñ inayafiel.

5. ¿Cheu püle amuingün Pablo tañi pu compañ engün ñi puhual ta Tiro?

⁵ Pablo tañi pu compañ engün nor amuingün, quellueyu ti cürüf, fei cañpüle rupalaingün. Femngechi, feichi antü mu müten puhuingün ta Cos huaria mu (Hech. 21:1). ¿Umapuingün fei mu peno? Ca antü mu amuingün ta Rodas, fei hula amuingün ta Pátara huaria, sur püle  Asia Menor mu. Üye mu, pürapuingün quiñe farcu negociaquelu, fei ñi puhual Tiro huaria mu. Lucas feipi chem rupai petu ñi amulen: “Huele ad püle farcu mu adquintufiyiñ ta Chipre huapi, huelu rulpacünufiyiñ” (Hech. 21:3). ¿Chumngelu nütrameleiñmu tüfa? Peafiyiñ.

6. 1) Pablo pefilu Chipre, ¿nehuentucupelaeyu tüfa? ¿Chumngelu? 2) Ngüneduamlu eimi chumngechi tami quelluqueteu Jehová, ¿chem piqueimi, chum duamcülequeimi?

⁶ Pefiel mu Chipre, Pablo, ¿raquiduampelai chem tañi rupan üyeu? Tati hunen rupa ñi amun Pablo tañi misionerongen, rupai Chipre mu Bernabé ca Juan Marcos engün, ailla tripantu deu rupauyefui. Üye mu, caiñetueyu ti calcu huentru Elimas (Hech. 13:4-12). Pablo, ¿nütramelpelafi tañi pu compañ com tüfa petu ñi amulen farcu mu feula? Fei tüfa, ¿nehuentucupelaeyu ta Pablo ñi chaftuafiel huesaque dungu Jerusalén mu? Ca femngechi, rume cümei iñchiñ mu ngüneduamal chumngechi taiñ füreneeteu ca quelluqueteu Chau Jehová taiñ chaftual huesaque dungu. Loncontucuniequeiñ: fentren huesaque dungu mu rupaquei pu nor che, huelu, chumngechi ñi feipin David, Chau Jehová “montulnieyu com tüfachi dungu mu” (Sal. 34:19).

7. ¿Chumingün Pablo tañi pu compañ engün puulu ta Tiro?

⁷ Pablo quimniefui fente ñi falin-ngen quiñentrür müleal pu peñi ca pu lamngen engün, feimu rume ayüniefui ñi peafiel engün. Lucas nütrameleiñmu puulu engün müten ta Tiro quintufingün pu feyentulelu, fei ñi peafiel engün (Hech. 21:4). Quimniefuingün ñi mülen cristiano Tiro huaria mu, ayüfuingün ñi peafiel, fei umañelpelaeyu engün. Famülque mu, ca femngechi nieiñ peñihuen ca lamngenhuen huall mapu püle. ¡Cüme dungu tati! Cheu rume miyauliyiñ, cüme llohuaiñmu taiñ pu peñi ca pu lamngen. Inei rume poyefile ca inafile Chau Jehová ñi feipin, nieai cümeque hueni com mapu püle.

8. ¿Chumngechi quimeltuafuimi ñi feipin Hechos 21:4?

⁸ Pablo tañi pu compañ engün regle antü mülenagingün Tiro mu. Lucas nütrameleiñmu chem ñi rupan petu ñi mülen engün üye mu. Feipi: “Chau Ngünechen ñi nehuen adcünufi tati pu feyentulelu. Feimu fillque rupa feipifingün ta Pablo ñi amunoal ta Jerusalén” (Hech. 21:4). ¿Chumngelu tüfachi texto feipilei Chau Dios ñi adcünueteu engün? ¿Chau Dios feipipei mai ñi amunoal Pablo? No, femlai. Chau Dios tañi nehuen mu quimelelfi ta Pablo ñi cutrancangeal Jerusalén mu, huelu feipilafi ñi amunoal. Feimu, ¿chumngechi adümürpuafuiñ ti texto? Chau Dios tañi nehuen mu quimelelfi pu discipulo Pablo ñi rume cutrancangeal. Quimlu engün tüfa, cutranpiuqueyefingün, ayüfuingün ñi cuñiutucuafiel, feimu feipifingün ñi amunoal. Epe com che, femngechi rupafule, ayüafui ñi femal. Feipingelu rume ñi amunoal, Pablo eluucülefui ñi femal Chau Dios tañi piel, amui müten ta Jerusalén (Hech. 21:12).

9, 10. 1) Feipingelu Pablo ñi amunoal ta Jerusalén, ¿chem rupan dungu raquiduampelai? 2) Epe com che, ¿chem raquiduamqueingün ti cüdau mu, huelu chem pi Jesús?

⁹ Feipingelu Pablo ñi amunoal ta Jerusalén, ¿raquiduampelai ñi rupan Jesús? Jesús feipifi tañi pu discipulo ñi amual ta Jerusalén tañi cutrancangeal ca langümngeal, feimu ca femngechi cüpa catrütungei. Pedro feipi: “¡Cutranpiuqueyeunge, Ñidol! Eimi rupalayaimi tüfachi dungu mu”. Huelu Jesús feipieyu: “¡Püntütripange iñche mu, Satanás! Catrütumequeen ñi femal Chau Ngünechen ñi ayüqueel. Nielaimi Chau Ngünechen tañi raquiduam, huelu mai huentru ñi raquiduam nieimi” (Mat. 16:21-23). Pedro cüme piuque mu entui ñi feipin, huelu Jesús eluucülefui ñi femal ti cüdau ñi elfalcünueteu Chau Jehová, langümngefule rume. Ca femngechi raquiduamquefui Pablo. Pu cristiano Tiro mu mülelu cüme piuque mu feipifingün ñi amunoal, huelu cüme adümlafuingün Chau Jehová ñi ayünieel, feita: Pablo ñi amual müten ta Jerusalén.

¹⁰ Famülque mu, epe com che pilai ñi rume cüdahual, “¡aungen, rume cüdaungei! Femlayan” piqueingün, fei quintuqueingün quiñe religion ñi feipinoaeteu fentren dungu tañi femafel. Huelu Jesús quimeltufi tañi pu  discipulo ñi cüme cüdaufengeal, feipifi engün: “Inei rume ayüle tañi inayaeteu, quisu illamuupe, eluupe ñi meñcu yenieal tañi orcon mamüll iñche reque ca inaechimeu” (Mat. 16:24). Inaniefiel mu iñchiñ ta Jesús, llouqueiñ fentren cümeque dungu, huelu cüdaungei taiñ femal.

11. Pu peñi ca pu lamngen Tiro mu, ¿chumngechi pengelingün ñi piuqueyeniefiel ta Pablo ca ñi quelluntucumequefiel?

¹¹ Puhui ti antü, Pablo, Lucas ca tañi pu compañ engün mülefui ñi tripayal Tiro mu. Biblia raquiduameleiñmu fente ñi hueñancün-ngen feichi antü. Tiro mu mülechi pu cristiano rume piuqueyequefuingün ta Pablo ca quelluntucuquefuingün ñi femal tañi cüdau. Pu peñi, pu lamngen ca pu pichiqueche, com compañfingün inaltu lafquen, lucutunagingün, llellipuingün, fei “peucayal” pifingün. Fei hula, Pablo, Lucas ca tañi pu compañ engün püraingün farcu mu ñi amual ta Tolemaida. Üyeu pefingün pu peñi ca pu lamngen, fei mülenagingün quiñe antü (Hech. 21:5-7).

12, 13. 1) Felipe, ¿tunte cüdahuelquefui ta Chau Jehová? 2) Felipe inayentufalngei pu ngen familia mu, ¿chumngelu?

¹² Pablo ca tañi pu compañ amuingün ta Cesarea, a “Felipe ñi ruca mu, tati amuldunguquelu pingei” (Hech. 21:8). Fentren tripantu yeniefui ñi cüdahuelquefiel ta Chau Jehová. Feichi mu rupauyefui 20 tripantu ñi elfalcünungen Jerusalén mu ñi hudamcalelafiel iyael, fei ñi eluafiel pu trahunche. Cafei, fentren tripantu amuldunguquefui com tañi nehuen mu. Caiñetungelu pu cristiano Jerusalén mu, Felipe amui ta Samaria ñi amuldungual. Cafei, quimeltufi ti rüf dungu tati Etiopía huentru, fei fautizafi (Hech. 6:2-6; 8:4-13, 26-38). ¡Rume ayüupelaingün ñi pefiel tüfachi cüme peñi!

¹³ Felipe fentecünulai ñi amuldungual com tañi nehuen mu. Cesarea mu, amulequefui ñi amuldungumequen, feimu Lucas feipi “tati amuldunguquelu” ñi pingequen ta Felipe. Feichi mu niefui meli ñahue amuldunguquelu tañi Chau reque (Hech. 21:9). b Quimfali, Felipe cüme quimeltufi tañi familia  ñi piuqueyeafiel ca cüdahuelafiel ta Chau Jehová. Pu ngen familia, ¿chumngechi inayentuafui ta Felipe? Mülei ñi inayentufalngeal tañi amuldunguquen mu ca mülei ñi quelluafiel tañi pu pichiqueche ñi ayühunquechi amuldungual com tañi piuque mu.

14. 1) Pablo huitranmaquefui pu trahunche, ¿chum tripai tüfa? 2) Famülque mu, ¿chumafuiñ taiñ hueluconque yafültucuhual?

¹⁴ Cheu rume ñi miyahun Pablo, quintuquefui pu peñi ca pu lamngen ñi quiñentrür müleal. Ca, fei engün ayühunquechi llouquefuingün ta Pablo ca tañi pu compañ. Femngechi, hueluconque yafültucuuquefuingün (Rom. 1:11, 12). Famülque mu, mangelafuiñ taiñ ruca mu tati huitran-ngepaquechi loncolelu tañi domo engu, pofrengeliyiñ rume. Femngechi cafei hueluconque yafültucuhuafuiñ fentren rupa (Rom. 12:13).

15, 16. ¿Chem feipicünui Ágabo, fei chum duamingün pu allcütulu?

¹⁵ Pablo petu mülecai Felipe tañi ruca mu, fei acui Ágabo. Com pu trahuluucülelu quimniefuingün Ágabo ñi profetangen, tüfa feipicünui ñi fillayal pu che petu ñi ngüneniemequen Claudio, ca femtripai ñi feipin (Hech. 11:27, 28). Feimu, ramtuupelaingün: “¿Chumalu cüpai? ¿Chem feipipayai?”. Petu ñi pefiel engün, Ágabo entuñmafi ñi trarihue ta Pablo. Feichi pañu trarihue mu pu che guardaquefui moneda ca itrofillem. Tüfa mu Ágabo quisu traricünuhui ñi namun ca tañi cuhu, fei feipi: “Tüfa ñi feipin Chau Ngünechen ñi nehuen: ‘Jerusalén huaria mu pu judio femngechi traricünuafingün tati ngen-ngelu tüfachi trarihue. Pu catripanche ñi cuhu meu hultucungeai’” (Hech. 21:11).

¹⁶ Ágabo ñi feipicünuel quimelelfi engün Pablo ñi puhual ta Jerusalén. Cafei quimürpuingün pu judio üye mu ñi hultucuafiel ta Pablo “pu catripanche ñi cuhu meu”. Müllmüllcülehueingün com pu allcütulu  tüfa. Lucas feipi: “Allcülu iñchiñ ca pu trahuluucülelu, llellipufiyiñ ta Pablo ñi amunoal ta Jerusalén huaria mu. Feimu Pablo feipi: ‘¿Chumngelu ngümamequeimün? ¿Chumngelu cüpa huesa duamelmun tañi piuque? Loncontucuniemün, eluucülen tañi traricünungeal Jerusalén huaria meu. Huelu feica müten no, ca eluucülen tañi layal Ñidol Jesús ñi üi meu’” (Hech. 21:12, 13).

17, 18. Pablo, ¿chumngechi pengeli ñi eluucülen tañi femal Chau Dios tañi piel? Pefiel mu tüfa pu cristiano, ¿chumingün?

¹⁷ Raquiduamnge com tüfachi dungu ñi rupan: com pu trahuluucülelu, Lucas cafei, ngümalen feipifingün ñi amunoal ta Jerusalén. Pefiel mu tüfa Pablo, fente ñi duamtueteu pu peñi ca pu lamngen, piuqueyenquechi feipifi engün: “¿Chumngelu ngümamequeimün? ¿Chumngelu cüpa huesa duamelmun tañi piuque?”, feipicai reque “¡allfülmamun tañi piuque!”. Huelu Pablo eluulai ñi catrütuaeteu pu cristiano Tiro mu, ca femngechi tüfa mu catrütulaeyu pu cristiano Cesarea mu. Doi mai, feipifi engün chumngelu mülefui ñi amual. ¡Fente nehuen piuquengefui Pablo! Jesús reque, Pablo eluucülefui ñi amual ta Jerusalén (Heb. 12:2). Pablo ayüquelafui ñi layal, huelu femngechi rupafule tañi inaniefiel mu ta Cristo, ayühunquechi eluhuafui ñi langümngeal.

¹⁸ ¿Chumingün cai pu peñi ca pu lamngen allcütulu ñi feipin Pablo? Biblia feipi: “Pepi catrütulafiyiñ, fei chem pihuelafiyiñ rume. ‘Chau Jehová ñi pin femngepe’ pileiñ” (Hech. 21:14). Femngechi yamniefingün ñi feipin Pablo ca “amulayaimi Jerusalén” pihuelaingün. Feichi pu peñi ca pu lamngen hueñancüingün tañi rupayafel Pablo, huelu quimtucuingün ñi doi falin-ngen Chau Jehová tañi piel. Pablo niefui tüfachi cüdau ca eluucülefui tañi femal, feimu tati pu che ñi piuqueyenieteu ngelafui ñi catrütuaeteu, femngechi doi cüdaungelayafui tañi femal.

19. Pablo tañi rupan, ¿chem falin dungu quimeltueiñmu?

¹⁹ Tüfa ñi rupan Pablo quimeltueiñmu quiñe falin dungu: turpu catrütulayafiyiñ pu che ñi femnoal fütraque dungu ñi cüdahuelafiel ta Chau Dios. Trür femngechi, Pablo reque, rupalayafui taiñ piuqueyen che famülque mu, huelu fentren fütraque dungu femafuingün ñi poyeafiel ta Chau Jehová. Quiñe tüfa: fentren chau ca ñuque rume hueñancüqueingün pefiel mu tañi pu fotüm, ñahue, ñi amun camapu ñi cüdahuelafiel Jehová. Taiñ lamngen Phyllis, Inglaterra mapu mu, feipi ñi allfülcangen reque tañi piuque pefilu tañi domo püñeñ ñi amun ta África ñi doi amuldungual. Cafei feipi: “Rume ayüucülequefun com tañi femün meu tañi saquin püñeñ, huelu rume hueñancülqueneu ñi mülen alücamapu. Fentren rupa llellipufiñ ta Chau Jehová. Huelu tañi püñeñ ayüquefui ñi femal, feimu ‘huiñotuaimi’ piquelafiñ. ¡Iñche ta quimeltufiñ ñi doyümafiel Chau Jehová tañi dungu! Deu yeniei 30 tripantu ca mapu mu, püntütripaquelai Chau Dios mu, feimu fill antü mañumquefiñ ta Chau Jehová”. Tüfa raquiduamelqueiñmu: rume cüme  dungu tati taiñ yafültucufiel pu peñi ca pu lamngen femmequelu fütraque dungu ñi doi cüdahuelafiel ta Chau Jehová.

20, 21. ¿Chumngechi pengeli Pablo ñi ayüuquen quiñentrür müleal tati pu trahunche engün? ¿Chumngelu ayüuquefui tüfa?

²⁰ Pablo tañi pu compañ engün pepicahuingün ñi amual ta Jerusalén, fei quiñeque cristiano Cesarea mu eluhuingün ñi ca compañafiel, femngechi pengelingün ñi quelluntucumequefiel tañi hueni. Fill püle tañi rupan engün quintuquefuingün pu peñi ca pu lamngen ñi quiñentrür müleal. Raquiduamnge tüfa: Tiro mu regle antü mülenagingün. Tolemaida mu pentucuhuingün com quiñe antü. Cesarea mu mülenagingün quiñeque antü Felipe ñi ruca mu, fei quiñeque cristiano compañfingün ñi puhual ta Jerusalén. Üye mu, Mnasón umañelfi engün tañi ruca mu. ¿Chumngechi lloungeingün? Lucas feipi: “Pu peñi ca lamngen ayühun mu llohueiñmeu” (Hech. 21:17).

²¹ Pablo rume ayüniequefui ñi müleal tañi pu peñi ca pu lamngen engün, müna yafültucuquefeyu engün, ca femngechi duamqueiñ iñchiñ famülque mu. Pablo caiñetungei ca cüpa langümngei, huelu fente ñi quellueteu tañi pu hueni, nehuentucuhui ñi femal ñi cüdau.