CAPITULO 21
“Culpaconlan ta inei no rume ñi lan mu”
Pablo ca elufi cümeque ngülam tati pu loncolelu
Hechos 20:1-38 mu entungei
1-3. 1) ¿Chem dungu mu rupai Eutico? 2) ¿Chumi Pablo, fei chem quimeltueiñmu?
TROAS huaria mu, Pablo trahuluhui fentren peñi ca lamngen engün quiñe ruca mu tañi cülangechi piso mu. Pablo ayüfui ñi feipiafiel fentren dungu petu ñi amutunon, feimu alüpuni tañi nütramcamequefiel. Feiti pieza mu mülefui fentren pelontuhue, feimu fitruncülefui ca eñumcülefui, cüdaungefui ñi neyüal. Quiñe ventana mu anülerquefui quiñe hueche huentru Eutico pingelu. Añitumequefui petu ñi hueupimequen Pablo, fei repente ütrüfnagrumei.
2 Tañi doctorngen mu Lucas, ¿hune tripapelai ñi quellumeafiel ta Eutico? Huelu deu larquei ti hueche (Hech. 20:9). Feimeu müten, Pablo nagpai, rofülnacümfi ti hueche ca feipifi tati pu che: “Ngelai tamün llicayal. Mongelecai tati”. ¡Pablo huiñomongeltufi ta Eutico! ¡Afmatufali! (Hech. 20:10).
3 Eutico tañi rupan mu quimfali fente ñi nehuen-ngen ta Chau Jehová. Pablo culpalai tañi lan mu Eutico, huelu ayülai ñi hueñancüleal ti trahunche feichi falin antü meu, feimu huiñomongeltufi tati hueche. Femngechi, yafültucufi engün ca nehuentucufi ñi ayühunquechi amuldunguleal. Pablo rume falintuquefi ca yamniequefi tati mongen, feimu feipi: “Culpaconlan ta inei no rume ñi lan mu” (Hech. 20:26). ¿Chumngechi inayentuafuiñ ta Pablo? Peafiyiñ.
“Amutui ta Macedonia” (Hechos 20:1, 2)
4. Éfeso mu, ¿chem huesa dungu rupai Pablo?
4 Capitulo 20 mu, inaduampeiñ ñi huesa rupan Pablo Éfeso mu. Pu fendequelu pichique adentun ñi püramyengeal ta Ártemis pofolcahuingün, fei tati pu che quehuayauquefui. “Fentecünulu ti quehuan dungu, Pablo feipifalfi ti pu peñi ñi cüpayal. Yafültucufi ca chaliyetufi engün”, fei hula amui ta Macedonia (Hech. 20:1).
5, 6. 1) ¿Tunten tiempo mu chi mülenagi Pablo Macedonia mu, ca chumngechi quellufi ti trahunche? 2) ¿Chumngechi pengeli ñi piuqueyefiel tati pu trahunche?
5 Petu ñi amulen ta Macedonia, Pablo rupai Troas mu. Üye mu mülenagi pichin tiempo. Esperamequefui ñi acual Tito, Corinto mu miyaufulu (2 Cor. 2:12, 13). Huelu Pablo ngüneduami ñi acunoal Tito, fei amui müten ta Macedonia. Üye mu, quiñe tripantu püle “rume yafültucufi tati pu inanieteu” (Hech. 20:2). a Rupalu ta tiempo Pablo engu Tito peutuingu Macedonia mu. Tito feipifi ta Pablo pu Corinto che cüme llohuingün tañi hunen huercüfielchi carta (2 Cor. 7:5-7). Feimu Pablo ca huercüi cangelu carta, tüfa ta Epungechi Corintios pingelu.
6 Ngüneduamfali ñi feipin Lucas: Pablo ñi yafültucufiel pu cristiano Éfeso ca Macedonia mu. Tüfa raquiduamelqueiñmu Pablo ñi duamtufiel engün rüf piuque mu. Pablo trürlafui tati pu fariseo mu, doicülelu troquiulai, rume piuqueyefi tañi pu peñi ca pu lamngen. Ayüucülefui tañi quiñentrür cüdahual engün (Juan 7:47-49; 1 Cor. 3:9). Quiñeque mu mülefui ñi norümtuafiel pu trahunche, femlu rume, quimcaulai (2 Cor. 2:4).
7. Pu loncolequelu, ¿chumngechi inayentuquefingün ta Pablo?
7 Famülque mu, pu loncolelu ca pu huitran-ngepaquechi loncolelu eluucüleingün ñi inayentuafiel Pablo ñi femün. Fei, mülefule engün ñi norümtuafiel quiñeque peñi ca lamngen, yafüluuqueingün ñi quelluafiel. Cüpa juzgalafingün, doi mai duamtufingün rüf piuque mu. Quiñe loncolelu yenielu fentren tripantu ñi huitranmaquefiel pu trahunche feipi: “Epe com pu peñi ca pu lamngen yafüluuquei ñi cüme femal, huelu quiñeque mu rupaqueingün huesaque dungu mu, huesa duamqueingün, llicaqueingün ca quimquelaingün chem tañi femafel”. Pu loncolelu rume quelluquefi pu peñi ca pu lamngen femngechi duamcülelu (Heb. 12:12, 13).
“Quiñehuingün ñi langümaeteu” (Hechos 20:3, 4)
8, 9. 1) Pablo, ¿chumngelu amulai ta Siria? 2) Pu judio, ¿chumngelu üdefingün ta Pablo?
8 Pablo elcünui Macedonia ñi amual ta Corinto. Üye mu mülenagi cüla cüyen. b Pablo feipifui ñi amual ta Cencreas, fei ñi pürayal farcu mu ñi puhual ta Siria. Fei, amuafui ta Jerusalén ñi puhulafiel ti quellu ñi duamnieel pu peñi ca pu lamngen üye mu (Hech. 24:17; Rom. 15:25, 26). c Huelu ruparumei quiñe huesa dungu, “pu judio quiñehuingün ñi langümaeteu” (Hech. 20:3).
9 Pu judio feipiquefui Pablo ñi chaftufiel tañi feyentun engün, feimu üdefingün. Crispo, tati loncolelu pu judio ñi ngillatuhue ruca mu, cristianongerpui allcütufilu ñi amuldunguel Pablo Corinto mu (Hech. 18:7, 8; 1 Cor. 1:14). Cangelu rupa, pu judio ayüfui tati gobernador Galión ñi juiciantucuafiel ta Pablo, feimu feipintucufingün ñi chaftufiel tati ley, huelu Galión famentueyu engün, fei rume illcuingün (Hech. 18:12-17). Feula pu judio ayüfuingün ñi langümafiel ta Pablo Cencreas huaria mu, ¿quimpelaingün Pablo ñi amual üyeu, cam re raquiduamingün chi? Quimlaiñ, huelu peaiñ chem ñi femün Pablo.
10. Pablo amulai Cencreas, huelu feipilayafuiñ ñi llicanchengen ¿chumngelu?
10 Pablo yeniefui ti quellu ñi trapümel pu trahunche, feimu amulai Cencreas. Doi mai, huiñotui Macedonia, femngechi ñi cuñiutucuhual tañi mongen ca tati falin quellu ñi yenieel. Ca cuñihun-ngefui miyahual rüpü meu, miyauquefui hueñefe ca fentren huesaque dungu mülefui cheu ñi umautuam pu che, huelu Pablo raquiduami doi cuñihun-ngeafui amufule ta Cencreas. Quisuyaulai, compañeyu Aristarco, Gayo, Segundo, Sópater, Timoteo, Tíquico ca Trófimo (Hech. 20:3, 4).
11. Famülque mu, ¿chumngechi cuñiutucuuqueiñ amuldungun mu? Amuldungulu Jesús, ¿chumngechi cuñiutucuhui?
11 Pablo reque, cuñiutucuuqueiñ taiñ mongen amuldunguyauliyiñ. Cuñihun-ngele quiñe lof, quisuyauquelaiñ. Cafei, pu autoridad cüpa catrütufile taiñ amuldungun cüdau, fentecünuquelaiñ taiñ amuldunguchequen, huelu cuñiutucuuqueiñ (Juan 15:20; 2 Tim. 3:12). Raquiduamaiñ ñi femün Jesús. Quiñe rupa, Jerusalén mu, Jesús ngüneduami tañi pu caiñe ñi ñimitumequen cura tañi ütrüftuaeteu. Feimu “ellcahui, fei amutui” (Juan 8:59). Cangelu rupa pu judio ayüfui ñi langümafiel, fei Jesús “fentecünui ñi miyahun pu judio ñi adquiñ mu. Efraín huaria mu amui”, püllelelu huellin mapu meu (Juan 11:54). Chau Jehová elufi ta Jesús quiñe falin cüdau, feimu Jesús cuñiutucuuquefui tañi huechurpuafiel. Ca femngechi femqueiñ iñchiñ famülque mu (Mat. 10:16).
“Rumeñma yafülduamcülehuei engün” (Hechos 20:5-12)
12, 13. 1) ¿Chum duamingün pu peñi ca pu lamngen huiñomongetulu Eutico? 2) ¿Chem maneluhun yafülduamelqueiñmu iñchiñ?
12 Pablo ca tañi pu compañ quiñentrür miyahuingün Macedonia püle. ¿Pichiñma mu peno hudahuingün? Huelu “quechu antü rupalu” d huiño trahutuingün, feimu Lucas huirintucui: “Trahuiñ ta Troas huaria mu” (Hech. 20:6). e Üye mu, Pablo huiñomongeltufi ta Eutico, chumngechi ngüneduampeiñ hunenque parrafo mu. ¿Chum duamingün pu peñi pefilu tüfa? “Rumeñma yafülduamcülehuei engün” (Hech. 20:12).
13 Famülque meu, rupaquelai femngechi afmatun dungu. Huelu pu layeluulu ‘rumeñma yafüluuqueingün’ raquiduamfiel mu ñi huiñomongetual tati pu lalu (Juan 5:28, 29). Eutico culpan chengefui, feimu rupalu ta tiempo ca huiño lai (Rom. 6:23). Huelu pu huiñomongetualu hue mapu mu rumel mongeleafuingün, ca pu huiñomongetualu huenu mu ñi ngünenieal Jesús engün llohuaingün laquenochi cuerpo (1 Cor. 15:51-53). Tüfachi cüme maneluhun rumeñma yafülduamelquefi pu amualu huenu mu ca pu “caquelu ufisa” reque felelu (Juan 10:16).
“Pu che ñi adquiñ meu ca fill ruca püle” (Hechos 20:13-24)
14. Pablo, ¿chem feipifi pu loncolelu trahuluulu engün Mileto mu?
14 Pablo tañi pu compañ engün tripaingün Troas mu ñi amual ta Asón, fei hula amuingün ta Mitilene, Quíos, Samos ca Mileto. Pablo ayüfui ñi puhual ta Jerusalén feichi antü fiestañmangelu tati Pentecostés, fei ñi matu puhual huiñotui quiñe farcu mu rupanoalu Éfeso mu. Huelu ca ayüfui ñi nütramcayafiel pu loncolelu Éfeso mu, feimu feipifi engün ñi pepayaeteu Mileto mu (Hech. 20:13-17). Trahuluulu engün feipifi: “Eimün cüme quimnieimün chem tañi femün iñche rangiñ eimün meu, hue aculu ta Asia mapu mu. Esclavo reque cüdahuelfiñ ta Ñidol ñom piuque meu. Ngüman ca cutrancahun tati pu judio ayülu ñi langümaeteu ta iñche. Huelu mai fentecünulan ñi feipial chem dungu rume tamün cümelcayaeteu. Cafei fentecünulan tamün quimeltuafiel pu che ñi adquiñ meu ca fill ruca püle. Doi mai cüme huldungulelfiñ tati pu judio ca pu Grecia che tüfachi dungu: mülei ñi nor raquiduamtual, huiñotual Chau Dios mu ca feyentual taiñ Ñidol Jesús meu” (Hech. 20:18-21).
15. Doyümqueiñ ti amuldungun fill ruca püle, ¿chumngelu?
15 Famülque mu, caquerumei chumngechi amuldunguqueiñ. Pablo reque, amuldunguqueiñ rüpü püle, paradero, negocio ca cheu rume ñi miyauquen fentren che... Huelu doyümqueiñ amuldungual fill ruca püle. ¿Chumngelu? Raquiduamnge tüfa, quiñe rupa müten rupaquelaiñ fill ruca mu, fentren rupa femqueiñ. Fei, com feichi pu che quiñeque antü allcütuafui tati cümeque dungu. Tüfa pengelquei Chau Jehová ñi dullintuchequenon. Cafei, amuldungun mu fill ruca püle, doi cüme quimafuiñ chem duamniei tati che cüme piuquengelu, fei taiñ quelluafiel ñi quimafiel ta Chau Dios. Ca quiñe cüme dungu mülei, nehuentucuqueiñmu iñchiñ ca quelluqueiñmu taiñ doi maneluhual Chau Jehová mu. Fei llemai, amuldunguqueiñ “pu che ñi adquiñ meu ca fill ruca püle”, femngechi quimfali taiñ rüf cristianongen.
16, 17. Pablo llicanchengelai, ¿chumngelu feipiafuiñ? ¿Chumngechi inayentuafuiñ cai?
16 Pablo amulei ñi nütramcafiel pu loncolelu Éfeso mu cüpalu, feipifi engün ñi quimnon chem tañi chaftuafiel Jerusalén mu, ca feipi: “Falintuquelan rume tañi mongen. Ayülen ñi huechunentual tañi dungu ca ti cüdau ñi elueteu ta Ñidol Jesús. Fei tüfa ta cüme huldungual ti cümeque dungu Chau Ngünechen ñi fütra cutranpiuqueyechen meu” (Hech. 20:24). Pablo rume caiñetungei ca contueyu cutran, huelu chem no rume catrütulaeyu ñi femal Chau Dios tañi ayünieel.
17 Caquerumei taiñ huesa rupamequen com pu cristiano famülque mu. Quiñeque engün catrütungequei ti amuldungun cüdau tañi mapu mu, ca caiñetungeingün, ca contuqueyu huesaque cutran, ca huesa duamcüleingün tañi raquiduam mu. Pu huechequeche ca ngüchaltucungequei colegio mu. Chem huesa dungu rume contueliyiñmu, Pablo reque, iñchiñ eluucüleaiñ taiñ “cüme huldungual ti cümeque dungu”.
“Quisu ngüneduamuhuaimün ca cuñiutucuafimün […] pu ufisa” (Hechos 20:25-38)
18. Pablo, ¿chumngelu feipi ñi culpaconnon inei no rume tañi lan mu? ¿Chumngechi inayentuafeyu pu loncolelu Éfeso mu?
18 Pablo allmalltui ñi feipiafiel pu loncolelu Éfeso mu cüpalu ñi pehuenoaeteu engün. Fei cüme ngülamtufi engün ca raquiduamelfi chumngechi tañi cuñiutucufiel pu trahunche. Feipi: “Culpaconlan ta inei no rume ñi lan mu. Iñche fentecünulan tamün feipiafiel com ñi ayünieel ta Chau Ngünechen”. ¿Chumngechi cai inayentuafuingün Pablo ñi femün? Pablo ngülamtufi: “Quisu ngüneduamuhuaimün ca cuñiutucuafimün Chau Ngünechen ñi pu ufisa. Chau Ngünechen tañi nehuen elcünueimünmeu tamün cuidayafiel Chau Dios tañi trahunche, fei tañi Fotüm ñi mollfüñ mu culli ñi ngillayafiel engün” (Hech. 20:26-28). Pablo ca feipicünufi engün chem ñi rupayal, feipifi: “Eimün meu ta conpuai huesaque auca trehua, [...] quimeltuai huelulcalechi dungu. Fei ngüchaltucuafingün tati pu feyentulelu tañi inayaeteu engün”. ¿Chem mülefui ñi femal pu loncolelu? Pablo quimfalcünufi: “Trepeluucülemün. Loncontucunieaimün, cüla tripantu fentecünulan ñi ngülamtufiel caque quiñeque eimün antü ca pun meu. Tripai ñi cülleñu cütu” (Hech. 20:29-31).
19. Rupalu 60 tripantu ñi lan ta Jesús puulu ta fantepu meu, ¿chem rupai?
19 Rupalu 60 tripantu püle ñi lan ta Jesús, conpuingün trahunche mu quiñeque che “auca trehua” reque felelu. Ti apostol Juan, 98 tripantu püle, huirintucui: “Quimnieimün ñi cüpalen feiti caiñetuquefilu ta Cristo. [...] Iñchiñ mu tripai engün, huelu rüf coneltulelafuingün iñchiñ taiñ troquiñche meu. Femngechi femngefule engün, turpu tripatulayafuingün” (1 Juan 2:18, 19). Rupalu 200 tripantu ñi lan ta Jesús, coilaque cristiano loncolequelu illamcafingün ti trahunche, quiñehuingün, fei doicülelu troquiuquefuingün tañi loncolen mu. Fei rupalu 100 tripantu hula, Constantino pingechi lonco ülmen Roma mu quelluntucufi engün. Fei religioncünufi tañi coila troquiñche ley dungu mu. Feichi coilaque loncolechi religioso reyülfingün Biblia tañi feipin ca caquelu coilaque quimeltun ca huimtun, “fei tüfa lle ñi femafel pu cristiano” piquefuingün. Huelu re “huelulcalechi dungu” tañi quimeltuel. Fantepu meu, fillque iglesia amulei ñi quimeltumequen feichi huelulcalechi dungu.
20, 21. Pablo quintulai quisutu ñi cümelcaleal müten, ¿chumngechi pengeli tüfa? Famülque mu, ¿chumngechi inayentuqueyu pu loncolelu?
20 Feichi coilaque loncolequelu turpu trürümlayafuiñ ta Pablo. Fei engün allmalltuingün ñi quisutu cümelcahual trahunche mu. Huelu Pablo rume cüdahui ñi nieal tañi duamnieel, raquiduamlai rume ñi cofrayafiel pu peñi ca pu lamngen, ayüfui ñi quelluafiel pu trahunche. Feimu ngülamtufi pu loncolelu Éfeso mu cüpalu ñi ca femngechi femal, feipifi: “Com dungu meu pengeleluhuiyiñ tamün rume cüdahual, fei ñi quelluafiel tati pu ngañhuadcülelu. Cafei mülei tamün raquiduamtucual Ñidol Jesús ñi feipin: ‘Tati llouquelu ñi elungeel niei ayühun. Huelu doi niei ayühun tati hulquelu ñi nieel’” (Hech. 20:35).
21 Famülque mu, pu loncolelu trahunche mu inayentuniefingün ta Pablo. Quintuquelaingün quisutu ñi cümelcaleal müten, doi mai ñi cümelcaleal ti trahunche. Quimnieingün Chau Dios tañi elfalcünueteu ñi cuidayafiel tañi trahunche, raquiduamquelaingün rume ñi cullingeal tañi femün mu. Chau Dios ayüniei ñi lifcüleal tañi trahunche, feimu famentungequei pu mallma chengelu, diñmatuquelu ca checahun-ngelu. Inei rume ayüle ñi quisutu püramyengeal, illamcangeai (Prov. 11:2; 25:27).
“Com ngümacahui engün” (Hechos 20:37).
22. Pu loncolelu Éfeso mu cüpalu, ¿chumngelu fente piuqueyeniefingün ta Pablo?
22 Amutulu Pablo, com pu loncolelu “ngümacahui engün” ca pengelfingün fente tañi piuqueyeniefiel (Hech. 20:37, 38). Pablo rüf piuqueyequefui tañi pu peñi ca pu lamngen, feimu fei engün ca piuqueyeniequefeyu. Ca femngechi, famülque mu, fentren cristiano Pablo reque feleingün, yafüluuqueingün ñi cuidayafiel tañi pu peñi ca pu lamngen, elantücünuqueingün, hulqueingün tañi falinque fillem ca com tañi nehuen mu cüdauqueingün. Feimu, rume falintuquefiyiñ ca piuqueyeniequefiyiñ. Fentren cümeque quimeltun entuiñ Pablo tañi femün mu, adümqueiñ chumngelu ñi rüfngen tañi feipin: “Culpaconlan ta inei no rume ñi lan mu” (Hech. 20:26).
a Inaduamnge ti huichulechi dungu: “ Pablo cartai Macedonia mu”.
b ¿Feichi cüla cüyen mu peno huirintucui Romanos?
c Inaduamnge ti huichulechi dungu: “ Pablo quelluntucui plata mu”.
d Cangelu rupa tripalu engün Filipos mu ñi amual farcu mu ta Troas, epu antü rupai ñi puhual (Hech. 16:11). Huelu tüfachi rupa, quechu antü rupaingün ñi puhual, ¿cürüf ñi duam meu peno?
e Pablo elcünufui ta Lucas Filipos mu (Hech. 16:10-17, 40). Huelu Hechos capitulo 20 mu, versiculo 5 ca 6, Lucas feipi “Filipos huaria pürapuiñ farcu mu”. Tüfa pengelqueiñmu ñi huiño peutun engu üye mu, fei ñi quiñentrür amual ta Troas.
