CAPITULO 20
Caiñetungelu engün rume, “doi fentren che feyentui”
Apolos engu Pablo quelluntucui doi fentren che ñi allcütual tati cümeque dungu
Hechos 18:23–19:41 mu entungei
1, 2. 1) ¿Chem cuñihun dungu rupai Pablo ca tañi pu compañ Éfeso mu? 2) ¿Chem ngüneduamaiñ tüfachi capitulo?
QUIÑE antü Éfeso mu, pu che rume illcui, pofolcahuingün, lefquiyahuingün ca huirarquiyahuingün. Fei fentren che rumei ti alürupachi rüpü cheu ñi mülen fentren negocio, huingüdyeniefingün Pablo tañi epu compañ. Petu ñi amulen engün tati teatro feichi huaria mu, doi fentren che quiñehui feichi pofolcalechi pu che engün. Feichi fütra teatro mu pepi müleafui 25 mil che. ¿Chem dungu rupai? Epe com che quimlai, huelu raquiduamqueingün “¿lefcontungepelai taiñ diosa Ártemis ñi ruca?”. Feimu com engün huirarquiyahuingün “¡pepiluhun-ngei Ártemis, pu Éfeso che tañi diosa!” (Hech. 19:34).
2 Ca quiñe rupa ti Huecüfü adniefi pofolcalechi che ñi catrütuafiel ti amuldungun cüdau. Huelu feita müten femquelai, tüfachi capitulo mu ngüneduamaiñ caquelu dungu ñi femquen Huecüfü fei ñi amuldungungehuenoal tati cümeque dungu, ca ñi hudamafiel pu hunenque cristiano. Huelu tati doi falin dungu taiñ ngüneduamal fei tañi huesa tripan ta Huecüfü, “Chau Jehová ñi pepiluhun mu com püle puhui” tati cümeque dungu, “fei doi fentren che feyentui” (Hech. 19:20). ¿Chumingün pu hunenque cristiano ñi hueutripayal? Chau Jehová quelluniequefi tañi pu che ñi hueutripayal, huelu cafei pu cristiano mülefui ñi rume cüdahual, iñchiñ reque famülque mu. Cüdaucülen mu iñchiñ taiñ doi cüme chengeal, Chau Jehová eluniequeiñmu tañi nehuen, femngechi huechurpuqueiñ taiñ amuldungun cüdau. Hune, peafiyiñ Apolos ñi femün.
“Cüme quimnierquefi Chau Ngünechen ñi huirintucuel” (Hechos 18:24-28)
3, 4. ¿Chem ngüneduami Áquila engu Priscila? Fei, ¿chem femingu?
3 Tüfa tati cülachi rupa ñi tripan Pablo tañi misionerongen mu. Fei petu ñi amulen ta Éfeso, puhui quiñe judio huentru Apolos pingelu, Egipto mapu mu cüpai, Alejandría pingechi huaria mu. Adümuhun huentrungefui, “cüme quimnierquefi Chau Ngünechen ñi huirintucuel” ca “rume yafüluhui Chau Ngünechen ñi nehuen mu”, fei ayühunquechi ca nehuen piuque mu quimeltumefi pu judio ñi ngillatuhue ruca mu (Hech. 18:24, 25).
4 Áquila engu Priscila allcütufingu Apolos tañi hueupin, ¿rume ayüucülepelaingu allcütufiel mu ñi cüme quimeltuchequen? Huelu ngüneduamingu ñi quimfiel müten “ti fautizahun ñi huldunguel Juan”. Fei, ¿chumingu? Llicanon mu huichunentufingu ta Apolos, “fei doi cüme quimeltulelfingu Chau Dios ñi rüpü”. Llicalaingu tañi femal, raquiduamlaingu: “¿Chem feipiafiyu? Apolos niei fentren adümuhun, iñchiu deumaqueyu tolto ruca müten” pilaingu (Hech. 18:25, 26). ¿Apolos cai? ¿Chem pi? Eluhui ñi quimeltungeal, femngechi pengeli tañi ñom piuquengen. Rume falin-ngei com pu rüfngechi cristiano ñi femngechi ñom piuquengeal.
5, 6. ¿Chumi Apolos ñi doi cüme cüdahuelafiel ta Chau Jehová? Ca, ¿chumngechi inayentuafuiñ?
5 Apolos cüme llohui ñi feipieteu Áquila engu Priscila, femngechi doi cüme hueniyefi ta Jehová. Rupalu ta tiempo amui ta Acaya, fei “müna yafültucufi” pu cristiano ca cüme quimeltufi Jesús tañi Mesías ngen. Lucas feipi “Apolos nehuen piuque mu cüme quimfalcünui tati pu judio ñi huelulcalen”, cafei ‘Chau Ngünechen ñi huirintucuel meu pengelelfi engün ñi Cristo ngen ta Jesús’ (Hech. 18:27, 28). Apolos müna quellufi tati trahunche. Tañi quellun mu doi fentren che quimürpui Chau Jehová tañi dungu. ¿Chumngechi inayentuafuiñ?
6 Com pu cristiano mülei taiñ ñom piuquengeal. Ñom piuquengenoliyiñ, falilai chem adümuhun rume taiñ nieel, mallmahuafuiñ, fei rume huesa tripayafuiñ (1 Cor. 4:7; Sant. 4:6). Rüf ñom piuquengeliyiñ, doicülelu troquiafiyiñ ta caquelu che (Filip. 2:3). Eluucüleaiñ taiñ quimeltungeal ca illculayaiñ ngülamtungeliyiñ. Eluucüleaiñ taiñ inayal ñi feipin Chau Jehová tañi troquiñche. Feipifeipiyaulayaiñ ñi femngeal taiñ raquiduam. Ñom piuquengeliyiñ, cüme quelluntucuafiyiñ ta Chau Jehová ca Jesús (Luc. 1:51, 52).
7. ¿Chem mu inayentufali Pablo engu Apolos?
7 Cafei, ñom piuquengeliyiñ, ütrirchelayaiñ. Tati Huecüfü, ¿rume ayüniepelafui ñi yafcahual pu cristiano? Yafcaufule Pablo engu Apolos, rume ayühuafui ti Huecüfü pefiel mu tañi ütriruhun, huelu turpu femlaingu. Quiñeque cristiano feipilu rume “iñche inaniefiñ ta Pablo”, caquelu feipiquefuingün “iñche inaniefiñ ta Apolos”, huelu fei engu quiñentrür cüdahuingu. Doi mai, Pablo saquifi ta Apolos tañi cüme cüdauquen mu, fei doi elfal cüdau elufi. Ca femngechi, ñom piuque mu Apolos inafi ñi feipieteu Pablo (1 Cor. 1:10-12; 3:6, 9; Tito 3:12, 13). Inayentufali tañi ñom piuquengen engu ca ñi hueluconque quelluuquen.
“Raquiduamelfi ti pu che” Chau Dios ñi ngünenietual ta mapu (Hechos 18:23; 19:1-10)
8. Pablo, ¿cheu püle huiñotui ta Éfeso? ¿Chumngelu cai femngechi femi?
8 Pablo feipi ñi huiñotual ta Éfeso, fei femi (Hech. 18:20, 21). a Tüfa mu mülei quiñe falin dungu, inaduamaiñ chumngechi ñi huiñotun. Pablo mülefui Antioquía, Siria mapu mu. Fei, ñi doi matu puhual ta Éfeso mülefui ñi amual ta Seleucia püllelelu, fei ñi farcu mu amual ta Éfeso. Huelu, femngechi femlai, doi mai namuntu “rupai huincul mu mülechi rüpü püle” (Hech. 19:1). Alü camapu namuntu amui Pablo, mil 600 kilometro püle. Fütra cüdaungefule rume, femi tañi yafültucuafiel “pu inaniefilu ta Jesús” (Hech. 18:23). Epu rupa deu miyaufui Pablo tañi misionerongen mu, tüfa tati cülachi rupa. Chaftumequefui fütra huesaque dungu, huelu quimniefui ñi falin-ngen tañi femal. Famülque mu ca femngechi femquei pu huitran-ngepaquechi loncolelu tañi domo engün, yafüluuqueingün ñi cümelcaleal com pu peñi ca pu lamngen. ¡Rume mañumquefiyiñ ñi femün engün!
9. ¿Chumngelu ca huiño fautizahuingün quiñeque huentru inaquefilu ta Juan, ca chem quimeltueiñmu ñi femün?
9 Puulu ta Éfeso, Pablo pefi 12 huentru inaquefilu ta Juan tati fautizachefe. Quimquefuingün ti fautizahun ñi quimeltueteu Juan müten, huelu tüfa deu falilafui. Cafei, quimlafingün chem am Chau Dios tañi nehuen, fei Pablo quimeltueyu engün. Fei engün, Apolos reque, ñom piuque mu eluhuingün ñi quimeltungeal. Fei fautizahuingün Jesús tañi üi mu ca elungeingün Chau Dios tañi nehuen, fei femürpuingün afmatun dungu. ¿Chem quimeltueiñmu tüfa? Quiñeque mu, cacünungeafui quiñeque dungu Chau Jehová tañi troquiñche mu, huelu eluucüleliyiñ taiñ inayafiel, Chau Jehová cümelcayaiñmu (Hech. 19:1-7).
10. Pablo, ¿chumngelu amui quiñe chillcatuhue mu, ca chumngechi inayentuafuiñ?
10 Pablo cüla cüyen amuldungui ti ngillatuhue ruca mu. Cüme “raquiduamelfi ti pu che Chau Ngünechen ñi ngünenietual ta mapu”, huelu quiñeque che chaftueyu, pilaingün ñi allcütuafiel, “huesa dunguyefingün Chau Dios ñi rüpü”. Feimu Pablo ngünamcalai tañi tiempo, amui quiñe chillcatuhue mu ñi hueupimeal (Hech. 19:8, 9). Pu ayünielu doi quimürpual Chau Dios tañi Reino mu amuhuelaingün ngillatuhue ruca mu, huelu mai cheu ñi hueupingequem. Famülque mu, quiñeque che cafei pilai taiñ allcütuaeteu, re ayüqueingün chaftudungual. Feimu, Pablo reque, fentecünuqueiñ ti nütram. Quintuafiyiñ com feichi pu ñom che rume duamnielu ñi yafültucungeal.
11, 12. 1) Pablo rume cüdauquefui ca pepicauquefui ñi quellucheal, ¿chumngechi pengeli ñi femün tüfa? 2) Iñchiñ cai pu testigo, ¿chumngechi inayentuniefiyiñ?
11 Fill antü amuldungui Pablo feichi chillcatuhue mu, ¿epe rangiantülu, 11:00 hora, puulu 4:00 hora nagantü mu peno? (Biblia de estudio huincadungun mu mülei quiñe nota Hechos 19:9 mu, pefinge). Femngechi femfule Pablo feichi 2 tripantu ñi mülepun üyeu, feipiafuiñ doi 3 mil hora ñi quimeltuchequen. b Doi arengefui 11:00 hora epe rangiantü puulu 4:00 hora nagantü mu, huelu cafei fentren che cüdaumequefulu huimtulequefui ñi iyal ca pichi ürcütual, fei doi tüngcülefuingün ñi allcütual. Pablo rume cüdauquefui ca quintuquefui tati doi cüme hora ñi lloungeal. Feimu “com pu judio che ca Grecia che Asia mapu mu mülelu, allcütuingün Ñidol Jesús ñi dungu” (Hech. 19:10). ¡Müna cüme huldungui Pablo! Feimu, doi fentren che feyentui.
Cheu rume ñi mülen pu che amuldunguafiyiñ.
12 Famülque mu, iñchiñ pu testigo, cafei rume cüdauqueiñ ca pepicauqueiñ taiñ quelluafiel pu che. Cüme raquiduamqueiñ chem hora ca cheu doi fentren che peafuiñ, fei taiñ amuldunguafiel. Feimu amuldunguqueiñ com püle, rüpü püle, negocio püle ca cheu ñi miyauquen doi fentren che. Amuldunguqueiñ carta mu ca telefono mu. Cafei, pemequefiyiñ ruca mu chem hora ñi mülen engün.
“Com püle [...] doi fentren che feyentui” pinofulu rume pu huecüfü (Hechos 19:11-22)
13, 14. 1) ¿Chem femürpui Pablo Chau Dios tañi nehuen mu? 2) ¿Chem huesa dungu femingün Esceva ñi pu fotüm, fei chumngechi trüringün coilaque religion mu?
13 Lucas huirintucui Chau Jehová ñi elufiel tañi nehuen ta Pablo, fei ñi femal “fütraque afmatun dungu”. Pablo tañi pañu ca pechera yelelngequefui ñi tremoltucheal ca huemünentungeal huesaque püllü (Hech. 19:11, 12). c Epe com che afmatuquefui pefiel mu ñi rupan tüfa, huelu quiñeque che ayüucülelafui.
14 Feichi antü meu, “quiñeque judio fill püle huemünentuyauquei huesaque püllü”. Pablo reque, ayüfuingün ñi femal afmatun dungu. Ñi femal tüfa, üituquefuingün ta Jesús ca Pablo. Inaduamnge tüfa ñi rupan: ti hunen lonco sacerdote Esceva pingelu niefui regle fotüm. Fei engün üitufingün ta Jesús ca Pablo ñi huemünentual huesaque püllü, huelu tati huesa püllü huiñoldungueyu: “Quimniefiñ ta Jesús, ca quimnien ineingen ta Pablo. Huelu, ¿inei am ta eimün?”. Ti huentru conhuecüfülelu quehuatufi ca allfülcafi engün, fei triltrangcülen lefmahuingün (Hech. 19:13-16). Femngechi cüme quimfalcünungei ñi coilangen tañi religion ca tañi nehuen engün. Trürlafuingün ta Pablo, tañi nehuen rüf cüpai Chau Dios mu. Feimu, doi fentren che feyentui Chau Jehová ñi dungu. Famülque mu, fentren che feipiquei tañi cristianongen, üituquefingün ta Jesús, “feita müten duamfalngei ñi ayühulafiel ta Chau Dios” piqueingün tañi raquiduam mu, huelu feingelai. Jesús cüme quimeltui feichi pu che femlu Chau Dios tañi ayüqueel müten niei cüme maneluhun (Mat. 7:21-23).
15. Pu cristiano Éfeso mu, ¿chumngechi inayentuafuiñ?
15 Éfeso huaria mu, pütrün che femquefui calcu dungu. Pu che malisiangequefui, yeniequefui fillque chemcün ñi huesalcangenoal, ca niequefuingün fillque lifru nütramcalu calcu dungu mu. Huelu ñi rupan Esceva ñi pu fotüm quellufi tati pu che ñi yamnieafiel ta Chau Dios, cristianongetuingün, fei famentufingün calcu dungu. Fentren Éfeso che lüpümfingün tañi falinque lifru fentren che ñi adquiñ meu. d Lucas feipi: “Chau Jehová ñi pepiluhun mu com püle puhui tañi dungu. Fei doi fentren che feyentui” (Hech. 19:17-20). Chau Jehová hueufi tati Huecüfü ca pu huesaque püllü. Inayentufali ñi femün feichi cümeque che. Cuñiutucuucüleaiñ taiñ nienoal chem no rume cüpalu pu huecüfü mu. Nieliyiñ, inayentuafiyiñ pu Éfeso che, ütrüfentufemafiyiñ.
“Pofolcahui pu che” (Hechos 19:23-41)
“Pu hueni, eimün cüme quimnieimün, tüfachi cüdau eluqueiñmu plata” (Hechos 19:25).
16, 17. 1) ¿Chumi Demetrio ñi caiñetungeal pu cristiano? 2) Pu Éfeso che, ¿chumngechi pengelingün ñi mallmauquen tañi religion mu?
16 Mülefui quiñe huentru deumaquelu pichique plata adentun ñi negociayal, Demetrio pingefui. Fei trahuli tañi pu chaf cüdaufe, ngüchaltucufi engün ñi chaftuafiel ta Pablo. Feipicafi reque: “Cümelai ñi feipiyauquen Pablo. Pu che feyentuaeyu, fei poyehuelayai fillque adentun taiñ deumael”. Demetrio ca quimniefui tati pu che ñi rume mallmauquen tañi huaria mu ca tañi tuhun mapu mu. Feimu feipifi engün, amulele ñi allcütungequen ta Pablo, illamcangeafui tañi diosa Ártemis ca tati ruca ñi poyengeam (Hech. 19:24-27). Cuñihun-ngefui ti dungu, tati pu che pofolcahui pu cristiano tañi duam mu (Hech. 19:23). e Fei tüfa femcaquei Huecüfü ñi catrütual tati cümeque dungu.
17 Femtripai Demetrio ñi ayünieel, pu che pofolcahui. Eluhui ñi huedhuedcülen huiraral, fei ñi püramyeafiel tañi diosa Ártemis. f Rupan mu tüfa, caquelu che quiñehui ñi pofolcahual. Pablo llican chengelafui, ayüfui ñi hueupilelmeafiel feichi illculechi pu che, huelu pu discipulo feipieyu “amulayaimi, cuñihun-ngei”. Fei, quiñe huentru Alejandro pingelu eluhui ñi hueupilelafiel tati pu che. Judiongefui, ¿feimu ayüniepelafui quimeltual chumngelu ñi trürnon tañi religion tati pu cristiano ñi religion mu? Huelu fente ñi illculen tati pu che, pilai ñi allcütual. Quimlu engün ñi judiongen, huirarün mu ñücüfcünufingün. Epu hora mu, huedhuedcülen huiraringün ñi pepiluhun-ngen tañi diosa Ártemis. Famülque mu, ca femngechi fentren che rume mallmauquei tañi religion mu, fei quiñeque mu, huedhuedcülen incañpeuqueingün (Hech. 19:28-34).
18, 19. 1) Tati hunen autoridad ti huaria mu, ¿chumngechi tüngduamelfi tati illculechi pu che? 2) Pu autoridad, ¿chumngechi cuñiutucufi Chau Jehová tañi pu che, ca chumafuiñ iñchiñ taiñ femngechi quelluntucungeal?
18 Tati hunen autoridad huaria mu quellufi tati pu che ñi tüngcületual, feipifi engün Pablo ca tañi pu compañ ñi chem huesa femnofiel tati diosa ca tati ruca ñi poyengeam. Cafei feipifi engün, “ayülmün tamün dalluntucuafiel, amuaimün pu autoridad mu”. Huelu tati doi falin dungu ñi feipifiel engün fei tañi chaftumequen Roma tañi ley, condenangeafuingün tañi pofolcahun mu. Feimu, “amutumün” pifi. Ñi cüme feipin tüfachi huentru autoridadcülelu matu ñücüfcületui tati pu che (Hech. 19:35-41).
19 Fantepu meu, fentren rupa pu autoridad quelluntucufi Chau Jehová tañi pu che. Tüfa cüme pengelngei tati apostol Juan. Fei pei tati “mapu” ñi lümüfiel ti “leufü”. Feiti mapu adentulei ta quiñeque che autoridadcülelu, ca feiti leufü adentulei itrofill dungu ñi femquen tati Huecüfü ñi caiñetuafiel pu cristiano (Apoc. 12:15, 16). Femngechi rupaquei, fentren juez incaqueiñmu taiñ amuldungual tati cümeque dungu ca taiñ trahuluhual. Pablo femquefui cümeque dungu, ¿feimu peno pu autoridadcülelu Éfeso mu ayüfui ñi cuñiutucuaeteu? Ca femngechi rupaquei famülque mu (Hech. 19:31). Feimu yafüluhuaiñ taiñ cüme chengeal ca yamnieafiel itrofill che. Femngechi cafei yamniengeafuiñ. ¿Cümeque dungu tripapelayafui fei mu? Felei llemai.
20. 1) ¿Chum duamelqueiñmu fente ñi puhun Chau Jehová tañi dungu? 2) ¿Chem eluucüleimi tami femal?
20 Ngüneduampeiñ chumngechi “com püle puhui” Chau Jehová tañi dungu, fei “doi fentren che feyentui”. Rume ayühulqueiñmu tüfa, afmatulqueiñmu. Ca femngechi, rume cüme duamqueiñ pefiel mu iñchiñ Chau Jehová ñi quelluniequefiel tañi pu che famülque mu. ¿Cüpa quelluntucuimi ñi doi alüpuhual Chau Dios tañi dungu? Tami femal loncontucuaimi com taiñ ngüneduampeel: 1) ñom chengeaimi. 2) cacünungele ñi feipin Chau Jehová tañi troquiñche, inanieaimi. 3) com tami nehuen mu amuldunguaimi. 4) famentunieafimi chem dungu rume cüpalu pu huecüfü mu. Ca, 5) yafüluhuaimi tami cüme chengeal ca yamnieafiel itrofill pu che.
a Inaduamnge ti huichulechi dungu: “ Éfeso, Asia ñi falin huaria”.
b Pablo ca huirintucui Hunen Corintios petu mülelu Éfeso mu.
c Feichi pañu traricünuuquefui Pablo tañi tol meu peno, fei ñi connoal arof tañi nge mu. Cafei tucuquefui pechera ñi cüdahual, tüfa raquiduameleiñmu ñi deumaquen tolto ruca pulihuen mu, petu ñi tripanon amuldungual (Hech. 20:34, 35).
d Lucas feipi com feichi lifru 50 mil plata moneda falifui, ¿tüfa ta denario peno? Ñi nierpual fenten plata quiñe che mülefui ñi cüdahual 50 mil antü, tüfa ta 137 tripantu.
e Pablo huirintuculelfi pu Corinto che “layaiñ pilefuiñ”. Fei, ¿raquiduamcülepelai ñi rupan Éfeso mu? Femngechi feipiquei quiñeque che (2 Cor. 1:8). Cam, ¿raquiduamcülefui chi ñi rupan doi cuñihun-ngechi dungu mu? ¿Feimu peno huirintucui “quehuatufiñ huapo culliñ Éfeso huaria mu”? ¿Rüf quehuatupefi mai huapo culliñ, cam re adentulepei müten ñi rume cuñihun-ngen tañi pu caiñe? Quimlaiñ, ¿rüf trür feleafui chi? (1 Cor. 15:32).
f Cuifi mu, quiñehun mu quiñe troquiñ cüdaufe, doi nehuen-ngequetui ñi feipin engün. Por ejemplo, rupalu 100 tripantu, pu deumaquelu cofque quiñehuingün ñi pofolcahual, fei pofolcahui pu che Éfeso mu.
