1-6. Pu testigo amuldunguquei cheu rume. Feipinge quiñeque rupan dungu.

 REBECCA, fei ta quiñe üllcha lamngen Ghana mapu meu mülelu. Fei amuldunguquei tañi escuela mu, tañi mochila mu yeniequei fillque publicacion. Femngechi recreo mu, amuldunguquefi tañi pu compañ. Deu enseñalmequefi tati Biblia quiñeque engün.

² Madagascar mapu mu, müna arengei. Huelu quiñe curehuen precursorngelu trecaquei 25 kilometro ñi quimeltumeafiel pu che camapulelu.

³ Pu testigo Paraguay mapu mu, quiñentrür cüdahuingün caquelu testigo 15 lof meu cüpalu. Deumaingün quiñe farcu ñi amuldunguafiel pu che Paraguay ca Paraná pingechi leufü mu püle. Tüfachi farcu pepicangei quiñe fütra ruca reque ñi müleal 12 che. Femngechi feula pu peñi, pu lamngen, ayühunquechi amuldunguquefingün pu che doi camapu mülelu.

⁴ Alaska mapu mu, pu testigo allmalltuquei ti doi cümeque antü, feichi mu doi acuquei turista. Fentren che caque rume tuhun-ngelu acuquei farcu mu, feimu pu testigo yequeingün tañi carrito mu fentren publicacion caque rume quehun dungun mu. Cafei üye mu, pu testigo duamniei ñi amual avioneta mu, fei ñi puhual fillque lof mu cheu ñi mülen fentren indigena caquerumechi quehun dunguquelu.

⁵ Larry, fei ta quiñe peñi Texas mapu meu mülelu. Fei mülei quiñe hogar de ancianos mu. Taiñ peñi quiñe accidente ñi duam mu, silla de rueda mu miyautui, femlu rume quintuquei pu che ñi amuldunguafiel ti cümeque dungu Chau Dios ñi ngünenietual mapu ca feipiquei ñi maneluucülen tañi huiño trecatual (Is. 35:5, 6).

⁶ Quiñe troquiñ testigo, Mandalay mapu meu mülelu, amuingün quiñe fütra trahun Myanmar mapu meu. Cüla antü alüñmaingün ñi puhual. Allmalltuingün ñi amuldungucheal, feimu yeingün fentren  publicacion. Ti farcu cheu ñi amulen engün rupaquefui fillque huaria mu. Feimu pu amuldunguquelu allmalltuquefuingün ñi quintuafiel caquelu che, fei ñi eluafiel fillque publicacion. Huiño püratulu engün ti farcu mu, hueque pasajero mületui fei ñi amuldunguafiel.

7. Pu peñi ca pu lamngen, ¿chumqueingün ñi amuldungucheal? Ca, ¿chem dungu ayünieiñ com iñchiñ?

⁷ Ñi femquen feichi pu peñi ca pu lamngen engün pengelqueiñmu huall mapu mu com taiñ pu peñi ca pu lamngen “cüme huldungulelfi engün” pu che Chau Ngünechen ñi ngünenietual ta mapu (Hech. 28:23). Amuldunguchequeingün fill ruca püle, rüpü mu, telefono mu, huirintucuqueingün carta ca amuldunguqueingün cheu rume ñi miyauquen: micro mu, parque, feria mu ca tañi cüdau mu. Rüfcünu allmalltuqueingün ñi amuldungucheal. Caquerumei chumngechi taiñ amuldunguchequen, huelu com iñchiñ ayünieiñ quiñe dungu müten: amuldungulelafiel com tati pu che (Mat. 10:11).

8, 9. 1) ¿Chumngelu afmatufali tunte ñi puhun ti amuldungun cüdau? 2) ¿Chem ramtuhuafuiñ ca chem femaiñ ñi huiñoldungungeal?

⁸ Mülei fentren peñi, lamngen, amuldunguquelu ti cümeque dungu doi 235 mapu mu. ¿Eimi cai? Saquin peñi, lamngen, ¿coneltulepeimi mai tüfa mu? Femülmi, coneltuleimi ti doi falin-ngechi cüdau ñi mülen. Iñchiñ pu testigo cüpa catrütungequei taiñ cüdau, caiñetungequeiñ ca fentren huesaque dungu femngequeiñ. Femngeliyiñ rume, cüme huldungulelquefiyiñ com pu che. Feimu afmatufali llemai tunte ñi puhun tüfachi fütra cüdau ñi femquen Jehová tañi pu che.

⁹ Huecüfü cüpa catrütuquefi ti amuldungun cüdau, femlu rume doi fentren che quimürpuquei Chau Dios ñi dungu. Fei ramtuhuafuiñ: ¿Chumngelu pepi catrütungequelai ti amuldungun cüdau? Ñi huiñoldungungeal tüfa, mülei taiñ inaduamal chem rupai hunen siglo mu. Feichi mu coni ti cüdau taiñ femmequen fachantü.

10. ¿Chem cüdau femi Jesús? Huelu, ¿chem quimniefui?

¹⁰ Jesús amuldungui ti cümeque dungu Chau Dios ñi ngünenietual ta mapu. Tüfa tati doi falin cüdau ñi femün, femngechi elcünui ti cristiano trahunche. Feimu feipi: “Caque huaria mu ca mülei ñi amuldungual tati cümeque dungu Chau Dios ñi ngünenietual ta mapu, feimu huercüngen iñche” (Luc. 4:43). Jesús quimniefui quisu ñi femnoal tüfachi cüdau. Epe puucülelu ñi layal, feipicünui ñi amuldungungeal “com troquiñque mapu püle” (Mar. 13:10). Fei, ¿inei engün am femafui tüfachi fütra cüdau? Ca, ¿chumngechi am femafuingün? Peafiyiñ.

11. Jesús, ¿chem elfalcünufi ñi pu discipulo? Fei, ¿chem quellu nieingün?

 ¹¹ Huiñomongetulu Jesús, peufaluhui tañi pu discipulo mu. Fei elfalcünufi quiñe falin cüdau, feipifi: “Amumün com troquiñ mapu mülechi pu che meu, ca quimeltuafimün iñche tañi inayaeteu engün. Fei ti Chau, ti Fotüm ca Chau Ngünechen ñi nehuen tañi üi meu fautizayafimün engün. Cafei iñche tamün huercüfiel ta eimün, com quimeltuafimün ñi inayal engün. Ca loncontucuniemün: mülean ta eimün mu fentepuule mapu meu müleyechi dungu” (Mat. 28:19, 20). Jesús feipi “mülean ta eimün mu”, femngechi pengeli ñi quellunieafiel tañi pu discipulo ñi amuldungucheal ca quimeltucheal. Jesús ca feipifi “pu troquiñche üdeaimünmeu”, feimu pu discipulo rume duamniefui ñi quelluaeteu (Mat. 24:9). Pu discipulo ca nieafui cangelu quellu: Chau Dios tañi nehuen, femngechi huldunguafuingün “huall mapu püle” (Hech. 1:8).

12. ¿Chem ramtun mülei? Ca, ¿chumngelu falin-ngei ñi huiñoldungungeal?

¹² Jesús huercüfi com tañi pu inanieteu ñi amuldungual, huelu ¿com piuque mu fempeingün mai? Pu cristiano pichin-ngefuingün ca rume caiñetungefuingün, ¿chumingün ñi cüme huldungual? ¿Rüf quelluniepeyu mai Chau Jehová tañi nehuen? Com tüfachi ramtun huiñoldunguai ti lifru Hechos ca rume falin-ngei taiñ quimafiel. ¿Chumngelu? Jesús feipicünufi tañi pu discipulo ñi quelluafiel “fentepuule mapu meu müleyechi dungu”. Petu fente puulai tüfa, feimu com iñchiñ mülei taiñ amuldungual ti cümeque dungu chumngechi taiñ huercüeteu Jesús. Ñi feipin ti lifru Hechos rume quelluaiñmu, feimu ayüleiñ taiñ doi quimafiel.

13, 14. 1) ¿Inei huirintucui ti lifru Hechos ca chumngechi quimi chem ñi rupan? 2) ¿Chem feipiquei ti lifru Hechos?

¹³ Jesús huiñotui huenu 33 tripantu mu ca Pablo presuntucungei 61 tripantu mu. Com ñi rupan feichi tripantu mu ngüneduamafiyiñ ti lifru Hechos. ¿Inei am huirintucui tüfachi lifru? Feipingelai ñi ineingen, huelu quimfali Lucas ñi huirintucuel (Luc. 1:1-4; Hech. 1:1, 2). Fütra cuifi mu, deu feipingequefui Lucas ñi huirintucufiel ti lifru Hechos. Lucas “saquin doctor” quimniengequefui (Col. 4:14). Cafei rume cüme inaduamquefui chem ñi rupan, fei ñi huirintucual. Feimu peno ramtupelafi ta Pablo, Bernabé, Felipe ca caquelu che quimlu. Lucas feipiquei chem ñi rupan, huelu epe fill rupa feipilai ñi mülen feichi mu. Femnolu rume, quiñeque mu quimnieiñ tañi mülen, ¿chumngelu? Mülei quiñeque dungu taiñ pengeleteu tüfa. Quiñe rupa feipilai “ngüneduamingün”, doi mai feipi: “Ngüneduamiyiñ Chau Dios taiñ mangeleteu” (Hech. 16:8-10; 20:5; 27:1).

 ¹⁴ Ti lifru Lucas pengeli ñi feipin ca ñi femün ta Jesús, huelu ¿chem feipiquei ti lifru Hechos? Nütramcaquei ñi femün tañi pu discipulo. Pu che raquiduamquefui pu discipulo “ñi müte nienon pepicahun”, falin che troquilafingün. Femngechi troquingelu engün rume, ti lifru Hechos feipi ñi femün quiñe afmatufal cüdau (Hech. 4:13). Chau Jehová tañi quellun mu, Lucas huirintucui ti lifru Hechos. Pengelcünui chumngechi elcünungei ca doi alün-ngerpui ti hunen cristiano trahunche ca chumngechi ñi amuldunguquen engün (Hech. 4:31; 5:42). Feipiquei chumngechi ñi quellueteu Chau Dios tañi nehuen ñi amuldungual engün (Hech. 8:29, 39, 40; 13:1-3; 16:6; 18:24, 25). Ti lifru Hechos cüme quimfalcünui ñi duamfalngen Chau Dios tañi Reino, fei ñi yamniengetual tañi üi. Ca femngechi pengelquei pu cristiano fentecünulai ñi amuldunguchequen inantucungelu engün rume (Hech. 8:12; 19:8; 28:30, 31).

15. Inaduamfiliyiñ ti lifru Hechos, ¿chumngechi quelluaiñmu?

¹⁵ Ti lifru Hechos yafültucuaiñmu taiñ doi maneluhual Chau Jehová mu, fei taiñ nehuencüleal. Pu hunenque cristiano inayentufalngeingün tañi nehuencülen engün ca tañi amuldunguquen com piuque mu. Tüfa puhuai iñchiñ taiñ piuque mu, fei doi pepicaucüleaiñ taiñ inayafiel Jesús taiñ huercüeteu, quimeltuafiel pu che ñi discipulongeal engün. Tüfachi lifru quelluaimu tami doi cüme adümafiel ñi feipin ti lifru Hechos.

16. ¿Chumngechi quelluaiñmu tüfachi lifru?

¹⁶ ¿Chumngechi quelluaiñmu tüfachi lifru? Mülei cüla dungu: 1) Doi maneluhuaiñ Jehová taiñ elueteu ñi nehuen taiñ amuldungucheal. 2) Doi ayühunquechi amuldunguaiñ pu hunenque cristiano reque. 3) Doi yamnieafiyiñ Jehová tañi troquiñche ca pu loncolequelu amuldungun mu ca trahunche mu.

17, 18. ¿Chumngechi adcünungei tüfachi lifru? Ca, ¿chem quellu peaimi tüfachi lifru mu?

¹⁷ ¿Chumngechi adcünungei tüfachi lifru? Niei pura troquiñ ngüneduamquelu fillque troquiñ ti lifru Hechos mu. Ngüneduamngelayai com ti versiculo, doi mai quelluaiñmu taiñ quimal chem dungu ñi rupan fei taiñ entual quimeltun, cafei feipiaiñmu chumngechi taiñ femal taiñ quimürpuel. Caque quiñeque capitulo hunelu feipiai chem ñi inaduamngeal ca chem texto mu entungei.

¹⁸ Mülei caquelu quellu taiñ doi cüme inaduamafiel ti lifru Hechos, ¿chem quellu am? Mülei ayüfalngechi foto, quelluaiñmu taiñ raquiduamal ñi feipilen Hechos. Fentren capitulo niei huichulechi dungu doi cüme  inaduamquelu quiñeque dungu. Por ejemplo, doi quimeltueiñmu ineingeingün quiñeque che poyequefilu ta Jehová. Caquelu huichulechi dungu doi quimeltuaiñmu quiñeque mapu ca huaria tripalu Hechos lifru mu, ca femngechi fillque huimtun ñi niequefel pu che cuifi.

19. ¿Chem dungu mu cümeafui taiñ ngüneduamuhual?

¹⁹ Tüfachi lifru quelluaiñmu taiñ ngüneduamuhual chum amulei taiñ cüdahuelniefiel Jehová. Tunten tripantu yenieliyiñ rume taiñ serfiniefiel, cümeafui taiñ ngüneduamuhual: ¿Rüf doyümniepefiñ mai Chau Dios tañi dungu ca amuldunguquen com tañi piuque mu? (2 Cor. 13:5). Fantepu mu, ¿falintupefiñ mai ti amuldungun chumngechi ñi femquefel cuifi? (1 Cor. 7:29-31). ¿Petu ayühunquechi amuldunguquen? (1 Tes. 1:5, 6). ¿Femquepen mai com ñi pepilnieel tañi amuldungucheal? (Col. 3:23).

20, 21. ¿Chumngelu fente falin-ngei taiñ cüdau? Ca, ¿chem eluucüleaiñ taiñ femal?

²⁰ Cüme loncontucuaiñ fente ñi falin-ngen tüfachi elfal cüdau. Matu fülcülepai Jehová tañi antü, feimu com tati pu che duamnieingün allcütual chem mülei ñi femal tañi montual. Quimlaiñ tunten che petu mülehuei ñi allcütual, huelu iñchiñ elfalcünungeiñ taiñ quelluafiel petu ñi mülen tiempo (Hech. 13:48; 1 Tim. 4:16).

²¹ Rume falin-ngei inayentuafiel chumngechi ñi amuldunguquen pu hunenque cristiano. Cüme ngüneduamfiliyiñ tüfachi lifru, doi ayühunquechi amuldunguaiñ, nehuencüleaiñ ca doi eluucüleaiñ taiñ “cüme huldungual Chau Ngünechen ñi ngünenietual ta mapu” (Hech. 28:23).