1-3. 1) Pablo, ¿chumngelu huesa duamnagi puulu Atenas mu? 2) ¿Chem quimeltuaiñmu Pablo ñi femün?

 PABLO puhui ta Atenas, Grecia mu. Üyeu mülefui adümuhun huentru quimeltuchequelu: Sócrates, Platón ca Aristóteles pingequefuingün. Pu Atenas che poyequefui fentren coilaque dios, feimu mülefui fentren adentun ñi poyengeam feria mu, rüpü püle ca fill püle. Chau Jehová üdequei ñi poyengeam coilaque dios (Éx. 20:4, 5). Pablo quimniefui tüfa, feimu rume huesa duamnagi pefilu fentren ñi mülen, Jehová reque, üdeniefi.

² Feria mu, Pablo pei fentren ünufalngechi estatua pengelquelu podngechi dungu, adentulefui tati dios Hermes. Ca fill püle feria mu mülefui fillque ruca ñi poyengeam caquerumechi dios. ¿Chumi Pablo ñi amuldunguafiel feichi pu che poyequefilu re coilaque dios? ¿Ngünenieupei mai, fei ñi tüngcülen amuldunguafiel? ¿Chem dungu inaduami, fei ñi ayüfalngeal tañi quimeltun? ¿Quellupefi mai quiñeque che ñi llohual Chau Dios tañi dungu, fei ñi poyeafiel?

³ Hechos 17, 22 puulu 31 mu, papeltuaiñ Pablo ñi chem hueupilelfiel pu Atenas che. Yamquechi amuldungui, cüme quintui chem dungu mu ñi quiñeucülen tañi raquiduam tañi pu allcütueteu mu, fei cüme dulli chem tañi feipial, ca cüme quimfalcünui tati rüf dungu. Cüme inaduamafiyiñ chumngechi tañi femün, fei taiñ inayentu quimeltucheal.

4, 5. Atenas mu, ¿cheu amuldungui Pablo? Ca, ¿chumngelu cüdautupelai ñi amuldungual feria mu?

⁴ Ti epuchi rupa ñi miyahun Pablo tañi misionerongen mu, puhui ta Atenas, a 50 tripantu püle. Üngümcülefui ñi acual Silas engu Timoteo cüpalu Berea mu. Petu ñi acunon, amuldungufi pu judio ngillatuhue ruca mu, femquefui Pablo. Cafei amuldungui “cheu miyauquelu fentren  che”, tüfa ta quiñe “feria” reque, ágora pingequelu. Üye mu, amuldungufi pu Atenas che inaquenofulu pu judio ñi huimtun (Hech. 17:17 ca tati nota). Tüfachi feria 5 hectarea niefui ca püllelefui ti Acrópolis mu. Üye mu pu che ngillacaquefui ca fendequefui itrofillem, doyelchi mai tüfa mu trahuluuquefui fentren che, feimu rume falin-ngefui. Quiñe lifru feipi pu negociaquelu, pu politico ca caquelu adümuhunche doyümniefui feiti feria ñi trahuluhual, rume ayüquefuingün üye mu ñi nütramcayal fillque quimün ñi nieel.

⁵ Pablo, ¿cüdautupelafui ñi raquiduamelafiel feiti pu che feria mu? Mülefui epu troquiñche nielu epu cangechi quimeltun: Quiñe, inaquefui ta Epicuro. Cangelu, inaquefui ta Zenón. b Feyentuquelafuingün tati huiñomongetun mu. Pu inaquefilu ta Epicuro feipiquefuingün quisu ñi huefpan tati mongen, ca feyentuquefui pu che ngelai ñi llicanieafiel ta Dios, “lan mu ta che cutrancauquelai” piquefuingün. Pu inaquefilu ta Zenón falintuquefui pu che ñi nieal ta quimün ca adümuhun, huelu feyentuquelafuingün chem dios mu no rume. Pablo quimeltuquefui tati rüf dungu Cristo Jesús mu, fei rume calefui tañi feyentun engün.

6, 7. Quiñeque griego adümuhun-ngelu, ¿chumngechi llohuingün tañi quimeltueteu Pablo? Famülque mu cai, ¿chumngechi llouquei quiñeque che iñchiñ taiñ quimeltufiel?

⁶ Pu adümuhunche, ¿chumngechi llohuingün tañi quimeltueteu Pablo? Quiñeque feipifingün “huedhued huentru”, tüfa griego dungun mu ca feipifui “ñimituquelu fün quetran” (Biblia de estudio huincadungun mu mülei quiñe nota Hechos 17:18 mu, pefinge). Quiñe adümuhun huentru feipi: “Cuifi mu feiti palabra raquiduamelchequefui pu pichique üñüm ñimituquelu fün quetran. Rupalu ta tiempo, femngechi üitungerpui ta che ñimituquelu sofrachi iyael ca itrofillem ütrüfentungelu feria mu. Doi rupalu ta tiempo, femngechi üitungerpui ta che ‘ñimituquelu’ reque fillque raquiduam, doyelchi mai pepi quimfalcünunolu tañi feipimequen”. Feimu femngechi üitungei Pablo ñi illamcangeal, feipicangei reque “quimquelaimi chem no rume, re feipiqueimi müten caquelu che ñi raquiduam”. Huelu Pablo llicalai.

⁷ Famülque mu, ca femngechi dungu rupaqueiñ. Fentren che illamcaqueiñmu taiñ poyefiel mu ta Chau Jehová, ca taiñ feyentufiel tati Biblia. Por ejemplo, pu profesor quimeltuquei ñi rüfngen tati evolucion, “pu rüf quimche feyentuquei tati evolucion, pu huedhued che feyentuquelafi” piqueingün. Feimu, huedhued che troquingequeiñ iñchiñ quimeltuquen mu Biblia ñi dungu ca ñi mülen quiñe Dios deumalu itrocom dungu. Huelu iñchiñ llicaquelaiñ, doi mai nehuen piuque mu incañpeniefiyiñ taiñ Huenu Chau Jehová deumalu itrofill dungu (Apoc. 4:11).

8. 1) Caquelu che, ¿chem pi Pablo tañi quimeltun mu? 2) ¿Chem pifel Areópago? (Inaduamnge ti quimal dungu).

⁸ Caquelu che allcütufilu ta Pablo feipingün: “¿Huldunguyaupelai pu catripanche ñi pu dios?” (Hech. 17:18). Tüfa rume cuñihun-ngefui. Cuifi mu ti  adümuhun huentru Sócrates femngechi dungu feipintucungei, fei condenangei ñi langümngeal. Feimu, femngechi femfule Pablo, ca huesa tripayafui. Feimu llemai yengei Areópago c mu ñi cüme quimfalcünual chem tañi quimeltumequen. Feichi pu che chem no rume quimlafui Chau Dios ñi Dungu mu, fei ¿chumi Pablo ñi incañpehual? Peafiyiñ.

9-11. 1) ¿Chem feipi Pablo ñi amuldunguafiel tañi pu allcütueteu? 2) ¿Chumngechi inayentuafuiñ amuldungun mu?

⁹ Pablo rume huesa duamnagi pefiel mu ñi mülen fentren adentun ñi poyengeam coilaque dios. Huelu ngüneniehui tañi hun, huesa dungulafi ta che. Doi mai, ngüneduami chem dungu mu ñi quiñeucülen engün, fei yamquechi  feipifi: “Com tamün femqueel, eimün doi yamquefimün tati pu dios ta caquelu che meu” (Hech. 17:22). Müna quim dungui Pablo, saquifi engün tañi yamniefiel engün tati pu dios. Feipicai reque: “Ngüneduamün tamün falintuniefiel pu dios ñi dungu”. Pablo loncontucuniefui: cüme piuquengeafui pu che, huelu ca ngünencangeafui, fei quimeltungefule tati rüf dungu, cüme llohuafuingün. Femngechi rupafui Pablo, feipi tañi huesa femün, fei tañi quimnon mu ca feyentunon mu (1 Tim. 1:13).

¹⁰ Pablo feipi ñi pefiel quiñe altar feipilu “quiñe quimngenoelchi Dios ngealu”, fei quimfali ñi rume yamniefiel engün itrofill dios. Quiñe lifru feipi “pu griego ca caquelu troquiñche llicaquefuingün ñi illculcayafiel pu dios fei tañi quimnon mu. Feimu deumaquefuingün quiñeque altar ñi poyengeam feichi pu ‘quimngenoelchi dios’”. Pu Atenas che niefuingün femngechi altar, quimniefuingün ñi mülen quiñe Dios tañi quimnofiel engün. Pablo feipi tüfa ñi amulcünual ti nütram, fei feipi: “Feiti Dios mu ta nütrameluhuayiñ. Eimün püramyefimün, huelu quimlafimün” (Hech. 17:23). Pablo yamquechi dungui, huelu chaftudungungelayafui tañi feipin. Feipintucungei ñi huldunguquen pu catripanche ñi pu dios, huelu huldunguquefui feichi quimngenoelchi Dios ñi poyefiel pu Atenas che, cüpa quimeltufi ñi ineingen tati rüfngechi Dios.

¹¹ Amuldungun mu iñchiñ, ¿chumngechi inayentuafuiñ ta Pablo? Ngüneduamafuiñ chumngechi tucutuuquei pu che ca chem dungu niei tañi ruca mu, femngechi quimtucuafuiñ chem mu feyentuquei. Feipiafuiñ ta che: “Ngüneduamün tami feyentuquen Chau Dios mu, ¡müna cümei tami femün!”. Saquifiliyiñ ta che tañi feyentun Chau Dios mu, doi cüme entuafuiñ chem taiñ amuldunguafiel. Juzgalayafiyiñ inei no rume chem tañi feyentuquen mu. Loncontucuaiñ: fentren taiñ pu peñi ca pu lamngen cüme piuque mu feyentuquefuingün coilaque dungu.

12. ¿Chumi Pablo ñi puhual pu Atenas che ñi piuque mu?

¹² Pablo feipi quiñe dungu ñi quiñehun tañi raquiduam engün, huelu ¿doi nütramcayafui? Pablo loncontucuniefui tañi pu allcütueteu quimniefuingün pu griego ñi quimün, huelu Chau Dios tañi Dungu no, feimu cüme dulli chem tañi feipiafiel engün: hune, feipifi engün quiñeque dungu ñi tripan Chau Dios tañi huirintucuel mu, huelu feipilafi cheu ñi entuel. Epu, feipi “iñchiñ”, femngechi pengeli ñi doicülenon tañi pu allcütueteu mu. Cüla, feipi quiñeque dungu ñi deu quimeltuel quiñeque adümuhunche griego tuhun-ngelu. Femngechi Pablo cüme quimelelfi quiñeque dungu feichi dios mu tañi quimnofiel engün, ¿chem dungu am? Inaduamafiyiñ tañi cüme hueupin.

13. Pablo cüme quimeltui chumngechi ñi mülerpun itrofill dungu, ¿chem feipi? Ca, ¿chem dungu cüme quimfalcünui?

¹³ Dios deumai itrofill ñi mülen mapu ca huenu mu. Pablo feipi “Dios  deumai ta mapu d ca com ñi mülen tüfa mu. Ñidolcülei ta huenu ca ti mapu meu”, feimu mülequelai chem ruca mu no rume (Hech. 17:24). Chem no rume quisu huefpaquelai, Chau Dios llemai deumai itrocom dungu (Sal. 146:6). Taiñ Fütra Huenu Chau Jehová ñidolcülei mapu ca huenu meu, püramyengei tañi alüpüralen mu müten, duamlai quiñe ruca ñi poyengeam, feimu doicülei ta Atenea ca caquelu dios duamniei quiñe ruca ñi püramyengeam (1 Rey. 8:27). Fei Pablo rume cüme quimfalcünui ñi doi alüpüralen Chau Dios ta com feichi coilaque adentun ñi deumael tati pu che (Is. 40:18-26).

14. Pablo, ¿chem pi ñi quimfalcünual Chau Dios ñi duamnon chem dungu no rume?

¹⁴ Dios duamlai chem dungu no rume. Pu che poyequefilu coilaque adentun tuculelquefui falinque ropa, eluquefui falinque fillem, iyael ca chem tañi pütocoal, ¡raquiduamquefuingün tañi pu dios ñi duamnieel feichi dungu! Huelu quiñeque adümuhunche, ¿raquiduamquepelaingün pu dios ñi duamnon chem no rume ñi eluaeteu pu che? Feimu feipilu Pablo Chau Dios ñi duamnon ñi serfiaeteu pu che, ¿quiñeucülepelaingün Pablo tañi feipin mu? Tüfa rüfngei llemai, taiñ Huenu Chau deumalu itrocom dungu duamlai ñi elungeal chem no rume. Doi mai, eli ta antü, mahun ca ti mapu hulquelu fillque fün, eluqueiñmu “mongen, neyen ca com dungu” (Hech. 17:25; Gén. 2:7). Feimu llemai, Chau Dios eluqueiñmu itrofill dungu, duamlai ñi elungeal chem dungu no rume.

15. Pablo, ¿chem pi ñi norümtuafiel pu Atenas che ñi raquiduam? Ca, ¿chem falin quimeltun entuafuiñ?

¹⁵ Dios deumai tati pu che. Pu Atenas che doicülelu troquiuquefuingün caquelu che mu, griegongenolu. Huelu tati Biblia ngülamtueiñmu taiñ mallmaunoal taiñ tuhun mu (Deut. 10:17). Pablo cüme feipi tüfachi falin dungu, huelu yamün meu femi. “Quiñe huentru meu müten deumai com pu troquiñche”  pi, fei ñi raquiduamelafiel tañi pu allcütueteu (Hech. 17:26). Entui tañi feipin Génesis mu feipilu Adán mu ñi tripan com tati pu che (Gén. 1:26-28). Com che quiñe tuhun niei müten, fei inei no rume doicülelai. Com pu allcütufilu ta Pablo quimtucupelaingün tañi chem pin. Ñi femün Pablo quimeltueiñmu: mülei taiñ cüme dullial chem taiñ pial ca yamquechi dungual, huelu turpu cambiacünulayafiyiñ tati rüf dungu ñi doi ayüfalngeal tati pu che mu.

16. Chau Dios, ¿chumal deumafi tati pu che?

¹⁶ Dios ayüniei ñi fülmaeteu pu che. Feichi adümuhunche fentren tripantu yeniepelai tañi ramtuuquen “¿chumalu mülei tati pu che mapu meu?”. Femngechi ramtuufule engün, quisutu turpu quimürpulayafuingün. Huelu Pablo cüme quimfalcünui: Chau Dios deumai ta che “ñi quintuaeteu, sumpatuyaule rume, peafi engün. Rüfcünu llemai, Chau Dios camapulelai caque quiñeque iñchiñ meu” pi (Hech. 17:27). Feimu llemai pu Atenas che quimürpuafui feichi Dios tañi quimnofel. Chau Dios fülmaniefi com tati pu che eluucülelu ñi quintunieaeteu (Sal. 145:18). Fei com che mülei ñi quintuafiel ta Chau Dios, Pablo cafei, feimu feipi ñi camapulenon “iñchiñ” meu.

17, 18. 1) Com che duamniei ñi quimafiel ta Chau Dios, ¿chumngelu feipiafuiñ? 2) ¿Chem quimeltueiñmu Pablo ñi chumngechi quimeltufiel tañi pu allcütueteu?

¹⁷ Pu che duamniei ñi quimafiel ta Chau Dios. Pablo feipi: “Fei ñi duam mu mai ta mongeleiñ, trecayauqueiñ, fei müleiñ tüfa mu”. ¿Cheu chi entui ñi feipin? Quiñeque adümuhunche feipi tüfa ñi deu feipifel Epiménides pingechi huentru. Tüfa quiñe fütra cuifi poeta rume yamniengequelu Atenas mu. Cafei Pablo feipi chumngelu pu che duamniei ñi quimafiel ta  Chau Dios, feipi: “Chumngechi feipingün quiñeque tamün pu huirintucuquelu: ‘Iñchiñ ta Chau Ngünechen ñi pu yallngeiñ’” (Hech. 17:28). Chau Jehová deumai tati hunen huentru, fei mu tripaiñ com iñchiñ. Fei, “com che coneltulei Chau Jehová tañi familia mu reque” piafuiñ. Pablo ayüniefui ñi allcütunieaeteu pu che, feimu entui quiñeque dungu tañi feipin pu griego adümuhunche yamniengelu, müna cümei ñi femün. e Iñchiñ ca femngechi femafuiñ, por ejemplo, quiñeque falinque lifru mu quintuafuiñ cheu ñi tripan coilaque huimtun ca quimeltun ñi nieel pu coilaque religion. Fei pengelelafuiñ tüfa tati pu che tañi doi cüme adümürpual tati rüf dungu.

¹⁸ Pablo cüme dulli tañi chem piafiel tañi pu allcütueteu, fei ñi cüme quimeltuafiel engün falinque dungu Chau Dios mu. Fei, ¿chem ayüniefui Pablo ñi femal tañi pu allcütueteu? Taiñ quimal inaduamafiyiñ ca dungu ñi feipifiel engün.

19, 20. 1) Pu quimche poyequelafi adentun, ¿chem pi Pablo ñi yamquechi quimeltual tüfa? 2) Pu Atenas che, ¿chem mülefui ñi femal?

¹⁹ Ñi fentecünual tañi hueupin, Pablo ngülamtufi tañi pu allcütueteu chem tañi femafel engün. Inaduamfi ñi feipiel quiñeque adümuhun-ngechi griego, feimu feipi: “Chau Ngünechen ñi pu yallngelu cai iñchiñ, raquiduamlayaiñ ñi trürümafiel ta Chau Ngünechen oro, plata cam cura meu no rume. Cafei chem ñi deumael pu che tripaquelu quisu tañi raquiduam mu, trürümlayafiyiñ ta Chau Ngünechen” (Hech. 17:29). Chau Dios deumafi tati pu che, fei ¿mülepeafui mai quiñe adentun mu ñi deumael tati pu che? Femlayafui. Pablo yamquechi quimfalcünui: pu quimche raquiduamlayafui ñi poyeafiel adentun (Sal. 115:4-8; Is. 44:9-20). Ngülamtulu Pablo, feipilai “eimün raquiduamlayaimün”. Doi mai, coneltui tañi ngülam mu, feipi “raquiduamlayaiñ ñi trürümafiel ta Chau Dios”. Femngechi tañi pu allcütueteu doi eluucüleafui ñi inayafiel tañi feipin.

²⁰ Pablo ngülamtufi engün: “Chau Dios rulpacünui feichi antü ñi quimnoeteu pu che. Huelu feula fill püle feipimequefi com pu che ñi nor raquiduamtual engün” (Hech. 17:30). Cuifi mu tati pu che quimlafui ta Chau Dios, feimu deumaquefui adentun ñi poyeafiel, huelu feichi antü deu rupafui. Feimu Pablo ngülamtufi com pu che ñi nor raquiduamtual ca repentiutuhual. Allcütulu tüfa, ¿afmatulepelai quiñeque engün? Huelu tañi cüme hueupin mu quimfali: Chau Dios tañi duam mu pu che niei ta mongen, feimu com che mülei ñi cüme femal tañi mongen mu, quintuafiel ta Chau Dios, quimürpual  chem tañi ayünieel, fei tañi femngechi femal. Pu Atenas che quimürpuingün ñi cümenon tañi poyefiel adentun, feimu mülefui ñi repentiutual ca femhuenoal.

21, 22. Ñi afal tañi hueupin, ¿chem falin dungu feipi Pablo? Ca, ¿chem pifel tañi feipin?

²¹ Ñi fentecünual tañi hueupin, Pablo feipi falinque dungu: “Chau Ngünechen elcünui quiñe antü ñi juzgayafiel mapu müleyechi pu che nor dungu mu. Ñi femal tüfachi dungu, elcünui quiñe huentru. Cafei huiñomongeltufi rangiñ ti pu layelu, femngechi com pu che ñi maneluhual” (Hech. 17:31). Femngechi quimürpuingün ñi puhual ti antü tañi juzgangeal. Feimu rume falin-ngefui ñi quintuafiel tati rüfngechi Dios, fei tañi peafiel engün. Pablo feipilai ñi ineingeal tati juez, huelu mai feipi ñi huentrungefel, ñi lan ca ñi huiñomongetun.

²² Cüme quimnieiñ ñi falin-ngen feichi af dungu ñi feipin Pablo. Quimnieiñ Chau Dios ñi Juezcünufiel ta Jesucristo (Juan 5:22). Ca quimnieiñ tunteñmayai feichi “antü” reque ñi juzgangeal ta che, mil tripantu mu femngeai ca pichilehuei ñi acual (Apoc. 20:4, 6). Quimnieiñ tati Juez ñi dulliafiel pu cümeque che nor piuquengelu, fei ñi elungeal fentren cümeque dungu, feimu llicaquelaiñ. Quiñe fütra afmatun dungu quimfalcünueiñmu com tüfa ñi rüf femtripayal, ¿chem am? Jesucristo huiñomongetui, feimu maneluucülequeiñ.

23. Tati pu che, ¿chumngechi llohui Pablo ñi feipiel?

²³ Pu che, ¿chumngechi lloufi Pablo tañi feipiel? Quiñeque che “ayentueyu”. Caquelu che huesa femlaeyu, huelu repentiutulaingün ca feipingün: “Ca antü hula allcütuhuayiñ” (Hech. 17:32). Huelu quiñeque che cüme llohui tañi feipin. Biblia feipi: “Quiñeque huentru inaeyu, fei feyentuingün. Tüfa ta Dionisio, juezcülerquei ti tribunal Areópago huincul mu. Cafei quiñe domo Dámaris pingelu. Caquelu che ca feyentui” (Hech. 17:34). Amuldungun mu iñchiñ, ca femngechi femquei pu che: Quiñeque ayentuqueiñmu. Caquelu chumquelaeiñmu, huelu inaquelaingün Biblia ñi feipin. Femngechi rupalu rume, müna ayühulqueiñmu ñi testigongerpual tati pu che cüme llouquelu Biblia ñi feipin.

24. ¿Chem falinque quimeltun entuafuiñ Pablo tañi hueupin mu?

²⁴ Fentren quimeltun entuafuiñ Pablo tañi hueupin mu. Quimürpuiñ chumngechi cüme quimfalcünual ñi rüfngen taiñ quimeltun, ca chumafuiñ ñi doi ayüfalngeal taiñ feipin. Cafei pengeleiñmu ñi falin-ngen taiñ nieal ta paciencia, ñochiduamngeal, fei taiñ yamquechi quimeltuafiel tati pu che ngünencamequengelu. Cangelu falin quimeltun, turpu cacünuquelafiyiñ tati rüf dungu ñi cüme duamelafiel tati pu che. Inafiliyiñ com tüfa, doi cüme quimeltucheaiñ amuldungun mu, ca pu loncolequelu doi cüme quimeltuafi tati trahunche. Femngechi, Pablo reque, quelluafiyiñ tati pu che ñi quintuafiel ta Chau Dios, fei ñi peafiel engün (Hech. 17:27).