CAPITULO 17
Quimeltufi engün “Chau Ngünechen ñi huirintucuel”
Biblia mu quimeltucheaiñ ca inayentuafiyiñ pu Berea che
Hechos 17:1-15 mu entungei
1, 2. ¿Inei engün am tripai Filipos mu ñi puhual ta Tesalónica? ¿Chem raquiduampelaingün rüpütulelu engün?
PABLO, Silas ca Timoteo tripaingün Filipos mu ñi amual ta Tesalónica, 130 kilometro camapulefui ca huinculngei ti rüpü. Roma cementacünufi reque feichi rüpü cura mu, miyauquefui pütrün che, quiñeque soltau, pu negociaquelu ca caquerumechi che, fei ¿allcüngequepelafui ñi nütramcamequen engün, ca ñi rupaquen carretela, ca fillque culliñ? Huelu Pablo engu Silas rume cüdautuingün ñi amulen feichi rüpü mu, petu cutrani tañi allfeñ engu, ñi hulelcangen Filipos mu (Hech. 16:22, 23).
2 Mülefui ñi rume trecayal engün, huelu ¿cümeque nütram entuquepelaingün? Fei tüfa füshcüñmaeyu tañi piuque. ¿Petu raquiduamniepelafingün feiti soltau carcel mu ca tañi pu che ñi cristianongerpun engün? Feichi rupan müna yafültucupelafi ta Pablo ca ñi pu compañ ñi fentecünunoal tañi amuldungun. Femlu rume, epe ñi puhual engün ta Tesalónica, ramtuuquepelaingün “¿cüme lloupeaiñmu mai pu judio üyeu? Cam, ¿ca rupa hulelcangeaiñ Filipos mu reque?”.
3. ¿Chumngechi quelluaiñmu inaduamal Pablo tañi femün?
3 Pablo huirintuculelfilu tañi carta pu cristiano Tesalónica mu, feipifi ñi chum duamcülen feichi mu. Feipi: “Quimnieimün Filipos huaria mu cutrancangeiñ ca huesalcangeiñ. Huelu taiñ Chau Ngünechen ñi duam mu nehuen piuquecünuhuiyiñ, femngechi nütrameluhuiyiñ Chau Dios ñi cümeque dungu huesa caiñetungeiñ rume” (1 Tes. 2:2). Tüfa raquiduameleiñmu ñi pichi llicalen engün, tañi rupan mu Filipos huaria mu. Eimi, ¿femngechi duamquefuimi cai? Quiñeque mu, ¿llicaqueimi amuldungual? Pablo maneluhui Chau Jehová mu. Llicalelu rume, fentecünulai ñi amuldungun, feimu rume cümei taiñ inaduamal tañi femün, fei taiñ llicanoal (1 Cor. 4:16).
Raquiduamelfi engün ñi feipin “Chau Ngünechen ñi huirintucuel” (Hechos 17:1-3)
4. ¿Chumngelu feipiafuiñ doi cüla semana mülepui Pablo Tesalónica mu?
4 Tesalónica mu, Pablo amui ngillatuhue ruca mu ñi amuldungual cüla ürcütun antü meu. Huelu tüfa feipilai ñi mülepun cüla semana müten Tesalónica mu, ¿doi tiempo rupapelai? Puulu üyeu, ¿tunten tiempo rupai, fei ñi amual tati ngillatuhue ruca mu?... quimlaiñ. Cafei Pablo ca tañi pu compañ cüdahuingün Tesalónica mu tañi mongeluhual, ca epu rupa pu cristiano Filipos mu mülelu huercüleleyu engün quiñeque dungu ñi duamnieel (Filip. 4:16; 1 Tes. 2:9; 2 Tes. 3:7, 8). Feimu llemai feipiafuiñ doi cüla semana mülepui Pablo Tesalónica mu.
5. Pablo, ¿chumngechi quellufi tañi pu allcütueteu?
5 Pichi llicalelu rume, Pablo amui ngillatuhue ruca meu ñi amuldungual, huimtulequefui ñi femal tüfa. Fei “quellufi engün ñi loncontucual Chau Ngünechen ñi huirintucuel. Femngechi quimeltulelfi engün. Cüme nütramcalelfi engün ñi duamfalngen ta Cristo tañi lan ca tañi huiñomongetun rangiñ ti pu layelu. Chau Ngünechen ñi huirintucuel meu pengelelfi tüfachi dungu. Feipiquei: ‘Tüfa tati Cristo, feiti Jesús iñche tamün nütramcalelfiel’” (Hech. 17:2, 3). Pablo re feipilai ayüfalchi dungu ñi ayühulmafiel tañi piuque engün, doi mai ayüfui com engün ñi cüme raquiduamal tañi feipimequen. Quimniefui tañi pu allcütueteu ñi quimniefiel ca yamniefiel Chau Dios tañi Dungu, huelu duamniefuingün ñi doi cüme adümürpuafiel. Feimu quellufi engün ñi cüme raquiduamal ñi chem pin Chau Dios tañi huirintucuel, femngechi doi cüme pengelelfi engün Jesús Nazaret mu tuulu fei tati Cristo, tati feipicünuelchi Mesías.
6. Jesús, ¿chumngechi raquiduamelfi tañi pu discipulo Chau Dios tañi huirintucuel mu? Fei, ¿chumingün pu discipulo?
6 Pablo inayentufi ta Jesús, Chau Dios tañi Dungu mu entuquefui com tañi quimeltun. Por ejemplo, Jesús quimeltufi tañi pu inanieteu ñi deu huirintucucünungeel tañi cutrancahual, tañi layal ca tañi huiñomongetual (Mat. 16:21). Deu huiñomongetulu, Jesús pengeluhui tañi pu inanieteu mu, femngechi pengelcünufi engün ñi rüfngen tañi quimeltuel petu ñi lanon. Huelu ca quiñe dungu femi ñi doi cüme adümürpuafiel engün ñi rüfngen tañi feipin. Por ejemplo, quiñe rupa re peufaluulai epu tañi pu discipulo mu, doi mai “eluhui ñi nütramcalelafiel ñi feipin Chau Ngünechen ñi huirintucuel tati Cristo meu. Nütramelfi ñi huirintucuel Moisés ca Chau Ngünechen ñi pu huerquen”. Fente ñi afmatulehuen feiti epu discipulo feipingu: “¡Feimu llemai pürapapiuqueyu petu tayu nütramcaeteu rüpü mu, cüme quimfalcünueyumu Chau Ngünechen ñi huirintucuel!” (Luc. 24:13, 27, 32).
7. ¿Chumngelu fente cümei taiñ quimeltucheal Biblia mu?
7 Chau Dios ñi Dungu niei nehuen (Heb. 4:12). Feimu com taiñ quimeltuqueel Biblia mu tuhui. Inayentunieafiyiñ ñi femün Jesús, Pablo ca caquelu pu apostol. Amuldungun mu iñchiñ, papeltulelquefiyiñ Biblia tati pu che, fei taiñ raquiduamelafiel ca cüme pengelcünuafiel chem ñi feipilen, fei ñi quimtucual engün ñi rüfngen taiñ feipin. Femngechi tati pu che quimtucuquei Chau Dios mu cüpai taiñ quimeltun, iñchiñ taiñ raquiduam no. Cafei rume cümei iñchiñ mu loncontucuafiel feichi dungu, fei rüf maneluucüleaiñ tüfachi quimeltun mu. Femngechi femliyiñ, llicanon mu amuldunguaiñ Pablo reque.
“Quiñeque che feyentuingün” (Hechos 17:4-9)
8-10. 1) Pu Tesalónica che, ¿chumngechi llohuingün tati cümeque dungu? 2) Quiñeque judio, ¿chumngelu ütrirfingün ta Pablo? 3) ¿Chumingün pu judio cüme llounolu tati cümeque dungu?
8 Pablo mu femtripai tüfachi dungu ñi feipin Jesús: “Ti cüdaufe doicülelai tañi ñidol meu. Caiñetungeli iñche, eimün ca caiñetungeaimün. Pu che inaniefile iñche tañi feipin, ca inayaingün eimün tamün feipin” (Juan 15:20). Femngechi rupai Pablo Tesalónica mu, quiñeque che allcütueyu, huelu caquelu caiñetueyu. Lucas feipi chem ñi rupan: “Quiñeque che feyentuingün, fei quiñehuingün Pablo engu Silas. Ca femngechi femi fentren pu Grecia che cüpa ayühuelfilu ta Chau Dios. Cafei alün yamfal domo feyentuingün” (Hech. 17:4). Tüfachi pu hue discipulo, ¿rume ayüucülepelaingün cüme quimeltungelu Chau Dios tañi Dungu?
9 Huelu com che ayüucülelafui tañi quimeltuel Pablo, doyelchi mai quiñeque che rume illcuingün. “Fentren pu Grecia che” cüme llohuingün Pablo ñi quimeltuel, feimu quiñeque judio Tesalónica mu ütrirfingün ta Pablo. Feichi pu judio cristianongelafui ca ayüfuingün pu Grecia che ñi inayal judio feyentun, feimu quimeltufingün ñi feipin Chau Dios tañi huirintucun hebreodungun mu. Huelu acui Pablo, cüme quimeltui ñi cristianongerpual engün, fei inahuelaingün judio feyentun. ¡Illcuingün llemai pu judio!
“Quintuyahulfi engün ta Pablo ca Silas, femngechi ñi hultucuafiel ti trahulechi che mu” (Hechos 17:5).
10 Lucas amulei ñi nütram Hechos mu, feipi: “Pu judio fente ütrirlu engün, trahulingün quiñeque huesaque huentru pecanquiyaulu feria püle. Fei trahulingün fentren che ñi pofolcayafiel ti huaria che. Feimu lefcontufingün ta Jasón ñi ruca. Quintuyahulfi engün ta Pablo ca Silas, femngechi ñi hultucuafiel ti trahulechi che mu. Huelu pelafingün, fei huingüdentufi engün ta Jasón ca quiñeque peñi. Yefingün cheu ñi mülen ti huaria ñi pu gobernante. Fei huiraringün: ‘Ti pu huentru fill püle hueluraquiduamfilu pu che ca mülepaingün tüfa mu. Jasón ta lloufi quisu tañi ruca meu. Com tüfachi pu huentru caiñetudungumequefi ñi huercüel Roma ñi Lonco Ülmen. Feipimequei engün ñi mülen cangelu lonco ülmen, Jesús’” (Hech. 17:5-7). Fei, ¿chem femngeafui Pablo ca tañi pu compañ? Peafiyiñ
11. ¿Chem dungu mu coila dalluntucungei Pablo ca tañi pu compañ? ¿Chem ley dungu mu raquiduampelaingün pu judio? (Inaduamnge ti quimal dungu).
11 Pofolcaucülen mu pu che, pepi ngüneniengequelai. ¡Llicafali! Trürümngeafui quiñe illculechi leufü mangiñcülelu. Feimu pu judio pofolcafingün fentren che, fei ñi caiñetuafiel ta Pablo engu Silas. Deu pofolcafilu engün fentren che, amuingün pu autoridad mu, fei ñi coila dalluntucuafiel ta Pablo engu Silas. Hune feipintucufingün ñi hueluraquiduamfiel pu che fill püle, huelu Pablo engu Silas chumlai rume ñi pofolcahual pu che. Ti cangelu dungu ñi feipintucufiel doyelcülefui, feipingün ñi chaftufiel engün tati ley dungu, feipingün Pablo engu Silas ñi feipiyahulmequen ñi mülen cangelu lonco ülmen: Jesús. a
12. Pu cristiano coila dalluntucungefulu langümngeafui, ¿chumngelu feipiafuiñ?
12 Cuifi, Jesús ca femngechi dalluntucungei. Pu loncolechi sacerdote ca pu quimeltuquelu Moisés ñi ley feipifingün ta Pilato: “Peiñ tüfachi huentru, ngüchaltucumequefi pu che ñi caiñetuafiel ti autoridad. [...] ‘Iñche ta Cristo, tati lonco ülmen’ pi” (Luc. 23:2). ¿Llicapelai Pilato? ¿Feipipelai: “Chumnoli rume, Roma ñi lonco ülmen feipiafui iñche ñi quelluntucumequefiel cangelu lonco ülmen”? ¿Feimu peno huercüi ñi langümngeal ta Jesús? Famülque mu, pu cristiano ca femngechi coila dalluntucungeingün, fei Jesús reque femngeafuingün. Quiñe lifru feipi “epe com che feipintucungefulu ñi chaftufiel tati lonco ülmen langümngequefuingün, feimu rume cuñihun-ngefui ñi femngechi dalluntucungeal”. Fei, ¿chum tripai ñi huesa femün pu judio Tesalónica mu? Peafiyiñ.
13, 14. 1) Pofolcaucülelu rume pu che, ¿chumngelu pepi catrütulai ti amuldungun? 2) Pablo, ¿chumngechi inayentufi ta Jesús? ¿Iñchiñ cai chumngechi inayentuquefiyiñ?
13 Fentren che pofolcaulu rume, pepi catrütulaingün ñi amuldungungeal tati cümeque dungu Tesalónica mu. Feichi illculechi pu che quintufi ta Pablo engu Silas, huelu pelafi. Cafei, pu autoridadcülelu ¿müte feyentulafingün peno ñi feipin feichi pu che? Feimu re cofraingün, plata peno, ñi lifrenentuafiel ta Jasón ca caquelu peñi, fei elufingün ñi amutual engün (Hech. 17:8, 9). ¿Chumi cai Pablo? Inafi Jesús ñi ngülam: ‘Llihuatui filu reque, huelu lif piuquengei paloma reque’ (Mat. 10:16). Feimu lefmahui cuñihun dungu mu, fei ñi amuldungumeal cañpüle. Pablo llican chengelafui, huelu quintuyahulquelafui cuñihun dungu, ¿chumngechi inayentuafuiñ iñchiñ?
14 Famülque mu, pu loncolechi religioso ca femngechi ngüchaltucuquefingün pu che ñi caiñetuafiel pu testigo. Feipiquefingün tati pu autoridad: “Feichi pu testigo chaftuquefi tati gobierno, mülei ñi catrütungeal”. Femngechi ngüchaltucuquefingün taiñ inantucuaeteu, ütrirniequeiñmu. Huelu, ¿chumqueiñ iñchiñ? Rüf inayentuniefiyiñ ta Cristo, fei quintuquelaiñ taiñ caiñetungeal, famentuuqueiñ mülen mu illculechi pu che piquenolu ñi cüme nütramcayal. Doi mai, chumqueiñ rume taiñ tüngcülen amuldungucheal. Quiñeque mu mülei taiñ amutual müten, fei taiñ huiñotual doi tüngcülele ti dungu.
Fei engün “doi cüme allcütuingün” (Hechos 17:10-15)
15. Pu Berea che, ¿chumngechi llohuingün tati cümeque dungu?
15 Ñi cuñiutucungeal Pablo engu Silas huercüngeingu ta Berea, 65 kilometro camapulelu. Puulu Pablo üyeu amui ti ngillatuhue ruca mu ñi amuldungucheal. ¿Rume ayüucülepelai pefiel mu pu che ayüquelu ñi allcütual? Lucas feipi pu Berea che “doi cüme allcütuingün” ta Tesalónica che meu. Pu Berea che “eluucülefui ñi llohual Chau Ngünechen ñi dungu” ca “fill antü cüme ngüneduamquefuingün”, fei “tañi quimal ñi rüfngen tañi feipingeel engün” (Hech. 17:10, 11). Huelu tüfa feipilai pu Tesalónica cristiano ñi cüme allcütunon, doi mai Pablo huirintuculelfi engün “iñchiñ mañumniequefiyiñ ta Chau Dios. Allcülu eimün Chau Ngünechen ñi dungu iñchiñ tamün huldungufiel, tüfa ta pu huentru ñi dungu pilaimün. Doi mai tüfa ta Chau Dios ñi dungu pimün, fei ñi dungu cai tati. Chau Ngünechen ñi dungu quellueimünmeu ta eimün, pu feyentulelu” (1 Tes. 2:13). ¿Chumngelu chi cai feipingequei pu Berea che “doi cüme allcütuingün”? Peafiyiñ.
16. ¿Chumngelu feipingequei pu Berea che ñi doi cüme allcütuel tati cümeque dungu?
16 Pu Berea che quimlafuingün tati cümeque dungu. Quimnofilu engün rume, caiñetudungufemlaingün cam müchai müten feyentulaingün. Doi mai, eluhuingün ñi cüme allcütuafiel ta Pablo, fei ñi quimeltuaeteu. Fei ngüneduamingün Chau Dios ñi Dungu ürcütun antü müten no, doi mai fill antü. Femngechi tañi quimürpual engün ñi rüfngen cam rüfngenon tañi allcütuel. Pu Berea che eluucülefuingün ñi llohual Chau Dios ñi Dungu, rume ayüniefuingün ñi quimal tati rüf dungu cüpalu Chau Dios mu. Ñom piuque mu pu Berea che cüme elcünutuingün tañi mongen, femngechi “fentren” engün feyentui (Hech. 17:12). Feimu llemai Lucas feipi ñi doi cüme allcütuel pu Berea che.
17. ¿Chumngelu fente cümei pu Berea che ñi femün? Ca, ¿chumngechi inayentuafuiñ fentren tripantu taiñ testigongen mu rume?
17 Fente ñi cümen pu Berea che ñi femün, huirintucungei Biblia mu iñchiñ taiñ quimeltungeal. Quimlafuingün rume tañi femün ñi puhual fantepu meu. Pablo, doyelchi mai Chau Jehová, ayüniefuingu ñi femngechi femal pu Berea che. Famülque mu, iñchiñ cafei feipiquefiyiñ pu che ñi cüme ngüneduamafiel tati Biblia, fei ñi foliluhual tañi feyentun Chau Dios tañi Dungu mu. Cafei deu fautizauliyiñ rume, fentecünulayaiñ taiñ inanieafiel pu Berea che ñi femün, doi eluucüleaiñ taiñ llohual Chau Dios ñi Dungu, fei taiñ inayafiel ñi ngülam com taiñ femquen mu. Femngechi femliyiñ müten, Chau Jehová adnieaiñmu ca pepicanieaiñmu taiñ femal quisu ñi ayünieel (Is. 64:8). Femngechi quelluntucuafiyiñ taiñ Huenu Chau ca rume ayühulafiyiñ.
18, 19. 1) Pablo, ¿chumngelu tripai Berea mu? Fei, ¿chumi? Ca, ¿chumngechi inayentuafuiñ? 2) ¿Chem che amuldunguafi Pablo cüpalechi capitulo mu?
18 Pablo müte alüñmalai Berea mu, ¿chem rupai? “Ti pu judio Tesalónica huaria mu, quimi Pablo ñi huldungufiel ti pu che Chau Ngünechen ñi dungu Berea huaria mu. Feimu üyeu amuingün. Fei ngüchaltucufingün ti pu che ñi caiñetuafiel engu. Feimeu müten pu peñi feipifingün ta Pablo ñi amutual lafquen püle. Huelu Silas ca Timoteo üyeu mülecaingu. Huelu pu compañyefilu Pablo, Atenas huaria mu yefingün. Fei hula huiñotuingün, fei feipipafingün ta Silas ca Timoteo müchai müten ñi trahuluhual Pablo engu” (Hech. 17:13-15). Tañi pu caiñe rume ayüniefui ñi catrütuafiel pu cristiano. Pablo tripai Tesalónica mu, huelu tañi pu caiñe tuduamlaingün, amuingün Berea mu ñi inantucuafiel. Femlu engün rume, pepi catrütulafingün ti amuldungun. Pablo quimniefui huall mapu ñi mülen pu che tañi allcütuafel ti cümeque dungu, feimu amui müten ca mapu ñi amuldungual. Ca femngechi iñchiñ chumaiñ rume, fei ñi catrütungenoal taiñ amuldungun.
19 Pablo cüme huldungui tati cümeque dungu Tesalónica ca Berea huaria mu. ¿Epu dungu chi doi cüme quimürpui Pablo tañi rupan üye mu?: 1) fente ñi falin-ngen ñi llicanon mu amuldungual, ca 2) falin-ngei raquiduamelafiel pu che Chau Dios tañi Dungu mu. Ca femngechi doi cüme quimeltueiñmu iñchiñ taiñ femal. Cüpalechi capitulo mu peaiñ Pablo ñi puhun ta Atenas. Pu Atenas che trürlafuingün feichi pu judio tañi deu amuldungufiel. Fei, ¿chumngechi llohuaingün Chau Dios tañi Dungu? Cüpalechi capitulo mu inaduamafiyiñ.
a Quiñe adümuhun huentru feipi feichi antü meu ñi mülefel quiñe ley. Feichi ley feipiquefui inei no rume ngelai ñi feipial ñi mülerpual cangelu lonco ülmen cam gobierno. Doyelcülefui feipial tüfa ñi hueluconal tati lonco ülmencülelu Roma mu. ¿Feichi ley dungu mu raquiduampelaingün pu judio ñi coila dalluntucuafiel ta Pablo? ¿Huesa raquiduamelpelafingün pu che Pablo ñi rulpacünufiel feichi ley? (Inaduamnge ti huichulechi dungu: “ Roma ñi pu lonco ülmen”).
