CAPITULO 11
‘Rumeñma ayühuingün ca Chau Dios elueyu ñi nehuen’
Pablo cüme chaftufi tañi pu caiñetueteu
Hechos 13:1-52 mu entungei
1, 2. 1) ¿Chem hue falin cüdau elungei Bernabé engu Saulo? 2) Ñi femtripayal Hechos 1:8, ¿chumngelu falin-ngefui tañi elfal cüdau?
¡MÜLEI cüme dungu! Siria mapu, Antioquía huaria mu, Chau Dios dullifi ta Bernabé a engu Saulo ñi amuldungumeal tati cümeque dungu ca mapu (Hech. 13:1, 2). Hue falin cüdau ta tüfa, fei engu tati hunenque misionero amualu cheu ñi ngequenon caquelu cristiano (Hech. 8:14; 11:22). Compañnieyu Juan Marcos, quiñentrür amuldungufingün pu che petu allcütunofulu tati cümeque dungu.
2 Mari meli tripantu cuifi, Jesús feipifi tañi pu discipulo: “Huldunguaimün iñche meu Jerusalén püle, com Judea, Samaria ca huall mapu püle” (Hech. 1:8). Tañi misionerongen mu, Bernabé engu Saulo quelluntucuingu ñi femtripayal Jesús tañi feipin. b
“Dullifiñ engu ñi femal quiñe cüdau” (Hechos 13:1-12)
3. Cuifi, ¿chumngelu cüdaungeafui amual ca mapu?
3 Famülque mu, mülei cümeque rüpü, auto, micro ca avion. Cuifi mu ngelafui ca epe com che namuntu amuquefui rüpü mu, feimu rume cüdaungefui puhual ca mapu. Ñi miyahual 30 kilometro müten, c pu che mülefui ñi trecayal com antü, ¡müna cansalen puuquefuingün! ¡Fütra cüdau tati ñi elungeel Bernabé engu Saulo! Mülefui ñi rume yafüluhual. Quimnielu rume tüfa, ayüucülefuingu (Mat. 16:24).
4. 1) ¿Chumngechi dullingei Bernabé engu Saulo? 2) ¿Chumingün pu peñi ca chumngechi inayentuafuiñ?
4 Tañi nehuen mu, Chau Jehová dullifi Bernabé engu Saulo ñi femal ti cüdau (Hech. 13:2). ¿Chumngelu fei engu müten dullingeingu? Quimlaiñ, Biblia feipilai. Chau Dios tañi pu huerquen ca pu quimeltuquelu Antioquía mu chaftudungulai ñi dullingen engu, ütrirlafingün rume. Doi mai, quelluntucuingün, ngüñüluhuingün ca ngillatucünuingün, fampuhulelfi ñi cuhu engün, fei ‘peucayal’ pihuingün (Hech. 13:3). ¿Cüme duamelpelafingün ta Bernabé engu Saulo? Trahunche mu, ca femngechi dullingequei quiñeque peñi ñi loncoleal ca femal fillque cüdau. Feimu iñchiñ quelluntucuafiyiñ, turpu ütrirlayafiyiñ, doi mai ‘pengelaiñ taiñ rume falintuquefiel engün ca piuqueyeafiyiñ fente ñi cüdahun engün’ (1 Tes. 5:13).
5. Bernabé ca Saulo, ¿chumingu ñi amuldungual Chipre mu?
5 Bernabé ca Saulo amuingu ta Seleucia, fei farcu mu amuingu ta Chipre, 200 kilometro camapulefui. d Bernabé, Chipre mu tuhui. Feimu rume ayüniepelai amuldungual tañi mapu mu. Puulu engün Salamina huaria mu, ‘conpuingün pu judio ñi ngillatuhue ruca mu ñi amuldungulelafiel tati pu che Chau Ngünechen ñi dungu’ (Hech. 13:5). e Fill püle amuldunguingu Chipre mu, tati doi fütraque huaria rüpü püle. Quimlaiñ chem rüpü tañi amun, huelu 160 kilometro peno trecayahuingu.
6, 7. 1) ¿Inei am ta Sergio Paulo? Elimas, ¿chumngelu cüpa catrütufeyu ñi allcütunoal tati cümeque dungu? 2) ¿Chem femi Saulo?
6 Bernabé engu Saulo puhuingu ta Pafos huaria, fei hula ngüneduamingün fentren che ñi poyequefiel coilaque dios. Com Chipre mapu meu, femngechi femquefui pu che. Pafos mu, mülefui quiñe huentru Bar-Jesús pingelu ca Elimas pingequefui tañi calcu huentrungen mu. Tüfachi huentru, Chau Dios ñi huerquen femfaluuquefui ca “cüdahuelquefi ta Sergio Paulo, quiñe quim huentru gobernadorcülelu”. f Feichi antü meu, fentren ülmen Roma che amuquefuingün pu calcu huentru mu ñi peufaluhual. Sergio Paulo ‘quim huentrungelu’ rume, femquefui. Huelu “müna cüpa allcüturquei Chau Ngünechen ñi dungu”. Fei Elimas rume nüngaitui (Hech. 13:6-8).
7 Sergio Paulo feyentufule Jesús mu, duamhuelayafui ñi ngülamtuaeteu feichi calcu huentru Elimas. Feimu Elimas ‘cüpa catrütufi ñi feyentunoal ta Ñidol Jesús meu’ (Hech. 13:8). Ngüneduamlu tüfa Saulo, incañpefi ta Sergio Paulo. ¿Chem feipi? Saulo, Pablo ca pingelu, llohui Chau Ngünechen ñi nehuen, fei leliniehuefi ta Elimas ca feipifi: “Eimi re ngünencan ca huesa dungu raquiduamqueimi. Eimi ta Huecüfü ñi fotüm, caiñetuquefimi com tati norngelu. ¿Chumngelu cacünuquefimi Jehová ñi nor cüme dungu? Chau Jehová juzgaeimu. Traumaleaimi, pichi alüñmayai tami pelohuenoal ti pelon antü”. Feimeu müten, “trucuri tañi quintun, fei dumiñnagi tañi nge. Fei sumpatuyahui ñi nüñmangeal tañi cuhu”. g ¿Chumi Sergio Paulo? Biblia feipi: “Pefilu ñi rupan, feyentui. Rume afmatulehuei Chau Jehová ñi quimeltun mu” (Hech. 13:9-12).
Caiñetungeliyiñ, Pablo reque incanieafiyiñ tati cümeque dungu.
8. ¿Chumngechi inayentuafuiñ Pablo?
8 Pablo eluulai ñi llicalcayaeteu Elimas, ca femngechi femaiñ iñchiñ. Inei rume cüpa catrütufule pu che ñi feyentunoal, ñücüflayaiñ. Doi mai incañpeafiyiñ pu che ayülu ñi quimürpuafiel ta Chau Jehová. Biblia elueiñmu tüfachi ngülam: “Rumel ayüfalngepe tamün dungun, chadiñmalepe reque” (Col. 4:6). Huelu huldunguaiñ müten ti cümeque dungu, ayüfalngenole rume quiñeque che mu. Doyelchi mai mülele quiñe che ayülu ñi doi quimal. Tati coilaque religion ‘cacünuquefi Jehová ñi nor cüme dungu’ chumngechi femquefui Elimas, fei llicanon mu cüme quimeltulelafiyiñ pu che (Hech. 13:10). Pablo reque, nehuen piuque mu amuldunguaiñ com pu che. Iñchiñ femquelaiñ afmatun dungu chumngechi ñi femquefel Pablo, huelu mai Jehová tañi nehuen mu cüpalniequefi pu che cüme llouquelu tati cümeque dungu (Juan 6:44).
Quiñe dungu ñi “yafültucuafiel tati pu che” (Hechos 13:13-43)
9. ¿Chem cüme dungu ñi femün Pablo engu Bernabé inayentuafeyu pu loncolelu?
9 Pablo, Bernabé ca Marcos engün tripaingün Pafos, rumeingün lafquen fei ñi puhual ta Perga, 250 kilometro camapulefui. Tüfa tati hunen rupa Biblia feipilu “Pablo ca tañi pu compañ”. Tüfa raquiduameleiñmu Pablo ñi loncolerpun feichi troquiñ huentru (Hech. 13:13). Bernabé ütrirlafi ta Pablo, doi mai quiñentrür cüdahuelfingün ta Chau Dios. Pu loncolelu inayentuafuingün ñi femün engu. Ayüquelaingün ñi doicüleal, doi mai loncontucuniefingün Jesús tañi feipin: “Com eimün peñiyehuimün”. Cafei ngülamtui: “Tati mallmauquelu illamcangeai, huelu tati ñom piuquengelu püramyengeai” (Mat. 23:8, 12).
10. ¿Chumngefui ti rüpü Perga puulu Antioquía, Pisidia mu?
10 Aculu engün ta Perga, Juan Marcos huiñotui ta Jerusalén. ¿Chem rupai? Quimlaiñ, huelu Pablo engu Bernabé amuleingu. Namuntu amuingu ta Antioquía huaria, Pisidia mapu meu, tüfa coneltulefui Galacia troquiñ mapu mu. Tüfachi mapu mil cien metro alüpüralefui lafquen mu, fentren huincul mülefui ca rüpü püle saltiangequefui pu che. Feimu rume cüdaungefui puhual üyeu, doyeli Pablo cutrancülepelafui. h
11, 12. ¿Chumi Pablo ñi cüme quimeltuafiel pu che trahuluucülelu ngillatuhue ruca mu?
11 Ürcütun antü mu, Pablo engu Bernabé coningu quiñe ngillatuhue ruca mu mülelu Antioquía, Pisidia mapu meu. Fei, “deu papeltungelu Moisés ñi ley dungu ca ñi huirintucuel Chau Ngünechen ñi pu huerquen, pu adnielu ti ngillatuhue ruca feipifalfingün ta Pablo engu Bernabé: ‘Pu peñi, nielmu quiñe dungu tamu yafültucuafiel tati pu che, allcütuhuayiñ’” (Hech. 13:15). Fei Pablo huitrapürai ñi dungual.
12 Pablo quimniefui tañi allcütueteu quiñeque judio ca quiñeque che concülelu pu judio ñi huimtun mu, feimu feipifi: “Pu Israel huentru ca com tati yamquefilu ta Chau Dios, allcütumün” (Hech. 13:16). Fei engün quimlafuingün Jesús ñi femquen fillque dungu ñi femtripayal Chau Jehová ñi ayüqueel. Fei, ¿ca chem feipi Pablo ñi raquiduamelafiel engün? Hunelu feipi chem ñi rupan pu Israel che. Egipto mapu mu mülerquefuingün, “huelu Chau Ngünechen quellueyu engün”. Cafei feipi: “40 tripantu miyaulu engün huellin mapu mu, Chau Ngünechen illcufemlai tañi huesa femün engün”. Cafei Pablo raquiduamelfi engün Chau Jehová ñi elufiel pu Israel che ñi ngen-ngeal ti mapu tañi feipicünufiel (Hech. 13:17-19). Quiñeque che feipiquei, Pablo ñi feipiel quiñeque texto hue papeltungelu feichi antü. Feingefule tüfa, feipiafuiñ tüfachi rupan ca pengelquei Pablo ñi cüme entuquen tañi feipin ñi quimeltuafiel “chem che rume” (1 Cor. 9:22).
13. ¿Chumafuiñ ñi doi ayüfalngeal taiñ quimeltun?
13 Pablo reque, iñchiñ ca ayünieiñ puhual pu che tañi piuque mu, fei ñi ayüafiel engün taiñ quimeltun. Feimu, raquiduamqueiñ chem dungu ayüafui ñi allcütual tati pu che, fei taiñ nütramelafiel. Por ejemplo, raquiduamqueiñ chem feyentun ñi nieel pu che, fei feyentule engün Biblia mu, feipiquefiyiñ quiñeque texto fentren che quimniefilu. Quiñeque mu, cümeafui ñi papeltuafiel engün quisu tañi Biblia meu. Chem che rume traf-filiyiñ amuldungun mu, feipiafiyiñ ayüfalchi dungu, fei taiñ puhual tañi piuque mu engün.
14. 1) Pablo, ¿chumi ñi nütramcalelafiel pu che Jesús mu, ca chem ngülam huli? 2) ¿Chumi pu che allcütulu Pablo tañi hueupin?
14 Pablo quimeltui Jesús ñi tuhun pu Israel che mu, “fei ñi montulafiel”. Ca Juan, tati fautizachefe, pepicafi pu che ñi cüme llohuafiel ta Jesús. Cafei Pablo feipi Jesús ñi langümngen, huelu ñi huiñomongetun (Hech. 13:20-37). Feipilu hula, Pablo feipi: “Feichi huentru ñi lan mu Chau Ngünechen rulpacünuai tamün culpan” ca “nor che troquituafi com tati feyentulu”. Feimu ngülamtui: “Cuñiutuculemün tamün rupanoal chumngechi ñi huirintucuel Chau Ngünechen ñi pu huerquen. Feipi engün: ‘Tamün antü meu femquen quiñe cüdau. Huelu cüme quimeltungelmün rume, feyentulayaimün. Ngüneduamfimün tüfachi cüdau eimün pu illamcaquelu. Afmatuleaimün, fei layaimün’”. ¡Fente cüme entui tañi hueupin Pablo! Fei tati pu che feipieyu ñi doi nütramcalelaeteu tüfa cangelu ürcütun antü mu. Cafei aflu ti trahun, fentren “feichi pu che inafingün ta Pablo ca Bernabé” (Hech. 13:38-43).
“Amuldunguafiyiñ pu catripanche” (Hechos 13:44-52)
15. Conlu ti ürcütun antü, ¿chem rupai?
15 Ca semana, conlu ti “ürcütun antü, epe com huaria che trahuluhui ñi allcütuafiel” ta Pablo. Quiñeque judio ayülafingün turpu ñi feipin Pablo, feimu “huesa piuque mu chaftudungufingün”. Fei Pablo ca Bernabé llicanon mu feipifingün: “Eimün hune mülefui tamün quimelelngeal Chau Dios ñi dungu. Huelu pilaimün ñi allcütual. Femngechi quimfali tamün elungenoafel rumel mongen. Feimu amuldunguafiyiñ pu catripanche. Chau Jehová ta huercüeyumu. Feipi: ‘Pelon reque elcünueyu tati pu catripanche meu. Fei huall mapu püle amuldunguafimi tati pu che chumngechi montulngeai engün’” (Hech. 13:44-47; Is. 49:6).
‘Caiñetufingün ta Pablo ca Bernabé’, huelu pu discipulo “rumeñma ayüucüleingün” ca “Chau Ngünechen elueyu ñi nehuen” (Hechos 13:50-52).
16. Pu judio allcütufilu ta Pablo engu Bernabé, ¿chumingün? Huelu, ¿chem femi Pablo engu Bernabé?
16 Pu judiongenolu allcütufilu ta Pablo rume ayühuingün, fei com pu “ayünielu ñi llohual ti rüf dungu, fei ñi nieal rumel mongen, feyentuingün” (Hech. 13:48). Femngechi alüñmalai ñi puhual Chau Dios tañi dungu huall püle feichi mapu meu. Huelu pu judio ayülafingün ñi feipieteu Pablo, feimu, ngüchaltucufingün pu ülmenque domo ca pu yamfal huentru “ñi caiñetuafiel ta Pablo ca Bernabé. Fei huemünentungeingu”. ¿Chem chumingu Pablo engu Bernabé? Mütrohuingu tañi namun, femngechi ñi ngüneduamal engün tañi huesa femün. Fei hula Iconio huaria mu amuingu. ¿Ngehuepelayafui mai cristiano Antioquía, Pisidia mapu meu? Femlai. Quiñeque che eluhui ñi inanieafiel ta Jesús, fei “rumeñma ayüucüleingün” ca “Chau Ngünechen elueyu ñi nehuen engün” (Hech. 13:50-52).
17-19. 1) ¿Chumafuiñ taiñ inayentuafiel ta Pablo ca Bernabé? 2) Femliyiñ, ¿chumngechi ayüucüleaiñ?
17 ¿Chem quimeltueiñmu ñi femün Pablo engu Bernabé? Fentecünulayaiñ taiñ amuldungual cüpa catrütueliyiñmu rume ülmenque che. Pu che Antioquía mu cüme lloulai tati cümeque dungu, fei Pablo engu Bernabé illcutulafi engün. Doi mai quimniefuingu caque quiñeque che mülei ñi dullial tañi allcütuafiel cam allcütunoafiel ta Chau Dios. Fei engu obligalayafui pu che ñi femal, fei ta tüfa pengelingu ‘mütroulu tañi namun’. Huelu mai femingu tañi pepi femün, amuingu ñi amuldungual Iconio huaria mu.
18 ¿Chem femingün cai pu cristiano mülelu Antioquía mu? Tañi cristianongerpun mu, fentren che caiñetueyu engün. Femngelu rume, ayüucülefuingün. Jesús feipi: “¡Doi ayühun niei pu allcütulu Chau Dios ñi dungu ca inaniefilu!” (Luc. 11:28). Femngechi femingün pu cristiano Antioquía mu, inaniefingün Jesús tañi feipin.
19 Inayentuafiyiñ ñi femün Pablo engu Bernabé. Loncontucunieaiñ: amuleaiñ taiñ amuldungucheal, feita taiñ cüdau. Huelu mai pepi obligaquelafiyiñ pu che ñi allcütuafiel ta Chau Dios. Fei pu che cüme llounofile tati cümeque dungu, inayentuafiyiñ tati hunenque cristiano. Caiñetungeliyiñ rume, loncontucunieaiñ fente ñi falin-ngen tati cümeque dungu ca eluucüleaiñ taiñ adnieaeteu Chau Dios tañi nehuen mu, femngechi rumel ayüucüleaiñ (Gál. 5:18, 22).
a Inaduamnge ti huichulechi dungu: “ Bernabé, feiti ‘yafültucuchequelu’”.
b Feichi antü mu, deu mülefui quiñeque trahunche camapulelu Jerusalén mu. Quiñe tüfa: Antioquía, Siria mapu meu mülelu, 550 kilometro camapulefui.
d Hunen siglo meu, ¿tunteñmaquefui ñi miyahual 160 kilometro quiñe farcu? Quelluelieyu ti cürüf, com antü. Huelu femnole, doi alüñmaquefui.
e Inaduamnge ti huichulechi dungu: “ Cheu ñi trahuluuquen pu judio”.
f Roma ngüneniequefui Chipre. Feimu dulliquefui inei ñi gobernadorngeal, fei ñi ngünenieafiel pu che feichi troquiñ mapu mu.
g Saulo, pingefui hebreodungun mu. Huelu tüfachi texto mu ca amulelu ti lifru Hechos, Pablo pingetui. Tüfa ta Roma üi, latin quehun mu tuhui. Quiñeque che feipiquei, Pablo ñi femngechi üitungequen tati gobernador Sergio Paulo ñi duam mu. Huelu feingelai. Tripalu Chipre mu, amulerpui ñi Pablo pingen. ¿Pichicalu üituculelngepelai feichi üi? Fei apostolcünungelu ñi amuldunguafiel catripanche, doi cümefui ñi femngechi üitungeal. Tañi üi “Saulo”, cümequelafui ñi femngechi üitungeal griegodungun mu (Rom. 11:13).
