Ti pu püllü müleyngün tati. Müley kümeke püllü ka wedake püllü. Tüfachi pu püllü, ¿chengekefuyngün Mapu mu? Fey lalu engün, ¿püllüngerpupetuyngün may?

¡Femlay tati! Tati pu che feypikey, ‘lan mu kiñe che, kañpüle amuy ñi mongeleal’. Welu tati Biblia femngechi feypikelay. Tüfachi lifru mew müley Ngünechen ñi rüf dungu, tati kiñen rüfngechi Ngünechen, Jewba pingelu. Kidu dewmafi tati pu che, feymu kimniey ñi chumletun tati pu layechi che (Salmo 83:18; 2 Timotew 3:16).

Biblia ta feypi Chaw Ngünechen dewmafi ti wünen wentru Adan, dewmafi “trufür [trufken] mapu mew” (Génesis 2:7). Ngünechen elkünufi ta Adan kiñe anümkawe mu, Eden pingefulu, tati Küme Mülewe. Adan mülefuy ñi feyentuafiel (müngeltuafiel) Jewba tañi werkün dungu, feyentulefule lalayafuy, ka petu müleafuy tüfachi Mapu mew. Welu Adan, kimnielu rume ñi welulkawmeken, feyentulafi Chaw Ngünechen ñi werkün dungu, feymu Ngünechen feypieyew: ‘Wiñotuaymi ta trufür mapu mew chew tami dewmangemum. Trufür mapu am ta eymi, fey trufür mapu mew ta wiñotuaymi’ (Génesis 3:19).

¿Chem dungu am ta tüfa? ¿Chew mülekefuy Adan petu ñi dewmanoetew ta Jewba trufür mapu mew? Chew no rume mülekelafuy. Petu ñi dewmangenon ta Adan, kiñe püllü reke mülekelafuy wenu mapu mew. Feymu Jewba feypifi ta Adan ‘trufür mapu mew ta wiñotuaymi’. ¿Chem pifel tüfa? Adan ñi larpual. Fey lalu Adan kiñe püllü ngerpulafuy. Lay müten, dew niewetulay mongen,  chew no rume mülekelafuy. Feymu llemay, tati pu layelu niewetulayngün mongen.

Welu, ¿kakelu pu layelu kay? ¿Niewetulay mongen, Adan reke? Biblia ta kimelelkeeiñmew tüfachi dungu:

• “Itrokom [pu che ka pu kulliñ] ka femngechi afi ñi mongen. Trufür [trufken] mu am dewmangelu engün, ka itrokom wiñotuyngün trufür mu” (Eclesiastés 3:20).

• “Tati pu layelu chem dungu no rume kimwetukelayngün” (Eclesiastés 9:5).

• “[Tati pu layelu] ñi piwkeyewün, ñi üdewün, ka ñi ütrirüwün ngewetulay” (Eclesiastés 9:6).

• “Fey ngenolu am küdaw, adkünun, ngüneduamün, ka kimün rüngan küfwe mew, chew tami amual” (Eclesiastés 9:10).

• “Fey [tati che] wiñotuy trufür mapu mew, feychi antü mew may niewelay rakiduam” (Salmo 146:4).

 ‘¡Müna küdawngey longkontukual chem pin ta Biblia!’, feypiafuymi chi. Welu rakiduamnge tüfachi dungu mu: fentren ruka mu tati wentru küdawkey ñi nieal kullin tañi kümelkaleal ñi pu che. Welu lale ti wentru, tañi pu che rupakey wedake dungu mu. Kiñeke mu tati domo ka ñi püñeñ nielay kullin ñi ngillayal iyael no rume. Kafey tañi pu kayñe kutrankanieafuy tati pu che ñi elkünuel ti la. Feymu rakiduamnge: petu mongelekafule kañpüle feychi wentru yem, ¿chumngelu (chemu) elulafi ñi duamnieel tañi pu che? ¿Chumngelu montul-lafi feychi wedake che mu? Tüfachi wentru am niewenolu mongen, pepi femlay chem no rume. Fey llemay Biblia ñi feypin tüfachi dungu mu, rüf dungu tati (Salmo 115:17).

Welu tati pu layelu, ¿wiñomongetuayngün? Femayngün tati. Küpalechi nütram mu, chillkatuafiyiñ chumngechi ñi wiñomongetual tati pu la. Welu fewla tukulpange, tati pu layelu kimlayngün chem tami chumael. Ka pepi adkintulayafeymu, allkütulayafeymu, ka pepi dungulayafeymu rume. Feymu ngelay tami llükanieafiel. Pu lachi che kellukelayafeymu, ka wedalkakelayafeymu llemay (Eclesiastés 9:4; Isaías 26:14).