Feymu, ¿chumngelu (chemu) Weküfü ka tañi pu inuma fente küpa ngünenkachekeyngün? Müna ayülu am taiñ kiñewküleal kidu engün mew ka taiñ kayñetuafiel ta Ngünechen. Fey engün ayüley ñi poyengeal. Ka ayükeyngün taiñ feyentual tati koylake dungu ka femal wedake dungu Jewba ñi ayükenoel. Ka tüfachi fentren koylake wimtun dungu femürpukeyngün ñi lan mu chi che.

Ñi lan mu kiñeke taiñ pu che, müna kutrankawkeiñ, ka pengelkeiñ taiñ weñangkülen mu, weda dungu no tüfa ñi ngümayengen. Jesu kütu “ngümay” lalu tañi weni, Lasaru pingelu (Juan 11:35).

Wall Mapu püle tati pu che fillke dungu femkey layüm tañi pu che. Tati Biblia chaftukelafi fentren tüfachi dungu. Welu tati pu che femkeyngün kiñeke wedake wimtun, feyentukelu am pu layelu kañpüle ñi mongelen engün, ka ñi pukintuniefiel tati pu mongelelu. Tüfa engün llükakefi pu layechi che ñi tutelkalenoal engün, feymu kiñeke femkeyngün fütrake pepikawkülechi eluwün, ka fütra ngümakefingün tati lalu. Welu tati pu layelu “chem dungu no rume kimwetukelayngün”, feymu tati pu che femkelu tüfachi dungu, kelluntukuley Satana tañi koylake dungu (Eclesiastés 9:5).

Tati pu che feypikeyngün ‘pu layelu duamnieyngün ñi kellungeal,  welu femngenofule chem dungu no rume ñi tüngküleal engün wedalkayafeiñmew’, pikeyngün. Fey kiñeke lof mu tati pu che tukulelkefingün tati la ñi nieelchi chemkün kakon mu, fey niealu kom ñi duamnieel chew tañi amual, femngenole tüfa ‘wiñotuafuy ñi yepatual tañi chemkün’, pikeyngün. Kafey eluwün mu elelkefingün iyael ka pulku tati la, rupachi antü mu ka femngechi femkeyngün eltun mu.

Kom tüfachi dungu ñi femkeel ta che, ¡kümelay tati! Amultukulu am Satana ñi koylake dungu chumlen mu tati pu layelu. Kom tüfachi dungu nüwküley pu weküfü ñi kimeltun mu, feymu ¿ayüpey may Jewba taiñ koneltual tüfachi wedake wimtun mu? Turpu ayükelay llemay (2 Korintio 6:14-18).

Feymu, Chaw Ngünechen ñi pu che turpu koneltulelayngün kiñe wimtun no rume tuwlu Satana ñi koylake dungu mu. Welu may yafüluwkeyngün ñi kelluafiel ka yafülduamafiel piwkeyen mu tati mongeleyechi che. Kimnielu am engün Jewba müten ñi nieelchi pepilüwün ñi kelluafiel tati lachi pu che (Job 14:14, 15).

Kiñeke che dungukefi tati pu wedake püllü, kidu femafuy tüfa, kam kiñe che kelluafeyew. Tati machitun mu, kalku dungu, ti pelontuchekelu, ka ti ramtukefilu tati pu la, kom engün fülkonküley pu wedake püllü engün.

Biblia mew feypikonküley taiñ femnoal tüfachi wedake dungu, ka feypiley: “Ngelay ñi müleal eymi mew rulpakelu ñi pu yall [püñeñ] ti kütral mu, iney no rume pünekelu pelontun che, adümkatukelu ti kalku dungu, pewütuwün, kalku che, iney no rume dawkelu [weya bemkünolümkelu], iney no rume ramtukelu tati rangiñelwelelu ta pu wedake püllü mew ka pu che engün mew, kam amukelu kiñe pelontuchekelu mew, ka iney no rume ramtukelu tati pu layelu. Kom ti che femkelu tüfachi dungu, ünufalngey ta Jewba mu” (Deuteronomio 18:10-12).

Jewba newentu ngüfetukeeiñmew (eypitukeeiñmu) taiñ  kiñepülekünuwal tüfachi wedake femün mu, ¿chumngelu (chemu)?

Jewba ngüfetunieeiñmu taiñ fülkon-noal pu wedake püllü mew taiñ kümelkaleal. Taiñ Wenu Chaw piwkeyechekey, ka duamtuchekey, ka kimniey kom tati pu kiñewkülelu pu weküfü engün kutrankawkeyngün.

Feychi weda dungu mu rupay Nilda pingechi domo Brasil mapu mew, kidu kellukefuy tati pu che ñi nütramkayal pu wedake püllü engün. Tati pu weküfü müna kutrankakefeyew. Kidu feypi: “Pu wedake püllü [...] konweküfükefenew, ngünekefenew engün. Kiñeke rupa kimkelafun chem ñi chumeken iñche, fey ka kimkonrumekefun, feymu weluduamlu iñche rakümtukungen pital mu. Fente tañi kutrankakefetew pu weküfü, turpu tüngduamkülekelafun. Feymu lawentukefun ñi tüngküleal, putufengetun, ka pütremtufengetun. Pütrüñma mu felekefun”, pi.

Welu Jewba ka tañi pu inanieetew kellufi engün tüfachi domo famtripatual tati pu weküfü ñi ngünen mu, feymu may küme ayüfalchi mongen nietuy fewla. Kidu feypi: “Ngülamtuafun itrokom che ñi pichin no rume duamnoafiel tati [wedake] püllü”.