TI LONCO José, 1879 tripantu püle, huesa duameleyu tati pu autoridad, feimu feipi: “Cüpa allcühuelan re feipin müten. Huesa duameleneu ñi acordayal com ñi feipicünungeel, huelu ñi femtripanon”. Tüfachi huentru tañi tuhun Catalechi Yu troquiñche pingei, Norteamérica mapu mu tuulu.

Fentren pu mapuche duamniei manelfalngechi che ñi quelluaeteu. Tüfa ta quiñe, Quisulechi Huentru pingelu Teton Sioux lof mu tuulu feipi: “Iñche quimtucun ta quiñe huentru müten puulayafui ñi femtripayal quiñe fütra dungu”.

¿Inei mu rüf maneluhuafuiñ ñi cüpalal nor dungu com pu che meu? ¡Taiñ Huenu Chau mu llemai maneluhuafuiñ!

Elchen dungulelquefi tati pu che, ca tañi feipicünufiel, quiñe lifru mu huiriconcülei (2 Timoteo 3:16, 17). Biblia mu quisu feipicünui ñi huecünutuafiel com dungu (2 Pedro 3:13). Taiñ Huenu Chau turpu ngoimaquelai tañi feipicünuel. Tañi troquiñche mu feipi: “¿Ngoimacünupeafui mai quiñe domo tañi moyol püñeñ, ca cutranpiuqueyelayafui tañi püñeñ quisu ñi choyüel? Tüfachi pu domo ngoimafule rume, iñche turpu ngoimanentulayayu” (Isaías 49:15). Tati lonco José feipi: “Quimeltungequeiñ ta Chau Ngünechen com ñi peel ca ñi allcütuqueel, ca turpu ngoimanentuquelai”.

Taiñ Fütra Chau quisu üitucuhui fei taiñ maneluhual quisu mu. Quisu ta ‘Jehová, tati Deumalu ti mapu’ (Isaías 40:28). Tati üi Jehová cüpa feipi “femcünuquei ñi femngechingerpual”. Chau Ngünechen femquei com ñi duamniengeel fei ñi femtripayal tañi feipicünuel, feimu niei tüfachi üi. ¿Chem mu manelfali ta Chau Jehová?

Piuqueyen: Chau Ngünechen rume piuqueyequeiñmu, feimu elueiñmu tati  mapu. Quiñe lonco Apache troquiñche, Gerónimo pingelu, feipi: “Tati antü eñumalqueneu, tati cürüf nengümnengümtuqueneu, ca tati anümca chellcomtuqueneu chumngechi ñi femqueel caquelu pichique mapuche. [...] Cheu rume amuafun ca cüme duamcüleafun”, pi. Taiñ Huenu Chau piuqueyefi com tati pu che chem tuhun-ngeafui rume, feimu huechunentuai tañi feipicünuel. Biblia ta feipi: “Jehová cüme piuquengelu cai, fentepuuquelai tañi nor piuqueyen, ca fentren pu cüpanche rupale rume, tañi manelfalngen aflayai” (Salmo 100:5).

Quimün: fentren ñidolcülechi huentru cüpa quelluquefingün tati pu duamtunielu, huelu quimlai ñi chem chumal engün. Huelu Chau Jehová, quisu tañi quimün mu, eluquefi ñi duamnieel com tati nielu mongen (Salmo 145:16). Quiñe lonco pu Dacota mu tuulu, Huitralechi Oso pingelu, feipi: “Feichi cuhu deumafilu ti mapu, cafei deumafi tati che ñi müleal tüfa mu”. Biblia feipi: “¡Ahuem Jehová, rume fentrelei tami deumael! Quimün mu com deumafimi. Tati mapu apolei tami deuman mu” (Salmo 104:24). Chau Dios tañi quimün mu maneluhuafuiñ ñi femtripayal taiñ feipicünueteu.

Nor dungu: tati lonco José, feipi: “Fütra Chau müten deumayefi com pu che”. Feimu llemai maneluhuafuiñ taiñ Huenu Chau ñi norümtuafiel com pu che ñi huesaque dungu. Biblia feipi Chau Dios mu: ‘Nor dungu mu amuquei com tañi rüpü’ (Deuteronomio 32:4). Cafei quimnieiñ taiñ Fütra Chau “dullintuchequelai. Doi mai llouquefi inei tañi yamnieteu ca femlu cümeque dungu, chuchi tuhun-ngele rume” (Hechos 10:34, 35). Chau Dios nor dungu femquelu cai, manelfali ñi femürpual tañi feipicünuel.

Nehuen: quiñeque ñidolcülechi huentru cüme piuquengeingün, huelu puulai ñi adümuhun tañi quellucheal. Huelu mai, Chau Ngünechen com nehuen niei. Quisu feipiquei tati pu huangülen mu: “Püraquintumün callfü huenu meu. ¿Inei am ta deumai com feichi dungu? Feichi entuquelu ñi raquingen mu tati pu huangülen, quiñe troquiñ hueichafe reque, ca com mütrümquefi tañi üi meu. Fütra pepiluhun-ngelu am ca afmatufali ñi nehuen, fei quiñe no rume ñamcülelai” (Isaías 40:25, 26). Feimu Chau Dios tañi nieelchi nehuen, raquiduamelqueiñmu ñi rüf femürpual tañi feipin.

Chau Ngünechen piuqueyechequelu, quimün nielu, nor dungu femquelu ca fentren nehuen  nielu, feimu maneluhuafuiñ ñi femtripayal tañi feipicünuel. Tati lonco ülmen Salomón feipi: “Com femtriparpui tañi feipicünuel” (1 Reyes 8:56).

Chau Jehová, tati Itrocom Deumalu, elfalcünufi tañi Fotüm Jesús ñi ngünenieal, fei norümtuafi com pu che ñi huesa dungu. Jehová feipi: ¡Tüfei! Iñche tañi saquifielchi poyequeteu! Tañi dulliel, ñi ayühulqueteu. Elufiñ tañi nehuen. Quisu nor dungu eluafi tati pu troquiñche” (Isaías 42:1). Tati Lonco Ülmen elcünulu Chau Ngünechen quelluafi com pu che, tati pu cutrancauquelu cütu. Biblia feipi ta Jesús mu: “Quisu [...] montulpe tati fillalelu ñi pu yall, ca apümcangepe tati ngünencachequelu. Quisu montulafilu cai tati fillalelu llellipumequelu ñi quellungeal, cafei tati cuñifallcülelu ca inei rume nienolu tañi quelluaeteu” (Salmo 72:4, 12).

Ellaca mu, taiñ Huenu Chau quiñe cüme mülehue elcünufi ti mapu ñi cüme feleal. Biblia ta feipi: “Fei Chau Ngünechen com liftuñmayafi tati pu che ñi cülleñu. Ngehuelayai lan, afai ta hueñancün, ngüman ca cutrantun. Ngehuetulai ti cuifi huesaque dungu”. Fei pichiñma mu femtripayai tañi ayüqueelchi dungu. ¿Maneluupeafuimi mai ta Huenu Chau ñi feipicünuel? Quisu feipi: “Tüfachi dungun manelfali ca rüfngei” (Apocalipsis 21:4, 5).

Chau Jehová feipi: “¡Ngüneduamniefulmi iñche tañi huercün dungu! Fei tami tüngün  quiñe leufü reque feleai, ca tami nor dungu tati lafquen ñi reu reque feleai” (Isaías 48:18). Tami Fütra Chau quimeltuafeimu cüme yenieal tami mongen. Chillcatufilmi ta Biblia, quimaimi chumngelu a tami mülen tüfachi mapu mu, chumngechi cüme yeucüleal caquelu che engün, ca chumngechi tami ayüucüleal (Miqueas 6:8; Lucas 6:27-31; 11:28). 

Elchen huiñoldungulelqueiñmeu fillque ramtun tati pu che ñi quimnoel, quiñeque tüfa: ¿chumngelu cutrancauquei ti cümeque che? ¿Chumletuquei tati layechi pu che? ¿Huiñomongetuaingün tati pu layelu?

Chau Ngünechen afquentu pengelquei ñi manelfalngen. Feimu, quisu am tami piuqueyequeteu, ¿eluhuaimi doi quimafiel ta quisu? Pu Dunguquelu Ineingen Jehová ayühun mu quimeltuaimu Biblia ñi rüf quimeltuqueel. “Maneluunge Jehová mu ca cümeque dungu femnge [...]. Penge tami doi fütra ayühun Jehová mu, fei quisu eluaimu tami piuque ñi ayüqueel” (Salmo 37:3, 4).