1. Epe puwlu ñi layal ta Jesus, ¿chem dungu küme feypikünuy?

EPE puwlu ñi layal Jesus pengeli fente ñi duamtuniefiel tañi pu inanieetew chem ñi rupayal engün küpalechi antü mu. Fey ngillatufi ñi Chaw: “Llellipulayaeyu tami püntünentutuafiel tati wesake che mew, welu may tami montulnieafiel tati wesake dungu mew. Chumngechi ta iñche koneltulelan tati wesake che mew, kisu engün ka femngechi koneltulelay tati wesake che mew [Mapu tuwün pu che, TNM]” (Juan 17:15, 16). Jesus piwke mew entuy tüfachi ngillatun, femngechi pengeli fente ñi piwkeyeniefiel tañi pu inanieetew ka ñi falin-ngen tañi feypilelfielchi dungu kiñeke tüfa engün: “Eymün koneltulenolu am tüfachi Mapu tuwün pu che mew” (Juan 15:19, TNM). Feley tati, Jesus rume falintufi tañi pu inanieetew ñi turpu koneltulenoal tüfachi Mapu tuwün pu che mew.

2. Jesus feypilu “tüfachi Mapu tuwün pu che”, ¿iney engün mu rakiduamkülefuy?

² Jesus feypilu “tüfachi Mapu tuwün pu che”, ¿iney engün mu rakiduamkülefuy? Kom ti pu che ñi ngünenieetew ti Weküfü püntütripakeyngün Chaw Ngünechen mu, ka llowkefingün Weküfü ñi rakiduam ñi mallmangeal ka femal kiduke ñi ayükeel müten (Juan 14:30; Efesio 2:2; 1 Juan 5:19). Feymu ti Biblia feypi pu weniyefilu tüfachi Mapu tuwün pu che, ‘kayñeyefi ta Ngünechen’ (Santiaw 4:4). Feymu ayüliyiñ taiñ rumel müleal  Chaw Ngünechen ñi piwkeyechen mew, ¿chumngechi koneltulayaiñ tüfachi Mapu tuwün pu che mu, müleliyiñ rume kidu engün mew? Fewla inaduamafiyiñ kechu dungu: 1) kelluntukuaiñ Chaw Ngünechen tañi Ngünenien müten, ka koneltulayaiñ politiko dungu mew, 2) famentuafiyiñ tüfachi Mapu tuwün-ngechi rakiduam, 3) mallmangenon mu tukutuwküleaiñ taiñ weshakelu, 4) yenieaiñ taiñ mongen ñi doyümnieafiel Chaw Ngünechen ñi dungu, ka 5) llowkeaiñ kom ti weychawe taiñ elukeetew Chaw Ngünechen.

3. a) Jesus, ¿chumngelu reyükonkelafuy politiko dungu mew? b)Jesus tañi dullielchi pu disipulu, ¿chumngelu tati Biblia mu ‘werken’ feypingeyngün? (Ka inaduamnge ti kimal dungu.)

³ Jesus reyükonkelafuy ti politiko dungu ñi antü mew, welu may eluwi ñi amuldungual Chaw Ngünechen ñi Ngünenien wenu mapu mew ñi müleal ka Jesus ñi Longko Ülmenküleal (Daniel 7:13, 14; Luka 4:43; 17:20, 21). Feymu, feypifi ta Ponsio Pilato, ti ngünenielu Roma mu: “Iñche ñi longko ülmenngen tuwlay tüfachi mapu mew” (Juan 18:36). Jesus ñi pu disipulungen mu yafüluwkeiñ taiñ inanieafiel, feymu kelluntukuleiñ Jewba ñi Ngünenien ka tañi Longko Ülmen Jesukristo, ka wall Mapu püle amuldungukeiñ tüfachi Ngünenien mu (Matew 24:14). Feymu ti apostol Pablo wirintukuy: “Feymew iñchiñ Jesucristo ñi werkenngeiñ tüfachi mapu mew [...]. Feymew llemay, ngellipuwayiñ Jesucristo mew tamün eluwael kümelkawtuael ta Ngünechen eymün” (2 Korintio 5:20). *

4. Tati pu rüfngechi inayentufilu ta Jesus, ¿chumngechi pengelkeyngün ñi kelluntukukefiel ta Chaw Ngünechen tañi Ngünenien müten? (Inaduamnge tati wichulechi dungu “ Tati pu wünenke kristiano koneltukelafuyngün politiko dungu mew”.)

 ⁴ Pu werken dunguñpefingün tañi lof, ka eluwküleyngün ñi femngeal chem ñi duamnieel tañi lof. Ka femngechi femkeyngün Jesus tañi pu dullielchi disipulu, kidu engün tañi “mülewe wenu mapu müley” (Filipense 3:20). Tüfa engün werken reke feleyngün, ka ayüwün mu amuldungukeyngün Jewba ñi Ngünenien tañi küme dungu, ñi femün mu tüfachi dungu kellufingün ta Kristo ñi fentren “kakelu ufisa” tañi “kümelkawtuael” Jewba engün (Juan 10:16; Matew 25:31-40). Tüfa engün kelluntukufingün Jesus ñi dullielchi pu peñi, trürkülen mu küdawkelu am. Pu dullingelu ka kakelu pu ufisa, kiñe kechan ufisa reke kiñewküleyngün ñi kellukonküleal ti Mesia ñi Ngünenien mu, feymu koneltukelayngün politiko dungu mülelu tüfachi Mapu mu (Isaías 2:2-4).

5. Iñchiñ taiñ rüf kristiano ngen mu, ¿chemu trürkülelaiñ tati pu kuyfike israelche mu? Ka ¿chumngechi pengelkeiñ tüfachi dungu taiñ mongen mu?

⁵ Iñchiñ koneltukelaiñ politiko dungu mew, kelluniefilu am ta Kristo, welu ka müley kakelu dungu taiñ femal tüfa. Iñchiñ taiñ pu peñi ka lamngen wall Mapu püle müleyngün. Trürkülelaiñ pu kuyfike israelche reke, kidu engün kiñe trokiñ mapu mew mülekefuyngün, Jewba ñi elufiel (Matew 28:19; 1 Pedro 2:9). Feymu kelluntukuliyiñ kiñe politiko trokiñche, ¿chem rupayafuy? Kiñewkülewelayafuiñ, ka pepi feypiwelayafuiñ ti pu che ‘Chaw Ngünechen ñi Ngünenien mu müten maneluwkülemün’ (1 Korintio 1:10). Kafey kiñe weychan mülerumefule, kewayafuiñ taiñ pu peñi ka taiñ pu lamngen, welu Biblia feypi ‘welukentu piwkeyewkülemün’ (Juan 13:34, 35; 1 Juan 3:10-12). ¡Tüfachi dungu mew Jesus feypi tañi pu disipulu ñi weychawenoal, ka tañi pu kayñe kütu ñi piwkeyeafiel! (Matew 5:44; 26:52; inaduamnge tati wichulechi dungu  “ ¿Rüf kelluntukulen Jewba ñi dungu mew?”.)

6. Chaw Ngünechen mu wülkünulu am iñchiñ taiñ mongen, ¿chem eluafiyiñ tati pu awtoridad, welu chem eluafiyiñ ta Chaw Ngünechen müten?

⁶ Rüf kristiano ngen mu, Chaw Ngünechen mu wülkeiñ taiñ mongen, elukelafiyiñ kiñe che, kam kiñe trokiñche ñi adkünuel engün, kam kiñe trokiñ mapu. Feymu  1 Korintio 6:19, 20 feypi: “Fey eymün ta kisu ngünewkülelaymün, fey Ngünechen am ngillaetew ta eymün, kisu ñi sakin Fotüm mew”. Fey elufiyiñ ñi koneltuleel tati pu ngünenielu, ti “emperador” pingelu: yamnieafiyiñ, kulliafiyiñ impuesto, ka feyentuafiyiñ chaftunofile engün ta Jewba ñi feypiel. Welu doyümnieiñ taiñ elukefiel ta “Ngünechen ñi koneltuleel” (Marku 12:17; Romanu 13:1-7). Feymu poyekefiyiñ ta Ngünechen, kom piwke mu piwkeyekefiyiñ, feyentukefiyiñ, püntütripakelaiñ kidu mew, ka wültukuafuiñ kütu taiñ mongen duamfalngele. Biblia feypi: “Fey mongeleliyiñ, Jewba mew ta mongeleiñ. Fey ka laliyiñ, Jewba mew ta layaiñ. Feymew mongeleliyiñ ka laliyiñ rume, Jewba ngen-ngey ta iñchiñ mew” (Romanu 14:8, TNM; Luka 4:8; 10:27; papeltunge Hecho 5:29).

7, 8. ¿Chem am “tüfachi Mapu tuwün-ngechi rakiduam”? ¿Chumngechi ngüneniefi tati pu che?

⁷ Ka femngechi, taiñ koneltulenoal tüfachi Mapu tuwün pu che mew, müley taiñ llownoal ñi weda rakiduamnieel. Pablo feypi taiñ llownoel “tüfachi Mapu tuwün-ngechi rakiduam, welu may Chaw Ngünechen tañi newen” taiñ llowün (1 Korintio 2:12, TNM). Ka tati efesoche feypifi: “Eymün ta inaniekefuymün tüfachi mapu mew müleyechi dungu, ka femkefuymün ñi ayükeel weküfü tati ngünenielu [...] ka yafültukuniefilu tüfeychi pu che tati müngeltukenofilu [feyentukenofilu] ta Ngünechen” (Efesio 2:2, 3).

⁸ ¿Chem am tüfachi Mapu tuwün-ngechi rakiduam? Tüfa ti weda rakiduam yafültukukefilu ti pu che ñi allkütunoafiel ta Chaw Ngünechen, ka amultukuniekefi “tañi wesa illutukeel ta che, ka tañi ayütukeel” (1 Juan 2:16; 1 Timotew 6:9, 10). Kafey tüfachi rakiduam ngüneniefi ta che, amultukufilu am ñi kulpayal. Kimfalngekelay  chumngechi ñi konmeken pu che mew, ka kom püle mülekey ti kürüf reke. Feymu pu che nierpukey wedake chumngen Jewba ñi ayükenoel: mallmawkeyngün, diñmatukefingün plata, femkeyngün ñi ayükeel müten, kidutu dullikeyngün chumngechi ñi yenieal ñi mongen, ka kayñetukefingün pu ngünenielu. * Tati pu che llowkelu tüfachi Mapu tuwün-ngechi rakiduam, ñochikechi nierpukey ñi piwke mu tati Weküfü ñi wedake chumngen (Juan 8:44; Hecho 13:10; 1 Juan 3:8, 10).

9. Tüfachi Mapu tuwün-ngechi rakiduam, ¿chumngechi konürpuafuy taiñ longko mu ka taiñ piwke mu?

⁹ Ti Mapu tuwün-ngechi rakiduam, ¿ka konürpuafuy taiñ longko ka taiñ piwke mu? Trepeluwkülenoliyiñ, femafuy llemay. Biblia feypi: “Kom dungu mu tami kuñiwtukukefiel, doyelchi may kuñiwtukuafimi tami piwke, chem mülele am tami piwke mu elungeaymi kam elungelayaymi mongen” (Proverbios 4:23). Ellaka mu ngüneduamlayafuiñ taiñ kontuniepaetew. Llowafuiñ tüfachi rakiduam kiñe kompañ mew, küme che taiñ trokiniefiel, welu poyekelafi ta Jewba (Proverbios 13:20; 1 Korintio 15:33).  Kafey peafuiñ tüfachi rakiduam kiñeke papel mew duamfalngenolu ñi papeltungeal, kiñeke pagina internet mew pengelkelu podngechi dungu kam ñi kimeltukeel pu püntüwlu Jewba mew, kafey ti wedake adngelluwün mu, ka fillke awkantun chew ti pu che re duamniey ñi wewal. Feymu, peafuiñ tüfachi Mapu tuwün-ngechi rakiduam kom pu che mu kam tati dungu pengelkelu ñi rakiduamnieel ta Weküfü ka tañi pu che.

10. ¿Chumngechi yafüluwküleaiñ taiñ llownoal ti Mapu tuwün-ngechi rakiduam?

¹⁰ Welu, taiñ rumel müleal Chaw Ngünechen ñi piwkeyechen mew, ¿chumngechi yafüluwküleaiñ taiñ llownoal ti Mapu tuwün-ngechi rakiduam kuñiwün-ngelu? Müley taiñ küme adümnieafiel kom ñi elkünuel Jewba taiñ küme weniyerpuafiel, ka rumel ngillatuafiyiñ taiñ eluaetew  ñi newen. Weküfü ka tañi pu che rume newen-ngeyngün, welu Jewba doy fütra newen-ngey (Santiaw 4:7). Feymu, rume falin-ngey taiñ ngillatunieafiel ta Jewba taiñ küme weniyeafiel.

11. Pu che, ¿chumngechi pengelkey ñi takutun mu ñi nieel ti Mapu tuwün-ngechi rakiduam?

¹¹ Chumngechi ñi adkülen kiñe che, pengelay chem rakiduam ñi nieel, ñi lifküleal ka küme adngechi takun yenieal. Welu fentren trokiñ mapu mew, pu che doy weda tukutuwkey. Feymu kiñe küdawkelu television mew feypi ‘chumngechi takutuwkey ti pu domo fanten mu, fey pu küri domo pelayayngün chem takutuwal ñi afmatufaluwal engün’. Kiñe diario mew feypingey ‘ti pu che pilolkiyawkeyngün reke, fey yewekelayngün rume’, ka pu pichike domo petu üllchangenolu ka femngechi tukutuwkeyngün. Kafey fentren che küme adngenochi takun yenieyngün ka tukutuwküleyngün ñi pengelal ñi chaftuniefiel pu awtoridad, femngechi pengelkeyngün ñi yamüwkenon.

12, 13. ¿Chem ngülam kelluaeiñmu taiñ dullial kümeke takun?

¹² Poyekefilu am ta Jewba, müna duamnieiñ taiñ küme adküleal, feymu rumel yeniekeiñ kümeke takun ayüfalngelu, ka lifkülekeiñ. Kom dungu mu, tukutuwkeiñ “mallmangenon mu ka küme rakiduam mew”, tüfachi kümeke chumngen mu, ka “kümeke femken” mu kimfaluwkey tati pu wentru ka domo “pengelkelu ñi poyeniefiel ta Chaw Ngünechen”. Iñchiñ duamnielaiñ taiñ adkintuaetew pu che, welu ayüleiñ taiñ ‘rumel müleal Ngünechen ñi piwkeyechen mew’ (1 Timotew 2:9, 10, TNM; Juda 21). Iñchiñ müna duamnieiñ taiñ ‘piwke mew may ñi müleael tati afkenochi adkülen [...]. Fey ta famngechi küme adkülen rume faliy ta Ngünechen mew’ (1 Pedro 3:3, 4).

 ¹³ Kafey, tukulpayaiñ, taiñ tukutuwkülen mu pu che küme rakiduamafuy kam weda rakiduamafuy ti rüf religion mu. Ngelay taiñ ülmenkawal kam mallmawal taiñ takun mew. Welu may müley taiñ pengelal taiñ poyeniefiel ta Jewba ka taiñ yamniefiel pu che ñi rakiduam ka chumngechi ñi duamnagken. Feymu, müley taiñ doyümafiel pu che ñi rakiduam, ka rakiduamlayaiñ “iney no rume feypilayaenew chumngechi ñi takutuwal”. Iñchiñ doy falintuafiyiñ yamnieafiel ta Jewba ka tañi pu che, femngechi küme kimfalngeay iñchiñ ta Ngünechen ñi konangen. Feymu, kom femkeaiñ “Ngünechen tañi püramyengeael” (1 Korintio 4:9; 10:31; 2 Korintio 6:3, 4; 7:1).

14. Taiñ takuwün ka lifkülen mu, ¿chem ramtuwafuiñ?

¹⁴ Amuliyiñ taiñ amuldungual kam taiñ trawün mu, doy fali taiñ küme tukutuwküleal ka taiñ lifküleal. Feymu, ramtuwafuiñ: “Tati pu che, ¿afmatukey tañi takun kam tañi lifkülenon mu? ¿Yewelkawkey kakelu che iñche mew? ¿Doy falintufiñ chumngechi iñche ayüken ñi tukutuwküleal? ¿Kam falintufiñ ñi pepikawküleal tañi llowal kiñe elfal küdaw ti trawünche mu?” (Salmo 68:6; Filipense 4:5; 1 Pedro 5:6).

15. Jewba feypikelaeiñmew Biblia mu fillke werkün dungu chumngechi taiñ adküleal taiñ takun mew kam taiñ lifkülen mu, ¿chumngelu am?

¹⁵ Jewba feypikelaeiñmew Biblia mu fillke werkün dungu chumngechi taiñ adküleal taiñ takun kam taiñ lifkülen mu. ¿Chumngelu? Ayünielu am taiñ kidutu küme dullial ka rakiduamal. Ka taiñ küme weniyefiel mu, küme rakiduamaiñ taiñ ngüneduamafiel Biblia ñi ngülam. Femngechi pepikawküleaiñ taiñ “ngüneduamafiel kom dungu”, fey kimaiñ “chem dungu ñi kümen kam ñi kümenon” (Ebrew 5:14). Doyelchi may, Jewba ayüniey taiñ küme tukutuwal, iñchiñ piwkeyefilu ta kidu ka taiñ chafche (papeltunge Marku 12:30, 31). Feymu, tüfachi pu ngülam,  dulliafuiñ fillke takun taiñ adküleal. Ti fütra trawün femkelu Jewba ñi pu che kom wall Mapu püle pengelkey fillke takun kolotun-ngelu ka pu trawüluwkelu ñi ayüwün.

16. Tüfachi Mapu tuwün-ngechi rakiduam, ¿chumngechi chaftuniefi Jesus ñi kimeltuel? Ka ¿chem ramtuwayiñ?

¹⁶ Ti Mapu tuwün-ngechi rakiduam ngünenkachekey, ka nengümkefi fentren che ñi kintual ayüwün ti plata ka fillke chemkün mu. Welu, Jesus feypi pu “che ñi mongen ta kümelkalekelay tañi nien mew müten ta fentren chemkün” (Luka 12:15). Jesus feypikelaeiñmu taiñ elkünual itrokom taiñ chemkün kam kom taiñ ayükeel. Welu feypi ñi nieal ti rüf ayüwün ka ñi montulngeal pu “duamnielu ñi llowael Ngünechen ñi küme dungu” ka ti pu doyümniefilu ñi mongen mu Ngünechen ñi küme dungu, eluwkülelu ñi weniyeafiel ta Jewba (Matew 5:3; 6:22). Feymu ta ramtuwayiñ: “¿Rüf feyentukefiñ Jesus ñi kimeltukeel, kam ka rakiduamelkeenew tati Weküfü?” (Juan 8:44). “¿Chem pengelken tañi dunguken mu, ñi ayükeel, ñi doyümnieel ka tañi mongen?” (Luka 6:45; 21:34-36; 2 Juan 6).

17. Tati pu doyümniefilu ñi mongen mu Jewba ñi dungu, ¿chem kümeke dungu llowkeyngün?

¹⁷ Jesus feypi ti “kimün kimfali ñi femkeel mew” (Matew 11:19). Feymu, pu che doyümniefilu ñi mongen mu Jewba ñi dungu, ¿chem kümeke dungu llowkey? Amuldungulu am Ngünechen ñi Ngünenien, rüf füshküpiwkeleyngün (Matew 11:29, 30). Kafey, famentuyngün fillke rakiduamelnieetewchi dungu, ka ti weñangkün (papeltunge 1 Timotew 6:9, 10). Ayüwküleyngün ñi nien mu tati duamfalchi mongelwe müten, feymu doy rupakeyngün tañi pu che engu ka ti pu peñi ka pu lamngen trawünche mu. Doy küme umawtuñmukeyngün kütu (Eclesiastés 5:12).  Wülkeyngün ñi tiempo ka ñi chemkün, feymu doy ayüwküleyngün (Hecho 20:35). Ka femngechi nieyngün “fentren maneluwün”, ka tañi piwke tüngküley ka küme duamküley (Romanu 15:13; Matew 6:31, 32). Kom tüfa doy fali chem dungu mu rume.

18. Ñi feypin mu ti Biblia, ¿iney kayñetukeeiñmew? ¿Chumngechi chaftukeeiñmew? Ka ¿chem weychan nieiñ?

¹⁸ Weküfü küpa katrütukeeiñmu ñi poyeafiel ta Jewba, fey taiñ ayüwkülenoal ka llownoal ti afnoachi mongen, welu rumel müleliyiñ Chaw Ngünechen ñi piwkeyechen mew, ingkañpeaeiñmew (1 Pedro 5:8). Pablo feypi taiñ weychameken, welu weychakelaiñ pu che “nielu ta kuerpu ka foro, welu may ti pu weküfü kom püle miyawkelu ta mapu mew, fey tüfa engün ta niey kisu ñi werken dungu, ka awtoridad ka ngüneniefilu ta tüfachi dumiñmalechi mapu” (Efesio 6:12). Tüfa feypilelu ‘weychan’ pengeli epu che ñi kewameken, alü kamapu mu chaftumekewlayngu, kam ellkawkülelayngu kiñe lolo mew ñi ingkañpewal. Pablo ka feypi pu wedake püllü taiñ kayñetunieetew nieyngün “kisu ñi werken dungu”, “awtoridad” ka ‘ngünenieyngün’. ¿Chem pengeli tüfa? Pu wedake püllü kom adnieyngün ka pepikawküleyngün taiñ chaftuaetew.

19. Pengelnge ñi chumngen kom ti weychawe reke felelu Chaw Ngünechen taiñ eluetew.

¹⁹ Iñchiñ rume welulkawkeiñ ka fentren dungu pepilkelaiñ, welu wewafuiñ taiñ weychan. ¿Chumngechi? Llowaiñ ‘kom ti weychawe reke felelu Ngünechen taiñ eluetew’ (Efesio 6:13). Ñi chumngen pengelngey Efesio 6:14-18 mu: “Feymu, newentuwkülemün ka küme trarifimün reke tamün rongewe mew tati rüf dungu kiñe trariwe  reke felelu, ka tukutuwaymün tati kuñiwtukelu ti piwke nor dungu mu, ka tukutuwaymün reke tamün okota ñi pepikawküleal tamün amuldungual tati kümeke dungu küpalnielu tüngün. Doyelchi may, nüafimün tamün mupiltun kiñe fütra eskudo reke felelu, femngechi tamün chongümafiel tati üykülechi wayki küpalu Weküfü mew. Kafey, llowaymün tati kasku [kam tati maneluwün] tamün montulaetew, ka tati fütra kuchillu küpalu Chaw Ngünechen ñi newen mew, fey tüfa Ngünechen tañi Küme Dungu, ka femngechi, fill ngillatun mu ka llellipun mew, rumel eluwkülemün tamün ngillatual Ngünechen tañi newen ñi duam mew” (TNM).

20. Iñchiñ pu kristiano ngen, ¿chem dungu mew trürlaiñ pu rüf weychafe engün?

²⁰ Kom tüfachi weychawe reke felelu rumel ingkañpeaeiñmu, taiñ eluetew am Jewba. Welu müley taiñ rumel adümnieafiel. ¿Chumngelu? Pu rüf weychafe kiñeke mu ürkütukeyngün ñi dewelkan kiñe weychan, welu iñchiñ pu kristiano ngen, rumel mekeiñ taiñ weychayal langümngeliyiñ rume ka turpu ürkütukelaiñ. Ngünechen apümkafile Weküfü tañi adkünuelchi dungu, ka rakümtukufile ka kom tañi wedake püllü engün ti fütra lolo mew, fey müten afay taiñ weychameken (Apokalipsi 12:17; 20:1-3). Fey, chaftumekefilmi tami wedake illutun ka welulkan, afeluwkilnge. Kom iñchiñ rume küdawtukeiñ taiñ inanieafiel ta Jewba, feymu müley taiñ ‘kutrankayafiel’ reke taiñ kuerpu (1 Korintio 9:27). Welu, weychamekenolmi, feyke ta kuñiwün-ngeafuy.

21. ¿Chumngechi müten wewaiñ taiñ weychan ñi nieel taiñ pu kristiano ngen?

²¹ Welu wewlayaiñ taiñ newen mew müten. Feymu Pablo feypi ñi duamfalngen taiñ rumel llellipuafiel Jewba, “tañi newen ñi duam mew”. Kafey müley taiñ  allkütuafiel. ¿Chumngechi? Müley taiñ chillkatuafiel ti Biblia, ka rumel trawüluwal taiñ pu kompañnieetew ti weychan mu. ¡Kidulelaiñ tati! (Filemon 2; Ebrew 10:24, 25). Feymu, küme inanieliyiñ kom tüfachi dungu, wewaiñ taiñ weychan, ka fill antü ingkañpewaiñ taiñ feyentuel ñi chaftungen mu.

22, 23. a) ¿Chumngelu müley taiñ rumel pepikawküleal ñi wiñoldunguafiel tati pu ramtuetew taiñ feyentun mu? ¿Ka chem müley taiñ ramtuwal? b)¿Chem inaduamaiñ ti küpalechi chillkatun mew?

²² Jesus feypi: “Tüfachi pu che üdeeymünmew, eymün koneltulenolu am tüfachi Mapu tuwün pu che mew” (Juan 15:19, TNM). Feymu, müley taiñ rumel pepikawküleal taiñ wiñoldunguafiel ñom piwke mu ka yamüwün mew kom taiñ ramtuetew taiñ feyentukeel (papeltunge 1 Pedro 3:15, 16). Feymu ramtuwayiñ: “Fentren pu che kümelu trokilafi kiñeke dungu taiñ femkeel Jewba ñi pu che, feymu ¿rüf kimnien chumngelu taiñ femngechi femken?”. “Mülele ñi femal kiñe dungu kümenolu ñi trokiniefiel kakelu pu che, ¿rüf maneluwkülen ti Biblia mew ka ti kim manelfal kona ñi feypikeel?” (Matew 24:45, TNM; Juan 17:17). “Mülele ñi femal Jewba ñi ayükeel, ¿pengelken tañi pepikawkülen ñi trürnoal kakelu che mu? Welu may, ¿pengelken ñi ayüwkülen tañi trürnoal fey engün mu?” (Salmo 34:2; Matew 10:32, 33).

²³ Ti Weküfü kiñeke mu newe kimfaluwkelay chumngechi taiñ kintukaduamnieetew taiñ koneltual ti Mapu tuwün pu che mew. Chumngechi taiñ inaduampeel, kiñeke mu kintukaduamnieeiñmew wedake adngelluwün mu. Feymu, taiñ yafültunieaetew ka küme duamelaetew taiñ rakiduam, ¿chumngechi dulliafuiñ kümeke adngelluwün? Ti küpalechi chillkatun mew inaduamafiyiñ.