1, 2. ¿Iney engün am müna ayüwkeyngün tañi pefiel ñi fawtisawün pu che?

FENTREN tripantu yenieliyiñ taiñ küdawülkefiel ta Jewba, fey allkütupelaiñ fentren wewpin ñi fawtisangeal pu che. Welu fentren allkütufilu rume iñchiñ, müna ayüwkülekeiñ pefiel chew taiñ trawülen tati pu anülelu ti wünelechi wangku mew ñi witrapüran ñi chalintukuwal tañi fawtisangeal. Feychi mu, rume ayüwkülelu am, fütra kutraftukuwükeiñ, ka kiñeke ngümakeyngün kütu fente ñi ayüwkülen engün. ¡Rume ayüwün-ngey peal tüfachi pu che ñi koneltuleal Jewba ñi trokiñche mew!

² Iñchiñ pekeiñ ñi fawtisawün pu che kiñeke rupa müten, welu tati pu kümeke püllü wenu mapu mew fentren rupa pekeyngün tüfa. ¿Rakiduamafuymi tunten “ayüwün [ñi mülen] wenu mapu mew” ñi pefiel fentren warangka pu che ñi konmeken Ngünechen ñi trokiñche mew? (Luka 15:7, 10.) Feley tati, pu kümeke püllü müna ayüwkeyngün tañi pefiel ñi rume tremkülerpuken Jewba ñi trokiñche (Ageo 2:7).

3. Weküfü, ¿chumngelu kiñe “ñawawkiyawchi trapial reke” miyawkey, ka chem eluwkey ñi femal?

³ Welu kiñeke püllü ayükelayngün ñi pefiel tüfachi pu che ñi fawtisawün ka famtripatuael tüfachi Mapu tuwün pu che mew. Weküfü ka tañi wedake püllü rume illkuyngün ñi rupameken tüfachi dungu. Tukulpayaiñ, Satana dalluntukufi tati pu che ñi poyenofiel ta Jewba piwkeyen mew ka ñi püntütripaken wedake dungu mu rupale engün. Biblia feypi: “Satana wiñoldungufi ta Jewba: ‘Kiñe wentru wülkünuay kom tañi nieel ñi montuluwal tañi mongen. Feymu, ñi kaletual tüfachi dungu, eluwnge tami topañmayafiel  tañi foro ka tañi fün, feymu ta peaymi tami malisiayaetew tami adkiñ mew’” (Job 2:4, 5). Feymu kiñe che wülkünuel ñi mongen Jewba mu, pengeli Satana ñi koylatufengen, ñüküfkünufi reke tati Weküfü. Fill semana femmekengey, feymu rume illkuley “ñawawkiyawchi trapial reke femyawlu, kintuyawülfi iney tañi lümüafiel reke” (1 Pedro 5:8). Feymu eluwkey ñi wedañmayafiel taiñ weniyewün Jewba engu, ka ayüley taiñ püntünentuaetew (Salmo 7:1, 2; 2 Timotew 3:12).

4, 5. a) Jewba, ¿chem epu dungu katrütufi ñi femal ti Weküfü? b)¿Chem feypikünueiñmew ti Biblia?

⁴ Tati Weküfü müna illkulelu rume kiñe trapial reke, ngelay taiñ llükayafiel. ¿Chumngelu? Jewba epu dungu katrütufi ñi femal ti Weküfü. ¿Chem epu dungu? Wünen, tati Weküfü turpu apümkalayafi Jewba tañi trokiñche. Ka Weküfü kimniepelay tüfachi dungu, Jewba feypikünulu am “ta fentren pu che” rüf kristiano ngelu ñi montual ti “fütra kutrankawün mew”. Ka Chaw Ngünechen tañi feypiel rumel femtripakey (Apokalipsi 7:9, 14).

⁵ Tati epungechi dungu ñi femnoal Weküfü, feyta ñi püntünentunoafiel tati pu küme fülkonkülelu Jewba mew. Kimürpuafuiñ tüfachi dungu taiñ ngüneduamfiel ti manelfal pelon wentru Asaria ñi feypifiel tati longko ülmen Asa: “Jewba müleay eymün mu, eymün püntütripanolmün kidu mew” (2 Crónicas 15:2; papeltunge 1 Korintio 10:13). Biblia pengeli fentren pu che eluwnolu ñi ngünenkayaetew ti Weküfü (Ebrew 11:4-40). Fey engün reke fülkonküleliyiñ Jewba mew, küme chaftuafiyiñ ka wewafiyiñ kütu tüfachi weda kayñe. Biblia feypikünueiñmew tüfa:  “Newentuwmün tamün ngünekanoaetew ta weküfü, fey tüfa lefmawtuay ta eymün mew” (Santiaw 4:7).

6. Satana, ¿chumkey ñi wewafiel kiduke pu kristiano?

⁶ Chumngechi taiñ ngüneduampeel, Weküfü turpu wewlayafi ta Chaw Ngünechen ñi trokiñche. Welu upewkülenole kiñeke kristiano, tüfake ta wewafi. Satana kimniey taiñ wewaetew newen-ngenole taiñ weniyewün Jewba engu. Feymu, ¿chumkey Weküfü? Fütra kayñetukefi Ngünechen ñi trokiñche, kiduke chaftukeeiñmu, ka niey pepikawkülechi ngünenkan. Inaduamaiñ tüfachi küla dungu.

7. Weküfü, ¿chumngelu doy fütra kayñetukefi ta Chaw Ngünechen ñi trokiñche?

⁷ Fütra kayñetukefi Ngünechen ñi trokiñche. Ti apostol Juan feypi: “Kom tüfachi chüf mapu ñi ngünenieetew tati weküfü ñi pepiluwün” (1 Juan 5:19). Tüfachi dungu küme ngüfetukeeiñmew Jewba ñi pu chengen. Weküfü dew ngüneniey tati pu che poyekenofilu ta Jewba, feymu doy newen mu eluwküley ñi kayñetuafiel Jewba tañi trokiñche, tüfa engün am rumel montuluwlu kidu mew (Miqueas 4:1; Juan 15:19; Apokalipsi 12:12, 17). Ka Weküfü kimnielu am ñi aluñmanoal, doy fütra illkuley ka doy weda kayñetukeeiñmew. Famülke mew chaftukeiñ ñi doy fütra kayñetun taiñ püntünentuaetew ñi poyeniefiel ta Jewba.

8. Ti apostol Pablo feypilu taiñ weychamekefiel pu weküfü, ¿chem kimeltueiñmew?

⁸ Kiduke chaftukeeiñmu. Tati apostol Pablo ngüfetueiñmu: ‘Iñchiñ am petu weychanolu tati pu che engün nielu ta kuerpu ka foro, welu may ti pu  weküfü engün’ (Efesio 6:12). ¿Chumngelu Pablo feypi taiñ ‘weychamekeel’? Femngechi ñi pengelal epu che ñi traf kewameken. Fey ti apostol Pablo pengeli tati pu weküfü kiduke taiñ chaftumekeetew, tati pu che feyentule kam feyentunole rume ti wedake püllü mu kidu ñi trokiñ mapu mew. Tukulpayaiñ wülkünulu iñchiñ taiñ mongen ñi poyeafiel ta Jewba, feymew müten koniyiñ tüfachi weychan mew. Feymu fawtisawlu iñchiñ, iney no rume feypilayafuy ñi weychamekenon. Feymew llemay Pablo küla rupa feypifi tati pu peñi ka lamngen Efeso waria mu mülelu ñi duamfalngen tañi newentuwküleal engün (Efesio 6:11, 13, 14).

9. a) Weküfü ka tañi wedake püllü, ¿chumngelu nieyngün fillke “ngünen”? b)Weküfü, ¿chumngelu ayükey ñi wedañmayafiel taiñ rakiduam, welu chumngechi newentuleafuiñ? (Inaduamnge tati wichulechi dungu “ ¡Kuñiwtukuwküleaiñ weküfü ñi ngünen mu!”.) c)¿Chem ngünenkan inaduamafiyiñ fewla?

⁹ Pepikawkülechi ngünenkan. Ti apostol Pablo yafültukueiñmew taiñ newentuleal “weküfü ñi ngünen mew” (Efesio 6:11). Tüfa mew Pablo feypi ti Weküfü ñi nieel fillke ngünenkan, kidu am pepikawkünulu kakerumechi ngünen taiñ püntünentuaetew Jewba mu. ¿Chumngelu? Weküfü ngüneduamkey kiñeke kristiano newenkülen mu ñi chaftuniefiel kiñe ngünenkan, welu ka dungu mew eluwingün ñi ngünenkangeal. Feymu Weküfü ka tañi wedake püllü ngüneduamniekeeiñmew taiñ femken. Femngechi ñi peal chem dungu mew taiñ newenkülenon ñi wedañmayafiel taiñ weniyefiel ta Chaw Ngünechen. Welu ayüwküleiñ taiñ kimniefiel Weküfü ñi ngünenkan, ñi pengelngeel Biblia mu (2 Korintio 2:11). Tüfachi lifru mu dew ngüneduamfiyiñ kiñeke ngünenkan,  tati diñmawün, tati wedake weni, ka fillke pekan kudumuwün eluñmakenolu Ngünechen ñi ley. Fewla inaduamaiñ kangelu ngünenkan: fülkonal pu wedake püllü engün.

10. a) ¿Chem dungu mu fülkonküleafuiñ pu wedake püllü mew? b)¿Chem rakiduamkey Jewba feychi dungu mew ñi fülkonal pu wedake püllü mu? ¿Chem rakiduamkeymi?

¹⁰ Kalku dungu, pewütuwün, dawün, ka ramtuafiel pu la, tüfa kiñeke dungu ñi fülkonküleal pu wedake püllü mew. Welu küme kimnieiñ kom tüfachi dungu “ünufalngey” Jewba mew (Deuteronomio 18:10-12; Apokalipsi 21:8). Taiñ Chaw Ngünechen feypikeeiñmew taiñ ‘üdeafiel wedake dungu’, feymu turpu rakiduamlayafuiñ rume taiñ furingünenmayafiel ta Jewba taiñ fülkonal pu wedake püllü mew (Romanu 12:9). Ünufalniefiyiñ taiñ rakiduamal tüfachi dungu mew.

11. Tati Weküfü rulpaeliyiñmu taiñ fülkonal pu wedake püllü mu, ¿chumngelu wewtripayafuy? Elunge kiñe pengelün dungu.

¹¹ Tati fülkonlu tati wedake püllü mew, furingünenmafingün ta Jewba. Feymew tati Weküfü rume newentukey taiñ rulpayaetew ñi fülkonal tati wedake püllü mew. Feymu kiñe kristiano femürpule, fey Weküfü wewtripayay. ¿Chumngelu? Rakiduamaiñ tüfachi dungu mew: kiñe weychafe eluwafuy ñi rulpangeal tañi elkünual ka furingünenmayafiel tañi trokiñ weychafe, tañi kiñewal tati pu kayñe mew, fey tati longkolelu ti pu kayñe mu rume ayüwafuy. Fey pengelafuy kütu tüfachi weychafe ñi wewel, tañi üyawtuafiel tati longkolelu ti kangelu trokiñ weychafe mu. Ka femngechi kiñe kristiano eluwfule  ñi fülkonal pu wedake püllü mew, fey dulliafuy tañi kayñetufiel ta Jewba, ka eluafuy ñi ngünenieaetew ti Weküfü. Rume ayüwafuy Weküfü ñi pengelal ñi wewün. ¿Ayüafuiñ taiñ kelluafiel tati Weküfü ñi wewal? Turpu femlayafuiñ, iñchiñ am furingünenmakenolu.

12. Weküfü, ¿chem pepikawkülechi ngünenkan niey taiñ welurakiduamelaetew?

¹² Ünufalniefiliyiñ fülkonal ti wedake püllü mew, fey konlayaiñ tüfachi dungu mu. Weküfü kimnielu am, feymu ayüniey taiñ rulpaduamelaetew. ¿Chumngelu? Welurakiduamelafeiñmew taiñ ‘küme trokiafiel ti wedake dungu ka weda trokiafiel ti kümeke dungu’ (Isaías 5:20). Weküfü niey kiñe pepikawkülechi ngünenkan tañi femal tüfa: ramtukünukey taiñ epurume duamelaetew.

13. Pengelnge chumi tati Weküfü ñi epurume duamelafiel kiñeke che.

¹³ Ngüneduamaiñ fillke rupa Weküfü ñi ngünenkakeel tüfachi dungu mew. Eden mew Weküfü ramtufi ta Eva: “¿Fey chem pieymumew anta Ngünechen? ¿Feypi tamu inoafiel kiñe anümka ñi fün no rume mülelu ti anümkawe mew?”. Kafey Job ñi antü mew, trawüluwlu ti pu kümeke püllü, Satana ramtuy: “¿Refalta pemay Job yamkefi ta Ngünechen?”. Fentren tripantu rupalu, Jesus we amuldungupalu, kintukaduamfi ka feypifi: “Ngünechen ñi Fotümngelmi, werkünge tañi kofkewtuael ta tüfachi pu kura”. Rakiduamnge, Weküfü yewentukulay rume ñi ayentufiel Jewba ñi feypiel kayu semana ñi rupan mu: “Fey tüfa ta iñche ñi sakin Fotüm, ñi fentren manelnieel” (Génesis 3:1; Job 1:9; Matew 3:17; 4:3).

14. a) Tati Weküfü, ¿chumi ñi epurume duamelafiel kiñeke kristiano tañi fülkonal pu wedake püllü mu? b)¿Chem inaduamaiñ fewla?

 ¹⁴ Fachantü Weküfü amuley ñi femngechi ngünenkayafiel tati pu che. Femngechi femkey tati pu che ñi epurume duamküleal ñi fülkonküleal ti wedake püllü mew. Müna weda, kiñeke kristiano kütu eluwingün ñi ngünenkangeal tüfachi dungu mew, ka rakiduamürpukeyngün kiñeke dungu mu ñi fülkonal pu wedake püllü mew “newe weda dungu no tati”, pikeyngün (2 Korintio 11:3). Feymu, ¿chumngechi kelluafuiñ tüfachi pu peñi ka pu lamngen ñi küme elkünutual ñi rakiduam? Ka ¿chem kelluafeiñmew taiñ ngünenkanoaetew ti Weküfü? Taiñ wiñoldungual tüfa, inaduamaiñ epu dungu taiñ mongen mu: tati adngelluwün ka lawentun mew. Tüfachi epu dungu mu tati Weküfü llum tukuy kiñeke dungu taiñ fülkonal pu wedake püllü mu.

15. a) Europa ka Norteamerica mu, ¿chem rakiduamkey fentren pu che tati dungu mu ñi fülkonal pu wedake püllü mew? b)Kiñeke kristiano, ¿chumngechi rakiduamürpukeyngün tüfachi dungu mew tati pu poyekenofilu reke ta Jewba?

¹⁵ Europa ka Norteamerica mapu mu, fentren che kuñiwün-ngechi dungu trokikelafi tati kalku dungu, ñi ramtuafiel pu la, kam kakelu dungu ñi fülkonal pu wedake püllü mew. Ka television mew, fentren pelikula mu, lifru ka videojuego mew ñi fülkonal pu wedake püllü mu trokifalngey kiñe adngelluwün dungu reke müten, kuñiwün-ngenolu ka adümkawkülelu. Fey müley kiñeke lifru ka pelikula rume kimniengekelu, re nütramkakey ñi fülkonal pu wedake  püllü mew, ka müley kiñeke che kütu trawükelu ñi rume ayüniefiel tüfachi dungu. Tati pu weküfü rakiduamelkefingün pu che ñi kuñiwün-ngenon ñi fülkonal pu wedake püllü mu. ¿Müley kiñeke kristiano rakiduamkelu ñi kuñiwün-ngenon? May. ¿Chumngechi? Kiñe peñi pefilu kiñe pelikula pengelkelu fentren dungu ñi fülkonal pu wedake püllü mew, feypi: “Pefiñ ti pelikula, welu fülkonkelan pu wedake püllü mew”. Kiñeke kristiano ka femngechi rakiduamürpukeyngün. Welu, ¿chumngelu fente kuñiwün-ngey femngechi rakiduamal?

16. ¿Chumngelu fente kuñiwün-ngey dullial adngelluwün nielu fillke dungu ñi fülkonal pu wedake püllü mu?

¹⁶ Feyngey, taiñ peal tüfachi dungu trürümfalngelay ñi fülkonal pu wedake püllü mu, welu kuñiwün-ngey. ¿Chumngelu? Longkontukuafiyiñ tüfa: Biblia pengeli tati Weküfü ka tañi wedake püllü ñi kimnienon chem ñi mülen taiñ longko mu. * Welu rume ayüleyngün ñi kimürpual taiñ rakiduamkülen ka chem dungu mew ñi newen-ngenon taiñ mupiltun, feymu küme ngüneduamkeeiñmew taiñ femken ka taiñ dullielchi adngelluwün. Feymu kiñe kristiano pengelmekele ñi ayüniefiel tati pelikula ka lifru nütramkakelu pu kalku mew, tati pu ramtukefilu pu la, pu konweküfülelu, kam fillke femngechi dungu, fey feypimekefiel reke tati pu weküfü. Pengelelafuy chem dungu mu ñi newenkülenon. Fey tati pu wedake püllü  doy fütra weychayafeyew, ka ti kristiano wewngeafuy. Kiñeke dullilu tüfachi wedake adngelluwün, fente ñi ayüniefiel, fülkonürpuyngün pu wedake püllü mu (papeltunge Galata 6:7).

17. Weküfü, ¿chumngechi allmalltuafuy ñi yafülduamkülenon kiñe kutrankülelu?

¹⁷ Weküfü allmalltukey taiñ ayüniefiel ti adngelluwün taiñ kintukaduamaetew, welu ka allmalltukey taiñ duamniefiel ti lawentun. ¿Chumngechi? Kiñe kristiano fentren rupa amule hospital mew, welu tremotunole, fey rume yafülduamkülelayafuy (Marku 5:25, 26). Kam rakiduamafuy ñi kalkutungeel kam tañi pu che, feymu ñi kutrankülen. Fey Weküfü ka tañi wedake püllü allmalltuafuyngün ñi kintukaduamafiel. Ñi yafülduamkülenon mu, ti pu weküfü rakiduamelafuy ti kutrankülelu ñi amual machi mew, kam llowal kiñeke lawentun adümniefilu “Weküfü mew küpachi pepiluwün” (Isaías 1:13). Tati femlu tüfachi dungu, wedañmayafuy ñi weniyeafiel ta Chaw Ngünechen. ¿Chumngechi?

18. ¿Chem lawentun famentukeiñ pu kristiano? ¿Chumngelu?

¹⁸ Jewba ngüfetufi tati pu israelche ñi adümfiel “Weküfü mew küpachi pepiluwün”, feypifi: “Ka eymün maychikünulmün tamün pülay kuwü, ellkafiñ tañi nge eymün mew. Fentren ngillatulmün rume, allkülan” (Isaías 1:15). Iñchiñ küpa femkelaiñ kidu engün reke, feymu famentukeiñ chem dungu rume taiñ katrütukeetew Chaw Ngünechen tañi allkütukefiel taiñ ngillatun ka taiñ kelluetew, doyelchi may kutranküleliyiñ (Salmo 41:3). Feymu kimngeal taiñ kutran kam taiñ lawentuñmangeal fülkonle tati wedake püllü mew, ¿chumaiñ? Llowlayafiyiñ llemay  (Matew 6:13). * Femngechi maneluwaiñ Jewba taiñ rumel füreneaetew (inaduamnge tati wichulechi dungu “ ¿Fülkonkülepey may pu wedake püllü mu?”).

19. a) ¿Chem dungu mew Weküfü ngünenkakefi pu che? b)¿Chem nütram müley taiñ famentuafiel pu poyekefilu ta Jewba?

¹⁹ Inaduampeiñ epe kom che Europa ka Norteamerica mülelu kuñiwün-ngenolu ñi trokikefiel ta Weküfü ñi ngünen, welu kakelu trokiñ mapu mew, tati pu che rume kuñiwün-ngey trokikefi. Tati pu che ngünenkawkey ñi trokikefiel ti Weküfü doy fütra pepiluwün ñi nieel, welu Weküfü femngechi pepiluwün nielay. Feymu tati pu che fill dungu ñi femkeel ñi mongen mu llükaniefingün tati wedake püllü. Welu rume ayükeyngün ñi allkütuafiel ka nütramkayafiel fillke afmatufalchi dungu ñi femün pu wedake püllü. Welu Jewba ñi pu che, ¿müley ñi allkütuafiel tüfachi nütram ka nütramkamekeal kütu? Femlay tati, epu dungu nieiñ taiñ femnoal tüfa.

20. ¿Chumngechi kelluntukuleafuiñ ngüneduamnon mu Weküfü ñi ayünieel?

 ²⁰ Wünen, nütramnieliyiñ pu weküfü ñi femün, kelluntukuleafuiñ Satana ñi ayünieel. ¿Chumngechi? Tati Biblia pengelkey tati Weküfü ñi femün afmatufalchi dungu, welu ka feypiley tañi nieel “koyla ngüneluwün [...,] itrofill wesake dungu femngechi tañi ngünenkayafiel” (2 Tesalonisense 2:9, 10). Kidu tati doy fütra ngünenkafe ñi mülen, feymu ta kimniey ñi welurakiduamelafiel feyti ayülu ñi fülkonal pu wedake püllü mew. Feymu tüfachi pu che rüfngelu trokifingün ñi pefiel kam ñi allkütufiel, welu tüfachi dungu rüf rupalay. Fey tati pu che ñi rume nütramkamekefiel tüfa, doyelkünukefingün ñi feypin,  rüfngen tripakey reke tüfachi nütramkan. Feymu kiñe kristiano dungumekefule tüfachi nütram, fey kelluntukuleafuy tati Weküfü mu, welu “kisu mew tripakey kom koyla dungu”. Amultukuafuy ñi kimngeal tati Weküfü (Juan 8:44; 2 Timotew 2:16).

21. ¿Chem dungu mew müley taiñ nütramkamekeal?

²¹ Epungelu: kiñe kristiano chaftufule rume tati pu wedake püllü, mülelay ñi nütramkamekeafiel tati pu peñi ka lamngen. Müley taiñ rakiduamnieafiel ta Jesus, welu rakiduamnielayafiyiñ ta Weküfü. Inayaiñ tüfachi ngülam: “Küme leliwülnieafiyiñ reke ta Jesus, kisu am eluetew taiñ mupiltun, fey kisu am ka felelu ñi küme adnieafiel” (Ebrew 12:2). Jesus küme kimpelay Weküfü ñi pepiluwün, welu mülepalu Mapu mew nütramkamekelafuy tañi pu inanieetew tüfachi dungu. Welu may rakiduamniekefuy ñi amuldungual Chaw Ngünechen ñi Ngünenien mew. Kümeafuy taiñ inayentuafiel ta Jesus ka tañi pu inanieetew taiñ küme nütramkayeafiel “Ngünechen ñi afmanngechi dungu” (Hecho 2:11; Luka 8:1; Romanu 1:11, 12).

22. ¿Chumngechi kelluntukuleafuiñ ñi müleal ayüwün wenu mapu mu?

²² Chumngechi taiñ ngüneduampeel Weküfü ayüley taiñ weniyenofiel ta Jewba, feymu eluy fillke ngünenkan, kiñe tüfa, ñi fülkonal pu wedake püllü mu. Welu müley taiñ üdenieafiel ti wedake dungu ka fülkonküleal tati kümeke dungu mu, femngechi tati Weküfü ngünenkalayaeiñmew taiñ llowal chem dungu no rume ñi fülkonal pu wedake püllü mu (papeltunge Efesio 4:27). Rakiduamnge tunten “ayüwün [ñi mülen] wenu mapu mew” ‘newen-ngeliyiñ taiñ ingkawael Weküfü ñi ngünen mew’ apümkangele wüla (Luka 15:7; Efesio 6:11).