Müna kutrankawafuiñ wemünentungele ti trawünche mu kiñe taiñ pu che kam kiñe küme weni kulpale, ka wiñorakiduamtunole ñi weda femün mu. Welu taiñ inafiel mu tüfachi dungu ñi feypiel ti Biblia pengelaiñ tunte taiñ piwkeyefiel ka taiñ feyentuniefiel ta Jewba ka tañi werkün dungu. * Feymu ngüneduamaiñ fillke dungu ñi rupayafel.

¿Chumngechi müley taiñ trokiafiel pu wemünentungelu? “Feley tamün kiñewkülenoael ta iney engün mew no rume tati peñi pifaluwkelu, fey wesa mongen niele kam diñmangele, ka püramyekefile tati adentun, kam dallukafengele, kam putufengelu, kam ta weñefengelu. Fey ta famngechi femngele ta che, anükilmün rume tamün kiñentrür iyael” (1 Korintio 5:11). Kafey tati Biblia ngülamtukeeiñmew: “Iney rume ta ayüle ñi welukünuñmayafiel Cristo ñi kimeltun [...], llowkefilmün ruka mew ka nütramkakefilmün rume [kiñe chalin rume elukefilmün, TNM]. Iney rume küme llowfile tüfeychi che ka femngechi kellukonay reke kisu engün tañi wesa dungu mew” (2 Juan 9-11). Tati chillka La Atalaya, 15 konchi noviembre 1981, pagina 19, feypiley: “‘Mari mari’ feypifilmi müten kiñe che, fey eluwafuymi tami nütramkayafiel ka tami weniyeafiel kütu. ¿Ayüafuiñ taiñ femal tüfa kiñe wemünentungelu engu?”. Feymu wemünentungele kiñe che koneltulelu ti trawünche mew, elkünufemkeiñ ka nütramkawekelafiyiñ Chaw Ngünechen tañi dungu.

¿Rume duamfalngey katrütuwal taiñ kiñentrürkülewenoal tati wemünentungelu engu? May, fillke dungu mew. Wünelu, piwkeyen mu taiñ feyentufiel ta Jewba ka tañi dungu. Rume piwkeyefiyiñ ta Jewba, feymu eluwkeiñ taiñ femal ñi  feypiel, küdawngele rume. Ka maneluwkeiñ kidu mew ñi norngen ka piwkeyechefengen, ka tañi werkün dungu rumel kümelkakeeiñmew (Isaías 48:17; 1 Juan 5:3). Epungelu, tati kulpakelu wedalkayafeiñmew. Feymu taiñ weniyenofiel mu ingkawkeiñ taiñ lif mongen-ngeal ka taiñ weniyefiel ta Jewba, ka femngechi kellukeiñ ñi lifküleal ka küme üytungeal ti trawünche (1 Korintio 5:6, 7). Külangelu, wemünentungele kiñe che femngechi pengelngekey ñi kellungekeel. ¿Chumngechi? Inafiliyiñ Biblia tañi ngülam ka kellukonküleliyiñ ñi femel tati pu longkolelu, fey tüfa nengümafeyew ñi piwke ñi küme elkünutual tañi mongen, ellaka mu llownofule rume ñi kelluaetew pu longkolelu. Ngüneduamle ñi weniyewenoetew tañi piwkeyenieelchi pu che ‘afduamafuy’ chi, kimürpuafuy ñi rume wedalkan tañi femün, fey küme elkünutuafuy ñi mongen tañi wiñotual Jewba mew (Luka 15:17).

¿Reñmayefiliyiñ kay tati wemünentungelu? Tüfachi dungu mew doy küdawtuafuiñ ñi feyentuafiel ta Jewba. Feymu wemünentungele kiñe taiñ pu che, ¿chumngechi müley taiñ trokiafiel? Tüfachi lifru mew pepi inaduamlayafuiñ kom ti dungu ñi rupayafel, feymu doy küme ngüneduamaiñ epu dungu.

Kiñeke mu ti reñmawen mew wemünentungeafuy chi ti chaw, ti ñuke kam kiñe püñeñ petu ñi ngüneytunieetew tañi pu chaw. Wemünentungele ti che, tüfa katrütukelay ñi reñmawküleal, feymu weda dungu no tañi yewküleal kiñeke dungu ñi femngekeel ruka mew. Tati wemünentungelu dulli (ngümintuy) ñi koneltuwenoal tañi poyeafiel ta Jewba ñi pu che engün, feymu tañi pu che piwkeyen mu feyentukefilu am ta Chaw Ngünechen, fentekünukefingün tañi kiñewküleal ñi poyeafiel ta Jewba. Eluñmayafuyngün chi ñi müleal tañi poyeafiel ta Ngünechen reñmawen mu, welu eluñmalayafingün ñi koneltual tañi feypin mu. Welu wemünentungele kiñe weche petu ñi ngüneytuetew tañi pu chaw, amuleafuyngu ñi kimeltulelafiel ti Biblia, tati  pu chaw elungelu am ñi kimeltuafiel ka norümafiel tañi pu yall (Proverbios 6:20-22; 29:17). *

Welu tati wemünentungelu dew mülewenole ti ruka mew tañi pu che engün, fey tati pu piwkeyefilu ta Jewba trawüafuy feyti che engu duamfalngele müten ñi ngüneduamal kiñeke dungu ñi rupan tañi pu che. Ngelay ñi kintual tañi nütramkayafiel tati wemünentungelu. Piwkeyen mu feyentukefingün ta Jewba ka tañi adkünuelchi trokiñche, feymu yamkefingün ñi chem piel ti Biblia ñi norümngeal tati kulpakelu. Ayüleyngün ñi kümelkaleal tañi reñma, feymu tañi feyentufiel mu ñi feypiel ta Biblia, tüfa nengümafeyew ñi piwke tati wemünentungelu ñi eluwal tañi kellungeal (Ebrew 12:11). *