Annette trantungey mapu mew, fey ngüneduamlay rume chem ñi rupameken. Annette feypi: “Newentufun ñi neykümaetew. Küpa wirarfun, welu tripalay tañi wirarün. Rültrefiñ, mankükafiñ, wülelkafiñ, kawlitufiñ... welu kidu allfülkaenew kiñe kuchillu mu. Fey rupalu tüfa, ngüneduamwelan, ka pepi ingkawlan”.

Tüfachi dungu mu rupalmi, ¿chumafuymi?

Pun mew tripalmi, kam kangelu dungu femülmi, ka kuñiwtuwülmi rume, rupayafuymi tüfachi dungu mu. Tati Biblia pengeli kiñeke che ñi feypikeel: “Fachantü kam wüle amuaiñ ta üyew kam tüyechi waria mew. Fey tüye mew kiñe tripantu mülepuaiñ”, welu ka feypiley ti Biblia: “¡Fey kimlaymün rume ñi chumleael tamün mongen ta wüle!” (Santiaw 4:13, 14).

Annette kimkelafuy ti wentru ñi nüntukaetew. Welu kiñeke mu, pu üllcha tañi kimniefielchi che kam kiñe tañi reñma kütu nüntuafeyew. Noelia 10 tripantu niefuy müten ñi nüntukaetew kiñe karukatu wentru. Kidu feypi: “Rume llükalefun ka yewelefun, feymu ellaka mu iney no rume feypilafiñ”.

Annette petu kulpantukuwkey ñi rupan mu. Kidu feypi: “Konpakey ñi rakiduam mu ñi rupan feychi pun mu, fey rakiduamken ‘mülefuy ñi doy küme ingkañpewal’. Allfülngelu kuchillu mew pepi femlan chem no rume, welu rakiduamnieken mülefuy ñi chaftuafiel”.

Noelia ka kulpatuwkülekey tañi rakiduam mu. Kidu feypi: “Ngelafuy ñi rakiduamal chem ñi rupanoal rume. Tañi pu chaw elufenew ñi awkantual wekuntu ñi kompañnieetew müten tañi lamngen; welu iñche allkütulafiñ engu. Feymu rakiduamken ñi wültukuwün reke tañi karukatu ñi weda femaetew. Rume kutrankawi ñi pu che, feymu kulpantukuwken ñi weda duamelkefiel engün. Feychi dungu müna kutrankakeenew”.

Rakiduamülmi Annette ka Noelia reke, ngoymakilnge: nüntungelmi, eymi ayünielafuymi tami femngeal. Kiñeke che weda dungu trokikelafingün tüfachi dungu, feymu feypikeyngün: “Kidutu wültukuwi ñi nüntukangeal”. Welu iney no rume mülelayafuy ñi rupayal tüfachi rume weda dungu mu. Feymu nüntungelmi, ¡eymi kulpantukuwkilnge!

Küdawngelay papeltual tüfa, welu rume küdawngeafuy tami kulpantukuw-wenoal. Kiñeke che nüntungelu nütramkakelayngün chem ñi rupan, ka kidutu chaftukeyngün ñi rakiduamkeel tañi kulpatuwken kam fillke rakiduam. Welu eymi feypinolmi, ¿iney am kümelkaleay? ¿Eymi kam tati nüntukachefe? Feymu doy kümeafuy kintual tami kellungeal.

Tati Biblia pengeli chem ñi feypin tati nor wentru Job fütra kutrankawün mu rupalu, kidu feypi: “¡Nütramkayan tañi weda weñangkün mu!” (Job 10:1). Ka kümeafuy tami femngechi femal. Nütramkalelfilmi tami rupan kiñe che tami manelniefiel, tüfa kelluaeymu tami küme elkünutual tami piwke ka longkontukunienoafiel tami rupan.

Feychi dungu femi Annette, ka tüfa rume kellueyew. Kidu feypi: “Nütramkafiñ kiñe küme weni, kafey yafültukuenew ñi feypilelafiel ñi rupan ta epu longkolelu ti trawünche mew. Ayüwkülen ñi femün tüfa. Fentren rupa nütramkaenew engu ka feypienew: ‘Kulpantukuwkilnge’, rume duamniefun ñi feypingeal tüfa”.

Noelia feypilelfi tañi pu chaw ñi rupan. Kidu feypi: “Yafültukuenew engu. Ka feypienew tañi nütramkayal ñi rupan mu, tüfa kelluenew tañi rume weda duamkülenoal ka weñangkülenoal tañi piwke”.

Noelia ka kellueyew ñi ngillatuken. Kidu feypi: “Nütramkakefiel ta Chaw Ngünechen rume yafültukuenew ka kelluenew rakiduamlu iñche ñi pepi nütramkanoafiel iney no rume. Tañi ngillatukefiel mu feypilelafun ta Jewba tañi rakiduamken, ka tüfa rume tüngduamelkeenew”.

Eymi ka ngüneduamaymi ñi puwal ‘ti antü tami tremotual’ (Eclesiastés 3:3). Kuñiwtukufinge tami piwke ka tami kuerpu, ürkütuñmunge. Welu doyelchi may kintunge ta Chaw Jewba tami yafültukuaetew (2 Korintio 1:3, 4).

Tami dakelnieetew dikümtukuelmu tami femal pekan kudumuwün, newentuaymi tami feypiafiel: “¡Femkilnge!”, kam “¡Famentunge tami kuwü!”. Rakiduamkinolnge: “Femnoli, elkünuaenew”. Elkünuelmu, ngüneduamaymi ngünam wentru ngerkefel. Eymi tami nieafetew kiñe doy küme wentru: kiñe weche tami yamnieetew ka ñi yamniefiel tami rakiduamken ti kudumuwün mu.

“Nielu iñche 13 kam 14 tripantu, kolegio mew pu weche furi püle witrañmakefenew tañi sosten, ka podngechi dungu feypikefenew: ‘Peaymi tami ayüwküleal kudumuwliyu’” (Coretta).

¿Chem feypiafuymi pu weche ñi femün mu?

1. Ayekantumekeeyew engün.

2. Dakelkamekeeyew engün.

3. Inantukuyawülkeeyew ñi kudumaetew engün.

“Tati bus mew, kiñe weche feypirumeenew fill podngechi dungu ka sumpayawüli ñi kuwü iñche mu. Kütrafüñmafiñ ñi kuwü ka feypifiñ: ‘¡Famtripange!’. Lelikünuenew wedwed tañi trokituetew” (Candice).

¿Chem feypiafuymi ti weche ñi femün mu?

1. Ayekantumekeeyew.

2. Dakelkamekeeyew.

3. Inantukuyawülkeeyew ñi kudumaetew.

“Kom chi tripantu mu, kiñe weche feypimekefenew tañi ayüetew ka ñi küpa dakelaetew. Iñche rumel feypifiñ: ‘Femlayan’. Kiñeke mu nünütuñmakefenew tañi lipang. Iñche feypifiñ: ‘¡Afeluwnge!’, welu kidu afeluwlay. Kiñe antü, iñche pürolmekelu ñi sapatu, kütrafkünuenew tañi anüwe” (Bethany).

¿Chem feypiafuymi ti weche ñi femün mu?

1. Ayekantumekeeyew.

2. Dakelkamekeeyew.

3. Inantukuyawülkeeyew ñi kudumaetew.

Rüfngey ti dungu “C” tati küla ramtun mu.

Tati dakeluwün, ayekantun ka ti inantukuyawülfilu ñi kudumafiel, ¿chem dungu mew trürlay?

Tati inantukuyawülfilu ñi kudumafiel kiñe üllcha, weda duamelkefi. Ka tati üllcha feypile rume “fentekünunge”, tati inantukuyawülfilu tüngkelay ñi femkeel.

Inantukuyawülfilu ñi kudumafiel kiñe üllcha, müna weda dungu tati: nüntukarpuafuy tati üllcha.