Rakiduamnge tüfachi rupan dungu: Karen dew mülefuy mari minuto ti fiesta mu, allkürumey kiñe dungun ñi kimniefiel ñi furi püle ka feypieyew:

Karen furi püle mu pefi tañi weni Jesica, küpalniey epu cerveza. Elueyew kiñe ka feypieyew: “Dew tremimi tati. Küme rupaleaymi”.

Karen petu puwlay ñi putual, feymu küpa llowlafi ti cerveza, welu ayülay tañi weni ñi rakiduamnieetew tañi ayünon ñi küme rupaleal. Kafey Jesica küme chengey. Feymu kidu putule, wedalkalayafuy. Fey Karen rakiduami: “Kiñe cerveza müten tati, trürlay ti droga mew”.

Eymi tüfachi dungu rupafulmi Karen reke, ¿chumafuymi?

Tami küme dullial tüfachi dungu mew, müley tami küme kimal tami chem chengen. Tüfa pengeli chem ngülam yenieel tami mongen, ka chem mew tami feyentuken. Küme longkontukuafiel tüfachi dungu, kelluaeymu tami kuñiwtukuwal ka inayal eymi tami küme rakiduam yenieal tami mongen, welu may inanoafiel kakelu pu che ñi weda rakiduam (1 Korintio 9:26, 27).

¿Chem kelluaeymu tami femngechi newenküleal? Wünelu mew, kümeafuy tami ngüneduamal tüfachi meli ramtun.

Doy maneluwküleaymi, kimnielmi chem dungu mew tami adümuwkeel ka tati kümeke chumngen tami nieel.

INAYENTUFALCHI CHE BIBLIA MU. Ti apostol Pablo wirintukuy: “Fey tañi wewpin müte adllenofule rume, welu fente küme kimnien” (2 Korintio 11:6). Kidu küme kimniefilu am Ngünechen tañi wirin chillka, feymu newenkülefuy tañi dunguyengeel rume. Eluwlay ñi ngañwadelaetew tañi üyawtudungungeel, fentekünulay ñi maneluwkülen (2 Korintio 10:10; 11:5).

NGÜNEDUAMUWNGE: Wirintukunge kiñe adümuwün tami nieel.

Fewla wirintukunge kiñe doy küme chumngen tami nieel (tüfa kiñeke: piwkeyechefengen, poyechefengen, manelfalchengen, puwal ti ora mu).

Kiñe kadena wüdatripayafuy chew ñi epe katrülen mu, ka femngechi eluwülmi tami ngünenieaetew tüfachi dungu tami newenkülenon mu, fey elkünurumeafuymi tami feyentun ka tami kümeke ngülam.

INAYENTUFALCHI CHE BIBLIA MU. Pablo ta kimi chem dungu mu ñi newenkülenon. Feymu wirintukuy: ‘Iñche tañi piwke mew ayükefiñ Ngünechen tañi ley dungu, welu ngüneduamken ta iñche mew ñi mülen kiñeke dungu tañi katrütukeetew ñi femael ta nor dungu. Fey tüfa tati kulpan mülelu iñche mew ka femngechi tañi püresunieetew’ (Romanu 7:22, 23).

NGÜNEDUAMUWNGE: ¿Chem dungu ñi newenkülenon müley tañi kim ngünenieafiel?

¿Pürayafuymi kiñe taxi mew, ka feypiafuymi ti chofer ñi chiwüdkiyawal ti kuadra mew, afle wüla ñi bencina? Wedwedche müten femngechi rakiduamafuy, ka rume falilu am femal tüfa.

¿Chem kimeltueymu tüfa? Rakiduamnielmi chem tami diturpual, fey küme yenieaymi tami mongen. Kimaymi chem tami ayülen ka chumngechi tami diturpuafiel tüfa.

INAYENTUFALCHI CHE BIBLIA MU. Pablo wirintukuy: “Fey iñche kay lefkelan tati trawmalelu reke” (1 Korintio 9:26). Pablo ngünamkakelafuy tañi mongen, welu may küme rakiduamniefuy chem ñi ayünieel ka eluwi ñi mongen mu ñi diturpuafiel (Filipense 3:12-14).

NGÜNEDUAMUWNGE: Wirintukunge küla dungu tami diturpual tüfachi tripantu mu.

Newe maneluwkülenolmi tami feyentukeel, feymu epurume duamküleafuymi. Kiñe kamaleon reke fillke ad künuwkelu, ka femngechi eymi fillke ad künuwkeymi chi tami trürümuwal tami pu weni reke. Tati femngechi femkelu kimfawlukelay chem chengen.

Welu femülmi tami rüf feyentukeel, fey femaymi chem ñi rüf mülen tami piwke mew, chem dungu rume femmekele kakelu pu che.

INAYENTUFALCHI CHE BIBLIA MU. Daniel, kiñe weche ngefuy chi püntünentungelu tañi pu che mu. Welu kidu “eluwi ñi piwke mew” tañi inanieal Chaw Ngünechen ñi ley dungu (Daniel 1:8). Femngechi elkünulay ñi chem chengen, ka rumel inaniekefuy ñi rüf feyentukeel.

NGÜNEDUAMUWNGE: ¿Chem dungu mew feyentukeymi? Rakiduamnge: ¿Feyentukeymi Chaw Ngünechen mu? ¿Chumngelu? ¿Chem rakiduamelkeeymu ñi rüf mülen?

¿Rakiduamkeymi tami kümelkakeetew Ngünechen ñi ngülam tami lif mongen nieal? ¿Chumngelu?

Feymu llemay, ¿chem dungu mew küpa trürümfalngeymi? ¿Kiñe tapül ñi yekeetew ti kürüf? Kam ¿kiñe fütra anümka reke newenkülelu fütra kürüftuku mu? Ayülmi tami trürümfalngeal ti anümka reke, yafüluwaymi tami küme elkünutual tami chem chengen. Femngechi wiñoldunguaymi tüfachi ramtun: ¿Chem chengen ta iñche?