Tati pu Dunguquelu Ineingen Jehová nehuentuqueiñ taiñ femal com tati dungu ñi femqueel tati pu cristiano ca Jesús ñi quimeltuelchi dungu, chumngechi ñi femfel tañi pu apostol. Tüfachi troquiñ pichiñma mu quimeltungeai taiñ doi falinque feyentun.

1.   Chau Ngünechen. Iñchiñ poyequefiyiñ tati quiñen rüfngechi Ngünechen, tati doi Alüpüralelu, ca Deumalu itrocom müleyechi dungu, Jehová pingei tañi üy (Salmo 83:18; Apocalipsis 4:11). Fei ta Abrahán, Moisés ca Jesús tañi Ngünechen (Éxodo 3:6; 32:11; Juan 20:17).

2.   Tati Biblia. Feyentuqueiñ ñi mülen Biblia mu Chau Ngünechen ñi huercün dungu ñi elcünulelfiel com tati pu che (Juan 17:17; 2 Timoteo 3:16). Taiñ feyentun tuhui tati 66 pichique lifru ñi nieel ti Biblia, mülelu ti Antiguo ca Nuevo Testamento mu. Tati quimeltuchefe Jason BeDuhn cüme feipi tati pu Dunguquelu Ineingen Jehová meu: “Com tañi feyentun ca ñi femqueel engün tuhui tati Biblia ñi rüf dungu mu, ca petu ñi inaduamnon ti Biblia dullilayafuingün chem ñi quimeltuafel”.⁠ a

    Iñchiñ cüme llouqueiñ Biblia ñi feipin, huelu dicümtucuquelafiyiñ inei no rume ñi feyentual iñchiñ reque. Cüme quimnieiñ quiñeque nütram Biblia adentufalngeingün, feimu mülei taiñ quimtucual tüfa quiñe adentuelchi nütram müten.

3.   Jesús. Inaniequeiñ Jesucristo tañi quimeltun ca ñi inayentufalchi femün, cafei yamniefiyiñ, quisu taiñ montuleteu am ca Ngünechen tañi Fotüm (Mateo 20:28; Hechos 5:31). Feichi dungu pengelquei taiñ cristianongen (Hechos 11:26). Huelu tati Biblia quimeltuquelai Jesús ñi Ngünechen ngen itrocom pepiluhun nielu ca quelluntucuquelai tati trinidad pingechi feyentun (Juan 14:28).

4.   Chau Ngünechen ñi Gobierno. Tüfa ta quiñe gobierno huenu mapu mülelu, feingelai quiñe dungu taiñ piuque mu. Tüfa fentecünuafi com tati pu huentru ñi ngünenieel ca huechurpuai Chau Ngünechen ñi ayüqueelchi dungu Mapu mu (Daniel 2:44; Mateo 6:9, 10). Pichiñma mu femürpuai tüfa, tati pelon dungu Biblia meu pengeli taiñ coneltulen ti afaelchi antü mew (2 Timoteo 3:1-5; Mateo 24:3-14).

    Jesús lonco ülmen-ngei Chau Ngünechen ñi Gobierno huenu mapu meu. 1914 tripantu mu amulei tañi ngünenien (Apocalipsis 11:15).

5.   Tati montuluhun. Jesús ñi lan mu, ti pu che lifrenentungeafuingün ti culpan (yafcan) ca lan dungu mu (Mateo 20:28; Hechos 4:12). Tati pu che ñi cümelcayaeteu Jesús ñi lan mu, mülei ñi feyentual quisu meu, femngechi ñi cüme elcünutual ñi mongen ca fautizahual engün (Mateo 28:19, 20; Juan 3:16; Hechos 3:19, 20). Quiñe che tañi femün mu pengelquei tañi rüf feyentulen (Santiago 2:24, 26). Iñchiñ taiñ duam mu nielaiñ ti montuluhun, huelu mai “Ngünechen ñi cutranpiuqueyechen müten” montulngeafuiñ (Gálatas 2:16, 21).

6.   Ti huenu mapu. Jehová, Jesús ca tati pu cümeque püllü mülei huenu mapu mu (Salmo 103:19-21; Hechos 7:55).⁠ b Cafei quiñe pichi troquiñche müten —144.000 che— huiñomongetuai huenu mapu mu ñi ngünenieal Jesús engu feichi Gobierno mu (Daniel 7:27; 2 Timoteo 2:12; Apocalipsis 5:9, 10; 14:1, 3).

7.   Ti Mapu. Chau Ngünechen deumafi ti Mapu com pu che ñi rumel mongeleal (Salmo 104:5; 115:16; Eclesiastés 1:4). Quisu cümelcayafi pu feyentulechi che fei ñi cutranhuenoal engün ca eluafi rumel mongen feichi cüme mülehue Mapu mew (Salmo 37:11, 34).

8.   Ti huesaque dungu ca ti cutrancahun. Biblia quimeltuquei quiñe püllü chaftufi ta Chau Ngünechen. Feichi rupan mu mülerquei huesaque dungu ca cutrancahun (Juan 8:44). Feichi püllü deu ñi chaftufiel Ngünechen feipingerpui Huecüfü ca Satanás, rulpaduamelfi tati hunen curehuen ñi quiñeucüleal tañi caiñetun mu. Feimu tañi yomelche re huesaque dungu rupaqueingün (Génesis 3:1-6; Romanos 5:12). Tañi norümngeal feichi huesaque dungu Huecüfü mu cüpalu, Ngünechen eluñmaquei ñi mülequeel huesaque dungu ca cutrancahun pichiñma mu müten, huelu eluñmalayai ñi müleal rumel meu.

9.   Tati lan dungu. Lale quiñe che, mongelehuequelai (Salmo 146:4; Eclesiastés 9:5, 10). Pu layechi che cutrancaucülelaingün quiñe cütral mapu mew no rume.

    Chau Ngünechen huiñomongeltuafi fentren lalechi che (Hechos 24:15). Huelu tati pu huiñomongetualu allcütunofile engün Chau Ngünechen ñi huercün dungu, apümcangeai ca turpu huiñomongetulayai engün (Apocalipsis 20:14, 15).

10.   Tati reñmahuen (taiñ pu che). Chumngechi ñi elcünuel Ngünechen ellaca mu, ti curehuen mu coneltuquei quiñe huentru ca quiñe domo müten. Tati pu curehuen hudayafuingu ñihuan dungu mu müten.(Mateo 19:4-9). Rüf maneluuqueiñ Biblia ñi ngülam mu ñi nieel quimün ca quelluqueyu pu familia ñi ayüucüleal engün (Efesios 5:22–6:1).

11.   Taiñ poyequefiel Ngünechen. Poyequelafiyiñ ti cruz ca chem adentun no rume (Deuteronomio 4:15-19; 1 Juan 5:21). Tüfa tañi mülen quiñeque falin dungu taiñ poyequefiel Ngünechen:

    •   Llellipuquefiyiñ ta Chau Ngünechen (Filipenses 4:6).

    •   Papeltuqueiñ ca chillcatuqueiñ tati Biblia (Salmo 1:1-3).

    •   Raquiduamqueiñ Biblia ñi quimeltun mu (Salmo 77:12).

    •   Trahuluuqueiñ taiñ papeltuafiel Biblia, llellipual, trür ülcantulelafiel Ngünechen, pengelngeal taiñ feyentun ca yafüluhuafiel ta caquelu che (Colosenses 3:16; Hebreos 10:23-25).

    •   Amuldunguqueiñ tati “cümeque dungu [cüpalu] ñi Ngünenien mu” (Mateo 24:14, Traducción del Nuevo Mundo [TNM]).

    •   Quelluquefiyiñ pu che duamtunielu (Santiago 2:14-17).

    •   Deumaqueiñ ca cüme elcünuquefiyiñ Trahunhue Ruca ca fillque ruca ñi quelluntucual taiñ cüdau ñi quimeltual Biblia ñi dungu huall Mapu mu (Salmo 127:1).

    •   Ruparumele huesaque dungu, coneltuqueiñ fillque cüdau ñi quelluafiel tati pu duamtunielu (Hechos 11:27-30).

12.   Taiñ adcünuelchi troquiñche. Adcünuuqueiñ trahunche mu ca quiñe troquiñ loncolelu inaduamyequefi tati trahunche. Ca femngechi tüfa engün coneltuquelai quiñe ülmen troquiñche mu ca cullingequelai rume (Mateo 10:8; 23:8). Feipingequelai pu che ñi hulal tañi chemcün ca diesmo no rume (2 Corintios 9:7). Taiñ cüdau culliutuquei mañum yehun mu müten ca quimngequelai inei ñi hulqueel ti plata.

     Quiñe pichi troquiñche loncolelu fentren tripantu nielu ñi cristianongen Quiñeucülechi Ngünenielu pingei, tati ngüneniechi ruca mu müleingün ca adcünuquei ti cüdau femquelu pu Dunguquelu Ineingen Jehová huall Mapu püle (Mateo 24:45).

13.   Taiñ quiñeucülen. Chem tuhun rume nieliyiñ, quiñeucülei taiñ feyentun (1 Corintios 1:10). Nehuen mu eluñmaquelaiñ taiñ hudayaeteu tati pu che ñi tuhun, ñi mollfüñ, caquerume mongen cam tunten plata ñi nieel (Hechos 10:34, 35; Santiago 2:4). Tüfachi quiñeucülen eluñmaquefi pu Dunguquelu Ineingen Jehová ñi quisutu dullial ñi femün, chumngechi ñi eluñmaqueteu tañi raquiduam inaniequefilu Biblia ñi ngülam (Romanos 14:1-4; Hebreos 5:14).

14.   Taiñ femün. Nehuentuqueiñ taiñ pengelal rüf piuqueyehun com taiñ femün mu (Juan 13:34, 35). Cüdauqueiñ taiñ femnoal huesaque dungu Jehová ñi üdequeel. Feimu eluuqueiñ taiñ huesa pünenoafiel ti mollfüñ. Tüfa mu coneltuquei: tuculelngenoal mollfüñ taiñ cuerpu mu (Hechos 15:28, 29; Gálatas 5:19-21). Quehuatuchefengelaiñ ca coneltuquelaiñ hueichan mu (Mateo 5:9; Isaías 2:4). Yamniefiyiñ ca inaniequefiyiñ tati pu huentru ñi ngünenieel ca tañi ley dungu chaftunofile Ngünechen tañi huercün dungu (Mateo 22:21; Hechos 5:29).

15.   Chumngechi yeuqueiñ caquelu pu che engu. Jesús feipi: “Piuqueyefinge tami chafche chumngechi piuqueyeniehuimi ta eimi”. Ca feipi com tati pu cristianongelu “coneltulelai tati huesaque che meu [Mapu tuhun pu che, TNM]” (Mateo 22:39; Juan 17:16). Felei llemai coneltuquelaiñ politico dungu mu ca reyüconcülelaiñ tati coilaque religion, huelu ayüqueiñ femal cümeque dungu itrocom che mu (Gálatas 6:10; 2 Corintios 6:14). Feimu yamquefiyiñ caquelu che ñi dulliel tüfachi dungu meu (Romanos 14:12).

 Nielmi doi ramtun pu Dunguquelu Ineingen Jehová ñi feyentun mu, peaimi caque dungu taiñ sitio internet mu. Cafei huercülelafuimi quiñe carta taiñ oficina, trahuluhuafuimi quiñe trahunhue ruca mu püllelelu cheu tami mülen cam ramtuafimi müten quiñe Dunguquelu Ineingen Jehová tami lof mu.