ভুল ধাৰণা: যিহোৱাৰ সাক্ষীসকলে ঈষ্টাৰ পৰ্ব্ব পালন নকৰাৰ এটা কাৰণ হৈছে তেওঁলোক খ্ৰীষ্টান নহয়।

 সত্যতা: যীচু আমাৰ উদ্ধাৰকৰ্ত্তা হয় বুলি আমি বিশ্বাস কৰোঁ আৰু তেওঁৰ “খোজৰ অনুগামী” হʼবলৈ চেষ্টা কৰোঁ।​—১ পিতৰ ২:২১; লূক ২:১১.

 ভুল ধাৰণা: যীচুৰ পুনৰুত্থানৰ ওপৰত আপোনালোকে বিশ্বাস নকৰে।

 সত্যতা: আমি যীচুৰ পুনৰুত্থানৰ ওপৰত বিশ্বাস কৰোঁ। পুনৰুত্থানৰ শিক্ষা সত্যৰ এক বুনিয়াদ বুলি স্বীকাৰ কৰোঁ আৰু ঘোষণা কাৰ্য্যত ইয়াৰ বিষয়ে লোকসকলক জনাওঁ।​—১ কৰিন্থীয়া ১৫:​৩, ৪, ১২-১৫.

 ভুল ধাৰণা: আপোনালোকৰ সন্তানে ঈষ্টাৰ পৰ্ব্ব পালন কৰাত যি আনন্দ আছে, তাৰ বিষয়ে আপোনালোকে চিন্তা নকৰে।

 সত্যতা: আমি আমাৰ সন্তানক ভাল পাওঁ। তেওঁলোকে আনন্দিত হৈ থাকিবলৈ আমি যিমান সম্ভৱ সিমান সহায় আৰু প্ৰশিক্ষণ দিওঁ।​—তীত ২:​৪, ৫.

•   ঈষ্টাৰ পৰ্ব্ব পালন কৰাৰ বিষয়ে বাইবেলত উল্লেখ নাই।

•   যীচুৱে নিজৰ মৃত্যুৰ দিনটো আমাক পালন কৰিবলৈ আজ্ঞা দিছিল। তেওঁ নিজৰ পুনৰুত্থানৰ দিনটো পালন কৰিবলৈ আজ্ঞা দিয়া নাছিল। বাইবেলৰ কেলেণ্ডাৰৰ অনুসৰি এক বিশেষ দিনত আমি যীচুৰ মৃত্যুৰ স্মৰণীয় দিনটো পালন কৰোঁ।​—লূক ২২:​১৯, ২০.

•   আমি বিশ্বাস কৰোঁ যে ঈষ্টাৰ পৰ্ব্বৰ কিছুমান পৰম্পৰা জননক্ষমতাৰ লগত জড়িত পৰম্পৰাৰপৰা আহিছে। সাধাৰণতে ইয়াৰ সম্পৰ্ক যৌন অনৈতিকতাৰ লগত থকা দেখিবলৈ পোৱা যায়। সেইবাবে যিহোৱা ঈশ্বৰে ইয়াক কেতিয়াও অনুমোদন নিদিয়ে। যিহোৱা ঈশ্বৰে আমাৰপৰা কেৱল “একান্ত ভক্তি” বিচাৰে। ঈশ্বৰে গ্ৰহণ নকৰা কোনো কাৰ্য্য উপাসনাত জড়িত কৰিলে, তেওঁক অপমান কৰা হʼব।​—যাত্ৰাপুস্তক ২০:​৫, NW; ১ ৰাজাৱলি ১৮:২১.

আ মি বিশ্বাস কৰোঁ যে ঈষ্টাৰ পৰ্ব্ব পালন নকৰাৰ কাৰণ সম্পূৰ্ণৰূপে বাইবেল আধাৰিত হয়। মানুহৰ পৰম্পৰা অনুকৰণ কৰাৰ পৰিৱৰ্তে, বাইবেলে আমাক “বুদ্ধি-কৌশল” ব্যৱহাৰ কৰিবলৈ উৎসাহিত কৰিছে। (হিতোপদেশ ৩:২১; মথি ১৫:৩) যেতিয়া ঈষ্টাৰৰ বিষয়ে আনে আমাৰ মতামত সোধে, তেতিয়া আমি আমাৰ বিশ্বাসৰ বিষয়ে জনাওঁ। কিন্তু তেওঁলোকে পালন কৰা ৰীতি-নীতিবোৰত আমি হস্তক্ষেপ নকৰোঁ। কিয়নো এই বিষয়ে নিৰ্ণয় লোৱাৰ অধিকাৰ প্ৰতিজন ব্যক্তিৰ আছে।​—১ পিতৰ ৩:১৫.