১. যীচুৱে আমাৰ বাবে কি কি কৰিলে?

 যীচুৱে আমাক যিমান সহায় কৰিছে, সিমান আন কোনো মানুহে সহায় কৰিব নোৱাৰে। পৃথিৱীত থকাৰ সময়ত তেওঁ নিজৰ চমৎকাৰ কৰা শক্তিৰ যোগেদিও লোকসকলক সহায় কৰিছিল। (লূক ৯:১২-১৭) আটাইতকৈ ডাঙৰ কথা হৈছে, তেওঁ নিজৰ জীৱন দি আমাক সহায় কৰিলে। (যোহ. ১৫:১৩) আকৌ জীয়াই উঠাৰ পাছতো তেওঁ লোকসকলক সহায় কৰিলে। ইয়াৰ লগতে তেওঁৰ শিষ্যসকলে যাতে শাস্ত্ৰৰ কথা বুজি পাই আৰু মনৰ শান্ত্বনা লাভ কৰে, তাৰ বাবে তেওঁ যিহোৱাৰ পৰা পবিত্ৰ শক্তি বিচাৰিছিল। (যোহ. ১৪:১৬, ১৭; ১৬:১৩) আজিও তেওঁ আমাক সহায় কৰি আছে। গোটেই পৃথিৱীত প্ৰচাৰ কাম যাতে ভালদৰে হয়, তাৰ কাৰণে তেওঁ সভাৰ যোগেদি আমাক শিকাই আছে।—মথি ২৮:১৮-২০.

২. যীচুৱে “মানুহৰ ৰূপত উপহাৰ” দিয়া লোকসকল কোন? (ইফিচীয়া ৪:৭, ৮)

^২ যীচুৱে আমাৰ বাবে আৰু এটা কাম কৰিলে। পাঁচনি পৌলে কৈছে যে যীচুৱে স্বৰ্গলৈ যোৱাৰ পাছত আমাক “মানুহৰ ৰূপত উপহাৰ দিলে।” (ইফিচীয়া ৪:৭, ৮ পঢ়ক।) পাঁচনি পৌলে বুজালে যে এই উপহাৰ যীচুৱে কিয় দিলে। কাৰণ মণ্ডলীৰ কাম যাতে ভালদৰে হʼব পাৰে। (ইফি. ১:২২, ২৩; ৪:১১-১৩) বৰ্তমান সময়ত কোন “মানুহৰ ৰূপত উপহাৰ” হয়? সহায়ক সেৱক, প্ৰাচীন আৰু চাৰ্কিট ওভাৰচিয়াৰ। a এই লোকসকলৰ পৰাও ভুল হʼব পাৰে কাৰণ তেওঁলোক আমাৰ দৰে অসিদ্ধ। (যাকো. ৩:২) তথাপিও যীচুৱে তেওঁলোকৰ যোগেদি আমাক সহায় কৰে, কাৰণ তেওঁলোক যীচুৱে দিয়া উপহাৰ হয়।

৩. আমি ‘মানুহৰ ৰূপত যি উপহাৰ’ পাইছোঁ, তেওঁলোকক কেনেকৈ সহযোগ কৰিব পাৰোঁ? বুজাওক।

^৩ যীচুৱে ‘মানুহৰ ৰূপত যি উপহাৰ’ দিছে, তেওঁলোকৰ কাম হৈছে মণ্ডলীক মজবুত কৰা। (ইফি. ৪:১২) কিন্তু এই দায়িত্ব পূৰ কৰিবলৈ আমিও তেওঁলোকক সহায় কৰিব পাৰোঁ। ইয়াক বুজিবলৈ এটা উদাহৰণলৈ মন কৰক। যেতিয়া কোনো এটা ৰাজ্যগৃহ নিৰ্মাণ কৰা হয়, তেতিয়া সকলোৱে তাত কাম নকৰে, কিছুমান লোকেহে কৰে। কিন্তু বাকী ভাই-ভনীয়ে  তেওঁলোকক সহযোগ আৰু সহায় কৰে। যেনে, তেওঁলোকে হয়তো আহাৰ ৰান্ধি দিয়ে, অহা-যোৱা কৰিবলৈ সহায় কৰে বা আন কিছুমান উপায়েৰে তেওঁলোকক সহায় কৰে। ঠিক সেইদৰে মণ্ডলীৰ ভাই-ভনীসকলে সহায়ক সেৱক, প্ৰাচীন আৰু চাৰ্কিট ওভাৰচিয়াৰসকলক সহায় কৰিব পাৰে। আমি তেওঁলোকক উৎসাহিত কৰিব পাৰোঁ বা তেওঁলোকৰ বাবে কিবা কৰিব পাৰোঁ। এই ভাইসকলে যি কঠিন পৰিশ্ৰম কৰে, তাৰ পৰা আমাৰ কি লাভ হয় আহক তাৰ বিষয়ে চাওঁ। আমি এয়াও চাম যে ‘মানুহৰ ৰূপত পোৱা উপহাৰৰ’ বাবে আৰু ইয়াক দিয়া যীচুৰ বাবে আমি কেনেকৈ কৃতজ্ঞতা দেখুৱাব পাৰোঁ।

‘আনক সহায় কৰা’ সহায়ক সেৱক

৪. প্ৰথম শতিকাৰ সহায়ক সেৱকসকলে কেনেকৈ সহায় কৰিছিল?

^৪ প্ৰথম শতিকাত কিছুমান ভাইক সহায়ক সেৱক হিচাপে নিযুক্ত কৰা হৈছিল। (১ তীম. ৩:৮) পৌলে যেতিয়া আনক সহায় কৰাৰ সেৱাৰ বিষয়ে উল্লেখ কৰিছিল, তেতিয়া তেওঁ হয়তো সহায়ক সেৱকসকলক মনত ৰাখি এই কথা কৈছিল। (১ কৰি. ১২:২৮) ইয়াৰ পৰা জানিব পাৰি যে সহায়ক সেৱকসকলে মণ্ডলীত বহুতো কাম কৰিছিল যাতে প্ৰাচীনসকলে শিকোৱাৰ কাম আৰু ঈশ্বৰৰ ভেড়াবোৰক চোৱা-চিতা কৰা কাম ভালদৰে কৰিব পাৰে। এই সহায়ক সেৱকসকলে শাস্ত্ৰৰ নকল বনাবলৈ বা নকল বনাবলৈ প্ৰয়োজন হোৱা বস্তুবোৰ কিনিবলৈ সহায় কৰিছিল।

৫. সহায়ক সেৱকসকলে মণ্ডলীত কি কি কাম কৰে?

^৫ আজি সহায়ক সেৱকসকলে মণ্ডলীত কি কি কাম কৰে, তালৈ মন কৰক। (১ পিত. ৪:১০) কিছুমান সহায়ক সেৱকে টকা-পইচাৰ হিচাপ ৰাখে, কিছুমানে প্ৰচাৰ এলেকাৰ ৰেকৰ্ড ৰাখে, কিছুমানে প্ৰকাশনৰ ৰেকৰ্ড ৰাখে আৰু আনক দিয়ে, আন কিছুমানে অডিঅʼ-ভিডিঅʼত কাম কৰে, কিছুমানে এটেনডেণ্টত কাম কৰে আৰু কিছুমানে ৰাজ্যগৃহ চোৱা-চিতা কামত সহায় কৰে। মণ্ডলীৰ সকলো কাম ভালদৰে কৰিবলৈ এই কামবোৰ বহুত গুৰুত্বপূৰ্ণ। (১ কৰি. ১৪:৪০) ইয়াৰ উপৰিও কিছুমানে ‘খ্ৰীষ্টান জীৱন আৰু পৰিচৰ্য্যা—সভাত’ নিজৰ ভাগ আগবঢ়ায় আৰু জন ভাষণ দিয়ে। কিছুমানক প্ৰচাৰ সমূহৰ অধ্যক্ষৰ সহায়ক হিচাপেও নিযুক্ত কৰা হয়। ইয়াৰ উপৰিও প্ৰাচীনসকলে কিছুমান যোগ্য সহায়ক সেৱকক নিজৰ লগত মেৰ পালকৰ সাক্ষাতত লৈ যায়।

৬. আমি পৰিশ্ৰমী সহায়ক সেৱকসকলৰ প্ৰতি কিয় কৃতজ্ঞ?

^৬ মণ্ডলীত সহায়ক সেৱকসকলে যি পৰিশ্ৰম কৰে, তাৰ পৰা মণ্ডলীৰ বহুতো লাভ হয়। মন কৰক কিছুমান ভাই-ভনীয়ে ইয়াৰ বিষয়ে কি কৈছে। বলিভিয়াত থকা ভনী বেবৰলীয়ে  b এইদৰে কৈছে, “সহায়ক সেৱকসকলৰ বাবে মই সভাত সম্পূৰ্ণকৈ লাভৱান হʼব পাৰোঁ। যেনে, মই গীত গাব পাৰোঁ, উত্তৰ দিব পাৰোঁ, ভাষণ শুনিব পাৰোঁ, ছবি আৰু ভিডিঅʼৰ পৰা বহুতো কথা শিকিব পাৰোঁ। তেওঁলোকে সুৰক্ষাৰ প্ৰতি ধ্যান দিয়ে আৰু যিসকল লোকে ভিডিঅʼ কনফ্ৰেন্সিঙৰ যোগেদি সভাত উপস্থিত হয়, তেওঁলোকেও যাতে লাভৱান হʼব পাৰে তাৰ প্ৰতিও ধ্যান দিয়ে। সভাৰ পাছত তেওঁলোকে ৰাজ্যগৃহ চাফ চিকূণ কৰিবলৈ আগবাঢ়ি আহে, তেওঁলোকে টকা-পইচাৰ হিচাপ ৰাখে আৰু কিতাপ-পত্ৰিকাবোৰ সকলো ভাই-ভনীয়ে পাইছে নে নাই, তাৰ প্ৰতিও তেওঁলোকে ধ্যান দিয়ে। সঁচাকৈ, তেওঁলোকৰ প্ৰতি মই বহুত কৃতজ্ঞ।” কলম্বিয়াত থকা ভনী লেচলিৰ উদাহৰণলৈ এতিয়া মন কৰক। তেওঁৰ স্বামী এজন প্ৰাচীন হয়। তাই এইদৰে কৈছে, “সহায়ক সেৱকসকলে বহুতো কাম কৰে, যাৰ বাবে মোৰ স্বামীৰ সহায় হয়। সহায়ক সেৱকসকলে তেওঁক সহায় নকৰা হʼলে মোৰ স্বামীৰ কাম বহুত বাঢ়ি গʼলহেঁতেন। তেওঁলোকে এই কাম আনন্দেৰে আৰু উৎসাহেৰে কৰে। সহায়ক সেৱকসকলৰ পৰিশ্ৰমৰ বাবে মই তেওঁলোকৰ প্ৰতি বহুত কৃতজ্ঞ।” আপুনিও হয়তো নিজৰ মণ্ডলীৰ সহায়ক সেৱকসকলৰ বিষয়ে এইদৰেই অনুভৱ কৰে।—১ তীম. ৩:১৩.

৭. সহায়ক সেৱকসকলৰ প্ৰতি আমি কৃতজ্ঞ বুলি কেনেকৈ দেখুৱাব পাৰোঁ? (ছবিখনো চাওক।)

^৭ আপুনি হয়তো সহায়ক সেৱকসকলৰ প্ৰতি বহুত কৃতজ্ঞ, কিন্তু তাক দেখুৱাবও লাগিব। বাইবেলত লিখা আছে যে আপোনালোকে তেওঁলোকৰ প্ৰতি ‘কৃতজ্ঞ আছে’ বুলি দেখুৱাওক। (কল. ৩:১৫) ফিনলেণ্ডত থকা ভাই কাচিচটফ এজন প্ৰাচীন হয়, তেওঁ মণ্ডলীৰ সহায়ক সেৱকসকলৰ প্ৰতি কৃতজ্ঞ বুলি বহুতো উপায়েৰে দেখুৱায়। তেওঁ কৈছে, “মই তেওঁলোকক কাৰ্ড দিওঁ, মেছেজ লিখোঁ, বিশেষকৈ তাত এটা পদ লিখোঁ। মই তেওঁলোকক এয়াও জনাও যে মই তেওঁলোকৰ কি কথাৰ পৰা উৎসাহিত হʼলোঁ আৰু তেওঁলোকৰ কি কথাৰ বাবে মই বহুত কৃতজ্ঞ।” নিউ কেলেডʼনিয়াত থকা ভাই পাস্কল আৰু তেওঁৰ পত্নী জীয়েলে সহায়ক সেৱকসকলৰ বাবে প্ৰাৰ্থনা কৰে। ভাই পাস্কলে কৈছে,  “কিছু সময়ৰ পৰা আমি প্ৰাৰ্থনা কৰাৰ সময়ত সহায়ক সেৱকসকলক মনত পেলাবলৈ ধৰিছোঁ। তেওঁলোকক দিয়াৰ বাবে আমি যিহোৱাক ধন্যবাদ দিওঁ আৰু তেওঁলৈ প্ৰাৰ্থনা কৰোঁ যাতে তেওঁ তেওঁলোকৰ লগত থাকে আৰু তেওঁলোকক সহায় কৰে।” এনেধৰণৰ প্ৰাৰ্থনা যিহোৱাই নিশ্চয় শুনে আৰু ইয়াৰ বাবে গোটেই মণ্ডলীয়ে আশীৰ্বাদ লাভ কৰে।—২ কৰি. ১:১১.

কঠিন “পৰিশ্ৰম” কৰা প্ৰাচীন

৮. প্ৰথম শতিকাৰ প্ৰাচীনসকলে কঠিন “পৰিশ্ৰম” কৰিছিল বুলি পৌলে কিয় কৈছিল? (১ থিচলনীকীয়া ৫:১২, ১৩)

^৮ প্ৰথম শতিকাত প্ৰাচীনসকলে মণ্ডলীক সহায় কৰিবলৈ বহুত পৰিশ্ৰম কৰিছিল। (১ থিচলনীকীয়া ৫:১২, ১৩ পঢ়ক; ১ তীম. ৫:১৭, IRV) তেওঁলোকে মণ্ডলীত “পৰিচালনা” কৰিছিল। যেনে, তেওঁলোকে সভাবোৰ চলাইছিল আৰু একেলগে মিলি নিৰ্ণয় লৈছিল। ইয়াৰ উপৰিও তেওঁলোকে ভাই-ভনীসকলক বুজাইছিল অৰ্থাৎ বেলেগ বেলেগ বিষয়ত পৰামৰ্শ দিছিল, যাতে তেওঁলোকে নিজৰ বিশ্বাস মজবুত কৰিব পাৰে। (১ থিচ. ২:১১, ১২; ২ তীম. ৪:২) ইয়াৰ লগতে তেওঁলোকে পৰিয়ালৰ প্ৰয়োজনীয়তা পূৰ কৰিবলৈ আৰু যিহোৱাৰ লগত থকা নিজৰ সম্পৰ্ক মজবুত কৰিবলৈও কঠিন পৰিশ্ৰম কৰিছিল।—১ তীম. ৩:২, ৪; তীত ১:৬-৯.

৯. প্ৰাচীনসকলে আজি কি কি দায়িত্ব পালন কৰে?

^৯ আজিও প্ৰাচীনসকলে বহুতো দায়িত্ব পালন কৰে। আমাৰ নিচিনা তেওঁলোকেও শুভবাৰ্তাৰ প্ৰচাৰক হয়। (২ তীম. ৪:৫) তেওঁলোকে প্ৰচাৰ কামৰ নেতৃত্ব লয় আৰু উৎসাহেৰে এই কামত ভাগ লয়। মণ্ডলীৰ এলেকাত যাতে প্ৰচাৰ কাম হয়, তাৰ বাবে তেওঁলোকে ভালদৰে ব্যৱস্থা কৰে। তেওঁলোকে আমাক ট্ৰেইনিং দিয়ে যাতে আমি প্ৰচাৰ কাম ভালদৰে কৰিব পাৰোঁ আৰু আনক শিকাব পাৰোঁ। ইয়াৰ উপৰিও তেওঁলোকে ন্যায়ীৰ কাম কৰে। এইদৰে কৰাৰ সময়ত তেওঁলোকে দয়া দেখুৱায় আৰু কাৰো পক্ষ নলয়। যেতিয়া কোনো ভাই বা ভনীয়ে গভীৰ পাপ কৰে, তেতিয়া যিহোৱাৰ লগত আকৌ ভাল সম্পৰ্ক গঢ়ি তুলিবলৈ তেওঁলোকক সহায় কৰে। ইয়াৰ লগতে মণ্ডলী যাতে শুদ্ধ হৈ থাকে, তাৰ প্ৰতিও ধ্যান দিয়ে। (১ কৰি. ৫:১২, ১৩; গালা. ৬:১) ইয়াৰ উপৰিও যিহোৱাই প্ৰাচীনসকলক মেৰ ৰখীয়াৰ বিশেষ দায়িত্ব দিছে। (১ পিত. ৫:১-৩) তেওঁলোকে বাইবেলৰ বিষয়বোৰত ভাষণ তৈয়াৰ কৰে, মণ্ডলীৰ প্ৰতিজন ভাই-ভনীক জানিবলৈ চেষ্টা কৰে আৰু মেৰ পালকৰ সাক্ষাৎ কৰে। কিছুমানে ৰাজ্যগৃহ নিৰ্মাণ আৰু চোৱা-চিতা কাম কৰে আৰু অধিৱেশনৰ ব্যৱস্থা কৰে, ‘চিকিৎসালয় যোগাযোগ সমিতিৰ’ আৰু ‘ৰোগীক সাক্ষাৎ কৰা সমূহত’ কাম কৰে। প্ৰাচীনসকলে আৰু বহুতো দায়িত্ব পালন কৰে। সঁচাকৈ, প্ৰাচীনসকলে বহুত পৰিশ্ৰম কৰে!

১০. পৰিশ্ৰমী প্ৰাচীনসকলৰ প্ৰতি আমি কিয় কৃতজ্ঞ?

^১০ যিহোৱাই কৈছিল যে প্ৰাচীনসকলে মেৰ ৰখীয়াৰ দৰে আমাক সহায় কৰিব। সেইবাবে, আমি ‘ভয় নকৰিম’ আৰু চিন্তিত নহʼম। (যিৰি. ২৩:৪) ফিনলেণ্ডত থকা ভনী ইয়হানায়ে এইদৰেই অনুভৱ কৰিছিল। যেতিয়া তাইৰ মা বহুত বেমাৰ হৈ পৰিছিল, তেতিয়া তাই অনুভৱ কৰিছিল যে প্ৰাচীনসকল সঁচাকৈ বহুত ভাল ৰখীয়া হয়। তাই এইদৰে কৈছে, “মোৰ মনত কি চলি আছে আৰু মই কেনে অনুভৱ কৰি আছোঁ, তাৰ বিষয়ে আনক জনাবলৈ মোক বহুত টান লাগে। কিন্তু এজন প্ৰাচীনে মোৰ লগত কথা পাতিলে, তেওঁ ধৈৰ্য্য ধৰি মোৰ কথা শুনিলে, প্ৰাৰ্থনা কৰিলে আৰু যিহোৱাই মোক বহুত প্ৰেম কৰে বুলি আশ্বাস দিলে। সেই সময়ত তেওঁ মোক কি কথা কৈছিল, সেয়া মোৰ মনত নাই, কিন্তু মই মনত কিমান শান্তি পাইছিলোঁ, সেয়া মনত আছে। মোৰ ভয় আৰু চিন্তা একেবাৰে শেষ হৈ গʼল। যিহোৱাই সঠিক সময়ত সেই ভাইক মোৰ ওচৰলৈ পঠিয়ালে।” আপোনাৰ মণ্ডলীৰ প্ৰাচীনসকলেও আপোনাক সহায় কৰিছে নে?

১১. আপুনি প্ৰাচীনসকলৰ প্ৰতি কৃতজ্ঞ বুলি কেনেকৈ দেখুৱাব পাৰে? (ছবিখনো চাওক।)

^১১ প্ৰাচীনসকলৰ “কাৰ্য্যৰ কাৰণে” আমি হৃদয়েৰে কৃতজ্ঞ হোৱাটো যিহোৱাই বিচাৰে। (১ থিচ. ৫:১২, ১৩) ফিনলেণ্ডত থকা ভনী হেনৰিতাই কৈছে, “প্ৰাচীনসকলে আনক সহায় কৰিবলৈ আনন্দেৰে আগবাঢ়ি আহে। কিন্তু ইয়াৰ অৰ্থ এয়া নহয় যে তেওঁলোকৰ ওচৰত বহুত সময় আৰু শক্তি আছে বা তেওঁলোকৰ জীৱনত কোনো সমস্যা নাই। মই প্ৰাচীনসকলক কেতিয়াবা কেতিয়াবা কওঁ, ‘আপুনি বহুত ভাল প্ৰাচীন হয়।’” তুৰ্কীয়েত  c থকা ভনী চাৰাই এইদৰে কৈছে, “প্ৰাচীনসকলকো উৎসাহৰ প্ৰয়োজন হয়। সেইবাবে, আমি তেওঁলোকক কাৰ্ড দিব পাৰোঁ, আহাৰৰ বাবে মাতিব পাৰোঁ বা তেওঁলোকৰ লগত প্ৰচাৰলৈ যাব পাৰোঁ।” আপোনাৰ মণ্ডলীতো এনে প্ৰাচীন আছে নে, যাৰ প্ৰতি আপুনি বহুত কৃতজ্ঞ? যদি আছে, তেনেহʼলে আপুনি ইয়াৰ বিষয়ে তেওঁক জনাব পাৰে।—১ কৰি. ১৬:১৮.

 মণ্ডলীবোৰক মজবুত কৰা চাৰ্কিট ওভাৰচিয়াৰ

১২. প্ৰথম শতিকাৰ মণ্ডলীবোৰক মজবুত কৰিবলৈ যীচুৱে আৰু কি ব্যৱস্থা কৰিলে? (১ থিচলনীকীয়া ২:৭, ৮)

^১২ যীচুৱে ‘মানুহৰ ৰূপত যি উপহাৰ’ দিছে, তেওঁলোকে আৰু এটা উপায়েৰে ভাই-ভনীসকলক সহায় কৰে। যীচুৰ নেতৃত্বত যিৰূচালেমৰ প্ৰাচীনসকলে পৌল, বাৰ্ণাব্বা আৰু আন কিছুমান ভাইক চাৰ্কিট ওভাৰচিয়াৰ নিযুক্ত কৰিছিল আৰু তেওঁলোকক মণ্ডলীবোৰত সাক্ষাৎ কৰিবলৈ পঠিয়াইছিল। (পাঁচ. ১১:২২) কিয় বাৰু? তেওঁলোকে যাতে সহায়ক সেৱক আৰু প্ৰাচীনসকলৰ দৰে মণ্ডলীবোৰক মজবুত কৰিব পাৰে। (পাঁচ. ১৫:৪০, ৪১) এই ভাইসকলে আৰামদায়ক জীৱন ত্যাগ কৰিছিল আৰু নিজৰ জীৱন বিপদত পেলাই আনক উৎসাহিত কৰিছিল আৰু ঈশ্বৰৰ বিষয়ে শিকাইছিল।—১ থিচলনীকীয়া ২:৭, ৮ পঢ়ক।

১৩. চাৰ্কিট ওভাৰচিয়াৰসকলে কি কি দায়িত্ব চম্ভালে?

^১৩ চাৰ্কিট ওভাৰচিয়াৰসকলে বেলেগ বেলেগ মণ্ডলীলৈ যাবলৈ বহুত পৰিশ্ৰম কৰে। কিছুমান ভায়ে এখন মণ্ডলীৰ পৰা আন এখন মণ্ডলীলৈ যাবলৈ বহু কিলোমিটাৰ যাত্ৰা কৰিবলগীয়া হয়। তেওঁলোকে প্ৰতি সপ্তাহে কেইবাটাও ভাষণ দিয়ে, প্ৰচাৰ সভা চলায়, মেৰ পালকৰ সাক্ষাৎ কৰে, অগ্ৰগামীসকলৰ লগত সভা ৰাখে, প্ৰাচীনসকলৰ লগত সভা ৰাখে। ইয়াৰ উপৰিও চাৰ্কিট সন্মিলন আৰু অধিৱেশনৰ ব্যৱস্থা কৰে আৰু তাত ভাষণ দিয়ে। তেওঁলোকে অগ্ৰগামী সেৱা স্কুলত শিকাই আৰু চাৰ্কিটৰ অগ্ৰগামী সেৱকসকলৰ লগত বিশেষ সভা ৰাখে। ইয়াৰ উপৰিও তেওঁলোকে আৰু বহুতো দায়িত্ব চম্ভালে। যেনে, শাখা কাৰ্য্যালয়ৰ পৰা যদি কিবা গুৰুত্বপূৰ্ণ কাম আহে, তেনেহʼলে তেওঁলোকে তাক লগে লগে কৰিবলগীয়া হয়। সঁচাকৈ, চাৰ্কিট ওভাৰচিয়াৰসকলে বহুত পৰিশ্ৰম কৰে!

১৪. আমি পৰিশ্ৰমী চাৰ্কিট ওভাৰচিয়াসকলৰ প্ৰতি কিয় কৃতজ্ঞ?

^১৪ চাৰ্কিট ওভাৰচিয়াৰসকল যিহোৱাৰ পৰা মানুহৰ ৰূপত পোৱা উপহাৰ হয়। তেওঁলোকৰ পৰা ভাই-ভনীসকলৰ বহুতো লাভ হয়। চাৰ্কিট ওভাৰচিয়াৰসকলে যেতিয়া সাক্ষাৎ কৰিবলৈ আহে, তেতিয়া কি লাভ হয় তাৰ বিষয়ে তুৰ্কীয়েত থকা এজন ভায়ে এইদৰে কৈছে, “যেতিয়া তেওঁলোকে আহে, তেতিয়া মই বৰ আনন্দিত হওঁ আৰু উৎসাহ লাভ কৰোঁ। তেওঁলোকক দেখি মোৰো  ভাই-ভনীসকলক সহায় কৰিবলৈ আৰু বেছিকৈ মন যায়। মই বহুতো চাৰ্কিট ওভাৰচিয়াৰক লগ পাইছোঁ, কিন্তু তেওঁলোকে বহুত ব্যস্ত আছে বা মোৰ লগত কথা পাতিবলৈ তেওঁলোকৰ সময়ে নাই, এইদৰে তেওঁলোকে কেতিয়াও অনুভৱ নকৰায়।” ওপৰত উল্লেখ কৰা ভনী ইয়হানাই এবাৰ যেতিয়া এজন চাৰ্কিট ওভাৰচিয়াৰৰ লগত প্ৰচাৰ কৰি আছিল, তেতিয়া তেওঁলোকে এখনো ঘৰত লোকসকলক লগ পোৱা নাছিল। তাই কৈছে, “তথাপি সেই দিনটো মোৰ আজিও মনত আছে। কিছু দিনৰ আগতে মোৰ দুজনী বাইদেউ বেলেগ ঠাই গৈ থাকিবলৈ ধৰিছিল। সেইবাবে, মই বহুত নিৰাশ হৈ পৰিছিলোঁ। তেওঁলোকলৈ মোৰ বহুত মনত পৰিছিল। কিন্তু চাৰ্কিট ওভাৰচিয়াৰজনে মোক বহুত উৎসাহিত কৰিলে আৰু এয়া বুজিবলৈ সহায় কৰিলে যে যিহোৱাৰ সেৱাৰ বাবে আমি নিজৰ পৰিয়াল আৰু বন্ধুসকলৰ পৰা দূৰত থাকিবলগীয়া হʼব পাৰে। কিন্তু এয়া সদায় দিনৰ বাবে নহʼব, আমি নতুন পৃথিৱীত সকলোৱে একেলগে মিলি থাকিব পাৰিম।” এনে আৰু বহুতো চাৰ্কিট ওভাৰচিয়াৰ আছে, যিসকলক ভাই-ভনীসকলে বহুত প্ৰেম কৰে।—পাঁচ. ২০:৩৭–২১:১.

১৫. (ক) তৃতীয় যোহন ৫-৮ পদৰ অনুসৰি আমি চাৰ্কিট ওভাৰচিয়াসকলৰ প্ৰতি কৃতজ্ঞ বুলি কেনেকৈ দেখুৱাব পাৰোঁ? (ছবিখনো চাওক।) (খ) আমি নিযুক্ত ভাইসকলৰ পত্নীসকলৰ প্ৰতি কিয় কৃতজ্ঞ হোৱা উচিত আৰু আমি এয়া কেনেকৈ কৰিব পাৰোঁ? (“ তেওঁলোকৰ পত্নীসকলকো মনত ৰাখক” নামৰ বক্সখন চাওক।)

^১৫ যিসকল ভায়ে সাক্ষাৎ কৰিবলৈ আহিছিল, তেওঁলোকক অতিথি সৎকাৰ দেখুৱাবলৈ আৰু ‘ঈশ্বৰ সন্তুষ্ট হোৱাকৈ তেওঁলোকৰ যাত্ৰা পথত সাহায্য আগবঢ়াবলৈ’ পাঁচনি যোহনে গায়ক কৈছিল। (৩ যোহন ৫-৮ পঢ়ক, IRV) আমিও এইদৰে কৰিব পাৰোঁ। চাৰ্কিট ওভাৰচিয়াৰসকলক আমি আহাৰৰ বাবে মাতিব পাৰোঁ আৰু সেই সপ্তাহত উৎসাহেৰে প্ৰচাৰত ভাগ লʼব পাৰোঁ। ওপৰত উল্লেখ কৰা ভনী লেচলিয়ে আৰু এটা উপায়েৰে চাৰ্কিট ওভাৰচিয়াৰসকলক কৃতজ্ঞতা দেখুৱায়। তাই এইদৰে কৈছে, “তেওঁলোকৰ প্ৰয়োজনীয়তা পূৰ কৰিবলৈ মই যিহোৱালৈ প্ৰাৰ্থনা কৰোঁ। মই আৰু মোৰ স্বামীয়ে মিলি তেওঁলোকলৈ চিঠি লিখোঁ আৰু তেওঁলোকক জনাওঁ যে তেওঁলোকৰ সাক্ষাতৰ পৰা আমি বহুত উৎসাহিত হʼলোঁ।” মনত ৰাখক চাৰ্কিট ওভাৰচিয়াৰসকলেও আমাৰ দৰে সমস্যাৰ সন্মুখীন হয়, বেমাৰ আৰু চিন্তিত হয় আৰু নিৰাশ হৈ পৰে। এনে পৰিস্থিতিত যদি আমি তেওঁলোকক উৎসাহিত কৰোঁ আৰু কিবা উপহাৰ দিওঁ, তেনেহʼলে যিহোৱাই  হয়তো আমাৰ জৰিয়তে তেওঁলোকৰ প্ৰাৰ্থনাৰ উত্তৰ দিব।—হিতো. ১২:২৫.

আমাক ‘মানুহৰ ৰূপত উপহাৰৰ’ প্ৰয়োজন আছে

১৬. হিতোপদেশ ৩:২৭ পদটো মনত ৰাখি এজন ভায়ে নিজকে কি কি প্ৰশ্ন সুধিব পাৰে?

^১৬ আজি গোটেই পৃথিৱীত ভাইসকলৰ বহুত প্ৰয়োজন আছে, যাতে তেওঁলোকে “মানুহৰ ৰূপত উপহাৰ” হʼব পাৰে। যদি আপুনি এজন ভাই হয় আৰু আপোনাৰ বাপ্তিষ্মা হৈ গৈছে, তেনেহʼলে আপুনি সেই লোকসকলক সহায় কৰিব পাৰিব নে, যিসকলৰ ‘উপকাৰ কৰাৰ আপোনাৰ সমৰ্থ’ আছে। (হিতোপদেশ ৩:২৭ পঢ়ক।) যেনে, আপুনি ভাই-ভনীসকলক সহায় কৰিবলৈ সহায়ক সেৱক হʼবলৈ চেষ্টা কৰিব পাৰেনে? আপুনি প্ৰাচীনৰ যোগ্য হʼবলৈ পৰিশ্ৰম কৰিব পাৰেনে? d আপুনি নিজৰ জীৱনত সাল-সলনি কৰিব পাৰেনে আৰু ৰাজ্য প্ৰচাৰকসকলৰ স্কুলৰ ফৰ্ম পূৰ কৰিব পাৰেনে? এই স্কুলে আপোনাক যীচুৰ আৰু কামত অহাৰ যোগ্য হʼবলৈ সহায় কৰিব পাৰে। যদি আপোনাৰ অনুভৱ হয় যে আপুনি এই দায়িত্ব লʼব নোৱাৰে, তেনেহʼলে যিহোৱালৈ প্ৰাৰ্থনা কৰক আৰু পবিত্ৰ শক্তি বিচাৰক, যাতে আপোনাক যি দায়িত্ব দিয়া হয় তাক আপুনি ভালদৰে পূৰ কৰিব পাৰে।—লূক ১১:১৩; পাঁচ. ২০:২৮.

১৭. আমি ‘মানুহৰ ৰূপত যি উপহাৰ’ পাইছোঁ, ইয়ে কি প্ৰমাণ কৰে?

^১৭ যীচুৱে ‘মানুহৰ ৰূপত যি উপহাৰ’ দিছে, ইয়ে প্ৰমাণ কৰে যে তেওঁ এই শেষ কালত আমাৰ নেতৃত্ব লৈ আছে। (মথি ২৮:২০) আমাৰ ৰজা যীচু খ্ৰীষ্টই আমাক প্ৰেম কৰে, আমাৰ যত্ন লয় আৰু আমাক মন খুলি দিয়ে, ইয়াৰ বাবে আমি তেওঁৰ প্ৰতি কৃতজ্ঞ নহয় নে? তেওঁ আমাক সহায় কৰিবলৈ যোগ্য ভাইসকলক দিছে, ইয়াৰ বাবেও আমি তেওঁৰ প্ৰতি কৃতজ্ঞ নহয় নে? আহক এই পৰিশ্ৰমী ভাইসকলৰ প্ৰতি আমি কৃতজ্ঞ আছোঁ বুলি দেখুৱাওঁ। ইয়াৰ উপৰিও যিহোৱাই তেওঁলোকক দিয়াৰ বাবে আমি তেওঁক ধন্যবাদ দিয়া উচিত। কাৰণ “সকলো উত্তম দান আৰু সকলো সিদ্ধ বৰ” তেওঁহে দিয়ে।—যাকো. ১:১৭.