আত্মসন্মান থকাটো কিয় গুৰুত্বপূৰ্ণ?

• এটা অনুসন্ধানৰ পৰা জানিব পৰা গৈছে যে যি লোকসকলে নিজকে অযোগ্য বুলি ভাবে তেওঁলোকে বহুত চিন্তা কৰিবলৈ ধৰে আৰু তেওঁলোকৰ ডিপ্ৰেচন হয়। এনে পৰিস্থিতিত কিছুমান লোকক ভোক নালাগে, আন কিছুমানে বহুত বেছি আহাৰ খায়। ইয়াৰ উপৰিও তেওঁলোকে বহুত বেছি মদ খাবলৈ ধৰে আৰু ড্ৰাগ্ছ লʼবলৈ আৰম্ভ কৰে।

• আত্মসন্মান থকা লোকসকলে নিজৰ তুলনা আনৰ লগত নকৰে। সেইবাবে, তেওঁলোকে সহজতে আনৰ লগত মিলা-মিচা কৰিব পাৰে আৰু ভাল বন্ধু বনাব পাৰে। আনহাতে, আত্মসন্মান নথকা লোকসকলে আনৰ ভুলবোৰ বিচাৰি থাকে। সেইবাবে, তেওঁলোকে আনৰ লগত ভাল সম্পৰ্ক গঢ়ি তুলিব নোৱাৰে।

• আত্মসন্মান থকা লোকসকলে সমস্যা আহিলে বেছিকৈ চিন্তিত নোহোৱাকৈ সেইবোৰৰ সন্মুখীন হয়। যেতিয়া তেওঁলোকে কিবা কৰিবলৈ থিৰাং কৰে, তেতিয়া বাধা আহিলেও হাৰ নামানি সেয়া পূৰ কৰিবলৈ সম্পূৰ্ণৰূপে চেষ্টা কৰে। আনহাতে, আত্মসন্মান কম থকা লোকসকলৰ বাবে সৰু সৰু বিফলতাবোৰ ডাঙৰ ডাঙৰ পাহাৰৰ দৰে বাধা হৈ পৰে। সেইবাবে, তেওঁলোকে হাৰ মানি লয়।

 আত্মসন্মান বঢ়াবলৈ আপুনি কি কৰিব পাৰে?

ভাল বন্ধু বাছনি কৰক। এনে লোকসকলৰ লগত বন্ধুত্ব কৰক যিসকলে আনৰ সন্মান কৰে, আপোনাৰ বিষয়ে চিন্তা কৰে আৰু আপোনাক উৎসাহিত কৰে।

আনক সহায় কৰক। যেতিয়া আপুনি আনক সহায় কৰে, এনে লোকসকলকো যিসকলে হয়তো ইয়াৰ বিনিময়ত আপোনাৰ বাবে একো কৰিব নোৱাৰে, তেতিয়া আপুনি প্ৰকৃত আনন্দ লাভ কৰিব। যদিও আপোনাৰ ভাল কামক কোনেও ধ্যান নিদিয়ে বা আপোনাৰ প্ৰশংসা নকৰে, তথাপিও আপুনি আনন্দত থাকিব।

নিজৰ লʼৰা-ছোৱালীক নিজকে সন্মান কৰিবলৈ শিকাওক। এটা উপায় হৈছে, যদি তেওঁলোকে কিবা সমস্যাৰ সন্মুখীন হৈছে আৰু তেওঁলোকে সেয়া সমাধান কৰিব পাৰে, তেনেহʼলে এইদৰে কৰিবলৈ দিয়ক। যাতে তেওঁলোকে শিকিব পাৰে যে সমস্যাৰ সন্মুখীন কেনেকৈ হʼব পাৰে বা সমস্যাৰ সমাধান কেনেকৈ কৰিব পাৰে। এইদৰে কৰিলে তেওঁলোকৰ আত্মসন্মান বাঢ়িব আৰু ডাঙৰ হোৱাৰ পাছতো তেওঁলোক লাভৱান হʼব।