সৰুৰেপৰা চমূৱেলে ঈশ্বৰৰ ঘৰতে থাকি কাম কৰিছিল। ঈশ্বৰৰ ঘৰ হৈছে এনে এখন ঠাই, যʼত লোকসকলে উপাসনা কৰিবলৈ গৈছিল। তুমি জানানে, কেনেকৈ চমূৱেলে ঈশ্বৰৰ ঘৰত কাম কৰিবলৈ সুযোগ পাইছিল? আহাঁ, প্ৰথমে আমি চমূৱেলৰ মাতৃ হান্নাৰ বিষয়ে কিছু কথা শিকোঁ।

মাতৃ হিচাপে হান্নাই সন্তানৰ আশা কৰিছিল, কিন্তু বহুবছৰ ধৰি তাইৰ কোনো সন্তান হোৱা নাছিল। গতিকে, তাই সন্তানৰ বাবে যিহোৱা ঈশ্বৰক প্ৰাৰ্থনা কৰিছিল। হান্নাই প্ৰতিজ্ঞা কৰিছিল যে যদি তাইৰ এটি পুত্ৰ সন্তান জন্ম হয়, তেনেহʼলে সেই পুত্ৰক ঈশ্বৰৰ ঘৰত থাকিবলৈ আৰু কাম কৰিবলৈ দিব। যিহোৱাই হান্নাৰ প্ৰাৰ্থনাৰ উত্তৰ দিলে। সঁচাকৈ তাইৰ এটি পুত্ৰ জন্ম হʼল আৰু তাৰ নাম চমূৱেল ৰাখিলে। প্ৰতিজ্ঞা কৰাৰ দৰে, তিনি বা চাৰি বছৰ হওঁতে হান্নাই চমূৱেলক ঈশ্বৰৰ ঘৰত সেৱা কৰিবলৈ লৈ গʼল।

সেই সময়ত এলী নামৰ মহাপুৰোহিতে ঈশ্বৰৰ ঘৰত সেৱা কৰিছিল। তেওঁৰ দুজন পুতেকেও তাতে পুৰোহিত হিচাপে সেৱা কৰিছিল। তোমাৰ নিশ্চয় মনত আছে যে ঈশ্বৰৰ ঘৰ হৈছে লোকসকলৰ উপাসনা কৰা এখন ঠাই আৰু ইয়াত সেৱা কৰা লোকসকলে যি ভাল তাকে কৰাৰ প্ৰয়োজন আছিল। কিন্তু এলীৰ পুত্ৰকেইজনে ঈশ্বৰৰ ঘৰত বেয়া কামবোৰ কৰিছিল। তেওঁলোকক বেয়া কাম কৰা চমূৱেলে দেখিছিল। এলীৰ পুত্ৰকেইজনৰ দৰে চমূৱেলেও বেয়া কামবোৰ কৰিছিলনে?— তেওঁ কৰা নাছিল। পিতৃ-মাতৃয়ে শিকোৱাৰ দৰে চমূৱেলে যি ভাল তাকে কৰিছিল।

তুমি কি ভাবা, এলীয়ে তেওঁৰ পুত্ৰ দুজনক কি কৰা উচিত আছিল?— এলীয়ে তেওঁলোকক শাস্তি দিয়াৰ প্ৰয়োজন আছিল। তেওঁলোকক ঈশ্বৰৰ ঘৰত কাম কৰিবলৈ দিয়া উচিত নাছিল। কিন্তু এলীয়ে এইদৰে নকৰিলে। সেইবাবে, যিহোৱা ঈশ্বৰে এলী আৰু তেওঁৰ পুত্ৰকেইজনৰ ওপৰত ক্ৰোধিত হʼল। যিহোৱাই তেওঁলোকক শাস্তি দিবলৈ নিৰ্ণয় লয়।

এদিন ৰাতি চমূৱেলে শুই থকাৰ সময়ত, কোনোবাই তেওঁক নাম ধৰি মতা যেন শুনিলে: ‘চমূৱেল!’ সি দৌৰি এলীৰ ওচৰলৈ গʼল আৰু সুধিলে। কিন্তু এলীয়ে উত্তৰ দিলে: ‘মই তোমাক মতা নাই।’ এইদৰে দুবাৰ হʼল। তৃতীয়বাৰ এইদৰে হোৱাৰ পাছত, এলীয়ে চমূৱেলক কʼলে যে যদি তেওঁ সেই মাত আকৌ শুনে তেনেহʼলে এইদৰে কʼব লাগে: “হে যিহোৱা কওক, আপোনাৰ দাসে শুনিছে।” চমূৱেলে সেইদৰেই কৰিলে। ইয়াৰ পাছত যিহোৱাই চমূৱেলক কʼলে: ‘এলীক কোৱা যে বেয়া কাম কৰাৰ বাবে মই তেওঁৰ  পৰিয়ালৰ লোকসকলক শাস্তি দিম।’ তুমি কি ভাবা, এলীক এই খবৰ দিয়াটো চমূৱেলৰ বাবে সহজ আছিলনে?— ইমান সহজ নাছিল। চমূৱেলে যদিও ভয় খাইছিল, তথাপি তেওঁ যিহোৱাই কোৱাৰ দৰে কৰিছিল আৰু ঠিক সেইদৰেই ঘটিল। এলী আৰু তেওঁৰ দুজন পুত্ৰৰ মৃত্যু হʼল।

চমূৱেলে আমাৰ সকলোৰে বাবে এটা ভাল উদাহৰণ ৰাখিলে। চমূৱেলে আন লোকসকলক বেয়া কাম কৰা দেখিছিল, তথাপিও তেওঁ যি ভাল তাকে কৰিছিল। তোমাৰ বিষয়েনো কি? তুমিও চমূৱেলৰ দৰে যি ভাল তাকে কৰিবানে? যদি তুমি এইদৰে কৰা, তেনেহʼলে তুমিও তোমাৰ পিতৃ-মাতৃ আৰু যিহোৱা ঈশ্বৰক সুখী কৰিব পাৰিবা।