যীচুক লক্ষ্য কৰাচোন। তেওঁ গালীলত থকা এখন পৰ্ব্বতত লোকসকলক শিক্ষা দিছে। তেওঁৰ একেবাৰে ওচৰত বহি থকা লোককেইজন হৈছে তেওঁৰ পাঁচনি। যীচুয়ে ১২জন লোকক নিজৰ পাঁচনি হিচাপে নিৰ্ব্বাচন কৰিছে। এই পাঁচনিকেইজন হৈছে যীচুৰ বিশেষ শিষ্য। তোমালোকে যীচুৰ পাঁচনিকেইজনৰ নাম জানানে?

তেওঁলোক হৈছে, চিমোন পিতৰ আৰু তেওঁৰ ভায়েক আন্দ্ৰিয়। যাকোব আৰু তেওঁৰ ভায়েক যোহন। যাকোব আৰু চিমোন নামৰ আৰু দুজন পাঁচনি আছে। পাঁচনিবিলাকৰ মাজত দুজনৰ নাম হৈছে যিহূদা। এজন হৈছে ঈষ্কৰিয়োতীয়া যিহূদা আৰু আনজনক থদ্দেয় বুলি কোৱা হয়। বাকীকেইজনৰ নাম হৈছে ফিলিপ, নথনেল (বাৰ্থলময় বুলিও কোৱা হয়), মথি আৰু থোমা।

চমৰিয়াৰপৰা ঘূৰি আহি যীচুয়ে প্ৰথমবাৰৰ বাবে এইদৰে ঘোষণা কৰে: ‘স্বৰ্গৰাজ্য ওচৰ হ’ল।’ স্বৰ্গৰাজ্য কি হয় তোমালোকে জানানে? স্বৰ্গৰাজ্য হৈছে ঈশ্বৰৰ চৰকাৰ আৰু এই চৰকাৰৰ ৰজা হৈছে যীচু। তেওঁ স্বৰ্গৰপৰা শাসন কৰিব আৰু পৃথিৱীলৈ শান্তি কঢ়িয়াই আনিব। ঈশ্বৰৰ ৰাজ্যই গোটেই পৃথিৱীখনক এক প্ৰমোদবনলৈ ৰূপান্তৰ কৰিব।

যীচুয়ে ইয়াত লোকসকলক সেই ৰাজ্যৰ বিষয়ে শিক্ষা দিছে। তেওঁ কৈছে: ‘তোমালোকে এইদৰে প্ৰাৰ্থনা কৰা, “হে আমাৰ স্বৰ্গত থকা পিতৃ, তোমাৰ নাম পূজনীয় হওক। তোমাৰ ৰাজ্য হওক। যেনেকৈ স্বৰ্গত, তেনেকৈ পৃথিৱীতো তোমাৰ ইচ্ছা পূৰ হওক।” ’ এই প্ৰাৰ্থনাক ‘প্ৰভুৰ প্ৰাৰ্থনা’ বুলি কোৱা হয়। তুমি সম্পূৰ্ণ প্ৰাৰ্থনাটো মুখস্থ কৰিব পাৰিবানে?

এজনে-আনজনৰ লগত কেনে ব্যৱহাৰ কৰিব লাগে, তাৰ বিষয়েও যীচুয়ে লোকসকলক শিক্ষা দিছে। তেওঁ কৈছে: ‘লোকে তোমালোকক যেনে ব্যৱহাৰ কৰিলে তোমালোকে ভাল পোৱা, তোমালোকেও তেওঁবিলাকক তেনে ব্যৱহাৰ কৰা।’ যেতিয়া কোনোবাই তোমাক ভাল ব্যৱহাৰ কৰে, তেতিয়া তোমাক ভাল নালাগেনে? নিশ্চয়। সেইদৰে আমিও আনৰ লগত ভাল ব্যৱহাৰ কৰা উচিত। প্ৰমোদবনত বাস কৰা লোকসকলে এজনে-আনজনৰ লগত মিলা-প্ৰীতিৰে থাকিব। সেইয়া এক আনন্দৰ পৰিস্থিতি নহ’বনে?