মথিয়ে লিখা শুভবাৰ্তা ৩:১-১৭
৩ তাৰ পাছত যোহন বাপ্তিষ্মা দিওঁতাই যিহূদিয়াৰ অৰণ্যৰ* এলেকালৈ আহিলে আৰু এইদৰে প্ৰচাৰ কৰিবলৈ ধৰিলে,
২ “অনুতাপ কৰা, কিয়নো স্বৰ্গৰাজ্য নিচেই কাষত।”
৩ আচলতে যোহনেই সেই ব্যক্তি হয়, যাৰ বিষয়ে ভৱিষ্যবক্তা যিচয়াৰ যোগেদি এই কথা কোৱা হৈছিল, “শুনা! অৰণ্যত কোনোবাই মাতি আছে, ‘যিহোৱাৰ* পথ তৈয়াৰ কৰা আৰু তেওঁৰ পথ পৰিষ্কাৰ কৰা।’”
৪ যোহনে উটৰ নোমৰ কাপোৰ পিন্ধিছিল আৰু তেওঁ কঁকালত ছালৰ পেটী লগাইছিল। তেওঁ ফৰিং আৰু হাবিৰ মৌ খাইছিল।
৫ তেতিয়া যিৰূচালেম, গোটেই যিহূদিয়া আৰু যৰ্দ্দন নদীৰ আশে-পাশে থকা গোটেই এলেকাৰ লোকসকলে তেওঁৰ ওচৰলৈ যাবলৈ ধৰিলে।
৬ তেওঁলোকে নিজৰ পাপবোৰ সকলোৰে আগত স্বীকাৰ কৰিছিল আৰু যোহনে তেওঁলোকক যৰ্দ্দন নদীত বাপ্তিষ্মা দিছিল।*
৭ যোহনে যেতিয়া বহুতো ফৰীচী আৰু চদ্দূকীবিলাকক বাপ্তিষ্মা লোৱা ঠাইত অহা দেখিলে, তেতিয়া যোহনে তেওঁলোকক কʼলে, “হে সাপৰ বংশবিলাক আহিবলগীয়া ক্ৰোধৰ পৰা পলাবলৈ কোনে তোমালোকক সাৱধান কৰিলে?
৮ সেইবাবে, তোমালোকে অনুতাপ কৰিছোঁ বুলি নিজৰ কামৰ যোগেদি দেখুৱা।
৯ আৰু তোমালোকে এইদৰে নাভাবিবা যে ‘আমি অব্ৰাহামৰ বংশৰ হয়।’ কিয়নো মই তোমালোকক কওঁ যে ঈশ্বৰে এই শিলবোৰৰ পৰা অব্ৰাহামৰ বাবে সন্তান জন্ম দিয়াব পাৰে।
১০ গছৰ গুৰিত কুঠাৰ ৰখা হৈছে, যিবোৰ গছে ভাল ফল নিদিয়ে, তাক কাটি জুইত পেলাই দিয়া হʼব।
১১ তোমালোকে অনুতাপ কৰাৰ কাৰণে মই তোমালোকক পানীত বাপ্তিষ্মা দিওঁ, কিন্তু মোৰ পাছত অহাজন মোতকৈ বহুত শক্তিশালী। মই তেওঁৰ জোতা খোলাৰো যোগ্য নহয়। তেওঁ তোমালোকক পবিত্ৰ শক্তি আৰু জুইৰে বাপ্তিষ্মা দিব।*
১২ তেওঁৰ হাতত শস্য ঝৰা বেল্চা আছে, তেওঁ নিজৰ মৰণা মৰা খলা ভালদৰে পৰিষ্কাৰ কৰিব আৰু ঘেঁহু গোটাই ভঁৰালত ৰাখিব। কিন্তু পটানবোৰ একেৰাহে জ্বলি থকা জুইত জ্বলাই দিব।”
১৩ তাৰ পাছত যোহনৰ পৰা বাপ্তিষ্মা লʼবলৈ যীচুৱে গালীলৰ পৰা যৰ্দ্দন নদীৰ ওচৰলৈ আহে।
১৪ কিন্তু যোহনে এইদৰে কৈ তেওঁক বাধা দিবলৈ ধৰিলে, “মই নিজেই আপোনাৰ হাতৰ পৰা বাপ্তিষ্মা লোৱাৰ প্ৰয়োজন আছে আৰু আপুনি মোৰ ওচৰলৈ আহিছে?”
১৫ তেতিয়া যীচুৱে তেওঁক কʼলে, “এতিয়া এইদৰে হʼবলৈ দিয়া, কিয়নো ঈশ্বৰৰ দৃষ্টিত যি সঠিক আমি সেয়াই কৰা উচিত।” তাৰ পাছত যোহনে তেওঁক বাধা নিদিলে।
১৬ বাপ্তিষ্মা লোৱাৰ পাছত যীচুৱে লগে লগে পানীৰ পৰা ওলাই আহিল, তেতিয়া আকাশ মুকলি হʼল।* আৰু তেওঁ* ঈশ্বৰৰ পবিত্ৰ শক্তিক কপৌৰ* ৰূপত তেওঁৰ* ওপৰত নামি অহা দেখিলে।
১৭ সেই সময়ত স্বৰ্গৰ পৰা মাত শুনা গʼল, “এওঁ মোৰ প্ৰিয় পুত্ৰ, এওঁক মই গ্ৰহণ কৰিলোঁ।”
Footnotes
^ ই এক কম লোকসকল থকা অঞ্চলক বুজায়।
^ অতি. ক৫ চাওক।
^ বা “সম্পূৰ্ণৰূপে পানীত ডুবাইছিল।”
^ অৰ্থাৎ তেওঁ তোমালোকক পবিত্ৰ শক্তিৰে অভিষিক্ত কৰিব আৰু জুইৰে ধ্বংস কৰিব।
^ শব্দকোষ চাওক।
^ হয়তো যোহন হʼব পাৰে।
^ বা “পাৰ।”
^ যীচুৰ।
