ৰোমীয়াসকললৈ ৯:১-৩৩
৯ মই খ্ৰীষ্টত সঁচা কৈছোঁ, মই মিছা কোৱা নাই, কিয়নো পবিত্ৰ শক্তিৰ লগত মিলি মোৰ বিবেকে সাক্ষ্য দিয়ে
২ যে মোৰ হৃদয়ত বহুত দুখ আছে আৰু এনে বেদনা আছে, যি কেতিয়াও শেষেই নহয়।
৩ মই মোৰ যিহূদী ভাইসকলক, যিসকলৰ লগত মোৰ তেজৰ সম্পৰ্ক আছে, তেওঁলোকক সহায় কৰিবলৈ অভিশপ্ত হৈ খ্ৰীষ্টৰ পৰা পৃথক হʼবলৈও সাজু আছোঁ।
৪ এওঁলোক ইস্ৰায়েলী হয়, যিসকলক পুত্ৰ হিচাপে তুলি লোৱা হৈছিল। তেওঁলোককেই মহিমা দিয়া হৈছিল, তেওঁলোকৰ লগত চুক্তি কৰা হৈছিল আৰু তেওঁলোকক নিয়ম আৰু পবিত্ৰ সেৱা কৰিবলৈ দিয়া হৈছিল আৰু তেওঁলোকৰ লগতে প্ৰতিজ্ঞা কৰা হৈছিল।
৫ আমাৰ পূৰ্বপুৰুষৰ পৰাই তেওঁলোক আহিছিল আৰু তেওঁলোকৰ বংশৰ পৰাই খ্ৰীষ্ট আহিল। সকলোৰে ওপৰত শাসন কৰা ঈশ্বৰৰ সদায় মহিমা হৈ থাকক। আমেন।
৬ কিন্তু ইয়াৰ অৰ্থ এয়া নহয় যে ঈশ্বৰৰ বাক্য ব্যৰ্থ হৈ গʼল। আচলতে ইস্ৰায়েলৰ বংশৰ পৰা অহা সকলো লোক সঁচাকৈ ইস্ৰায়েলী নহয়।
৭ অব্ৰাহামৰ বংশৰ হোৱাৰ বাবে তেওঁলোক সকলোৱে সঁচাকৈ তেওঁৰ সন্তান হʼব, এনে নহয়। কিন্তু যিদৰে লিখা আছে, “যি বংশক, তোমাৰ বংশ বুলি কোৱা হʼব, সেয়া ইচহাকৰ যোগেদি আহিব।”
৮ ইয়াৰ অৰ্থ হৈছে যে যিসকল তেজৰ সম্পৰ্কেৰে অব্ৰাহামৰ সন্তান হয়, তেওঁলোক আচলতে ঈশ্বৰৰ সন্তান নহয়। ইয়াৰ পৰিৱৰ্তে, যিসকল ঈশ্বৰৰ প্ৰতিজ্ঞাৰ অনুসৰি তেওঁৰ সন্তান হয়, তেওঁলোককহে অব্ৰাহামৰ বংশ বুলি কোৱা হয়।
৯ কিয়নো ঈশ্বৰে এই প্ৰতিজ্ঞা কৰিছিল, “মই অহা বছৰ এই সময়তে আহিম আৰু চাৰাৰ এটা লʼৰা জন্ম হʼব।”
১০ কিন্তু এই প্ৰতিজ্ঞা কেৱল সেই সময়তে কৰা হৈছিল, এনে নহয়। ইয়াৰ পৰিৱৰ্তে যেতিয়া ৰিবেকাই আমাৰ পূৰ্বপুৰুষ ইচহাকৰ যোগেদি গৰ্ভৱতী হৈছিল আৰু তেওঁৰ গৰ্ভত যঁজা সন্তান আছিল, তেতিয়াও ঈশ্বৰে প্ৰতিজ্ঞা কৰিছিল।
১১ সিহঁত জন্ম নহওঁতেই আৰু সিহঁতে ভাল বা বেয়া কাম নকৰাৰ আগতেই ঈশ্বৰে এই প্ৰতিজ্ঞা কৰিছিল যাতে বাছনি কৰা কাম ঈশ্বৰৰ উদ্দেশ্যৰ অনুসৰি হয়, মানুহৰ কামৰ অনুসৰি নহয়। ঈশ্বৰে যিজনক বিচাৰে, তেওঁকেই বাছনি কৰে।
১২ ঈশ্বৰে ৰিবেকাক কৈছিল, “ডাঙৰজন সৰুজনৰ দাস হʼব।”
১৩ যিদৰে লিখাও আছে, “মই যাকোবক প্ৰেম কৰিলোঁ, কিন্তু এচৌক ঘিণ কৰিলোঁ।”
১৪ তেনেহʼলে আমি কি কʼম? ঈশ্বৰে অন্যায় কৰে নে? কেতিয়াও নহয়!
১৫ কিয়নো তেওঁ মোচিক কৈছিল, “মই যিজনক, দয়া দেখুৱাব বিচাৰোঁ, তেওঁক দয়া দেখুৱাম আৰু যিজনক কৰুণা কৰিব বিচাৰোঁ, তেওঁক কৰুণা কৰিম।”
১৬ তেনেহʼলে ঈশ্বৰে কাক বাছনি কৰিব, এয়া মানুহৰ ইচ্ছাৰ ওপৰত আৰু তেওঁৰ পৰিশ্ৰমৰ ওপৰত নিৰ্ভৰ নকৰে।* ইয়াৰ পৰিৱৰ্তে ঈশ্বৰৰ ওপৰত নিৰ্ভৰ কৰে, যিজনে দয়া দেখুৱায়।
১৭ কাৰণ শাস্ত্ৰই ফৰৌণৰ বিষয়ে কৈছে, “মই নিজৰ শক্তি দেখুৱাবলৈ আৰু গোটেই পৃথিৱীত নিজৰ নাম ঘোষণা কৰিবলৈ তোমাক আজিলৈকে জীয়াই ৰাখিছোঁ।”
১৮ গতিকে, ঈশ্বৰে যাক ইচ্ছা কৰে, তাৰ ওপৰত দয়া দেখুৱায় আৰু যাকে ইচ্ছা কৰে, তাক কঠোৰ হʼবলৈ দিয়ে।
১৯ কিন্তু এতিয়া তুমি মোক কʼবা, “তেনেহʼলে তেওঁ মানুহক এতিয়াও কিয় দোষী কৰে? তেওঁৰ উদ্দেশ্যৰ বিৰুদ্ধে কোনে থিয় হʼব পাৰিছে?”
২০ কিন্তু হে মানুহ, তুমিনো কোন যে ঈশ্বৰক উত্তৰ দিবলৈ তুমি সাহস কৰিছা? নিৰ্মাণ হৈ যোৱা বস্তুৱে নিৰ্মাণ কৰোঁতাজনক কʼব পাৰিব নে “আপুনি মোক এইদৰে কিয় বনালে?”
২১ একে লদা মাটিৰে এটা পাত্ৰ আদৰৰ কামৰ কাৰণে আৰু আন এটা পাত্ৰ সাধাৰণ কামৰ* কাৰণে বনোৱাটো কুমাৰৰ অধিকাৰ নাই নে?
২২ ঈশ্বৰেও দুষ্ট লোকসকলৰ ওপৰত ক্ৰোধ প্ৰকাশ কৰাটো আৰু নিজৰ শক্তি দেখুৱাটো বিচাৰে, তথাপি তেওঁ বহুত ধৈৰ্য্য ধৰে আৰু নিজৰ ক্ৰোধৰ পাত্ৰ অৰ্থাৎ দুষ্ট লোকসকলক সহন কৰিছে, যিসকল বিনাশৰ যোগ্য হয়।
২৩ তেওঁ এয়া কৰাৰ কাৰণ হৈছে যাতে নিজৰ প্ৰচুৰ মহিমা দয়াৰ পাত্ৰক দেখুৱাব পাৰে, যিবোৰক তেওঁ মহিমা পাবলৈ আগৰে পৰা তৈয়াৰ কৰিছে।
২৪ অৰ্থাৎ আমাক যিসকলক তেওঁ কেৱল যিহূদীসকলৰ পৰাই নহয়, কিন্তু ইস্ৰায়েলী নোহোৱা ৰাষ্ট্ৰবোৰৰ পৰাও নিমন্ত্ৰণ কৰিছে।
২৫ এয়া সেইদৰেই হয়, যিদৰে যিচয়াৰ কিতাপত লিখা আছে, “যিসকল মোৰ লোক নাছিল, তেওঁলোকক মই ‘নিজৰ লোক’ বুলি কʼম আৰু যিজনীক মই প্ৰেম কৰা নাছিলোঁ, তেওঁক মই ‘প্ৰিয়’ বুলি কʼম।
২৬ আৰু যি ঠাইত তেওঁলোকক কোৱা হৈছিল, ‘তোমালোক মোৰ লোক নোহোৱা,’ সেই ঠাইত তেওঁলোকক ‘জীৱিত ঈশ্বৰৰ পুত্ৰ’ বুলি কোৱা হʼব।”
২৭ ইয়াৰ উপৰিও, যিচয়াই ইস্ৰায়েলৰ বিষয়ে চিঞৰি কয়, “ইস্ৰায়েলৰ সন্তানসকলৰ সংখ্যা যদিও সমুদ্ৰৰ বালিৰ সমান হয়, তথাপি কেৱল কম সংখ্যক লোকেহে* উদ্ধাৰ পাব।
২৮ কাৰণ যিহোৱাই* পৃথিৱীত থকা লোকসকলৰ বিচাৰ কৰিব আৰু অতি সোনকালে এই কাম পূৰ কৰিব।”
২৯ লগতে যিচয়াই আগতে যিদৰে কৈছিল, “বাহিনীবিলাকৰ যিহোৱাই* আমাৰ কিছুমান বংশক জীয়াই নৰখা হʼলে আমি চদোমৰ নিচিনা হʼলোঁহেঁতেন আৰু আমাৰ অৱস্থা ঘমোৰাৰ দৰে হʼলহেঁতেন।”
৩০ তেনেহʼলে আমি কি কʼম? ইস্ৰায়েলী নোহোৱা ৰাষ্ট্ৰই যদিও ভাল মানুহ হʼবলৈ চেষ্টা কৰা নাই, তথাপি ঈশ্বৰে তেওঁলোকক ভাল মানুহ বুলি গণ্য কৰি আছে, কিয়নো তেওঁলোকৰ বিশ্বাস আছে।
৩১ কিন্তু ইস্ৰায়েলে নিয়মৰ অনুসৰি ভাল মানুহ হʼবলৈ চেষ্টা কৰিলে, তথাপি তেওঁলোকে সম্পূৰ্ণৰূপে নিয়ম পালন কৰিব নোৱাৰিলে।
৩২ কাৰণ কি আছিল? তেওঁলোকে বিশ্বাসেৰে নহয়, কিন্তু নিজৰ কামৰ যোগেদি ভাল মানুহ হʼবলৈ চেষ্টা কৰিলে। “যি শিলে উজুটি খোৱায়, সেই শিলত” তেওঁলোকে উজুটি খালে।
৩৩ যিদৰে লিখাও আছে, “চোৱা! যি শিলে উজুটি খোৱায়, সেই শিল আৰু যি শিলাই আঘাত কৰে, সেই শিলা মই চিয়োনত থৈছোঁ, কিন্তু যিজনে তাৰ ওপৰত বিশ্বাস কৰে, তেওঁ নিৰাশ নহʼব।”
Footnotes
^ আক্ষ., “যি ব্যক্তিয়ে ইচ্ছা কৰে বা যি ব্যক্তিয়ে দৌৰে, তেওঁৰ ওপৰত নিৰ্ভৰ নকৰে।”
^ আক্ষ., “অনাদৰৰ।”
^ বা “বাকী থকা লোকসকলেহে।”
^ অতি. ক৫ চাওক।
^ অতি. ক৫ চাওক।
