Hebreo-Arameo Arunakat Qellqatanakatsa a Griego Arut Qellqatanakatsa janis ni mä original qellqatas utj-jjchejja, kuntï Isaías 40:8 qellqatan siski uka arunakajj cheqäskapuniwa. Ukhamajj jichhürunakan utjkistu uka Bibliajj hebreo, arameo, griego arunakan qellqatäkäna uka pachpa yatichäwinakaniwa, Diosan amuytʼayatarakiwa sasajj ¿kunatsa confiysna?

Biblia utjaskakiñapatakejja, Diosaw nayra tiempon Hebreo Arut Qellqatanakat copianak lurapjjañapatak mayïna. b Sañäni, Israel markankir reyinakarojja, Leyit copianak lurapjjañapatakiw mayïna (Deuteronomio 17:18). Maysa toqetjja, Diosajj “Leyinakan libro” imapjjañapataki ukhamarak uka Leyinakat markar yatichapjjañapatakiw levitanakarojj mayïna (Deuteronomio 31:26; Nehemías 8:7). Judionakajj Babilonia markar apat uñjasisajj kuttʼanjjapjjäna uka qhepatjja, copianak luririnakata jan ukajj escribanakat mä grupow uñstäna, jupanakajj soferim satäpjjänwa (Esdras 7:6, notanakap liytʼäta). Qhepatjja uka escribanakajj Hebreo Arut Qellqatanakan 39 libronakapat walja copianakwa lurapjjäna.

Escribanakajj wali amuyumpiw uka 39 libronak copiapjjäna, walja maranakaw ukham lurapjjäna. 500 marat 1500 maranakkamajja (Edad Media) judío escribanakat mä grupow copianak lurasipkakïna, jupanakajj masoretanaka satäpjjänwa. Masoretanakajj qellqapkäna uka nayra qellqatajja, Códice de Leningrado satawa, uka qellqatajj 1008, 1009 después de Cristo maranakatawa. 1950 maranakanjja Rollos del mar Muerto sat qellqatanak taypinjja mä 220 qellqatanaka ukhamarak  Biblian jiskʼa qellqatanakapwa (fragmentonakapwa) jikjjatapjjäna. Uka qellqatanakajja Códice de Leningrado sat qellqatat sipansa waranqa maranak jukʼamp nayra luratänwa. Rollos del mar Muerto sat qellqatanakampi Códice de Leningrado sat qellqatampi igualtʼayasajj akaw yatisiwayi: Rollos del mar Muerto sat qellqatanakajj mä jukʼa mayj qellqatäkchisa, janiw yatichäwinakapajj mayjtʼayatäkiti.

¿Griego Arut Qellqatanakan 27 libronakapat kamsaraksnasa? Qalltanjja Jesucriston yaqhep apostolonakapampi nayrïr patak maranakan jakir mä qhawqha discipulonakampiw qellqapjjäna. Ukatjja judío escribanakat yateqasisajj nayrïr cristianonakaw uka libronak copiapjjäna (Colosenses 4:16). Taqe uka copianakjja, yaqhep jaqenakajj qʼal chhaqtayañ munapjjäna, uka jaqenakat maynejj Diocleciano sat romano emperadoränwa. Ukham chhaqtayañsa munapkchïnjja, Biblian jiskʼa qellqatanakapasa nayra qellqatanakasa waranqanakaw jichhürunakan utjaskaki.

Griego Arut Qellqatanakjja yaqha arunakaruw traducipjjarakïna. Bibliat nayrïr traduccionanakajj armenio, copto, etiópico, georgiano, latín, siriaco uka nayra arunakanwa lurasiwayi.

Biblian nayra qellqatanakapat copiaskäna ukanakajj janiw taqpachajj mä igualäpkiti. Ukhamajj ¿kuntï original qellqatajj siskäna uk kunjamatsa yatsna?

Ak amuytʼañäni, mä profesorajja 100 yateqerinakaruw mä libron mä capitulop copiapjjañapatak mayi. Original capitulotejj chhaqjjaspa ukhajja, uka 100 copianakwa igualtʼayasispa, ukhamat original qellqatajj kamsänsa uk yatiñataki. Inas taqpach yateqerinakajj copiañan pantjasipjjchi, ukampis janiw taqpachanejj mä igualak pantjasipkaspati. Bibliampejj ukhamarakiwa, wali yatjjattʼat jaqenakajj Biblian jiskʼa qellqatanakapampi, Biblian libronakapan nayra copianakapampi igualtʼayasajj copianak luririnakan pantjasitanakapwa amuyapjjaspa, original qellqatanakajj kamsänsa uksa yatipjjarakispawa.

Ukhamajj utjkistu uka Bibliajj kuntï original qellqatanakajj siskäna uka pachpa yatichäwinakaniwa sasajj ¿kunatsa confiysna? William Green sat yatjjattʼat chachajj Hebreo Arut Qellqatanakat akham sänwa: “Nayra qellqatanakatjja janiw yaqha qellqatajj ukham wali sum cheqapar luratajj utjkiti”. Bibliat yatjjattʼat Frederick Bruce chachajja, Griego Arut Qellqatanakata, mä arunjja Nuevo Testamento sasin uñtʼatäkaraki uka qellqatat akham sänwa: “Nuevo Testamenton kunanaktï qellqatäki ukajj cheqapar qellqasitap uñachtʼayañatakejja,  nayra qellqerinakan qellqatanakapat sipansa walja pruebanakaw utji. Uka nayra qellqerinakan qellqatanakapatjja janiw khitis janiw ukhamäkaspati sasin siskaspati” sasa. Ukatjja saskakiwa: “Nuevo Testamentotï yaqha qellqatanakjamäspajja, jilaparte jaqenakajj janiw mä jukʼsa payachasipkaspati” sasa.

Hebreo arut qellqata. Machaq Mundon Jakirinakataki Hebreo Arut Qellqatanaka sat inglés arut Bibliajja (1953-1960), Biblia Hebraica sat qellqatarjam traducitawa, uka Bibliajj Rudolf Kittel chachan luratawa. Uka qhepatjja Biblia Hebraica Stuttgartensia, Biblia Hebraica Quinta uka qellqatanakaw hebreo arut actualizat uñstjje. Uka qellqatanakajj kuntï Rollos del mar Muerto qellqatanakana ukhamarak yaqha nayra qellqatanakan siski ukarjam sum yatjjattʼasin luratawa. Biblia Hebraica Stuttgartensia, Biblia Hebraica Quinta qellqatanakajja, textonakajj Códice de Leningrado qellqatarjam luratawa, yaqha qellqatanakat apstʼatäki ukanakajja notanakar uchatawa, uka qellqatanakat yaqhepajj akanakawa: Pentateuco samaritano, Rollos del mar Muerto, Septuaginta, tárgums, Vulgata, Peshitta. Machaq Mundon Jakirinakataki Bibliajja, Biblia Hebraica Stuttgartensia, Biblia Hebraica Quinta sat qellqatanakarjamaw revisasiwayi.

Griego arut qellqata. 1853 marat 1881 maranakkamajja, Brooke Westcott, Fenton Hort sat yatjjattʼat chachanakajja, griego arut qellqata (texto maestro) wakichtʼañatakejj yaqhep qellqatanakampi Biblian jiskʼa qellqatanakampiw igualtʼayapjjäna. Amuyuparjamajja jupanakajj lurapkäna uka qellqataw kuntï griego arut qellqatajj siskäna uk wali sum qhanañchäna. 1950 maranakanjja, Machaq Mundon Jakirinakataki Biblia Traducirinakajja uka qellqatarjamaw lurawayapjje. Ukatjja papironakan lurat yaqha nayra qellqatanakatsa yatjjatapjjarakïnwa (amuyatajja uka papironakajj 125-300 después de Cristo maranakatawa). Ukat aksarojj walja papironakaw yatjjattʼañatakejj utj-jje. Ukatjja Nestle, Aland chachanakan qellqatanakapasa, Sociedades Bíblicas Unidas ukan qellqatanakapas jichhanakak yatjjatasiwayki ukarjam luratawa, uka qellqatanakat yaqhep qellqatanakaparjamaw aka Bibliajj revisasiwayi.

Uka qellqatanak (textos maestros) uñakiptʼasajja, Griego Arut Qellqatanakan yaqhep versiculonakapajj yaptʼatätapaw amuyasïna, qhepat copianak lurapkäna uka jaqenakaw yaptʼapjjatayna. Uka versiculonakajj nayra tiempon traducit King James Version (Versión del Rey Jacobo), La Biblia del Oso sat Biblianakansa uñstkchejja, janiw hebreo, arameo, griego arunakan Diosan amuytʼayat qellqatanakan uñstkänti. 1550 maratakejja Bibliajj versiculonakar jalanoqatäjjänwa, jilaparte Biblianakajj ukarjam traducitäjjarakïnwa. Jilaparte Biblianakanjja uka versiculonak apsjjapjjänwa, ukatwa numertʼatäkäna uka versiculonakajj chʼusa chʼusak jaytatäjje. Uka versiculonakajj akanakawa: Mateo 17:21; 18:11; 23:14; Marcos 7:16; 9:44, 46; 11:26; 15:28; Lucas 17:36; 23:17; Juan 5:4; Hechos 8:37; 15:34; 24:7; 28:29;  Romanos 16:24. Aka Biblianjja, apsutäki uka versiculonakan mä notaw uchasiwayi.

Marcos capítulo 16:9-20 versiculonakan tukjjatayañataki walja arunakapasa (conclusión larga), Marcos 16:8 versiculon tukjjatayañataki jukʼa arunakapasa (conclusión corta), Juan 7:53-8:11 versiculonakas janiw griego arut original qellqatanakan uñstkänti. Ukatwa uka textonakajj aka Bibliat apsutäjje. c

Biblian yaqhep textonakapajj askichtʼasiwayiwa, kawkïr textonakatï yatjjatatanakatakejj griego arut original qellqatanakarjam cheqapar luratäki ukarjamaw askichtʼasiwayi. Amuytʼañataki, yaqhep nayra qellqatanakarjamajja Mateo 7:13 textojj akham siwa: “Kʼullkʼu punknam mantapjjam, jiwañar apir punkojj wali jachʼawa, thakipas anchorakiwa, waljanirakiw uka punku mantasipki” sasa. Machaq Mundon Jakirinakataki nayra Biblianakanjja janiw “punkojj” sasin siskänti. Ukampis nayra qellqatanakat jukʼamp yatjjatasajja, uka arunakajj griego arut original qellqatanakan uñstatapaw amuyasiwayi, ukatwa aka Biblian uchasiwayjje. Niya ukar uñtasitajj waljaw utji, ukampis ukanakajj jiskʼa cambionakakiwa, janiw Diosan Arupan yatichäwinakap mayjtʼaykiti.