1 Crónicas 10:1-14
-
Saúl reyimpin yoqanakapampin jiwjjatapa (1-14)
10 Ukatjja filisteonakajj Israel contraw nuwasisipkäna. Israelit chachanakajj filisteonak nayraqatat escapjjapjjänwa, waljaniw Guilboa qollun jiwarapjjarakïna.+
2 Filisteonakajj Saúl reyimpiru yoqanakapampirojj jakʼatwa arktapjjäna. Ukatjja filisteonakajj Saúl reyin Jonatán, Abinadab, Malki-Súa+ sat yoqanakaparuw jiwarayapjjäna.
3 Saúl contrajj walpun nuwasipjjäna. Arcomp flechtʼirinakaw jupar uñjapjjäna, ukatsti Saúl reyirojj walpun usuchjapjjäna.+
4 Ukatwa Saúl reyejj armadura apiriparojj akham säna: “Espadam apsusisajj ukamp jiwayita, ukhamatwa uka jan circuncidat* chachanakajj nayar tʼaqesiyasin jan jiwayapkitaniti”+ sasa. Ukampis armadura apiripajj wal ajjsarayasitap laykojj janiw jupar jiwayañ munkänti. Ukatwa Saúl reyejj espada katusin uka patjjar liwjjattäna.+
5 Kunapachatï armadura apiripajj Saúl reyin jiwatätap uñjäna ukhajja, pachpa espadapar liwjjattasaw jiwäna.
6 Ukhamaw Saúl reyisa, kimsa yoqanakapasa, taqe utapankirinakas uka urun jiwarapjjäna.+
7 Kunapachatï israelit soldadonakan escapjjapjjatap istʼapjjäna, Saúl reyimpi yoqanakapampi jiwapjjatap yatipjjarakïna ukhajja, valle toqenkir taqe israelitanakajj markanakap jaytanukusaw escapjjapjjäna. Filisteonakasti jutasaw uka oraqenak katuntasipjjäna.
8 Qhepürusti filisteonakajj kunanakatï jiwatanakan utjkäna ukanak apaririw jutapjjäna, ukhaw Saúl reyimpiru kimsa yoqanakapampirojj Guilboa qollun jiwat uñjapjjäna.+
9 Ukatwa Saúl reyirojj isinakap apsupjjäna, pʼeq apaqapjjäna, armaduraps apasipjjarakïnwa. Ukatjja jupanakajj filisteonakan taqpach oraqeparuw chachanak khitapjjäna, ukhamat kunatï paskäna ukanak idolonakan+ templonakapana ukhamarak markankirinakar yatiyanipjjañapataki.
10 Ukatjja jupanakajj diosapan temploparuw Saúl reyin armadurap uchapjjäna, pʼeqepsti Dagón sat diosan temploparuw chʼakkatapjjarakïna.*+
11 Galaad oraqenkiri taqe Jabés+ markankirinakajj kunsa filisteonakajj Saúl reyin jiwat cuerpopamp lurapjjäna+ taqe ukanak yatisajja,
12 guerran nuwasir taqe chachanakaw sarasin Saúl reyimpin yoqanakapampin jiwat cuerponakap Jabés cheqar apasjjapjjäna. Chʼakhanakapsti Jabés cheqankir jachʼa qoqa* jakʼaruw imtʼjjapjjäna,+ paqallqo urunakaw jupanakajj ayunapjjarakïna.
13 Ukhamaw Saúl reyejj Jehová Dios contra juch lurasajj jiwjjäna, jupajj janiw Jehová Diosan arunakapar istʼkänti,+ jiwatanakamp parliri mä warmiruw jisktʼasirakïna,+
14 Jehová Diosar jisktʼasiñat sipansa. Ukhamaw jupajj* jiwayjjäna, Jesé chachan David sat yoqaparuw jupa lantejj reyit uttʼayjjarakïna.+
Notanaka
^ “Circuncisión” siski uk glosarion liytʼäta.
^ Variante: “kʼutkatapjjarakïna”.
^ Jan ukajja, “árbol”.
^ Ukajja, Jehová Diosat parlaski.
