1 Samuel 2:1-36
2 Ukatsti Anajj akham sasaw oración luräna:
“Chuymajajj Jehová Diosïpanwa kusisi;+Jehová Diosaw chʼam churitu.*
Jan ajjsartʼasaw enemigonakaj contra arsusta,jumajj churkta uka salvacionat wal kusisitaj layku.
2 Jehová Dios, janiw jumjam santo Diosajj utjkiti,janiw jumjam yaqha Diosajj utjkiti,+nanakan Diosaja, jumjam suma uttʼata qarqajj*+ janiw utjkiti.
3 Jan jachʼa jachʼa tukus parlapjjamti;janirak lakamat kuna jiskʼachir arunakas mistpanti,Jehová Diosajj taqe kun yatir Diosätap layku,+jupasti cheqaparjamaw taqe kuns uñakiparaki.
4 Wali chʼamani chachanakan flechtʼañ arconakapajj tukjatawa,jan chʼamaninakasti chʼamaniw tukupjjaraki.+
5 Wali sistʼatäpkäna ukanakajj tʼantʼa laykuw yaqha jaqenakatak trabajipjjañapa,ukampis manqʼat awtjatanakajj sistʼatäjjapjjewa.+
Jan ususir warmisti paqallqo yoqall wawanakaniwa,+walja wawanïkäna uka warmisti sapakëjjarakiwa.*
6 Jehová Diosajj jiwayaspawa, jakayarakispawa;jupaw maynirojj Sepulturar* apaqaspa, jaktayarakispa.+
7 Jehová Diosajj maynirojj pobreruw tukuyaspa, qamiriruw tukuyarakispa;+jupajj jiskʼaruw maynir tukuyaspa, jachʼañcharakispa.+
8 Jupaw humilde jaqerojj laqʼat wayti,juparakiw pobre jaqerojj qhella montonats waysu,*+ukhamat principenakampi qontʼasipjjañapataki,jupanakarojj apnaqerit uttʼayasaw jachʼañcharaki.
Oraqen columnanakapajj Jehová Diosankiwa,+juparakiw uka columnanakjjarojj oraq uchi.
9 Diosaw jupat jan jitheqtir jaqenakan taktʼatanakap imi,+ukampis jan wali jaqenakajj chʼamak sepulturan amuktʼayatäpjjaniwa,+kuna laykutejj mä chachajj janiw pachpa chʼamapampi atipjkaspati.+
10 Jehová Diosaw jupampi nuwasirinakarojj tukjani;*+jupanak contra coleraskani ukhajj alajjpachanakatsa qʼejjo qʼejjonakaw istʼasini.+
Jehová Diosaw oraq tukuykam juzgani,+jupaw reyiparojj chʼam churani,+jupaw ajllitapar chʼamañchani”.*+
11 Ukatsti Elcaná chachajj Ramá markankir utaparuw sarjjäna, wawasti Jehová Diosan serviripäjjänwa,+ Elí sacerdoten uñjataw jupajj servirakïna.
12 Elí chachan yoqanakapajj jan wali jaqenakäpjjänwa,+ janiw Jehová Diosar respetapkänti.
13 Jaqenakajj sacrificiot loqtañataki apanipkäna ukanakat qhawqchʼatï derechopat waktʼkäna uk aptasiñat sipansa, jupanakajj ak lurapjjäna:+ kunapachatï mä jaqejj mä sacrificio loqtkäna ukhajja, sacerdoten serviripaw aycha wallaqeskipan kimsa puntani jachʼa tenedoras aptʼasit jutäna,
14 ukatjja mä fuenteru, pä katuñani phukuru, jachʼa purakan phukuru jan ukajj mä katuñani phukuruw uka tenedor apantäna. Kuntï tenedorampi wayskäna ukjja, sacerdotew jupatak katusïna. Siló markanwa uk lurapjjäna, uka markar sarir taqe israelitanakaruw ukham lurapjjerïna.
15 Ukatjja sacrificiop loqtir jaqejj janïraw sacrificiopan likʼipsa jewqʼeykänti+ ukhaw sacerdoten mä serviripajj jutasin uka jaqer akham säna: “Sacerdoten kankasiñapatak aycha churam. Jupajj janiw qhatit aycha katoqkätamti, chʼoqe aychak katoqätam” sasa.
16 Kunapachatï uka chachajj “nayraqat likʼiy jewqʼeyapjjpan,+ ukatwa kuntï munkta uk apasiskasma” säna ukhajja, sacerdoten serviripajj akham sarakïnwa: “Janiwa, jichpach churita, jan churkitätajja aparämawa” sasa.
17 Ukhamwa servirinakan juchapajj Jehová Dios nayraqatan wali jachʼäjjäna,+ uka chachanakajj Jehová Diosan ofrendap janiw respetapkänti.
18 Samuelojj Jehová Dios nayraqatanwa serviskäna,+ jupajj wawäkchïnsa linot lurat efod*+ isimpi isthapitänwa.
19 Samuelun mamapasti jan manganakani jiskʼa isi lurarapirïna, sapa mara sacrificio loqtañataki chachapamp chika makatirïkäna ukhaw uka isi wawapatak aparapirïna.+
20 Elí sacerdotesti Elcaná chacharusa warmiparusa akham sasaw bendisïna: “Jehová Diosar churkta uka wawa lantejja, Jehová Diosaw jumarojj aka warmi taypi yaqha wawa churätam”+ sasa. Ukatjja jupanakajj utaparuw kuttʼjjapjjäna.
21 Jehová Diosasti Ana warmit amtasïnwa, ukatwa jupajj usuriptäna.+ Kimsa yoqanakani pä phuchanëjjarakïnwa. Jiskʼa Samuelusti Jehová Dios nayraqatan jiltaskakïnwa.+
22 Elí chachajj wali awkëjjänwa, ukampis kuntï yoqanakapajj Israel markar lurapkäna ukanak yatïnwa,+ yoqanakapajj Diosamp jikisiñ carpa*+ mantañawjan serviri warminakamp ikintasipjjataps yatirakïnwa.
23 Jupasti yoqanakaparojj akham sirïnwa: “¿Kunatsa ukhamanak lurasipkakta? Kunanaktï taqe markankirinakajj jumanakat parlapki ukanakajj janiw walïkiti.
24 Wawanaka, jan ukanak lurapjjamti, Jehová Diosan markap taypin kunanaktï jumanakat parlir istʼkta ukajj janiw walïkiti.
25 Mä chachatï yaqha chacha contra juchachasispajja, mayniw Jehová Diosarojj uka chachar yanaptʼañapatak mayirapispa, ukampis mä chachatejj Jehová Dios contra juchachasispajja,+ ¿khitiraki jupatak orarapispasti?” sasa. Ukampis jupanakajj janiw tatapar istʼapkänti, Jehová Diosasti jupanakar jiwayañ amtjjarakïna.+
26 Ukañkamasti jiskʼa Samuelojj jilsuskakïnwa, Jehová Diosasa markankirinakasa jukʼampwa jupar munasipjjäna.+
27 Ukatjja Diosan khitat mä jaqew Elí chachan ukar jutasajj akham säna: “Jehová Diosajj akham siwa: ‘Nayra awkimajj familiapampi* Egipto markan faraonan utapan esclavösipkäna ukhajja, ¿janit jupanakamp qhanpach uñtʼayaskayätjja?+
28 Nayra awkimasti Israelan taqe tribunakap taypit ajllitänwa,+ ukhamat nayaru sacerdotet serviñapataki, nayan altarajan+ sacrificionaka, incienso loqtañapataki,* ukhamarak naya nayraqatan efod isimpi isthapisiñapataki. Nayasti nayra awkimarusa jupat jutirinakarusa israelitanakajj ninamp nakhantayañatak sacrificionak apanirapipkitu uka aychat mä parte apaqasipjjañapatakiw arsuyäta.+
29 ¿Kunatsa jumanakajj utajan loqtaski uka sacrificionaksa ofrendanaksa jiskʼachapjjta?*+ ¿Kunatsa nayat sipansa wawanakamar jukʼamp respetta? ¿Kunatsa jumanakajj markajajj apanki uka suma ofrendanakat apaqasisajj likʼintasipkta?+
30 ”’Ukatwa Israelan Jehová Diosapajj akham arsuraki: “Utamankirinakasa nayra awkiman utapankirinakasa nayarojj servipjjapunitaniwa sasaw arsuyäta”+ sasa. Ukampis jichhajj akham sasaw Jehová Diosajj arsuraki: “Jichhajj janiw ukhamäjjaniti. Nayar jachʼañchirinakarojj jachʼañchäwa,+ nayar jiskʼachirinakarusti jiskʼacharakïwa” sasa.
31 Nayasti chʼamamsa nayra awkiman utapankirinakan chʼamapsa chhaqtayäwa, janiw utamankirinakat ni mä chachas awkiptañkam jakkaniti.+
32 Israel markan taqe kunas sumaruk sarani ukhaw utajan mä enemigo uñjäta,+ janirakiw mä awki jaqejj utaman utjkaniti.
33 Jumat jutiri chacharojj janiw altarajan serviñat apaqkäti, ukhamatwa nayramajj aynachtʼani, wal llakisiyarakïtam,* ukampis utamankirinakatjja jilapartejj jaqenakan espadapampiw jiwarapjjani.+
34 Nayajj cheq parlaskataj yatiñamatakejja aka señal churäma: Hofní, Finehás sat pä yoqanakamajj mä urunak jiwapjjani.+
35 Ukatsti nayatakejj mä confiykaña sacerdote uttʼayasëjja.+ Jupasti kuntï chuymajajj munki* ukarjamaw lurani. Nayawa jupat jutir wawanakaparojj sacerdotet walja tiempotak servipjjañapatak uttʼayäjja, jupaw nayan ajllitajatakejj sacerdotet servipunini.
36 Utamankirinakat jiltʼkani ukanakatjja, kawkïrïpans sacerdotejan ukar jutasaw pagompi mä tʼantʼampi katoqasiñatakejj nayraqatapan altʼasini, ukatsti akham sarakiniwa: “Mirä amp suma, sacerdotet uttʼayita, ukhamat mä jiskʼa tʼantʼa manqʼasiñajataki”+ sasa’”.
Notanaka
^ Variante: “jaqhejj”.
^ Hebreo arunjja, “wañsutäjjarakiwa”.
^ Ukajja, “basura taypits waysu” sasaw jaqokipasirakispa.
^ Ukajja, “Jehová Dios contra nuwasirinakajj wali sustjatäpjjaniwa” sasaw jaqokipasirakispa.
^ “Efod” siski uk glosarion liytʼäta. Apéndice B5 uñjjattʼarakïta.
^ “Diosamp jikisiñ carpa” siski uk glosarion liytʼäta.
^ Hebreo arunjja, “utapampi”.
^ Ukajja, “sacrificionakan jewqʼenakapajj muytas muytas makatañapataki” sasaw jaqokipasirakispa.
^ Jan ukajja, “takichasipjjta”.
^ Jan ukajja, “chuymaman aynachtʼayarakïtam”.
^ Jan ukajja, “kunatï chuymajansa almajansa utjki”.
