2 Juan 1:1-13
1 Naya ancianojja,* ajllit kullakampiru* wawanakapampiruw qellqanipjjsma, nayajj cheqapuniw jumanakar munasipjjsma, janiw nayakejja, jan ukasti cheqa yatichäwinak uñtʼirinakasa taqeniw munasipjjaraktamjja.
2 Cheqa yatichäwinak laykuw jumanakar munasipjjsma, ukajj jiwasan chuymasankiwa, wiñayatakiw chuymasankarakini.
3 Alajjpachankir Dios Awkimpi Jesucristo Yoqapampiw uka cheqa yatichäwinak churistani, munasiñampiw uñjarakistani. Jupanakajj wali munasiñampi, khuyapayasiñampiw uñjapjjestani, sumankañwa churapjjarakistani.
4 Yaqhep wawanakamajj cheqa yatichäwinakarjamaw sarnaqasipki,+ kunjamtï alajjpachankir Awkit mandamientonak katoqktan ukhama, uk yatisajj nayajj wal kusista.
5 Ukatwa jichhajj ajllit kullaka, maynit maynikam munasiñ utjañapatak ruwtʼansma. Janiw mä machaq mandamiento qellqanksmati, jan ukasti qalltatpach utjkistäna ukakwa qellqansma.+
6 Jiwasatejj munasiñanïstanjja, jupan mandamientonakaparjamajj sarnaqaskakiñäniwa.+ Kunjamtï qalltatpach istʼapktajja, uka mandamientojj akawa: jumanakajj munasiñan sarnaqasipkakiñamawa.
7 Aka mundonjja walja engañjirinakaw uñstaski,+ jupanakajja Jesucriston jaqjam jutatap janiw creyipkiti.+ Khititejj uk jan creyki ukaw engañjirisa anticristosa.*+
8 Wal amuyasipjjam, ukhamat kunanak laykutï nanakajj wal trabajipkta ukanak jan chhaqayapjjañamataki, ukhamarak Diosajj wakicharapipktam taqe uka bendicionanak katoqapjjañamataki.+
9 Taqe khititejj Criston yatichäwiparjam jan sarnaqki ukhamarak jan cheqapar yatichki ukajja, janiw Diosan suma uñjatäkiti.+ Khititejj Criston yatichäwiparjam sarnaqki ukajja, Awkinsa Yoqansa suma uñjatawa.+
10 Maynitejj jumanakan ukar jutchi, Criston yatichäwinakapsa jan apankarakchi ukhajja, jan utanakamar katoqapjjamti,+ janirak aruntapjjamsa.
11 Khititejj jupar aruntki ukajja, jan wali luratanakaparuw apoyaski.
12 Jumanakar qellqaniñajj waljaw utjaskitu, ukampis janiw papelar qellqaniñ munapksmati, jan ukasti jumanakan ukaruw jutañ munta, jumanakar uñkattʼasaw parlañ munapjjsma, ukhamat wali kusisitäpjjañamataki.
13 Ajllit kullakaman wawanakapajj aruntanipjjtamwa.
Notanaka
^ Jan ukajja, “jilïr jaqejja”.
^ Griego arunjja, “ajllit mamampiru”. Ukajja, mä congregacionatwa parlarakispa.
^ “Anticristo” siski uk glosarion liytʼäta.
