2 Samuel 23:1-39
23 Akanakaw Davidan qhep qhepa arunakapajja:+
“Jesé chachan David sat yoqapan arunakapa,+kawkïr chacharutï Diosajj jachʼañchkäna,+Jacob chachan Diosapan ajllitapäkarakïna,+Israel markan cancionanakap sum cantirïkäna* uka chachan arunakapa.+
2 Jehová Diosan espiritupajj naya taypiw parläna,+arunakapajj lajjrajankarakïnwa.+
3 Israelan Diosapaw parläna,Israelan Qarqapajj*+ akham sitänwa:
‘Kunapachatï mä apnaqerejj jaqenakar cheqaparjam apnaqki,+Diosar ajjsartʼas apnaqkaraki ukhajja,+
4 jupan apnaqatapajj kunjamtï intejj alwan wal qhantʼanki ukhamawa,+jan kuna qenayanakani alwjamawa.
Kunjamtï jallu pasatat wal qhantʼanki ukhamawa,uka qhanaw pastonaks oraqet jilsuyaraki’+ sasa.
5 ¿Janit nayan familiajajj Diosan nayraqatapan ukhamäkaraki?
Diosasti wiñay pacto nayamp luri,+ukajj suma lurtʼata jan pʼakintkayarakiwa.
Uka pactow nayan salvacionajasa, nayan kusisiñajasa,Diosaw cheqpachans familiaj jiltayani.+
6 Ukampis jan kunatak serviri+ taqe chachanakajj chʼapinakjam apanukutäniwa,uka chʼapinakajj amparampi jan katthapiñjamätap layku.
7 Mä chachan uka chʼapinakar llamktʼañapatakejja,jupajj metalat lurat isimpi ukhamarak lanzan lawapampi armantatäñapawa,ukhamarus uka chʼapinakajj kawkjankkitï uka pachpa lugaranwa qʼala phichkatatäñapa” sasa.
8 Akanakaw Davidan guerran nuwasir chʼamani chachanakan sutinakapajja:+ Joseb-Basébet, jupajj tahkemonita chachänwa,* guerran nuwasiñatak chʼamani kimsa chachanakaruw pʼeqtʼarakïna.+ Mä kutejja Joseb-Basébet chachajj 800 chachanakaruw lanzapamp jiwarayäna.
9 Joseb-Basébet chachjjarusti Dodó+ chachan Eleazar+ yoqaparakïnwa, Dodó chachajj Ahohí chachan yoqapänwa. Mä kutejja filisteonakajj Israel markamp nuwasiñatakiw tantachatäsipkäna, ukhaw Davidamp chikäpkäna uka guerran nuwasir chʼamani kimsa chachanakajj filisteonakar jiskʼachapjjäna, Eleazar chachajj uka taypinkarakïnwa. Uka urunjja Israel markankir chachanakajj nuwasiñat sipansa sarjjapjjänwa,
10 ukampis Eleazar chachajj uka pachpan saytʼasisaw filisteonakar jiwarayäna, amparapan qarjtañapkamaw jupajj filisteonakar jiwarayaskakïna, ukampis amparapajj janiw espadap antutkänti.+ Uka urunsti Jehová Diosaw israelitanakar atipjayäna.*+ Ukatsti soldadonakajj Eleazar chachan qhepapwa kuttʼapjjäna, ukhamat kunanakatï jiwatanakan utjkäna ukanak aparaniñataki.
11 Eleazar chachjjarojj Agué sat hararita chachan Samá yoqapänwa. Filisteonakajj kawkjantï mä lenteja yapojj utjkäna ukjanwa Lehí sat cheqan tantachtʼasipjjäna, ukatwa soldadonakajj filisteonakat escapjjapjjäna.
12 Ukampis Samá chachajj uka pachpa oraqer saytʼasisaw filisteonakar jiwarayaskakïna, janirakiw jupanakarojj uka oraqe katuntaykänti, ukhamatwa Jehová Diosajj israelitanakar atipjayäna.*+
13 Kunapachatï cosecha tiempökäna ukhajja, 30 pʼeqtʼirinakat kimsa chachanakaw Adulam+ sat qollu pʼiyar Davidan ukar saraqapjjäna. Filisteonakan mä tropapajj Refaím+ vallenwa campamentopankaskäna.
14 Davidajj imantasiñ cheqankaskänwa,+ filisteonakan campamentopajj Belén markankaskarakïnwa.
15 Ukapachaw Davidajj akham säna: “Belén markan punkup jakʼan utjki uka uma estanquen umap mä jukʼaks umtʼirista, nayajj walpun kusisirista” sasa.
16 Uk istʼasasti guerran nuwasir chʼamani kimsa chachanakajj filisteonakamp nuwasisaw uka campamentopar mantapjjäna, ukatjja Belén markan punkup jakʼan utjki uka uma estanquetwa um waysupjjäna. Uka umsti Davidan ukaruw apapjjarakïna, ukampis jupajj janiw uka um umtʼañ munkänti, antisas Jehová Diosatakiw uka um wartäna.+
17 Davidajj akham sänwa: “¡Jehová Dios Tata, nayan uk lurañajajj janipuniw walïkaspati! ¿Kunjamaraki nayajj niyapun vidap aptʼasipki uka chachanakan wilap umtʼiriststi?”+ sasa. Ukatwa jupajj uka um jan umtʼañ munkänti. Ukanakwa guerran nuwasir chʼamani kimsa chachanakajj lurapjjäna.
18 Yaqha kimsa chachanakarojj Zeruyá+ warmin Abisái+ sat yoqapaw pʼeqtʼarakïna, jupajj Joab chachan jilapänwa. Mä kutejja Abisái chachajj 300 chachanakaruw lanzapamp jiwarayäna, jupajj guerran nuwasiñatak chʼamani kimsa chachanakjam wali uñtʼatarakïnwa.+
19 Abisái chachajj pʼeqtʼkäna uka kimsa chachanakat sipans wali aytat jaqëkchïnsa, janiw guerran nuwasiri chʼamani mayni kimsa chachanakjamäkänti.
20 Jehoiadá chachan Benaya+ sat yoqapajj jan ajjsariri chachänwa,* jupajj walja musparkañ luräwinakwa Cabzeel+ markan luräna. Jupaw Moab toqenkir Ariel chachan pä yoqanakaparojj jiwarayäna, juparakiw khununtaskir urun mä estanquer mantasajj mä leonar jiwayäna.+
21 Jupaw wali jachʼa mä egipcio jaqerojj jiwayarakïna. Uka egipcio jaqejj amparapan mä lanzanïkchïnsa, Benaya chachajj mä lawampikiw uka egipcio jaqemp nuwasiñatak jakʼachasïna. Ukatsti egipcion amparapat lanza aparasajj uka pachpa lanzapampiw jupar jiwayäna.
22 Taqe ukanakwa Jehoiadá chachan Benaya yoqapajj luräna, guerran nuwasir chʼamani kimsa chachanakjam wali uñtʼatarakïnwa.
23 Jupajj 30 chachanakat sipans wali aytatäkchïnsa, janiw guerran nuwasir chʼamani mayni kimsa chachanakjamäkänti. Ukampirus Davidajj jupar uñjiri guardianakapar pʼeqtʼañapatakiw uttʼayäna.
24 Joab chachan Asahel+ jilapas 30 chachanak* taypinkarakïnwa, Belén markankir Dodó+ chachan Elhanán yoqapasa,
25 Samá sat harodita chachasa, Elicá sat harodita chachasa,
26 Hélez+ sat paltita chachasa, Iqués sat tecoíta chachan Irá+ sat yoqapasa,
27 Abí-Ézer+ sat anatotita+ chachasa, Mebunái sat husatita chachasa,
28 Zalmón sat ahohíta chachasa, Maharái+ sat netofatita chachasa,
29 Baaná sat netofatita chachan Héleb sat yoqapasa, benjaminitanakan Guibeá markankiri Ribái sat chachan Ittái yoqapasa,
30 Benaya+ sat piratonita chachasa, Gaas+ sat jawiranak toqenkir Hidái chachasa,
31 Abí-Albón sat arbatita chachasa, Azmávet sat bar-humita chachasa,
32 Eliahbá sat saalbonita chachasa, Jasén chachan yoqanakapasa, Jonatán chachasa,
33 Samá sat hararita chachasa, Sarar sat hararita chachan Ahiam yoqapasa,
34 maacatita jaqen Ahasbái yoqapan Elifélet sat yoqapasa, Ahitofel+ sat guilonita chachan Eliam sat yoqapasa,
35 Hezró sat carmelita chachasa, Paarái sat arbita chachasa,
36 Zobá toqenkir Natán sat chachan Igal yoqapasa, Baní sat gadita chachasa,
37 Zélec sat ammonita chachasa, Naharái sat beerotita chachasa, jupajj Zeruyá warmin Joab sat yoqapan armadurap apirïnwa,
38 Irá sat itrita chachasa, Gareb sat itrita+ chachasa,
39 Urías+ sat hitita chachasa. Taqpachanejj 37 chachanakäpjjänwa.
Notanaka
^ Jan ukajja, “chuymar purtʼkir cantirïkäna”.
^ Variante: “Jaqhepajj”.
^ Jan ukajja, “Hacmoní chachat jutirïnwa”.
^ Jan ukajja, “salväna”.
^ Jan ukajja, “salväna”.
^ Hebreo arunjja, “jan ajjsarir chachan yoqapänwa”.
^ Niyakejjay 30 jila chachanakan sutinakapajj listan uñstchejja, “30 chachanak” sasajj waljanit parlañatakiw aytasispa.
