Isaías 2:1-22
2 Amoz chachan Isaías yoqapajja akwa Judá ukhamarak Jerusalén markanakat mä visionan uñjäna:+
2 tukuya urunakanjja,*kawkjantï Jehová Diosan utapajj jikjjataski uka qollojja,taqe qollunakat sipansa jukʼamp jachʼäniwa, suma uttʼayatarakïniwa,+lomanakat sipansa jukʼamp jachʼäniwa,uka qollurusti taqe markanakaw sarapjjani.+
3 Walja markanakaw sarapjjani, akham sapjjarakiniwa:
“Jutapjjam, Jehová Diosan qollupar makatapjjañäni,Jacobun Diosapan utapar makatapjjañäni.+
Diosajj thakinakapatwa yatichistani,jiwasasti thakinakapanwa sarnaqarakiñäni”+ sasa.
Kuna laykutejj Sionatwa leyejj* mistuni,Jerusalenatwa Jehová Diosan arupajj misturakini.+
4 Jupaw markanak taypin juezäni,kunanakatï walja markanak taypin jan walïki ukanakjja jupaw cheqañchani.
Markanakajja espadanakap aradon rejanakaparuw tukuyapjjani,lanzanakapjja jusinakaruw* tukuyapjjarakini.+
Markanakajja janiw yaqha markanak contrajj espada aytjjapjjaniti,janirakiw jukʼampejj guerran nuwasiñatak yateqjjapjjaniti.+
5 Jacobut jutir wawanakapa, jutapjjam,Jehová Diosan qhanapan sarnaqapjjañäni.+
6 Diosay, jumajja Jacobut jutir wawanakaparuw apanuktajja,+kuna laykutejja jupanakajj inti jalsu toqenkir markanakan walja costumbrenakaparjamaw sarnaqjjapjje.
Filisteonakjamaw jupanakajj magia lurapjje,+jupanak taypinjja extranjeronakan walja wawanakapaw utj-jjaraki.
7 Jupanakan markapajj qollqempi qorimpi phoqantatawa,wali valorani yänakapas* waljapuniwa.
Jupanakan markapajj caballonakampi phoqantatawa,carronakapas waljapunirakiwa.+
8 Jupanakan markapajja jan kunatak servir diosanakamp phoqantatawa.+
Pachpa amparanakapamp lurapki ukanakaruw jupanakajj altʼasipjje,pachpa lukʼananakapamp lurapki ukanakaruw jupanakajj altʼasipjje.
9 Ukhamaw jaqenakajj altʼasipjje, humillasipjjaraki,jumajj janipuniw jupanakarojj perdonkasmati.
10 Qarqa* pʼiyanakar mantapjjam, laqʼar imantasipjjam,kuna laykutejj Jehová Diosan colerasiñapajj wali ajjsarkañawa,jupajj wali chʼaman Diosarakiwa.+
11 Jachʼa jachʼa tukurinakajja pʼeqenakapwa altʼasipjjani,wali wali tukur jaqenakas jiskʼachatäpjjarakiniwa.
Uka urunjja Jehová Diosakiw jachʼañchatäni.
12 Kuna laykutejj ejercitonakan Jehová Diosapan urupawa.+
Diosan uka urupajja taqe jachʼa jachʼa tukuri jaqenak contra wali wal tukur jaqenak contraw jutaski,taqe jaqenak contraw jutaski, importante jaqenak contra, jan yäqat jaqenak contraw jutaski,+
13 uka urunjja Líbano qollunakankir taqpach jachʼa cedro qoqanakaw* tinkupjjani,Basán toqenkir taqpach roble qoqanakaw tinkupjjani,
14 taqpach jachʼa qollunakajj tukjatäpjjaniwa,taqpach jachʼa lomanakas pampa tukuyatäpjjaniwa,
15 taqpach jachʼa torrenakasa taqpach jachʼa murallanakas allthapitäpjjaniwa,
16 Tarsis toqenkir taqpach barconakas jiskʼa jiskʼa tʼunjatäpjjaniwa,+taqpach suma barconakas jiskʼa jiskʼa tʼunjatäpjjaniwa.
17 Jachʼa jachʼa tukur jaqejj jiskʼachatäniwa,wali wal tukur jaqenakajj jiskʼachatäpjjarakiniwa.
Uka urunjja Jehová Diosakiw jachʼañchatäni.
18 Jan kunatak servir diosanakajj qʼala chhaqtayatäpjjaniwa.+
19 Jaqenakajj qarqanakan* pʼiyanakaparuw mantapjjani,oraqen pʼiyanakaparuw mantapjjarakini,+kuna laykutejj Jehová Diosan colerasiñapajj wali ajjsarkañawa,wali chʼaman Diosarakiwa,+kunapachatï oraqer wali ajjsarañat khatatiyañatak jupajj sartaskani ukhaw ukajj pasani.
20 Uka urunjja qollqeta qorita lurat jan kunatak serviri diosanakaparuw jaqenakajj aptapjjani,jupanak nayraqatan altʼasiñatak lurapkäna uka diosanakaparuw aptapjjani,ukatjja kawkjantï musaraña* sat animalanakasa murciélago sat animalanakas jakapki uka cheqaruw jaqtjjapjjani,+
21 ukhamat qarqa* pʼiyanakar mantañataki,jachʼa qarqa taypinakan imantasiñataki,kuna laykutejj Jehová Diosan colerasiñapajj wali ajjsarkañawa,wali chʼaman Diosarakiwa,kunapachatï oraqer wali ajjsarañat khatatiyañatak jupajj sartaskani ukhaw ukajj pasani.
22 Aleq jaqerojj jan confiyjjapjjamti,jaqejj jiwirikiwa.
¿Kunatarak maynejj jaqer confiyañapäspasti?
Notanaka
^ Jan ukajja, “qhepa urunakanjja”.
^ Jan ukajja, “yatichäwejj”.
^ Jan ukajja, “segaderanakaruw”.
^ Jan ukajja, “cosasanakapas”.
^ Variante: “Jaqhe”.
^ Jan ukajja, “arbolanakaw”.
^ Variante: “jaqhenakan”.
^ Uka jiskʼa animalajj achakur uñtasitawa.
^ Variante: “jaqhe”.
