Jeremías 18:1-23
18 Jehová Diosajj akham sasaw naya Jeremiasarojj sitäna:
2 “Sañunak luririn utapar saraqam,+ ukanwa nayajj jumamp parläjja” sasa.
3 Ukatwa nayajj sañunak luririn utapar saraqayäta, jupasti sañunak luririn tornopampiw trabajiskäna.
4 Ukampis ñeqʼet luraskäna uka phukojj janiw sañunak luririn amparapan waltʼjjänti. Ukatwa sañunak lurirejj kunjamtï munkän ukarjam yaqha phuku luräna.
5 Ukatsti Jehová Diosajj akham sitänwa:
6 “‘Israelitanaka, ¿janit nayajj kunjamtï aka sañunak lurirejj lurki ukham lurapkirisma?’, sistwa naya Jehová Diosajja. ‘Israelitanaka, kunjamtï ñeqʼejj sañunak luririn amparapankkejja, ukhamarakiw jumanakajj nayan amparajankapjjtajja.+
7 Nayatï mä markaru jan ukajj mä reinor* jikʼinukuñata, tinkuyañata, tukjañata parlä,+
8 ukatsti contra parlkayäta uka jan walinaktï uka markajj apanukjjani ukhajja, uka markar jan waltʼäwi apayañ amtkayäta uka amuyuj mayjtʼayjjäwa.+
9 Ukampis nayatï mä marka jan ukajj mä reino* saytʼayañata ayruntañata* parlä,
10 ukatsti uka markajj kunatï nayatak jan walïki uk lurani, janirak nayar istʼkitani ukhajja, kuna sumtï jupanakatak lurañ munkayäta uka toqet janiw pachpa amuyjjäti’.
11 ”Mirä amp suma, jichhajj Judá markankir chachanakarusa Jerusalenan jakirinakarusa, akham sañamawa: ‘Jehová Diosajj akham siwa: “Nayajj mä jan waltʼäwi jumanakatak wakichaskta, kunjamsa jumanakar castigapjjerisma uk amuytʼaskarakta. Mirä amp suma, jan wali thakinakamat kuttʼanjjapjjam, thakinakamsa luratanakamsa askichapjjam”+ sasa’”.
12 Ukampis jupanakajj akham sapjjänwa: “¡Ukajj inamayakiwa!+ Nanakajj kuntï amtapkta ukarjamaw sarnaqapjjäjja, jan istʼasiri jan wali chuymanakajarjamaw sarnaqapjjarakëjja”+ sasa.
13 Ukhamasti Jehová Diosajj akham siwa:
“Mirä amp suma, jumanak pachpa yaqha markanak taypin jisktʼapjjam.
¿Khitis ukar uñtasit istʼi?
Israelan phuchapajj mä jan walpun luri.+
14 ¿Líbano toqenkir qollu parkinakan qarqanakapat* khunojj chhaqtiti?
Jan ukajj ¿wali jayat jutir chʼuchʼu umanakach wañsuspa?
15 Ukampis markajajj nayat armasjjewa.+
Jupanakajj jan kunatak serviri diosanakaruw sacrificionak loqtapjje,*+chachanakarojj thakinakapan lanktʼasiyapjje, nayra thakinakapana,+ukhamat jan pampachata jan nivelata* thakinakar saranukupjjañapataki.
16 Ukhamasti jupanakan oraqenakapajj wali ajjsarkañaruw tukuni.+
Jaqenakajj uka oraqe uñjasajj jiskʼachasaw khuyusipjjani.+
Taqe khititejj uka cheq paskani ukajj wali musparataw uñchʼukini, pʼeqepsa khiwirakiniwa.+
17 Jupanakarojj inti jalsu toqet jutir thayar uñtatwa enemigo nayraqatan anatatäjja.
Jupanakan jan waltʼäwi urupansti, jupanakar uñtañat sipansa maysaruw uñtäjja”.+
18 Jupanakajj akham sapjjänwa: “Jutapjjam, Jeremías contra arustʼasiñäni,+ kuna laykutejj sacerdotenakasan leyipasa,* yatiñan chachanakan ewjjtʼapasa, profetanakan arunakapasa janiw chhaqtkaniti. Jutapjjam, jupa contra parlañäni,* janirak kuntï jupajj parlki ukar istʼapjjañäniti” sasa.
19 Jehová Dios Tata, istʼakitaya.
Kuntï enemigonakajajj parlapki uk istʼakimaya.
20 ¿Kunatï walïki ukarojj jan walimpit kuttʼayasispa?
Jupanakajj vidaj apaqañatakiw mä pʼiya allsupjje.*+
Kunjamsa nayraqataman saytʼatajj jupanakat sumanak parlayäsma uk amtakimaya,ukhamat colerasiñamajj jupanakat apaqtjjañapataki.
21 Ukhamasti wawanakaparojj manqʼatjam jiwarañapatak jaytam,jupanakarojj espadan chʼamapar katuyam.+
Warminakapajj wawanakaps chachanakaps aptʼasipjjpan.+
Chachanakapajj mä jan wali usumpi jiwarapjjpan,wayna chachanakapas espadampi guerran jiwarapjjpan.+
22 Jupanakan artʼasipjjatapajj utanakapatpach istʼaspan,mä akatjamat jupanakan ukar saqueyjirinak khitkäta ukapachajja.
Kuna laykutejj nayar katuntañatakiw mä pʼiya allsupjje,*kayunakajatakejj trampanak uchapjjaraki.+
23 Ukampis juma Jehová Diosajja,nayar jiwayañatak arustʼasitanakap sum yattajja.+
Janikiy jupanakan pantjasitap perdonamti,janikiy juchanakap juma nayraqatat chhaqtayamti.
Juma nayraqatan lanktʼasipjjañapatak jaytam,+wali colerasiñaman jupanakar castigkäta ukapachana.+
Notanaka
^ Jan ukajja, “gobiernor”.
^ Jan ukajja, “gobierno”.
^ Variante: “mallkintañata”.
^ Variante: “jaqhenakapat”.
^ Jan ukajja, “jan lurata”.
^ Jan ukajja, “sacrificionak jewqʼeyapjje”.
^ Jan ukajja, “yatichäwipasa”.
^ Hebreo arunjja, “lajjrasamp usuchjañäni”.
^ Variante: “jatʼsupjje”.
^ Variante: “jatʼsupjje”.
