Jeremías 2:1-37
2 Jehová Diosajj akham sitänwa:
2 “Saram, Jerusalén markarojj akham sasin yatiyanim: ‘Jehová Diosajj akham siwa:
“Nayajj sum amtasiskta, jumajj tawaqökasin munasiñampi jan jaytjasiñampiw nayar uñjirïstajja,+nayamp casarasiñatak parlatäjjayäta ukhajj nayar munasitamwa uñachtʼayistajja.+
Kunjamsa jumajj wasaran nayar arkirïta,jan yapuchat oraqena, uks amtasiraktwa.+
3 Israelajj Jehová Diosatakejj santönwa,+ cosechapat nayrïr achunakapänwa” sasa’.
‘Kawkïritejj jupar usuchjkäna ukajj juchañchatänwa.
Jan waltʼäwiw jupanakjjar jutarakïna’, siw Jehová Diosajja”.+
4 Jehová Diosan arup istʼapjjam, Jacob chachat jutirinakampi,Israel markan taqe familianakapampi.
5 Jehová Diosajj akham siwa:
“¿Kunan pantjasitajsa nayra awkinakamajj nayan uñjapjjäna,+ukhamat nayat wali jayar jitheqtapjjañapataki,ukhamarak jan kunatak servir idolonakar+ arkasajj jupanak pachpa jan kunatak servirir tukuñataki?+
6 Jupanakajj janiw akham sasin jisktʼasipkänti: ‘¿Kawkinkis Jehová Diosajja,khititejj Egipto oraqet apsunkistu,+khititejj wasara cheq irpankistu,pʼiyanakani chʼusa pampa oraqenak irpankistu,+wali chʼamak waña oraq irpankistu,+jan khitis viajkijan khitis jakki uka oraqenjja?’ sasa.
7 Ukatjja nayajj huertanakani oraqeruw irpanipjjsmajja,ukhamat suma achunakap manqtʼasipjjañamataki, kunatï sumäki ukanakamp kusisipjjañamataki.+
Ukampis jumanakajj oraqejar mantasaw qʼañuchapjjtajja,herenciajsa jan kunatak serviriruw tukuyapjjtajja.+
8 Sacerdotenakajj janiw ‘¿kawkinkis Jehová Diosajja?’ sasin jisktʼasipkänti.+
Khitinakatejj Ley yatichapjjañapäkäna ukanakajj janiw nayar uñtʼapkitänti,awatirinakas naya contraw saytʼapjjäna,+profetanakas Baal+ diosan sutipjjaruw profecianak arsupjjäna,jupanakar jan kunans yanaptʼkäna uka diosanakaruw arkapjjäna.
9 ‘Ukhamasti nayajj mayampiw jumanak contra arsuskakëjja’,+ siw Jehová Diosajja,‘wawanakaman wawanakap contras arsuskakïwa’ sasa.
10 ‘Ukampis jumanakajj kitim sat jaqenakan+ islanakapar sarapjjam, uñjapjjarakim.
Quedar+ markar mä yatiyäwi apayasajj sum amuytʼapjjarakim.
Mä ukhamajj pasänti janicha uk uñjapjjarakim.
11 ¿Mä kutis mä markajj diosanakaparojj jan diosanakäpki ukanakampejj turkiti?
Ukampis pachpa markajaw musparkañ chʼamani Diosätaj kunatï jan servirïki ukanakamp turkitu.+
12 Alajjpachanaka, akanak wali musparañampi uñtapjjam,wal ajjsarañats khatatipjjam’, sistwa naya Jehová Diosajja.
13 ‘Kuna laykutejj pä jan walinakwa markajajj luri:
jupanakajj nayaruw apanukupjjetu, jakañ churir umaru,+jupanakajj estanquenak allsusipjje,*um jan achtʼayiri kʼakʼatatat estanquenaka’ sasa.
14 ‘¿Israelajj mä serviriti? ¿Utan nasiri mä esclavoti?
Ukhamajj ¿kunatsa jupajj katuntat uñjasi?
15 Chʼamani leonanakajj jupa contraw wararipjje.+
Jupanakajj wali jachʼat arnaqasipjje.
Jupan oraqep wali ajjsarañaruw tukuyapjje.
Jupan markanakapajj phichantatawa, janirakiw ni mä jaqes ukan jakjjeti.
16 Nof*+ ukhamarak Tahpanés+ markankir jaqenakas qʼara pʼeqer tukuyañkamaw mururapjjtam.
17 ¿Janit juma pachpajj ukhamar purtʼaskayäta,Jehová Diosamar apanukutam layku,+jupajj thakin irpkayätam ukapachajja?
18 Jichhajj ¿kunatsa jumajj Egiptor sarki uka thak sarañ munta,+ukhamat Sihor* jawiran umanakap umtʼañataki?
¿Kunatsa jumajj Asiria markar sarki uka thak sarañ munta,+ukhamat Éufrates jawiran umanakap umtʼañataki?
19 Jumarojj jan wali luratamaw cheqañchañapa,kutkatasitamaw jumarojj toqenoqañapa.
Yateqam, kunja jan walisa kunja llakkañasa+Jehová Diosamar apanukuñajja.
Jumajj janiw nayarojj ajjsarkistati’,+ sistwa naya Taqe Kunjjar Munañani Dios Tatitojja, ejercitonakan Jehová Diosapa.
20 ‘Nayajj nayra tiempotpach yukum jiskʼa jiskʼa tʼunjayäta,+cadenanakams tʼaqararakiyätwa.
Ukampis jumajj “janiw jumar sirvkämati” sasaw sistajja,kuna laykutejj jumajj jachʼa lomanakansa jachʼa qoqa* jakʼanakansa,+winktʼataw mä prostitutjam qʼañunak luraskayätajja.+
21 Jumarojj suma ajllit wila uvasjam ayrusiyäsmajja,*+ suma jathat jilsuri.
Ukhamajj ¿kunjamatarak jumajj pampan jiliri yaqha uvas alir tukjjayätasti?’+ sasa.
22 ‘Jumajj álcali jayumpis jareqasiskam, walja lejiampis* jareqasiskam,juman juchamajj naya nayraqatan mä manchäskakiniwa’,+ sistwa naya Taqe Kunjjar Munañani Jehová Dios Tatitojja.
23 ¿Kunjamaraki jumajj ‘nayajj janiw qʼañuchaskti,janiw Baal diosanakarojj adorkti’* sasin sasmasti?
Kunjamsa jumajj vallen sarnaqta uk uñjam.
Kunsa jumajj lurta uk amuytʼam.
Jumajj mä ratuk sariri ankut qachu camellor uñtasitätawa,janis kawksar sarañ yatkaspa ukham uks aks sariri,
24 wasarar yatinoqtat mä salvaje qachu asno,orqonak thaqas mukhiri.
¿Khitis juparojj katusiñ munki ukhajj jarkʼaspa?
Janiw ni mä orqo asnos jupar thaqasajj qarkaniti,katusiñ munkani uka tiempopan* jupar katjapjjani.
25 Jan jumajj jukʼamp tʼijuskakimti, jan ukasti qʼara kayuw tuküta,mallqʼamas wañkatjjarakiniwa.
Ukampis jumajj akham sistawa: ‘¡Janiwa! ¡Janiw ukhamäkaniti!+
Nayajj extranjeronakatwa* enamorastjja,+jupanakan qhepap sararakëjja’+ sasa.
26 Kunjamtï mä lunthatajj katjatäsin phenqʼaskejja,ukhamarakiw israelitanakajj phenqʼachat uñjasipjje,jupanakasa, reyinakapasa, principenakapasa,sacerdotenakapasa, profetanakapasa.+
27 Mä qoqarojj* ‘jumaw tatajätajja’+ sapjjewa,mä qalarusti ‘jumaw mamajätajja’ sapjjarakiwa.
Ukampis nayar uñkatañat sipansa kutikipstapjjewa.+
Jan waltʼäwejj jupanakjjar jutani ukhajj akham sapjjaniwa:
‘¡Jutam, salvapjjeta!’+ sasa.
28 Jichhasti ¿jumatak luraskta uka diosanakajj kawkinkapjjesa?+
Jupanakajj jutapjjpanaya, ukhamat puedipjjchi ukhajj jan waltʼäwi horasamat jumar salvañataki,kuna laykutejj Judá marka, juman diosanakamajj markanakamar uñtat waljapunëjjewa.+
29 ‘¿Kunatsa jumanakajj naya contra quejasisipkakta?
¿Kunatsa taqe jumanakajj naya contra saytʼasipjjta?’,+ sistwa naya Jehová Diosajja.
30 Nayajj inamayakiw wawanakamarojj castigta.+
Jupanakajj janiw nayan cheqañchäwij katoqasipkiti.+
Jumanakan pachpa espadanakamaw profetanakamar manqʼanti,+wali colerat leonar uñtasita.
31 Aka tiempon jakir jaqenaka, Jehová Diosan arunakap amuytʼapjjam.
¿Israel markatakejj mä wasararut tuktjja,jan ukajj wal llakisiyiri chʼamak oraqeruch tuktjja?
¿Kunatsa nayan markajajj ‘nanakajj librëjjapjjtwa,janiw mayampis juman ukar kuttʼanipkäti’ sasin sapjje?+
32 ¿Mä virgen tawaqojj adornonakapat armasispati?
¿Mä noviajj pechor uchasiñ fajapat* armasispati?
Ukampis nayan markajajj wali jaya tiempow nayat armasjje.+
33 ¡Ay warmi, jumajj wali amuyumpiw jumar munir chachanak thaqtajja!
Juma pachpaw jan wali thakinakan sarnaqañatakejj yatichastajja.+
34 Juman isinakamas jan juchani pobrenakan wilapampi manchatawa,+janis jupanakarojj wali chʼamampi utamar mantir uñjkstjja,jupanakan wilapajj taqpach isimankiwa.+
35 Ukampis jumajj ‘janiw nayajj juchanïkti.
Diosajj nayatak colerasitap apjtayasjjpachawa’ sistawa.
Jichhajj nayaw jumarojj juicior apäma,‘janiw nayajj juch lurkti’ satam layku.
36 ¿Kunatsa maysar maysar saranukutam janis kunäkaspa ukham uñjta?
Jumajj Egiptot phenqʼasirakïtawa,+kunjamtï Asiria markat phenqʼaskayäta ukhama.+
37 Ukatwa jumajj amparanakamas pʼeqemar uchat mistüta,+kuna laykutejj Jehová Diosaw khitinakarutï jumajj confiykta ukanakarojj apanuku,jupanakajj janiw jumarojj nayrar sartayapkätamti” sasa.
Notanaka
^ Variante: “jatʼsusipjje”. Jan ukajja, “kʼutsusipjje”. Inas ukanakajj qarqaru (jaqheru) luratächïna.
^ Jan ukajja, “Menfis”.
^ Ukajja, Nilo sat jachʼa jawirat saraqer yaqha jawirat parlaski.
^ Jan ukajja, “árbol”.
^ Variante: “mallkiyäsmajja”.
^ Jan ukajja, “jabonampis”.
^ Jan ukajja, “yupaychkti”.
^ Hebreo arunjja, “phajjsiparuw”.
^ Jan ukajja, “yaqha markankir diosanakatwa”.
^ Jan ukajja, “arbolarojj”.
^ Jan ukajja, “casarasiñatak cintapat”.
