Jeremías 30:1-24
-
Wasitat sumar tukuyañampit qollatäñampit promesanaka (1-24)
30 Jeremiasajj aka arunakwa Jehová Diosat katoqäna:
2 “Israelan Jehová Diosapajj akham siwa: ‘Kunanaktï nayajj sisksma taqe ukanak mä libror qellqañamawa.
3 Kuna laykutejj “urunakajj jakʼachasisinkiwa”, sistwa naya Jehová Diosajja, “ukapachaw nayajj preso katuntatäpki uka Israel markajampir Judá markajampir tantachtʼäjja”,+ sistwa naya Jehová Diosajja, “ukatsti nayra awkinakapar churkayäta uka oraqeruw jupanakarojj mayamp kuttʼayanjjarakëjja, uka oraqejj wasitat jupanakankjjarakini”’”.+
4 Jehová Diosajj aka arunak Israel markampir Judá markampirojj parläna.
5 Jehová Diosajj akham siwa:
“Nanakajj wal sustjasiñat arnaqasitanakwa istʼapjjta.
Wali sustjasiñaw utji, janiw sumankañajj utjkiti.
6 Mirä amp suma, jisktʼasipjjam, ¿mä chachajj ususispati?
Ukhamajj ¿kunatsa chʼamani chachanakajj amparanakamp purakap kattʼasipjje,mä ususir warmir uñtata?+
¿Kunatsa ajanunakajj qʼellur tukjje?
7 ¡Llakkañäniwa! ¡Wali sustjaskañ* urüniwa!+
Janiw ukham urojj utjkiti.
Jacobutakejj wali llakisiñ tiempöniwa.
Ukampis nayaw jupar salväjja”.
8 “Uka urunsti”, sistwa ejercitonakan naya Jehová Diosapajja, “nayajj kunkamankir yuku pʼakjäjja, payaruw lazonakam* tʼaqjarakëjja. Janiw extranjeronakajj* mayampis jupar* esclavor tukuyapkaniti.
9 Markajajj Jehová Diosapampir David reyipampiruw cheqpachans servipjjani, juparuw nayajj jupanakatak saytʼayäjja”.+
10 “Nayar serviri Jacob, jumajj jan ajjsarayasimti”, sistwa naya Jehová Diosajja,“Israel, janirak wal sustjasimti.+
Jumarojj jaya lugarat salväma,juman wawanakamarojj kawki oraqentï preso katuntatäpki uka oraqet salvarakëjja.+
Jacobojj kuttʼanjjaniwa, tranquilokïniwa, jan kuna llakini,janirakiw khitis jupar sustjkaniti”.+
11 “Kuna laykutejj nayaw jumampïskta”, sistwa naya Jehová Diosajja, “jumaru salvañataki.
Kawkïr markanakarutï nayajj anatatksma taqe uka markanakarojj qʼal tukjäjja,+ukampis jumarojj janiw tukjkämati.+
Kawkikamatï wakiski ukhakamaw jumarojj cheqañchäma,janiw jan castigonejj jaytkämati”.+
12 Kuna laykutejj akham siw Jehová Diosajja:
“Juman* jan waltʼäwimajj janiw qollañjamäkiti.+
Janiw heridamajj qollañjamäkiti.
13 Janiw quejam khitis arjjatkaniti,janiw llagamajj* qollañjamäkiti.
Janiw jumajj qollañjamäktati.
14 Juman wal munirinakamajj taqeniw jumat armasjjapjje.+
Janiw jumarojj jukʼamp thaqjjapjjtamti.
Kuna laykutejj mä enemigor uñtataw jumar nuwantsmajja,+Mä qhoru* jaqer uñtataw jumar castigsmajja,juman wali juchanïtamata, walja juchanak luratam layku.+
15 ¿Kunatsa jan waltʼäwimat arnaqasta?
¡Llakimajj jan qollkañawa!
Juman wali juchanïtamata, walja juchanakanïtamatwa+nayajj uk lursma.
16 Ukhamasti jumar tukjapktam taqe ukanakajj tukjatäpjjarakiniwa,+taqe enemigonakamaw yaqha markar preso apatäpjjani.+
Jumar lunthatirinakajj lunthatatäpjjarakiniwa,taqe khitinakatï jumar saqueyjapktam ukanakarojj saqueyjat uñjasiyarakëjja”.+
17 “Ukampis nayaw kʼumarachjjäma, heridanakams qollarakïmawa”,+ sistwa naya Jehová Diosajja,“jumarojj janis katoqañ munapkstam, akham sasas sutichapkstam:
‘Jan khitins thaqat Sion’ sasa”.+
18 Jehová Diosajj akham siwa:
“Nayajj Jacobun carpanakaparuw kuttʼanëjja, preso katuntatäpki ukanakaruw tantachtʼäjja,+tabernaculonakapat sinttʼasirakïwa.
Markasti pachpa jiskʼa qollupanwa mayampi saytʼayatäni,+jachʼa torrejj lugarapar saytʼayatarakïniwa.
19 Jupanakatsti yuspärañatak cancionanakampi larusitanakampiw mistuni.+
Jupanakarojj waljaptayäwa, janiw jukʼakïpkaniti.+
Jupanakarojj waljaniruw tukuyäjja,*janiw jukʼakïpkaniti.+
20 Jacobun wawanakapajj nayra tiemponjamäniwa,nayaw jupanakarojj naya nayraqatan chʼamani markar tukuyäjja.+
Nayaw jupan taqe tʼaqesiyirinakaparojj castigäjja.+
21 Jupan apnaqeripajj pachpa jaqenakap taypitäniwa,jupa taypitwa jupan apnaqeripajj mistuni.
Nayaw jupar jakʼachasiyanëjja, jupasti nayarojj jakʼachasirakitaniwa”.
“Janitï ukhamäkaspajja, ¿khitirak nayarojj jan ajjsaras jakʼachasitaspasti?”, sistwa naya Jehová Diosajja.
22 “Jumanakajj nayan markajäpjjätawa,+ nayasti jumanakan Diosamarakïyäwa”.+
23 Jehová Diosan colerasiñapajj mä jachʼa thayjamaw mistunini.+
Mä thaya tutukaw muytas muytas jan wali jaqenakan pʼeqepjjarojj saraqanini.
24 Jehová Diosan colerasiñapajj janiw apjtkaniti,kuna amtanakatï chuymapan utjki ukanak phoqasiyañkama, lurañkama.+
Qhepa urunakanwa jumanakajj sumpach uk amuyapjjäta.+
Notanaka
^ Hebreo arunjja, “Jachʼa”.
^ Hebreo arunjja, “chinuñanakam”.
^ Jan ukajja, “yaqha markankirinakajj”.
^ Jan ukajja, “jupanakar”.
^ “Juman” sasinjja, Sionat parlaski.
^ Jan ukajja, “ulceramajj”. Ukajja llejjtir uñtasitawa.
^ Variante: “phiru”.
^ Ukajja, “jachʼañchäwa” sasaw jaqokipasirakispa.
